If you have would like a copy of this version please contact info@davaraudiobibles.org

The Gofa Bible, CC-BY-SA-4.0, The Word for the World International and The Word for the World Ethiopia. (Text). Gofa Audio Bible, CC-BY-SA-4.0, Davar Partners International, 2018. (Audio).

ጌሻ ማፃፋ

The Word for the World International and The Word for the World Ethiopia

ሄ በሳን ሺቅዳ ሻንጎት ኡባይ ደንድድ የሱሳ ጵላፆሳኮ ኤፍዶሶና። “ሀ ኡራይ ኑ አሳ ባለሽን፥ ካዋስ ጊራ ጊሮና መላ ድግሽንነ፥ ቃስ ‘ታኒ ክርስቶሳ ህንተ ካዋ’ ያግሽን ደምዳ” ያግድ ሞትዶሶና።
ጵላፆስ የሱሳ፥ “ኔኒ አይሁደታ ካዎ?” ያግድ ኦይችስ።
የሱሲ፥ “ኤ፥ ነ ግዳይሳ መላ” ያግስ።
ጵላፆስ ካህነ ሀላቃታኮነ አሳኮ፥ “ሀ ኡራ ቦላ ታኒ እስ ባላካ ደማብከ” ያግስ። ሽን ኤንቲ፥ “ሀ ኡራይ ጋልላፐ ዶምድ ሀይሳ ጋካናዉ ይሁዳ ኩመ ኢታባስ ደንስ” ያግድ ምን ኦድዶሶና።
ጵላፆስ ሄሳ ስእዳ ዎደ የሱሲ ጋልላ አሴኮ ኤራናዉ ኮይድ እያ ኦይችስ። የሱሲ ሄሮዲሳ ቢታፈ ይዳ አስ ግደይሳ ጵላፆስ ኤርዳ ዎደ ሄሮዲስ ሄ ዎደ የሩሳላመን ደእያ ግሾ እያኮ የድስ።
ሄሮዲስ የሱሳ በአናዉ ዳሮ ዎደፐ ኮይሸ ደእያ ግሾ፥ እያ በእዳ ዎደ ዳሮ ኡፋይትስ። አይስ ጊኮ፥ እያባ ስእዳ ግሾ ማላልስያባ ኦን በአናዉ አሞትሸ ደኤስ። ሄሮዲስ የሱሳ ዳሮ ኦይሾታ ኦይችስ፥ ሽን እ አይኮካ ዛርቤና። ካህነታ ሀላቃትነ ህገ አስታማረት ያን ኤቅድ ምንድ እያ ሞቶሶና። ሄሮዲሳራነ እያ ዎታዳረታራ የሱሳ ካዶሶናነ ለቅስዶሶና። ቦንቾ አፍላ ማይዝድ ጵላፆሳኮ ዛሪድ የድዶሶና። ሄሮዲሳራነ ጵላፆሳራ ካሰ ሞርከሽን ሄ ጋላስ ዎላ ጊግዶሶና።
ጵላፆስ ካህነ ሀላቃታ፥ አሳ ሃረይሳታነ አሳ ፄግድ፥ “ ‘ሀ ኡራይ አሳ ጌላተስ ደንስ’ ግድ ታኮ ኤህደታ። ታካ ህንተ ስንን ፕልጋዳ ህንተ ሺሽዳ ሞቱዋስ አይብ ባላካ ደማብከ። ሄሮዲስ፥ ሄሳ አይብ ባላካ እያ ቦላ ደምቦና ግሾ ኑኮ የድስ። ቱማካ ሀ ኡራይ ሀይቆስ ጋያ አይብ ባላካ ኦቤና። ሄሳ ግሾ፥ እያ ጋራፋዳ ብላ የዳና” ያግስ። ሄሳ እ ግዳይ ፓስካ ባኣለ ዎደ እስ አስ ኤንታዉ ብላናይስ እያዉ አቶናባ ግድያ ግሾሳ።
ደረይ ኡባይ እስ ቦላ፥ “ሀ ኡራ ገደ ድጋ፥ ኑስ ባርባና ብላ” ያግድ ዋስዶሶና። ባርባን ካታማ ግዶን አሳ ኢታባስ ደንድ አሰ ዎድ ቃሸትዳ አስ።
ጵላፆስ የሱሳ ብላናዉ ኮይድ አሳስ ዛር ኦድስ። ግዶሽን፥ አሳይ፥ “ካቃ! ካቃ!” ያግድ ዋስዶሶና። ጵላፆስ ሄን፥ “ሀ ኡራይ ቆህዳባይ አይቤ? ዎስ ጋያ ባላ ታ ደማብከ። ሄሳ ግሾ፥ ጋራፋዳ የዳ አጋና” ያግስ።
ኤንቲ ባንታ ቃላ ቁ ኦድ፥ “ካቀታናዉ በሴስ” ግድ ምን ዋስዶሶና። ኤንታ ዋሶይካ ፆንስ። ኤንታ ኦይሻ ግሾ፥ ግድ ጵላፆስ እያ ቦላ ፕርድስ። አሰ ኢታባስ ደንዳይሳነ አሰ ዎድ ቃሸትዳይሳ ብላና መላ ዎስዳ ግሾ ሄ ኡራ ኤንታዉ ብልስ። ሽን የሱሳ ኤንቲ ኮይዳባ ኦና መላ ኤንታዉ አድ እሚስ።


