text: copyright The Konta New Testament The Word for the World,  audio: copyright The Konta New Testament ℗ 2018, Davar Partners International 

Ooratsa C’aak’uwa Kontaso Doona

ዬሱሲ ጌሻ ጎሊያፔ ኬሲዴ ቢያ ዎዴ፥ ጌሻ ጎሊያ ዲርሳ ጊዶን ዴዒያ ጎሊያ ቤሳናው ኣ ካሊያዋንቱ ኣኮ ዬዲኖ። ዬሱሲ ዛሪዴ ኡንቱንታ፥ «ሄዋ ኡባ ቤዒቴ? ታኒ ሂንቴንቶ ቱሙዋ ኦዳይ፤ ሃ ጎሌቱዋን ዴዒያ ኢቲ ሹቻይኔ ኣቴናን ኡባይ ኮሌታና» ያጌዳ።


ዬሱሲ ዴብሬ ዛይቴ ጌቴቲያ ዴሪያ ቦላን ኡቲዴዒሺን፥ ኣ ካሊያዋንቱ ባሬንቱ ፃላላ ኣኮ ዪዴ ኣ፥ «ሄዌ ኣዉዴ ሃናኔንቶ፥ ኑሲ ኦዳሪኪ፤ ቃሲ ኔ ዩሳዉኔ ዎዲያ ዉርሴው ማላይ ኣያ ጊዳኔ?» ያጌዲኖ።
ዬሱሲ ዛሪዴ፥ ኡንቱንታ ሃዋዳን ያጌዳ፤ «ሂንቴንታ ኦኒኔ ባሌና ማላ ናጌቲቴ። ኣዪሲ ጎፔ፥ ዳሮ ኣሳይ ታ ሱንን፥ ‹ታኒ ኪሪስቶሳ› ያጊዴ ያና፤ ያቲዴ ዳሮ ኣሳ ባሌና። ማታን ዴዒያ ኦላ ዋሱዋኔ ሃኩዋን ዴዒያ ኦላ ኦዱዋ ሲሳናው ሂንቴንቱ ዴዒታ፤ ሄዋ ማላባይ ሃናናው ቤሲያ ዲራው፥ ናጌቲቴ፤ ሂርጎፒቴ፤ ሺን ዉርሴይ ቢራ። ኣዪሲ ጎፔ፥ ኢቲ ጋዲያ ኣሳይ ሃራ ጋዲያ ኣሳና ኦሌታና፤ ቃሲ ኢቲ ካዉቴይ ሃራ ካዉቴና ኦሌታና፤ ኮሻይኔ ቢታ ቃይ ኡባሳን ዴዓናዋ። ሄዌ ኡባይካ ኮይሮ ኦይ ማላ።
«ኣሳይ ሄ ዎዴ ሂንቴንታ ዋዪሳናኔ ዎናዋ፤ ታ ሱን ዲራው፥ ጋዴ ኡባይ ሂንቴንታ ኢፃናዋ። ሄ ዎዴ ጮራ ኣሳይ ኣማኑዋ ኣጋናዋንታ፤ ባሬንቱ ጊዶን ኢቱ ኢቱዋ ኣዴ ኢማናኔ ኢቱ ኢቱዋ ኢፃናዋ። ቃሲ ዎርዶ ናባቱ ጮራቱ ዴንዲዴ፥ ዳሮ ኣሳ ጪማናዋንታ። ማካላይ ዳሪያ ዲራው፥ ጮራ ኣሳ ሲቁ ኢርፃናዋ። ሺን ዉርሴይ ጋካናው ጌንጪያ ኡራይ ኣታናዋ። ኣሳው ኡባው ማርካ ጊዳና ማላ፥ ካዉቴ ዎንጋላ ሚሺራቹ ሳዓ ኡባን ኦዴታናዋ፤ ሄዋፔ ጉዪያን፥ ዉርሴይ ጋካናዋ።


