پیدایش ۱۸
۱۸
سه‌تأ فرشته ایبراهیمٚ اَمرأ ملاقات کونیدی
۱ دوواره خوداوند مَمری بلوطأنٚ نزدیکی ایبراهیمَ آشکارَ بوسته، هو وخت کی ایبراهیم روزٚ گرما دورون خو خیمه درٚ سر نیشته‌بو. ۲ وختی کی خو سرَ راستَ کوده، بیده کی سه‌تأ مردأی اونٚ چومٚ جُلُو به پا ایسه‌ییدی. هَطو کی اوشأنَ بیده، خو خیمه درٚ سر ویریشته بودووَسته بوشو اوشأنٚ پیشواز و سجده بوکوده ۳ و بوگفته: «ای سرور، خوأهش کونم، مرَ لطف بوکون و جٚه تی بنده ورجه نَوأ شوئون! ۴ وهل بگم ایپچه آب شیمی پا شستنٚ‌ره بأورید و دارٚ جیر ایستراحت بوکونید. ۵ شِمره ایتأ لقمه نان بأورم کی قوّت بیگیرید، چونکی هَنٚ وسی شیمی گوذر شیمی بنده ورجه دکفته.»
اوشأن جواب بدَییدی: «اونچی بوگفتی انجام بدن.»
۶ پس ایبراهیم زود بوشو خیمه دورون سارا ورجه بوگفته: «زو باش! سه پیمانه خورم آردَ اوسَن، خمیر بیگیر چندتأ نان بپز.» ۷ خودشم بودووَسته بوشو گله طرف و ایتأ جوانٚ خورم مأنده‌یَ اوسَده، ببرده خو نوکرَ فدَه کی اونَ زود چأکونه. ۸ کره و شیر و او مأنده‌یَ کی چأکوده‌بید بنَه اوشأنٚ جُلُو. خودشم اویه اوشأنٚ ورجه دارٚ جیر به پا بِیسه تا غذا بوخوردیدی.
۹ اوشأن اونَ وَورسه‌ییدی: «تی زن سارا کویه ایسَه؟»
اون بوگفته: «اویه خیمه دورون ایسَه.»
۱۰ ایتأ جٚه اوشأن بوگفته: «بدأن، سالٚ دیگر هَه موقع کی وأگردم تی ورجه، تی زن سارا ایتأ پسر دأره.»
سارا خیمه درٚ سر ایسَه‌بو و ایشنَوستی، خیمه‌یم اوشأنٚ پوشتٚ سر بر پا بو. ۱۱ ایبراهیم و سارا پیر و سالمند بید، سارا دِ عادتٚ ماهانه نأشتی. ۱۲ سارا خو دیلٚ دورون خنده بوکوده و بوگفته: «هسه کی پیرَ بوستم، می آقایم پیرَ بوسته تأنم اَ جور لذت ببرم؟»
۱۳ بَزین خوداوند ایبراهیمَ بوگفته: «چره سارا خنده بوکوده، بوگفته: ‹هسه کی پیرَ بوستم، راس راسی، زأیدار بم؟›»
۱۴ خوداوند بوگفته: «کاری ایسه کی خودا ره سخت ببه؟ سالٚ دیگر سرٚ وخت وأگردم اَیم تی ورجه و سارا ایتأ پسر دأره.» ۱۵ سارا اینکار بوکوده و بوگفته: «نه، من خنده نوکودم.» ولی خوداوند بوگفته: «چره، تو خنده بوکودی.»
ایبراهیم سدومٚ‌ره شفاعت کونه
۱۶ بَزین او مردأکأن ویریشتیدی، رو به سوی سدوم فندرستید و ایبراهیم اوشأنَ بدرقه بوکوده.
