Vute - 2007 Edition (Non-Drama - NT)

Vute - 2007 Edition (Drama - NT)

Jùrúb kùb taŋ bɨ̀rê mvùùŋ no ɗàwáá, kùb du ɓénɨ Páskà rɨ, yi ŋgóobtɨ́. Mvènnɨ́b nùb na satɨgàà ɓe nɨ̀gááŋ káàtàbì ɨ́ yà mánɨ kɨ̀cáàb kù ŋgáb kwíhe Yésù noò, ɓetí ŋgáb yaá bɨ ónɨ vùù nɨ̀vɨ́tɨ̀bì.


Yúdàs kùb ya ɓékom Ìskàrìyôt rè yaá ɓwê kpáín nɨ̀fuùb cóóŋ ɨ́ bɨrɨ́b Yésùù no. Á Sátàìn yi lə́ no sumí. Ŋgə́ ɨ́ gì kwànɨ mvènnɨ́b nùb na satɨgàà ɓe mvènnɨ́b nùb yi gə́tɨkom Dúú Jíri Mèín, tànànɨ ŋgáb hȩ ní ɓa ŋgáb Yésù sə́rɨ̀kɨnàniì. Nùb kɨ́ ɨ́ ókɓà mɨ̀tù cei ɓe àm kɨ́, á ŋgáb ɓwáí nànɨ Yúdàs mòné. Yúdàs ɨ́ ə́mnè, á ŋgə́ yaré mánɨ mvókín ŋge no á ní ɓa ŋgáb sə́rɨ̀kɨ́nànɨ Yésù, kùb a dù bɨ́ ɗə̀ŋhɨ̀r.


Yɨɨ́m jíì jùrúb taŋ bɨ̀rê mvùùŋ no ɗàwáá á. Ye kùb yi du ténnɨ mwin ndèɗúú sìnɨ cɔŋ Páskàà noò ɨ́ ɗóhè. Á Yésù tóm Píyéèr ɓe Jâŋ, ŋgə́ ɨ́ tà: «Gɨnáam nɨ́m nyààŋkɨ́nànɨ cɔŋ Páskàà.» Á ŋgáb fɔ́ Yésù ɨnè: «Ŋga á wu ɗú nɨ́m gɨ̀ nyààŋkɨ́nɨ cɔŋ kɨ́?» Yésù ɨ́ pììnà ŋgáb: «Óknáye, lə́sònɨ kwé lȩ́ȩ, nyí ɓa ɓànnɨ ɓe nɨ̀ŋgwá kù nɔk mvúmí ŋgwéé á, tunáam ŋgə́ há̧á̧ dúú ŋgə́ ɓa nó léniì no. Nyí a tànà tá dúú kíì ɨnè: ‹Tá tɔ̀hí ta nɨ́m gò wu fɔ́nɨ: Lúùm nɨ́me nɨ̀fuùb moò ɓa cɔŋ Páskàà no tàŋniì á ŋga?› Ŋgə́ ɓa nyí túùmnànɨ lúùm kù du ɓe nɨ́ɨ́b du nɨ́m ɗúnàniì lâs no ku, dúú còmné no á, ɓè á nyí ɓa nɨ́m nyààŋkɨ́nànɨ cɔŋ Páskàà ru.» Ŋgáb ɨ́ gì, ŋgáb ɨ́ kwàmè nɨ́ɨ́b lâs hȩ Yésù tɨ tasona ŋgábè, ŋgáb ɨ́ nyààŋkɨ́hácè cɔŋ Páskàà kɨ́ yó ku.


