Rut 3
3
Si Rut duk si Boꞌas laꞌi si pagdiꞌikan
1Dembuwaꞌ ellew paꞌin si Naꞌomi pu si Rut, eyuꞌannen, “Subey ne kew paꞌellahanku duk ne kew maglumaꞌan dīnu. 2Na, bakas kew maghinang nuhut meꞌ daraꞌakan si Boꞌas bu kataꞌuhannu hep weꞌ usbate iye. Pakale kew, ninaꞌ magpalid barley iye laꞌi si pagdiꞌikan. 3Hangkan mandi kew bu nu magbengngi-bengngi bu asekun semmeknu mahāpin. Ubus padurul kew pī si pagdiꞌikan; saguwaꞌ daꞌa kew pakite si iye samantaꞌan gaꞌi pe iye ubus mangan duk nginum. 4Bang pabāk ne iye payamanun duk esseb-essebun bang intag. Ubus pī kew, lukahun mantane si bettisnen#3:4 Hātinen masaley, mekeꞌipat iye., duk pabāk kew laꞌi. Ubus bugtuꞌ akahanne kew bang ine subey hinangnu.” 5Paꞌin si Rut, “Hinangku saꞌ kēmon pinaꞌinnun.”
6Hangkan padurul iye hap pagdiꞌikan duk hinangne kēmon dinaꞌak weꞌ metoꞌanen. 7Pag ubus si Boꞌas mangan duk nginum duk sinna diyalem ateynen pī iye pabāk si bihing tumpuk barley tuli. Kamaya-maya si Rut hap pī, lukane mantane si bettisnen duk pabāk iye laꞌi. 8Pag nengaꞌ bahangi ne, takeddut si Boꞌas. Pag ngape iye niyaꞌ hatiꞌ dende pabāk si bettisne! 9“Sine kew,” paꞌinne. Nambung iye, paꞌinne, “Si Rut ku, Tuwan. Peggeꞌ kaꞌu usba kami magkuwiraw nabangan kami hinangun ku anda.#3:9 lit. bettadun mantanun diyataꞌku” 10Paꞌin si Boꞌas, “Karayaw iledjikiꞌan kew weꞌ Tuhanin, Dende. Hāp boꞌohannun si metoꞌanun bu mās hāp ne kuweꞌitu boꞌohannun si aku usbanun peggeꞌ dumaꞌin pinihanun lella bataꞌ, miskin ke atawa dayahan. 11Na, daꞌa kew suse, Dende. Tuhutku saꞌ kēmon kinabayaꞌannun. Kataꞌuhan du weꞌ kēmon aꞌa dem puweblohin weꞌ kaꞌu dende hāp addatnen. 12Saguwaꞌ bisan toꞌo weꞌ pingged pagusbahan kamihin duk metoꞌanu lellaley, niyaꞌ pe dembuwaꞌ lella pesōng pingged amban aku. 13Tuꞌu ne kew hadja tiggelan gaꞌi pe dantaꞌ. Sumu salung payamante saꞌ bang ngatu aꞌa miyaꞌan magkuwiraw ngipat kaꞌu. Bang ngatu iye, na hāp; iye ne iyan. Saguwaꞌ bang gaꞌi iye ngatu - napa ne ku kuweꞌitu bu pakale Tuhanin - aku ne iye. Pabāk ne kew hadja tuꞌu sampay sumu salung.”
14Ubus pabāk si Rut laꞌi si antag bettisnen sampay subu-subu. Saguwaꞌ dongaꞌ iye lindem pe supaya gaꞌi iye takilale. Peggeꞌ paꞌin si Boꞌas weꞌ gaꞌ niyaꞌ subey ngataꞌuhanne weꞌ niyaꞌ dende bakas laꞌi si pagdiꞌikan. 15Paꞌin si Boꞌas, “Pituhun olosnun duk bellatun.” Ubus isihanne ennem takesan#3:15 kaw 6 ‘omer’, meꞌ 24 kilu barley duk tinabangan iye weꞌ ne pinapī diyataꞌ bahane. Ubus pī iye balik hap puweblo. 16Pag tekka si Rut si palaꞌihan metoꞌanen tinilew iye weꞌ Naꞌomi, paꞌinne, “Saꞌingge du kaꞌam, Anak?” Ubus inakahan iye kēmon weꞌ si Rut bang ine hinang si Boꞌas si iyehin. 17Ubus paꞌinne pe, “Urunganne ku meꞌ ennem takesan barley inin peggeꞌ gaꞌi koꞌ makajari weꞌ moleꞌ ku pitu bu gaꞌ niyaꞌ taboꞌoku.” 18Paꞌin Naꞌomi, “Daꞌa kew sasew, Anak, tiggelan gaꞌi pe kataꞌuhannu kaꞌujudannen. Aꞌa iyan gaꞌi pahali samantaꞌan gaꞌi haregla palkalaꞌin ellew inin.”
ప్రస్తుతం ఎంపిక చేయబడింది:
Rut 3: yakV
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2019, Wycliffe Bible Translators, Inc. All rights reserved.