የሱሳ ኦይክድ ኤፍሽን ስሞና ጌተትያ ቀሬና ቢታ አደይ ጋፃረፐ ይሽን፥ ደምድ ማስቃልያ ቶስድ የሱሳ ካልድ ባና መላ ኡንኤዶሶና። ዳሮ አሳይነ ባንታ ትራ እጭሸ ዬክያ ማጫሳት እያ ጉየራ ካሎሶና።
ሽን የሱሲ ኤንታኮ ጉየ ስሚድ፥ “ህንተኖ፥ የሩሳላመ ማጫሳቶ፥ ህንተ ሁጰስነ ህንተ ናይታስ ዬክተፐ አትሽን፥ ታዉ ዬኮፍተ። ‘ሄኮ ማይንት፥ የሎና ኡሎትነ ንና ንት አንጀትዶሶና’ ህንተ ያጋና ጋላሳይ ያና። ሄ ዎደ ደረታ፥ ‘ኑ ቦላ ኩንድተ’፥ ዙማታካ፥ ‘ኑና ካምተ’ ያጋና። ህዛ፥ ቃየ ም ሄሳ ኦኮ መላ ም ዋታንደሻ?” ያግስ።
እያራ ዎናዉ ሀራ ናምኡ ዎራንታ ኤፍዶሶና። ቀራንዮ ጌተትያ በሳ ጋድ ካቅዶሶና። ዎራንታፐ እሱዋ ኡሻቻ ባጋራ ሀንኩዋ ሀድርሳ ባጋራ ካቅዶሶና። የሱሲ፥ “ታ አዋዉ፥ ኤንቲ አይ ኦያኮ ኤሮና ግሾ፥ ኔኒ ኤንታዉ አቶ ያጋ” ያግስ።
ኤንቲ እያ አፍላ ቦላ ሳማ የግድ ሻከትድ ኤክዶሶና።
አሳይ ኤቅድ ፄሎሶና፥ ሽን ደርያ ሃረይሳት፥ “ሀራታ አሽስ፤ ፆሳይ ዶርዳ ክርስቶስ እያ ግድኮ አነ ባና አሾ” ያግድ ለቅስዶሶና። ዎታዳረት እያኮ ሺቅድ፥ ጫላ ዎይነ ኡሻ እምዶሶና። ያትድ፥ “ኔኒ አይሁደታ ካዎ ግድኮ ነ ሁጵያ አሻ” ያግድ ለቅስዶሶና።
እያዉ ሁጰ ባጋራ፥ “ሀይስ አይሁደታ ካዎ” ግያ ፁፈይ ደኤስ። ካቀትዳ ዎራንታፐ እሶይ ጫሸ ሳአራ ጎችሸ፥ “አነ ኔኒ ክርስቶሳ ግድኮ፥ ነናካ ኑናካ አሻ” ያግስ።
ሽን ሀንኮ ዎራንይ፥ “ኔኒ ሀይሳ መላ ፕርዳን ደአሸ ሀር አቶሽን፥ ፆሳስ ያይኪ? ኑኒ ኑ ኦዳ ናጋራ ግሾ በሲያ ፕርዳ ኤኮስ፥ ሽን ሀ ኡራይ እስ ኢታባ ኦቤና” ያግድ ሀንቀትስ።
