Lik - 2013 WBT (NT) Non Drama

Lik - 2013 WBT (NT) Drama

Sik nirya daulamika ani, aminyan talak ara, Yesus ara, ‘Yahudi yala ninye arye, Yerusalem mutuku kwalipnamakak ara, na ton binune’ tenen, Galilea tam batakuka, Yerusalem mutuku welebiyuk. Ara, Yerusalem asik domikce, bisik dana-dana nirya ara, weik keil poka domikce, tonok buplan potopdeiyamik sukum ara, el si Domba Bublan potokdeiamik. Abuplan dam mekwen ton deiamuk. Amekwen si ara, Betesda mekwen nyalamik. Amekwen sirya dana-dana tam, ninye bulubuka bunak ati antanapdongamek, aik arum atonun ning pamubarye domik. Amekwen dana-dana aik arum domikak ara, uk dilamuk ninye weik delilyangalamikba, malamik. Aninye ara, asing kun nang ap, yok kwanilamuk ninye ap, yan ap taruk ap dipnarye lulukmankum ulamik nang ap, bisik kum binmanto ninye ap dobuka delilyanabuk, asukumuk malamik.
Amekwen damuk anyuk ninye, sikuk din ninye malilyangalamik deiyok ara aubuk. Ara, asum ton, asum ton Allah el im deice pil don nang, malaikat arye, amekwen deice yanuka mek bol pipmanbuk, amekwen lulukuka lonting-lonting anopura, minopce amek kwen wekelbinanye bira, minopce kwetepdeipnaba, adiparyuk teleb kilamuk. Yata yalauk do nirya, amekwen minopce wekelbinanye bira, eluk dilamuk ning, adiparyuk kum danalamuk. ‘Winipsutue’ tenen, auk dilamuk ninye, Betesda mekwen dam bobuka delilyangalamik.
Yesus arye, amekwen dam biyukce, tonoknye keting tamun yupa weik 38 tahun deice arye bisik binmanto kum ulamuk ati, amekwen dam bukmokba, Yesus arye anye bira eibuk. Yesus anye biti eibukce, asipdeyukba, aunmek nang arye anye bira eluk talilamuk ning lak nyabikura, Yesus arye anye biti asipdeyuk. “Amio, anda, ‘Allah arye kwetepdeipnute’ tenen, dipkoprop patanmakil do?” nyabuka asipdeyuk.
Asipdeyukura, bisik kum binmantonye birye tamubuka nyabuk. “Kume, naio, malaikat amekwen deice yakce talak ara, na nong erebuka mekwen pum bisik dongolbana ati, na melin nang kum anya arye, na ikin arye, ‘Mekwen wekel binun’ tenen, nimalye arye pirinmanye talak ara, yuk nang arye bisibuka minopce mekwen pum wekelbanyake. Ati, na minopce kum wektinye,” nyabuk. Nyabukura, Yesus arye anye biti nyabuk. “An tiklyame. Tikmince an amsuna dobuka, yan yanibuka bisik banulyame,” nyabuk.
Yesus arye ayupu nyabukopura, anye bira adiparyuk kwetepdeibukba, teleb ubuk. Teleb ubukura, tikmokce el amsuna dobuka, yan yanibuka bisik banmok. Yesus arye aik bunanye kwetepdeibuk sum ara, sik Yahudi yala ninye arye, Allah el si erena ati, talye pil dona kumce, dikdik selamik sum, Sabat sum nyalamik.
Asum ara, sik pil dona kum sum anya arye, Yahudi yala nang arye, Yesus kwetepmoknye biti nyabik. “Arup ara, Sabat sum anya arye, Musa arye sekamuk yupu nyasilye touk, pil kum doptume. Ati an amsuna bobuka banmalama ara, pil dona atonun unmalama ati, anda malye wininmalame,” nyabik.
Sikce nyabikba, anye birye tamubuka nyabuk. “Bukni, na kwetepdeipmanilanye birye, ‘An amsuna bobuka bilyame,’ nyapmanila ati wininmane,” nyabuk. Nyapmok ati sikce asipdeyik. “Amio, arup anye birye, ‘An amsuna bobuka bilyame,’ nyanmakilnye bira, yatanye birye ayupu nyapmakil do? Elda yatanye ulul do?” nyabuka asipdeyik. Nyabuka asipdeyik bukni, Yesus kweteipmoknye birye, ‘Anye bira el si ani’ tenen, moubuka kum bikmoka ati, talye yupu tunimapmok. Anye bira kum bikmoka ara, Yesus arye elti, kwetepmokce, awekmek ninye yupa weik unmeka noutamak arye binmoka anya arye, kwetepmoknye birye, Yesus el si kum bikmok.