«ሄዋ ዲራው፥ ናቢያ ዳኔል ኦዴዳ ባሻ ቱናቴይ ጌሻ ሳን ኤቄዳዋ ሂንቴንቱ ቤዓና፤ ሄዌ ዋጊያዌንቶ፥ ናባቢያዌ ኣኬኮ።
«ዪሁዳ ጋዲያን ሄ ዎዴ ዴዒያዋንቱ ዴሪያኮ ኬሲኖ። ጎሊያ ሁጲያን ዴዒያ ኡራይካ ባሬ ሶዪን ዴዒያዋ ኣካናው ዎፖ። ጋዴን ዴዒያዌ ባሬ ማዩዋ ኣካናው ጉዬ ሲሞፖ። ሄ ዎዴ ሻሃራ ማጫዋንቱሲኔ ንያ ማጫዋንቱሲ ኣዬሮ። ባልጉዋን ዎይ ሳምባታን ሂንቴንቱ ቤቴና ማላ፥ ፆሳ ዎሲቴ፤ ኣያው ጎፔ፥ ኣላሚ ሜቶዴፔ ሃቼ ጋካናው ዴዒቤናባይኔ ቃሲ ሃዋፔ ሲንዉካ ኡባ ዴዔና ኢታ ዋዪ ሄ ዎዴ ዴዓናዋ። ፆሳይ ሄ ጋላሳቱዋ ፓይዱዋ ጉያዌ ባዌንቶ፥ ኣሳ ጊዴዳ ኦኒኔ ኣቴና፤ ሺን ኢ ባሬ ዶሬዳ ኣሳቱዋ ዲራው፥ ሄ ጋላሳቱዋ ፓይዱዋ ጉናዋ።
«ሄ ዎዴ ኦኒኔ ሂንቴንታ፥ ‹ቤዒቴ። ኪሪስቶሲ ሃዋን ዴዔ› ዎይ፥ ‹ሄዋን ዴዔ› ያጎፔ ኣዋ ኣማኖፒቴ። ኣዪሲ ጎፔ፥ ዎርዶ ኪሪስቶሳቱኔ ዎርዶ ናባቱ ዴንዳና፤ ያቲዴ ባሬንቶ ዳንዳዬቶፔ፥ ሃራይ ኣቶ ፆሳይ ዶሬዳዋንታካ ባሌናው ዎልቃማ ማላታኔ ማላሊሲያባ ቤሳናዋ። ቤዒቴ፥ ታኒ ሂንቴው ሄዋ ካሴታዴ ኦዳዲ።
«ሄዋ ዲራው፥ ኣሳይ ሂንቴንታ፥ ‹ቤዒቴ፥ ኪሪስቶሲ ባዙዋን ዴዔ› ጎፔ፥ ያ ቦፒቴ፤ ዎይ ሂንቴንታ፥ ‹ቤዒቴ፥ ቆልዖን ዴዔ› ጊንቶካ፥ ኡንቱንቱባ ኣማኖፒቴ። ኣዪሲ ጎፔ፥ ዋልቃንይ ኣዋይፊ ዶሊያ ባጋፔ ዋልቃሚዴ፥ ኣዋይፊ ዉሊያ ባጋ ጋካናው ጶልቁጊያዋዳን፥ ታ ዩሳይ፥ ኣሳ ናዓ ዩሳይ፥ ሄዋዳን ሃናናዋ።
«ባኩታይ ዴዒያሳ ሾርቲ ሺቃና።


«ሄ ዎዴ ዋዪያፔ ጉዪያን፥
ማንዒያን ኣዋይ ማና፤
ኣጌናይ ፖዒያዋ ኣጋናዋ፤
ፆሊንታቱ ሳሉዋፔ ኩንዳናዋንታ፤
ቃሲ ሳሉዋን ዴዒያ ዎልቃቱካ ቃፄታናዋንታ።
ሄ ዎዴ ታ ማላይ፥ ኣሳ ናዓ ማላይ፥ ሳሉዋን ቤታናዋ፤ ሳዓን ሄ ዎዴ ዴዒያ ኣሳ ዛሪ ኡባይ ዬካናዋንታ። ቃሲ ታኒ፥ ኣሳ ናዓይ፥ ዎልቃናኔ ዎልቃማ ቦንቹዋና ሳሉዋፔ ሻሪያ ጊዶና ዪሺን፥ ኡንቱንቱ ቤዓና። ኢ ባሬ ኪታንቻቱዋ ዎልቃማ ማላካታና ኪታና፤ ኪታንቻቱ ኣላሜው ሃ ጋፃፔ ያ ጋፃ ጋካናው፥ ቃሲ ሳዓን ኦይዱ ባጋፔ ኣው ዶሬቴዳ ኣሳ ሺሻናዋ።