Hȩ ɓwâ cɔɔ̀ŋ yi ɗóoré, Yésù ɓe nùb tómé ɨ́ dùrê cɔɔ̀ŋ. Ŋgə́ ɨ́ tànà ŋgáb ɨnè: «Cɔŋ Páskàà rè, mɨ ɗúɓa nɨ́me nyí tàŋ ɨnè á, ɗà mɨ a pə́gì jábɨ́r mɨ ɓa nó kúnɨ rè. Ɓetí mɨ tànàɓà nyí wááŋ, mɨ tɨ̀ mɨ cɔŋ Páskàà ɓe nyí tàŋcɨ̀r há̧á̧ hȩ Mèín ɓa túùmnɨ njàb cɔŋ kíì ŋgɔ̧́ɔ̧̀ noò no kwe.» Á ŋgə́ gamwo tob súmé, ŋgə́ ɨ́ sáktè Mèín, ŋgə́ ɨ́ tà: «Gamnáam tob lè, meináɓwéem súm no kɨ́. Ɓetí mɨ tànà nyí wááŋ, yànɨ ɗàrò, mɨ tɨ̀ mɨ súm mèìcɨ̀r, háá̧ hȩ Ŋgɔ̧́ɔ̧̀ Mèèín ɓa féínniì.» Cùr kɨ́ no, ŋgə́ ɨ́ â bɨ̀rê, ŋgə́ ɨ́ sáktè Mèín, ŋgə́ ɨ́ kùm. Ŋgə́ ɨ́ nà nɨ̀fuùb noò, ŋgə́ a tace: «Nɨ́m ndè síí móò mɨ na ɓe ɨ́r nyínè á. Ndɨ̀ŋlɨ́ŋná u̧, nyí a vùŋhȩ̀ mɨ no.» Ŋgáb taŋcáŋhȩ cɔŋ, Yésù ɨ́ nàkwà ŋgáb tob súmé, ŋgə́ ɨ́ tà: «Tob lè du túúm jin nyàáŋ heé Mèín kwéí ɓe tɨ́m moò sú ɓe ɨ́r nyínè rè á. Ɨ́dù mɨ tànà nyí, nò ɓa mɨ sə́rɨ̀niì á hò̧ nɨ́me ŋgə́ cɔŋ ndè tàŋɓáànɨ. Á mè u̧, Mwin Nɨ̀rì ɓa kúnɨ hȩ Mèín ya ɓwállé á, ɨ́dù jábɨ́r á ɓe nò ɓa ŋgə́ sə́rɨ̀nɨ kɨ́!» Á nɨ̀fuùb yaré fɔ́tèènɨ mvókín ŋgábè no ɨnè: «Na ɨ́ cábye nɨ́ ndɨ̀ŋnɨ kúúŋ nɨ́m kíì?»

Mɨ̀sə̧̀ə̧́ ɨ́ gù mvókín nɨ̀fubì àm ju tíí. Ŋgáb yaá mánɨ ɗə̀ə̀ŋnɨ na ɨ́ du tíí mvókín vúmè no. Á Yésù tana ŋgáb ɨnè: «Mvènnɨ́b jííb á kɨ́ɨ́nɨ nɨ̀vɨ́tɨ̀b, nùb geé tií á cè ɗúnɨ kùb ɓé vúm nùb ‹nyɔ̧ɔ̧́.› Ɨ́dù kɨ́ nyínè, nɨ ɗúwa nyí ndɨ̀ŋ u̧. Ɗú nɨ́ nò tíí, dù hȩ nò cáŋhɨ̀rí á. Nò duce kɨ́ɨ́niì a dù hȩ nò éína kùbè. Nɨ̀vɨ́tɨ̀b ɨ́ dù bɨrɨ́b, nɨ̀mwi̧ á tə́bə̀rè móŋnɨ cɔŋ, nò kù cè nò gewo gȩné, nò du tíí duha nò du tə́bə̀rè móŋnɨ cɔɔ̀ŋ á ye! Àà kɨ́ moò, mɨ ma du mɨ nò éína nyínè á. Kɨ́ nyínè, nyí tɨ jíitɨ́ jábɨ́r ɓe mɨ. Mɨ á nyí nàɓwênɨ ŋgɨ́ŋgɔ̧́ hȩ Tá moò yi nace mé. Nɨ́me náb ɓa tàŋnɨ á, nɨ́m a mèì ɓwâ mɨ ɓa dùnɨ ŋgɔ̧́ɔ̧̀ moò no kwe. Nyí a dùtèèrê kò ŋgù̧ní ya, ŋgùnnɨ gbàŋ Ísràyéèl cóóŋ ɨ́ bɨrɨ́b lè.»