Aminyan ara, Yesus arye Yahudi ninye, Allah si erelamik aik, weik aik dam biyukce, akwetepmoknye eipdarik. Epdarikce, Yesus arye anye biti nyabuk. “Ura, wini talak akunum kwetepmakinabuk, teleb unmalama anya arye, malye winina ap, malye tenena ap nirya ara bataklyame. Kumopura, mince aikuk bulalum ning ara, mitik ikin bukni, aminyan kanye imun upnamkil ning ara, weik mambul weik upnamkile.” Yesus arye nyabuk. Nyabukura, anye birye amutuku Yahudi yala nang, sik deiyok nang dam biyukce, “Kwetepmanilnye bira, el si ara Yesus,” nyabuka lak nyalbiyuk.
Laka nyalbiyukura, sik Yahudi deiyok nang arye, ‘Se, Yesus arye nun pil dona kum sum, Sabat sum arye, ninye kwetena ap, aning atonun ning ap winilula ati, aning nirya pil dona atonun anya arye, elda malye,’ tenelamikce, Yesus el nong deice ikin ning weik delilamik.
Sik utenelamik bukni, Yesus arye sikti, nyabuk. “Na ni Allah ara, batakna kumce, tuba-tuba pil dolula anya arye, na babye atonun tuba pil donauk unamne,” nyabuk. Nyabuka ati ara, amutuku Yahudi yala deiyok nang arye yu ubukba, ‘Yesus optibye’ tenen, patalamuk. Deiyok ara, Yesus arye sik pil dona kum sum, Sabat sum pil atonun ning winilamuka ati tenelamik. Aning ara mambul bukni, weik mambul tenelamik ning ara Yesus arye, “Na Ni Koprop Allah,” nyabuk deice arye, sikce, ‘Se, anye bira, “Nara, Allah ulye touk unune. Nun ansinibuka unyame,” nyalule. Anyalul yupu ati ara, pia malye ubuka, Allah yanina atonun ulule,’ tenebik. Utenebik ati, ‘Yesus ara, wenebuka optibye,’ tenelamik.

Tonda, Yesus arye elti, yuk anye bopmek nang, sik Yahudi yala ninye sik deiyok nang ati, ayupu nyabuk.
Pia dipkoprop yupu nyapsine. Nun ni koprop Allah arye winilul ning nirya ara, el Mi Koprop babye aninguk winilule. Ati, Allah el Mi Koprop, el bidamnang, pil tonok ning babye, el yuk kum doptue. EL Li Koprop Allah pil dolul ninguk eiplirye, apiluk dolula ati nyapsine.
Ara, talya ati kum nyapsine. Deiyok ara, Allah arye el Mi Koprop ati, kanye arilula anya arye, elce pil dolye ning nirya ara, ‘Na mi biknamnil’ tenen, kiklipdeliba, el mi arye elilula anya arye, el li koprop pil dolye touk, el babye atonun pil dolule. Na pil donmanbuk, eipmanulum ning ara, mitik mambul bukni, Allah arye weik mambul ning arepnilibuk, ninye kum winipmanto ning ton pil dopnebuk, eipmunyopura lukdanamlume. Ayupu ara talye ati kum nyapsine. Ara, Allah arye akunum diamikce ninye, kam bukuka delilamle touk, el Mi Koprop arye el kanye delilul ninye ati ara, elcuk tenelul touk, kam una deiyok ning ariliba, pia kam unamake.
Aninguk kum bukni, nun ni koprop Allah arye ninye mutuku-mutuku nirya ati, ‘Anang ara teleb bukni, anang ara malye wininyak’ tenen, yupu kum bokolisulule. Elce yupu bokolina deiyok pil ara, el Mi Koprop deice akunum deibuk ati, el mi aryuk, ninye yupu bokolisilirye, malye nang ati wenelule. Teleb nang ati dekna arisulule. Allah arye amambul pil dobuka, el Mi Koprop ati aribuka deiyok ara, ‘Ninye mutuku-mutuku nirya, nati si erebuka, na si kilamniayak atonun, na Mi Koprop ati atonun, si erebuka el si kipnamake’ tenen, yupu bokolina deiyok pil ara, el mi koprop ati aribuk. Ati, yata ninye do nirya, Allah el Mi Koprop ati si erebuka, el si kum kinyak ninye ara, wininyaka deice arye, Allah el babye ati si erebuka, el si kum kinyake. Yesus arye sik Yahudi yala deiyok nang ati nyabuk. Yesus arye ayupu nyabukce, ayupu dukdongobuka nyabuk.
