San Juan 2
2
Jesús‑ni ugíabie dha'a lhe'esi Caná
1Beyonna ubisaha nna utta ttu dha'a lhe'esi Caná ge Galilea‑ni. Niha‑gaba du nan ge Jesús‑ni. 2Biyaxigaba Jesús‑ni lenie ka benne rudhetinieha tse'eke dha'aha. 3Tti chi bebisi vinuha, nianna ra nan geeha bie:
―Birua vinu tee.
4Jesús‑ni nna bekabie, ree:
―Nana, ¿beaka netila ralu nuná? Neti labí chi bisia ura kia.
5Nan geeha nna rabie ka nu se'e gwexxua ya kwe'eha:
―¡Gwaluni iyába nu innábi!
6Niha se'e xxupa ka re'e ankakana ge íyya. Rita'a inda lhe'ekani. Lhe'e ttu ttu ka nuha rita'a ttiba ttu gayua (100) litru inda. Ka nuha rixúni ka benne Israel‑ni ki riga'ake inda lhe'ekani tti reyarike arlo Tata Do Yebáha. 7Jesús‑ni nna rabie ka nu se'e gwexxua ya kwe'eha:
―Gwalodisá ka re'e‑na inda.
Ka nuha nna bodisá tíbakana ka re'eha inda, 8nianna tti ra Jesús‑ni kana:
―Nnanna nna gwalika'a latti nuná nna gwatagwe benne bananie dha'a‑ni.
Nianna denkana nuha nna begwekana benneha. 9Benne bananie dha'aha, kumu labí yue gaxa gwaxxíkana vinuha, sunruba ka nu se'e gwexxua ya kwe'eha yúkana, kumu de lakana gwattekana indaha, laxkala tti bennixxie inda chi beyaka vinuha, nianna tti uxie nubiyú rutsá nániha 10nna ree na:
―Iyába ka nu runi ttu dha'a, lade'axa ruga'akana vinu tseru nna iki deliba ganna chi u'uya xxatta ka benne yu'u dha'aha nuha, la'anialiba nna chi ruga'akana vinu nu labí tte anka tse. Lu nna nnannaliba ruga'alu vinu tseru‑ni.
11Nuní sisi'a tte milagru ben Jesús‑ni lhe'esi Caná ge Galilea. Len nu benieha bele'ebie nu xxeni ra lebie. Ka benne rudhetinieha nna ugía leke gebie.
12Iki de nuha nna ugwadie die lhe'esi Capernaum lenie nan geeha lhe ka betsieha lhe ka benne rudhetinieha lhe. Niha use'eke sunruba ttu chupa ubisa.
Jesús‑ni rochesue ka nu se'e gwetto'o lali'a yotuha
(Mt. 21:12-13; Mr. 11:15-18; Lc. 19:45-46)
13Kumu de chi dabigana isia laní ge ka benne Israel‑ni nu tee láni Pascua, Jesús‑ni nna ugwapie die lhe'esi Jerusalén‑ni. 14Lali'a yotuha gwaxxake ka nu rutto'okana ka ku'una lhe ka neru lhe ka becha lhe. Anágaba ka nu rotsea belhiu lhe, niha‑gaba se'ekana. 15Nianna tti bilhe ttu tuu. Len nuha bochesue kana ro'o yotuha itupa lenkana ka neruha lhe ka ku'una rutto'okanaha, nna ka nu rotsea belhuha nna bedhíe belhiu gekaniha lo yu nna berixxi lobie ka mexa gekaniha. 16Nianna rabie ka nu rutto'o ka bechaha:
―Gwalebea ka nuná nii nna bittu uinle lisi Tata kia‑ni yo'o ata raka i'iya.
17Ka benne rudhetinieha nna gwadú tteba leke nu ra lo ka yetsi ge Tata Do Yebáha ata dia ra: “De raka xxattati ge lisilu‑ni, de nuha nna ruyú xxattaa elha disa.” 18Ka nu loni ge ka benne Israel‑ni nna rákane:
―Lu, ¿bíla ttu seña ule'elu kini ula'a deki gwalí rapalu lo neda uinlu nu ruinlu‑ni?
19Jesús‑ni nna bekabie gekani, ree:
―Gwaluttampa yotu‑ni nna delo tsunna ubisaba chi elhidhaa na.
20Ka nu loni ge ka benne Israel‑ni nna rákane:
―Chua bixxi xxupa (46) ida bisá ka benne ulhidhake yotu‑ni, lu nna delo tsunna ubisaba ralu chi elhidhalu nuní.
21Ttaka Jesús‑ni laa gwalíga ge yotuha nuha rinnebie, sinuki gebe nuha rinnebie. 22Iki deliba chi beyaka benbie lagwi ge ka benne chi uttiha, la'anialiba nna gwadú le ka benne rudhetinieha deki chiba unnebie ge nuha, nianna tti ugía leke ge nu ra lo ka yetsi ge Tata Do Yebáha lhe ugíagaba leke ge nu ra Jesús‑ni lhe.
23Laka reki Jesús‑ni lhe'esi Jerusalén‑ni tti raka laní Pascuaha, ixe ka benne ugía leke gebie de bilákanie ka milagru runieha. 24Ttaka kwinaba Jesús‑ni labí ruxxen lebie geke, kumu chiba yue gasina ruin iyáke. 25Labie labí riyasanie nuxa kixxi'ane gaxasina ruin ka benne se'e yiesi lo yu‑ni kumu chiba yue gasina anka lhe'e lastoke.
ప్రస్తుతం ఎంపిక చేయబడింది:
San Juan 2: zae
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2014, Wycliffe Bible Translators, Inc. All rights reserved.