«Ókye, Sìmôŋ, Sátàìn tɨ ɓottɨ́ fɨ́ínɨ nyí hȩ kùb fɨ́íce mvéín ndɨ u̧, kùb ɨ́ ə́ə̀mnà ŋgə́. Ɨ́dù mɨ yóŋtɨ́ ɓe ɨ́r woò àm ə́ə́m wóò tɨ̀ guré. Ɓwâ wu ɓace féíncùnɨ gín mó síhé, tamnɨm mwin yàáb woò njɔ̧̀.» Á Píyéèr tana Yésù: «Kéké, kùb kɨ́klégɨ̀ wu nìrì, kùb kwíìgɨ̀ wu kwíhîn, mɨ á wo cùrì.» Yésù ɨ́ tàcùnà ŋgə́ ɨnè: «Mɨ tanaɓa wu wááŋ á Píyéèr, mwáín ɓàcéyè, cein tíí gònɨ tóŋnɨ rɨ, wu tacií há̧á̧ gwì taarɨ́b ní nɨ mɨ ɗə̀ə̀ŋwá á.»

Á Yésù fɔ́ nɨ̀fuùb noò ɨnè: «Ɓwâ mɨ tɨ tóm nyí u̧ pósà ŋgáré ɗàà, càká ŋgáré ɗàà, tə́b guré ɗàà rɨ, nɨ́m kù tɨ tuŋtɨ́ nyí à?» Á ŋgáb ta: «Ɗàà.» Á ŋgə́ tacuna ŋgáb: «Ɗàrò, nò du ɓe pósà, dùgɨ̀ càká, átɨ. Nò duce ɓe jì̧í̧ ɗàwáá sə́rɨ̀kɨ́ júk ndoŋnɨri noò, ŋgə́ a gwì jì̧í̧ kɨ́ ɓe kí. Ɓetí mɨ tana nyí wááŋ á, á ɗúnɨ nɨ́m du tɨín káàtà Mèèín no ɓe ɨ́r moò rè fó̧ó̧ hàrák. Ɓetí á tɨín ɨnè: ‹Kùb ya fainndéé ŋgə́ kpáín nùb ɓáŋhɨ́bí no.› » Nɨ̀fuùb ɨ́ tà: «Kéké, nɨ́m á ɓe jì̧í̧ bɨrɨ́b.» Á Yésù ta: «Dùkɨ́cɨ̀ u̧.»


Yésù ɨ́ fô̧ gìnɨ ɓe Òlìvíyéè ya, hȩ ŋgə́ yi ndɨŋlɨ́ŋkomndé. Nɨ̀fuùb noò ɨ́ háàgè ŋgə́. Ɓwâ ŋgáb féín ɓeè kwe, ŋgə́ ɨ́ tànà ŋgáb ɨnè: «Yóŋnáam Mèín, àm kɨhɨr tɨ̀ kwa nyínè.» Á ŋgə́ ŋgɨɨndóŋso tíí ŋgób; ŋgə́ ɨ́ cáàmsê ɗàá, ŋgə́ ɨ́ yàrê Mèín yóŋnɨ ɨnè: «Yée Bɨ̀bá, ɓè wu ɗúré, ndɨŋ jábɨ́r yînɨ́mí rè nɨ mɨ kwà. Ɨ́dù nɨ́m kɨ́ nɨ hȩ mɨ ɗúré ndɨ̀ŋ, ndɨ̀ŋhánɨ hȩ wu ɗúré.» [ Á dùgal Mèín tómsóworé go ŋgə́ tààmcùnànɨ njɔ̧̀. Yésù ɨ́ yà yóŋndóŋɓàgɨ̀nɨ Mèín tíí, ɓetí vùù ya bɨɓatɨ́ ŋgə́. Ɗà ɨ́lɨ́b ɨ́ yà ŋgə́ njèènɨ jòb jòb hȩ tɨ́m súséce ɗàá.] Ŋgə́ yóŋcáŋhȩ Mèín, ŋgə́ ɨ́ éícùwû, ŋgə́ ɨ́ gàìncù nɨ̀fuùb noò, ŋgə́ ɨ́ kwà nɨ́ ŋgáb wumí, ɓetí njɔ̧̀ yi fettɨ́ nɨ́ ŋgáb. Ŋgə́ ɨ́ tànà ŋgáb: «Nyí gwín nɨ́ wum á hàye! Éíwúnáam còóm, nyí a yôŋ Mèín àm nyí tɨ̀ guré kɨhɨri.»