«ሌሚሱዋ ባላሳቶ ጌቴቲያ ሚቲፔ ኣኬኪቴ፤ ባላሳታ ኣጪያ ዎዴኔ ኢዚ ሃይይ ቆሌቲያ ዎዴ፥ ቦኒ ማቴዳዋ ሂንቴንቱ ኤራኒታ። ሄዋዳንካ፥ ሂንቴንቱ ሄ ኡባባ ቤዒያ ዎዴ፥ ኢ ማቲዴ ፔንጊያ ሺቄዳዋ ኤሪቴ። ታኒ ሂንቴንቶ ቱሙዋ ኦዳይ፤ ሃ ኡባባይ ሃናና ጋካናው፥ ሃ ዎዲያ ኣሳይ ሃይቂዲጌና። ሳሉኔ ሳዓይ ኣና፤ ሺን ታ ቃላይ ኡባካ ኣና።


«ሺን ሄ ጋላሳኔ ሄ ሳቲያ ኣዉዋ ፃላላፔ ኣቲን፥ ሃራይ ኣቶ ሳሉዋን ዴዒያ ኪታንቻቱዋ ጊዲና፥ ዎይ ታና ናዓ ጊዲናካ ኦኒኔ ኤሪያዌ ባዋ። ታ ዩሳይ፥ ኣሳ ናዓ ዩሳይ፥ ኖሄ ዎዴ ሃኖዋ ማላ ጊዳናዋ። ኣዪሲ ጎፔ፥ ባሻ ሃ ዩሳፔ ካሴ ዎዴ፥ ኖሄ ማርካቢያን ጌሌዳ ጋላሳይ ጋካናው፥ ኣሳይ ሜኔ ኡሼኔ፤ ቃሲ ኣቱማ ኣሳይ ኣኬኔ ማጫ ኣሳይ ኣሲና ጌሌ። ባሻ ሃይ ዪዴ፥ ኡንቱንታ ኡባ ኣፋና ጋካናው፥ ኡንቱንቱ ኣኬኪ ቤይኪኖ፤ ታኒ፥ ኣሳ ናዓይ፥ ዪያ ዎዲ፥ ሄዋ ማላ ጊዳናዋ።
«ሄ ዎዴ ላዑ ኣሳቱ ጋዴን ኦያዋንቱፔ ኢቱዋ ኣፋና፤ ኢቱ ኣታናዋ። ላዑ ማጫዋንቱ ዎፃን ጋጪያዋንቱፔ ኢቲኖ ኣፋና፤ ኢቲና ኣታና።
«ሲሚ ሂንቴ ጎዳይ ኣይ ጋላሲ ያናዌንቶ ሂንቴንቱ ኤሬና ዲራው፥ ናጊ ኡቲቴ። ሺን ካዪሱ ቃማፔ ዎይሳ ዎዲያን ያኔንቶ ጎሊያ ጎዳይ ኤሬዴንቶ፥ ባሬ ጎሊ ቦኬቴና ማላ፥ ቤጎቲዴ ናጊ ኡታናዋ ኤሪቴ። ሄዋ ዲራው፥ ሂንቴንቱካ ጊጊ ኡቲቴ፤ ኣያው ጎፔ፥ ታኒ፥ ኣሳ ናዓይ፥ ሂንቴንቱ ቆፔና ሳቲያን ያና።


«ያቲና፥ ባሬ ሶይ ኣሳው ቁማ ኮሺያ ዎዲያን ኢማና ማላ፥ ኣ ጎዳይ ሱንዳ ኣማኔቴዳ ዎዛናማ ቆማይ ኦኔ? ኢ ሄዋዳን ኦሺን፥ ኣ ጎዳይ ዪዴ ዴሚያ ቆማይ ኣንጄቴዳዋ። ታኒ ሂንቴንቶ ቱሙዋ ኦዳይ፤ ጎዳይ ሄ ቆማ ባሬዋ ኡባ ቦላ ሱንና። ሺን ቆማይ ኢታ ጊዶፔ፥ ‹ታ ጎዳይ ጋሚዒዴ ያናዋ› ያጊዴ ባሬ ዎዛናን ቆፒዴ፥ ባሬ ላጌ ቆማቱዋ ዋ ዶሞፔ፥ ማቲያዋንቱና ሞፔኔ ኡሾፔ፥ ሄ ቆማ ጎዳይ ኢ ቆፒቤና ጋላሳኒኔ ኢ ኤሪቤና ሳቲያን ያና። ሄዋፔ ጉዪያን ኣ ቃንፄሬዴ፥ ሎዓ ማላቲያ ኢታ ኣሳቱ ዴዒያሳን ዎና፤ ሄዋን ኢ ዬካናኔ ኣቻ ቃና።

వినండి ማቶሳ 24