Na dipkoprop yupu nyapsine. Yata ninye do nirya, na yupu kekebikirye, na dopdeipnuknye Allah ati, dib tenebiceura, akunuma, adiparyuk kam pia una deiyok ning doprobikirye, kam pia unamake. Sirya talak ara, Allah arye aninye wenebuka kum opnamle. Ara, diba tenena ninye ara, sikce diamikce ninye tam batakuka, kam pia unamak ninye tam akunum kilonyaka ati nyapsine. Dib yupu nyapsine. Aminyan talak mambul talak yanamle. Tonda wini talak akunum deiyok koupmasile. Atalak ara, sik akunum diamik ninye bukni, Allah el Mi Koprop arye el yupu nyapliba, kekebicopura, kam bukuka pia kam unamake.
Aning ara talye kum nyapsine. Deiyok ara, na ni koprop Allah kam una deiyok ning talibuka ulye touk, elce aribukba, el Mi Koprop babye atonun kam una deiyok ning talibuka ulule. Tonda, el Mi koprop ara, Ninye Mi Koprop Atonunye ulula ati, Allah arye ninye ati yupu bokolina deiyok ning dobuka, el mi deice akunum deibukba, el mi arye aning talibuka pil dolulce, ninye ati yupu lipsisikuka bokolisulule.
Ayupu nyapmasina ati ara, lukuldana kume. Aminyan sirya talak ara, nara Ninye Mi Koprop Atonunye birye na yupu nyapnyopura, akunum diamikba, weiamik ninye nirya na yupu kekepnamake. Yesus arye nyabuk. Nyabukopura, ayupu ton dukdongobuka nyabuk. “Atalak ara na yupu kekebiceura, tuku lukamicebuk kam bukikirye, kubuka yanamake. Sik diksukum ulamice ninye ara, kam pia unamake. Bukni, sik malye-malye winilamice ninye ara, kubuka tiknamak bukni, narye Ninye Mi Koprop Atonunye, sikti, yupu lipsisikuka bokipnirye, wenebuka opnamne.
Na Yesus ara, na tenepnye touk tonok pil babye, na yuk kum donune. Na ni koprop arye nyanilye touk, kekepnirye yupu bokolisunune. Na aryuk kanye delinun ninguk tenebuka, pil kum donune. Aning kum bukni, na dopdeipnuknye, el kanye delilul ning uk, el tenelul touk wininune. Aninguk wininuna anya arye, yupu bokolisununa nirya ara, dipkoprop teleb kibuka diksukumuk yupu bokolisunune.” Yesus arye nyabuk.

Yesus arye ayupu nyabuk. Narye na bidamnye ati, “Anye bira dipkoprop diksukumnye,” nyabuka, talye nyaplopnyopura, anggunce dib kum tenenamnulume. ‘Elda talye nyanmasile,’ tenepnamnulume. Bukni, yuknye, weik mambulnye birye nati, “Anye bira dipnye,” nyanulule. Na kele, elce nati nyanulul yupu ara, dipkopropuk nyanulule. Talya kume.
Aning atonun, anggunce Yohanes dam ninye dopdeiplumba, nati asipdeyikopura, Yohanes arye dipkoprop yupu akunum nyapsukba, kekeplume. Aning nyapmasina ara, ‘Talye tukwak ninye arye nati nyaninyak yupu ara mambul weik,’ tenen, ati kum nyapsine. Bukni, ‘Yohanes arye nati nyapnuk yupu kekebuka diba teneptumopura, Allah arye lyepsute’ tenen, nyapsine.
Yohanes ara, winipmantonye ulamsuke. Elda, weisa updeibiceura, dirina yiplya arye ninye elilamak touk ulamuk. Winilamukce, el nyalamuk yupu, dirina atonun kibukba, anggunce kanye deibuka, el yupu ara, tia talak ati kekelamlume, nyapsine. Yesus arye nyabuk. Nyabukopura, Yesus arye ayupu ton nyabuk.