Ŋgə́ á cè nyìnkɨ́nɨ, á kùŋkùŋ nɨ̀vɨ́tɨ̀bì féínso. Yúdàs, nò yi du kpáín nɨ̀fuùb cóóŋ ɨ́ bɨrɨ́b lè noò yi ɨ́ duce ŋgwé gùrí ru. Á ŋgə́ ŋgɨɨréso Yésù no, ɗúnɨ ŋgə́ kùùnɨ àm nyìndíí. Á Yésù tana ŋgə́ ɨnè: «Yúdàs, wu ɗú kùùnɨ Mwin Nɨ̀rì àm wu sə́rɨsokɨ́na ŋgə́ nùb no ɓi̧ní á hàye?» Hȩ nùb tɨ du ɓe Yésùù pə́ bɨ́ àm ɓáaŋtɨ́ nɨ́ rèé, ŋgáb ɨ́ fɔ̂ Yésù ɨnè: «Kéké, wu ɗú nɨ́m ə́tɨ̀ ŋgáb ɓe jì̧í̧ à?» Yésù ɗúnɨ pììnɨ, nɨ̀mwi̧ tɨ suŋce nɨ́ jì̧í̧ su̧ú̧ kúríí, ŋgə́ ɨ́ téínkî nò ə́ré nɨ̀gáŋ satɨgàà tó ŋgáár lame. Ɨ́dù, Yésù ɨ́ tà: «Ní á kí? Kí yɨ́klé ɓè.» Á ŋgə́ di̧so yɨ́ tó nɨ̀ŋgwá rèè tɨ duré, ɗà ɨ́ èrɨ̀cù hàrák. Ɗà Yésù ɨ́ tànà mvènnɨ́b nùb na satɨgàà, ɓe mvènnɨ́b nùb gə́tɨ Dúú Jíri Mèèín, ɨ́ kɨ̀jííb yi go ŋgə́ bìniì ɨnè: «Ɓe ɨ́r nyí gò mɨ bìniì, tɨ á nyí ɗúnàyènɨ jì̧í̧ ɓe ŋgɨ́ɨ̀ŋ hȩ kùb gɨce bìnɨ ŋgàyɨ́r à? Ye lâs nɨ́me nyí yaá Dúú Jíri Mèèín no, nyí mɨ bɨ̀wá. Ɨ́dù ɗàrò, ndɨŋnáhácɨm nɨ́m nyí ɗú ŋdɨ̀ŋniì. Ɓwâ Sátàìn éí ə́r nó mɨ̀sɨ́mnɨ̀rí ɨ́ ɗóhe ru.»