۱۷ خوداوند بوگفته: «آیا می نقشه‌یَ ایبراهیمٚ جَا قایمَ کونم؟ ۱۸ ایبراهیمٚ جَا، ایتأ پیله قدرتمندٚ میلت به وجود اَیه و اونٚ جَا جهانٚ تومامٚ میلتأنم برکت گیریدی، ۱۹ چره کی من اونَ انتخاب بوکودم کی اون خو خانواده و خو زأکأنَ فرمان بده کی بعدٚ خودش می دستورأنَ اجرا بوکونید و راستی و عیدالتَ بجا بأورید، تا منم هرچی‌یَ کی ایبراهیمَ وعده بدَه‌بوم، بجا بأورم.» ۲۰ خوداوند بوگفته: «سدوم و عموره گوناهٚ سر و صدا اَنقدر بوجور بَمو کی من بیشنَوستم. ۲۱ پس شم بیجیر بیدینیم او چیزأنی کی من بیشنَوستم درسته یا نه. وگرنه من فهمم.»
۲۲ دوتأ او مردأکأن رأ دکفتیدی بوشوییدی سدوم، ولی ایبراهیم هوطو در حضورٚ خوداوند بِیسه. ۲۳ ایبراهیم جُلُوتر بوشو بوگفته: «آیا درستکارأنَ شریرأنٚ اَمرأ نابودَ کونی؟ ۲۴ اگه پنجا نفر درستکار شهرٚ دورون بِیسید، چی؟ راس راسی خوأیی شهر نابودَ کونی؟ او پنجا نفرٚ درستکارٚ وسی اونَ نجات ندی؟ ۲۵ حاشا بر تو کی اَطویی بوکونی، اَطو کی درستکارأنَ، شریرأنٚ اَمرأ بوکوشی یَنی درستکارأن و شریرأنٚ اَمرأ یکسان رفتار بوکونی. حاشا بر تو، داورٚ تومامٚ جهان کی عیدالتَ بجا نأوری!»
۲۶ خوداوند بوگفته: «اگه پنجا نفر درستکارم شهرٚ سدومٚ میأن بیأفم، اوشأنٚ وسی شهرَ نجات دهم.»
۲۷ ایبراهیم جواب بدَه، بوگفته: «با اَنکی هیچی نی‌یم جز خاک و خاکستر، جسارت کونم، ای سرور، تی اَمرأ گب زنم. ۲۸ اگه درستکارأن چهل و پنج نفر بیبید چی؟ پنج نفرٚ وسی تومامٚ شهرَ نابودَ کونی؟»
خوداوند بوگفته: «اگه چهل و پنج نفرم اویه بیأفم، شهرَ نابودَ نوکونم.»
۲۹ ایبراهیم دوواره خوداوندَ بوگفته: «اگه چهل نفر اویه پیدا ببه، چی؟»
خوداوند بوگفته: «چهل نفرٚ وسی‌یم اَ کارَ نوکونم.»
۳۰ ایبراهیم بوگفته: «ای سرور، خوأهش کونم می گب زِئنٚ اَمرأ ترَ غیظَ نیگیره. اگه اویه سی نفر پیدا ببه، چی.»
خوداوند بوگفته: «اگه سی نفرم اویه بیأفم، اَ کارَ نوکونم.»
۳۱ ایبراهیم بوگفته: «هسه کی جسارت بوکودم تی اَمرأ گب بزنم — اگه اویه بیس نفر پیدا ببه، چی؟»
خوداوند جواب بدَه: «بیس نفرٚ وسی‌یم، او شهرَ نابودَ نوکونم.»
۳۲ ایبراهیم بوگفته: «خوأهش کونم، ای سرور، ترَ غیظَ نیگیره، وهل فقط اَ ایبارم گب بزنم. اگه اویه ده نفر پیدا ببه، چی؟»
خوداوند جواب بدَه: «ده نفرٚ وسی‌یم او شهرَ نابود نوکونم.»
۳۳ وختی کی خوداوند خو گبأنَ ایبراهیمٚ اَمرأ تومامَ کوده، جٚه اویه بوشو. ایبراهیمم وأگردسته بوشو به خانه.
ప్రస్తుతం ఎంపిక చేయబడింది:
پیدایش ۱۸: گیلکی (رشتی)
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2010-2019 Gilak Media