 If you would like a copy of this version please contact info@davaraudiobibles.org

Surgujia New Testament, CC-BY-SA-4.0, The Love Fellowship. Surgujia New Testament Audio Bible, CC-BY-SA-4.0, Davar Partners International, The Love Fellowship, 2023.

Surgujia New Testament

SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.

“दोष झिन लगावा, कि तुमन मन पर भी दोष नी लगाल जाही।
काबर कि जे नियर तुमन मन दोष लगाथा, ओहिच नियर तुमन पर भी दोष लगाल जाही; जे नाप ले तुमन नापिहा, ओहिच नियर तुमन बर भी नापल जाही।” तय काबर अपन भाई कर आएख कर तिनका ला देखथस, अउ अपन आएख कर लट्ठा तोला नी सूझे? जब तोर ही आएख मे लट्ठा है, त तय अपन भाई ले कईसे कह सकथस, लान मैहर तोर आएख ले तिनका ला हिकाएल देहू? हे कपटी, आगू अपन आएख ले लट्ठा ला हिकाएल ले, तब तय अपन भाई के आएख कर तिनका ला बड़िया देख के हिकाएल सकबे।
“पवित्र चीज मन ला कूकुर मन ला झिन दा, अउ अपन मोती बरहा मन कर आगू मे झिन दे, एसन झिन होए कि ओमन ओला गोड़ तरी खुईन्द दे अउ फिर पलेट के तुमन ला फाएड़ देही।”


“मान्गिहा, त तुमन ला देहल जाही, ढूढिहा त तुमन पईहा; खटखटईहा, त तुमन बर खोलल जाही। काबर कि जे कोनो हर मांगथे, ओला मिलथे, अउ जे कोनो हर ढूढथे, ओहर पाथे, अउ जे कोनो हर खटखटाथे, ओकर बर खोलल जाथे।”
“तुमन मन मे कोन एसन मैनसे है, कि अगर ओकर बेटा रोटी मान्गही त ओला पखना देही? या मछरी मान्गही, त ओला साप देही? तले जब तुमन बुरा होए के अपन छउवा मन ला बड़िया चीज देहे बर जानथा, त तुमन कर स्वर्गीय दाऊ हर अपन मांगे बाला ला बड़िया चीज काबर नी देही? ये कारन जे कुछ तुमन मन चाहथा कि मैनसे मन तुमन कर संग मे करे, तुमन भी ओकर संग मे ओहिच कस करा; काबर कि मूसा कर ब्यवस्था अउ अगमजानी मन कर शिक्षा एहिच है।”


“सकरा दूरा ले घुसा, काबर कि चाकर है ओ दूरा अउ सहज है ओ डगर जेहर बिनाश कती ले जाथे, अउ ढेरेच झन मन है जेमन मन ओमे ले घुसथे। काबर कि सकेत है ओ दूरा अउ कठिन है ओ डगर जेहर जीवन कती पहुचाथे अउ तनिक झन मन है जे ओला पाथे।”


“झूठ कर अगमजानी मन ले सचेत रहा, जेमन भेड़ मन कर भेष ला धईर के तुमन कर आगू मे आथे, लेकिन पहिचान मे अलगेच ओमन फाड़े बाला भेड़िया है। ओमन मन कर फर ले तुमन ओमन मन ला पहिचाएन लेईहा। का लोग मन झाड़ी मन ले अंगूर, या ऊंटकटार मन ले अंजीर तोड़थे? एहिच नियर हर एक बड़िया रूख हर बड़िया फर लाथे अउ बुरा रूख हर बुरा फर लानथे। बड़िया रूख हर बुरा फर नी लाने अउ न बुरा रूख हर बड़िया फर नी लाने सकही। जे-जे रूख हर बड़िया फर नी लाने, ओहर काएट के आगी मे डाएल देहल जाथे। तले ये नियर ओमन मन कर फर ले ओमन मन ला पहिचाएन लेईहा।”
“जेहर मोर ले, ‘हे प्रभु! हे प्रभु!’ कहथे, ओमन ले हर एक झन हर स्वर्ग कर राएज मे नी घुसे पाही, लेकिन ओहिच हर जेहर मोर स्वर्गीय दाऊ कर इक्छा मे चलथे। ओ दिन ढेरेच झन मन मोर ले कही, ‘हे प्रभु, हे प्रभु, का हमन मन तोर नाव ले अगमजानी नी करेन, अउ तोर नाव ले प्रेत आत्मा मन ला नी हिकालेन, अउ तोर नाव ले ढेरेच अकुन सामर्थ्य कर काम नी करे?’ तब मैहर ओमन ले खुईल के कह देहू, ‘मैहर तुमन ला कभो नी जाने, हे कुकरम करे बाला मन, मोर जग ले चईल जावा।’”


“एकरे बर जे कोनो हर मोर ये गोएठ मन ला सुईन के ओमन ला मानथे, ओहर ओ बुईधमान लोग मन कर नियर ठहरही जेहर अपन घर चट्टान मे बनईस। अउ पानी गिरिस, अउ बाढ़ अईस, अउ आंधी चलिस, अउ ओ घर ले टकरईस, तबो ले ओहर नी गिरिस, काबर कि ओकर नींव ला चट्टान मे डालल गए रहिस। लेकिन जे कोनो हर मोर ये गोएठ मन ला सुनथे अउ ओमे नी रेंगे, ओहर ओ मूर्ख लोग मन के नियर ठहरही जेहर अपन घर बालू मे बनईस। अउ पानी गिरिस, अउ बाढ़ अईस, अउ आंधी चलिस, अउ ओ घर ले टकरईस अउ ओहर गिर के सत्यनाश होए गईस।”
जब यीशु हर ये गोएठ मन ला कह दारिस, त एसन होईस कि भीड़ ओकर उपदेश ले अकचकाए गिन, काबर कि ओहर ओमन कर शास्त्री मन कर नियर नही लेकिन अधिकारी मन कर नियर उपदेश देहत रहिस।

వినండి मत्ती 7