ቃስካ፥ “የሱሳ፥ ነ ነ ካዎተራ ያ ዎደ ታና ቆፓ” ያግስ።
የሱሲ፥ “ታ ነዉ ቱማ ኦዳይስ፤ ሀች ኔኒ ታራ ጋናተን ግዳና” ያግስ።
ሄ ጋላስ ኡሱፑን ሳተፐ ብድ ኡዱፉን ሳተ ጋካናዉ አዋይ ፖኡዋ ድግዳ ግሾ፥ ቢታ ኡባ ቦላ ማ ግድስ። ፆሳ ኬ ማጋራጆይ ዳከትድ ናምአን ሻከትስ። የሱሲ፥ ቃላ ቁ ኦድ፥ “ታ አዋዉ፥ ታ ታ ሸምፕዉ ነ ኩሸን ሼይስ” ያግድ ሀይቅስ።
ማቶ ሀላቃይ፥ ሀንዳይሳ በእድ፥ “ሀይስ ኡራይ ቱማካ ፅሎ” ያግድ ፆሳ ጋላትስ። ሀ ሀንያባ በአናዉ ሄ በሳ ሺቅዳ አሳ ኡባይ ሀንዳባ በእዳ ዎደ ባንታ ትራ እጭሸ ባንታ ሶ ስምዶሶና። ግዶሽን፥ የሱሳ ማታን ኤርያ አሳ ኡባይ፥ ሄሳዳካ ጋልላፐ ካልድ ይዳ ማጫሳት ሄሳ በእሸ ሃሆን ኤቅዶሶና።
አይሁደ ሻንጎታፐ እሶይ፥ ዮሰፋ ጌተትያ ኡራይ ደኤስ። እ አርማተ ጌተትያ ይሁዳ ካታማፐ ይስ። እ ሎኦነ ፅሎ አስ ግድያ ግሾ ፆሳ ካዎተ ዩሳ ናጌስ። ሻንጎታፐ እሱዋ ግድሸ ኤንታ ዞረተንነ ኦሱዋን ዴና። ሄ ኡራይ ጵላፆሳኮ ብድ፥ የሱሳ አሀ ሞጋናዉ ታዉ እማ ግድ ዎስስ። ጵላፆስ ኤካ ያግን፥ የሱሳ አሀ ዎስድ አፍላራ ፃፅስ። ዛላፈ ዎጭድ ከስዳ ሀራ አስ ሞገቶና ኦራ ዱፎን ዎስ። ሳምባት ገላና ሀንያ ግሾ፥ ሄ ጋላሳይ ጊገተ ቃማ።
ጋልላፐ ደንድድ የሱሳ ካልድ ይዳ ማጫሳት ዮሰፋራ ብድ እያ አሀ ዋት ሞግያኮ ዱፉዋ አኬክድ በእዶሶና። ያፐ ስሚድ ሽቶነ ቅባተ ጊግስዶሶና። ህገይ ኪተይሳ መላ ሳምባታ ጋላስ ሸምፕ ፔእዶሶና።

వినండి ሉቃሳ 23