Yohanes arye nati nyapnuk yupu ara, mitik mambul ulul bukni, weik mambul ning ton aupmale. Ara, na ni koprop Allah arye, ‘Apil donmalya ani, sirya daknamle’ tenen, arepnuk pil ara tuba donune. Apil dopnyaura, mambul ning weik eipmunyopura, adeice arye, ‘Kume, dipkoprop Allah arye anye bira dib dopdeibukura, yanmasile. Talinye kume,’ tenenamnulume. Aninguk kum bukni, anggun ni koprop Allah dopdeipnuknye bira, elce nati, “Anye dipkopropnye ulule,” nyanulule. Bukni, anggun Farisi nang ara, el nyalye yupu kum kekelulume. Tonda, el nong pia kum elilulume.
Tonda, anggun Farisi nang ara, Allah arye dopdeibuknye ati, dib kum teneluluma anya arye, Allah el yupu ara, kekeplumbuk, anggun kanye talima noutamak tuba kum ulule. Allah arye nyapdeiamukba, seklamik yupu buku nirya ara, anggunce, ‘Kume, ayupu kel bikibirye, moubuka talibibya deice arye, pia kam una deiyok ning dopropnamabe’ tenen, ayupu nirya weik arye, moubuka kel kilulume. Bukni, ayupu seklamik nirya ara, dipkoprop nati lak nyanulul ning ara, moubuka dib kum tenelulume.
Ayupu nirya ara, nati nyalul bukni, anggunce, ‘Kam una deiyok ning dolona ati ara, anye bira Yesus ati, dib kum tenepnamabe. Elda nun lik’ tenen, batakanululume. Nati, dib tenepnutumopura, kam una deiyok ning arepsitinye bukni, dib kum tenenululume. Yesus arye sik Yahudi yala deiyok nang ati nyabuk. Nyabukce ayupu dukdongobuka nyabuk.
Talye nang arye, ‘Kanye deipnamsil’ tenen, “Anda telebe,” nyaninyak yupu ara, kum kekenune. Anggun Yahudi yala deiyok nang ara, anggun winilulum ning ara akunum kel bikamsise. Na kele. Anggun kanye talima noutamak ara, Allah ati, dipkoprop kanye kum delilulume. Elti ara, dipkoprop dib kum tenelulume. Nara, na ni koprop Allah, el si deice arye yase bukni, anggunce, ‘Yesus ara dipnye ulule’ kum tenenululume. Bukni, yuk talinye bira, el bidamnye si deice aryuk yatopura, anggunce, ‘Elda dipnye’ tenen, dib tenepnamlume.
Anggunce, anggun bidamnye ati, “Nunda teleb ninyeuk unyabe,” nyabuka si erelamunce, kanye talima erelalulume. Winilulum bukni, ‘Allah ara el tonok ululnye birye kanye deipsutu’ tenen, el tenesilye ninguk diksukumuk winibibyeura, Allah arye, ‘Teleb tenenamsile,’ tenebuka kum winilulume. Winimunce, malye-malyeuk winimunyopura, yata wiribuka dib tenepnutum do? Kume, kum winiptume.
Bukni, ‘Sirya talak ara, Allah el dam welebibyopura, Yesus arye yupu bokeipsilirye, wenepnamsile’ tenena kume. Narye kume. Anggunce, ‘Musa sekeipsuk yupu talibibya deice arye, Allah lyepnamsile’ tenen, Musa el yupu atibuk anggun kanye talima delilulume. Ati el Musa arye sekamuk yupu deice arye, Allah arye anggunti yupu lipsisikuka bokeipsilirye, wenepnamsile.
Dipkoprop nyapsine. Musa arye nati sekamuka ati, anggunce Musa sekamuk yupu ati, dipkoprop dib teneptumopura, nati dib tenepnutume. Ara Musa sekamuk yupu noutamak arye, nati sekamuka ati nyapsine. Bukni, anggun winimunya ara, na kele. Musa arye sekamuk yupu ara, anggunce dib kum teneluluma anya arye, yata wiribuka na nyapsinye yupu ati, dib teneptum do? Kume, dib kum tenenamnulume. Yesus arye el nong deice ikin ning delilamik nang, Yahudi yala deiyok nang ati ayupu nyabuk.

వినండి Yohanes 5