Ɓwâ ŋgáb yi bɨ Yésùù, ŋgáb ɨ́ gè ŋgə́ nɨ̀gáŋ satɨgàà yó. Píyéèr ɨ́ yà nɨ́ gɨ̀tèsònɨ cùrì. Laŋtaŋ dúú kíì ya, kùb yi latií wa kàm kù, nɨ̀vɨ́tɨ̀b ɨ́ yà ònnɨ. Píyéèr ɨ́ gì dùrésòɓwênɨ wa kɨ́ ònnɨ. Nɨ̀gwi kù yi éíkom yó kwe ɨ́ pê ŋgə́ gín wa kíì, ŋgə́ ɨ́ góòmkî Píyéèr u̧u̧, ŋgə́ ɨ́ tà: «Nɨ̀ŋgwá rè ɓwê nɨ̀fuùb Yésùù á!» Ɨ́dù Píyéèr ɨ́ càm, ŋgə́ ɨ́ tà: «Éì, mɨ mɨ ŋgə́ ɗə̀ə̀ŋndóŋwa.» Mvin ŋgób, nò kù ɨ́ pê ŋgə́, nò kɨ́ ɨ́ tà: «Wu ɓwê, wu nò kpáín ŋgábè noò á!» Ɨ́dù Píyéèr ɨ́ tàcùnà nɨ̀ŋgwá rè: «Éì, mɨ mɨ no ɗàndóŋwa.» Tií na, nò kù ɨ́ nòmhâ, nò kɨ́ ɨ́ tà: «Ndɨŋgií i̧, nɨ̀ŋgwá rè taá ɓwê ɓe Yésù, ɓetí ŋgə́ nò Gàlìléè á.» Á Píyéèr tacuna nò kɨ́ ɨnè: «Ɨna àm kù kèè nɨ́me wu, ní á wu duye nyìnnɨ kɨ́.» Nyindí ŋgə́ ɓɔ̧ɔ̧ cɔ̧́hó̧wa, á cene tóŋ. Kéké ɨ́ góòmcùwò íí cùrì, ŋgə́ ɓe Píyéèr ɨ́ ɓàìn mɨ̀ŋgeè íhé, á Píyéèr lə́əmcu nɨ́m Kéké tɨ tana ŋgə́ ɨnayâna: «Mwáín ɓàcéyè, cein tíí gònɨ tóŋnɨ rɨ, wu tacií há̧á̧ gwi taarɨ́b ní mɨ ɗə̀ə̀ŋwá á» na rè. Píyéèr ɨ́ fô̧, ɗà ŋgə́ ɨ́ kɨ́íɓà nɨ́ cei.


Nùb yi du Yésù gə́tɨ̀nɨ àm ŋgə́ tɨ̀ luré, ɨ́ yà ŋgə́ kə́ə̀nɨ, ŋgáb a womɨce ŋgə́. Ŋgáb yaá ŋgə́ ɓòmkɨ́nànɨ íí, ŋgáb a fɔ̂ ŋgə́ ɨnè: «Wu nò du tɨ́kìn Mèèín* ndè, tanam nɨ́m, mvókín nɨ́mè no, na ɨ́ wom wu?» Ŋgáb ɨ́ àndɨ̀ɓà bɨ́ Yésù nyèìn ví̧i̧.


Ɓwâ ye yi sallé, kɨ̀jííb Jwîf ɓoò, mvènnɨ́b nùb na satɨgàà ɨ́ nɨ̀gááŋ káàtàbì ɨ́ ɓáhè. Ŋgáb ɨ́ ndɨ̀ŋ kùb gèwò Yésù ɓáhɨ́r ŋgwìn jírií ŋgábè no. Á ŋgáb fɔ́ Yésù ɨnè: «Tanaye nɨ́m, wu Mèsî á à?» Ŋgə́ ɨ́ pììnà ŋgáb ɨnè: «Mɨ tanaá nyí, nyí tɨ̀ nɨ ə́mnɨ̀r. Mɨ ɨ́ fɔ́cê nyí fɔ́ mwi̧, nyí tɨ̀ nɨ mɨ pììnàr. Ɨ́dù, yànɨ ɗàrò Mwin Nɨ̀rì ɓa ŋgáŋnɨ Mèèín ŋgáár lame á, Mèín nò du ɓe nyòme ndóŋ nyòm lâs.» Á ŋgáb lâs ta: «Àm ndè wu wu Mwin Mèèín á hàye?» Ŋgə́ ɨ́ pììnà ŋgáb: «Á hȩ nyí ta kɨ́, mɨ mwin nóò á.» Á tɨ́ŋgù̧ú̧ bɨ ta: «Nɨ́m ma mándóŋkwacɨ mɨ̀námé ɓe ní? Nɨ́m nɨ̀miib, nɨ́m ókhaá nɨ́ nɨ́m ŋgə́ nɨ̀mɨr taɓaré ye!»

వినండి Lúkàs 22