Zhan 9
9
Zhezü kɔrɛ ɔwrɔn tɔ̀n léyi ke sɩ́ kán ɛyri n'ebîemɛ̀n nɔn
1Zhezü dú ɛnlevri kɛ hɔ̀n, kɩ kán ɔwrɔn tɔ̀n léyi n'ebîemɛ̀n ke sɩ́ kán ɛyri nɔn. 2N'ɛsɛnkɛn-bɔ̀ ke yrɛ nɛ̀n le: “Ankà-yé-wrɔn, cɛci kruhú kɛ ɔwrɔn ndɔ léyi ye bî nɔn, ke sɩ́ kán ɛyri: nɛ́n mùmù n'ɛgbàn, kale n'ɛmɛ̀n-bɔ̀ gbàn kruhúɛ?” 3Zhezü mrɛ́n yɔ ɔmùan le: “Ke sɩ̀ dù nɛ́n mán n'ɛmɛ̀n-bɔ̀ gbàn kruhú. Nɛ́n sɩ́ kán ɛyri, ô Ɔwɔ kɔrɛ̀-kɔhɔ̀n lɔ ke ci n'eyri kɛ̀ yé n'edomɛ̀n. 4Ɛnvra ɔmu léyi ɛcɛ̀n cüe nɔn, ke ji le bɔ̀ hán ɔwrɔn léyi wá mɛ̀n ɔkɔhɔ̀n nɔn, n'ɛkɔrɛzì-ci; ɛnnyran kɛ vá ɛgɔ̀n-yri kɩ ɔwrɔn zriɛmɛ́n ke sɩ̀ hán ɔkɔhɔ̀n rɔ́. 5Ɛnvra ɔmu léyi mɛ̀n dú ɛnhibù wú nɔn, mɛ̀n dú ɛnhibù wú yri-kàn.” 6Ɛnvra léyi Zhezü dɔ́ ankà ndɔ lɔ trɔ nɔn, nɛ̀n cüe andà ɛnhibɩɛ, kɩ nɛ̀n bɩ́ andà lɔ nɛ̀n borɛ antà-hi; nɛ̀n bɩ́ antà-hi lɔ nɛ̀n cɔ́ ɔwrɔn léyi ke sɩ́ kán ɛyri nɔn anvɛ̀, 7kɩ nɛ dɔ́ yi le: “Ɛ̀ hɔ̀n è juru ezì Siloe shi-bɛ́ lɔ mɛ̀n.” (Ebɩ́ ndɔ lɔ n'ɛmɛ̀n kɛ dɔ̀ le “Ɔkɔ̀hɔ̀n wá”). Ɔwrɔn léyi ke sɩ́ kán ɛyri nɔn, hɔ́n juru ezì, kɩ ɛnvra léyi nɛ̀n vru ɛmɛ̀ẅi nɛ́n và nɔn, nɛ kán ɛyri tɛ̀. 8Zɛtɛn n'ɛtɛsɛ̀n-bɔ̀ mán anwrɔn hɔ̀n léyi gɔ́ kán nɛ̀n ɛci sán yri nɔn, kɛ dɔ̀ le: “Kè sɩ̀ dù ɔwrɔn ndɔ lɔ de kɛ yɛ́ kɛ sán ɛci nɛ́n?” 9Anwrɔn jan kɛ dɔ̀ le: “Nɛ́n.” Ndɔ hɔ̀n kɛ dɔ̀ le: “Hɔ̂, ke sɩ̀ dù nɛ́n, tɛ́n nɛ̀n cá yi.” Kɩ ɔwrɔn lɔ kɛ dɔ̀ le: “Mɛ̀n tɛ̀.” 10Yɔ yrɛ nɛ̀n le: “Anwɔntan de v'anvɛ̀ lɔ hán vrú nɛ́n?” 11Nɛ̀n mrɛ́n ɔmùan le: “Ɔwrɔn léyi ye bi Zhezü nɔn, borɛ antà-hi bɩ́ cɔ́ mɛ̀n anvɛ̀ kɩ dɔ́ mɛ̀n le: ‘Hɔ̀n Siloe shi bɛ lɔmɛ̀n, è juru ezì’. Mɛ́n hɔ̀n, kɩ ɛnvra léyi mɛ̀n juru ezì trɔ nɔn, mɛ kán ɛyri tɛ̀.” 12Yɔ yrɛ nɛ̀n le: “Ɔwrɔn ndɔ lɔ nɛ́n tɔwá?” Kɩ nɛ̀n mrɛ́n yɔ ɔmùan le: “Mɛ̀n sɩ̀ nyrìɛn.”
Ɔwɔ-nyanmàn-sùva-wá-bɔ̀ ke yrɛ anvɛ̀-boyɛ-wrɔn léyi kɔrɛ̀ nɔn ankà
13Zɛtɛn yɔ bɩ́ ɔwrɔn léyi kɔrɛ̀ nɔn, yɔ hɔ́n sɩ́ Ɔwɔ-nyanmàn-sùva-wá-bɔ̀. 14Tɛ́n nbì léyi Zhezü bɩ́ antà-hi wá ɔwrɔn lɔ anvɛ̀ hɩ kɔrɛ nɛ̀n nɔn, dú ɛnyanmán-bì. 15Hɩ le kruhú de Ɔwɔ-nyanmàn-sùva-wá-bɔ̀ mán ke yrɛ ɔwrɔn lɔ, ɔmu le hán ci hɩ nɛ kán ɛyri zɛtɛ̀ lɔ nɔn. Ɔwrɔn lɔ kɛ dɔ́ yɔ le: “Nɛ̀n wá mɛ̀n antà-hi jan anvɛ̀, mɛ̀n juru ezì, kɩ zɛtɛn mɛ kán ɛyri.” 16Ɔwɔ-nyanmàn-sùva-wá-bɔ̀ jan kɛ dɔ̀ le: “Ɔwrɔn léyi hán eci ndɔ lɔ nɔn, nɛ̀n sɩ̀ dù Ɔwɔ yri nɛ̀n và, ɔmuhi nɛ́n sɩ́ wá ɛnyanmán-bì nyanmàn lɔ nɔn.” Tɛ́n ndɔ hɔ̀n kɛ dɔ̀ le: “Anwɔntan de ɔwrɔn kɛ lɛ hán anvɛmɛ̀n-frɛ́n-ci ndɔ hɔ̀n lɔ, ke dú kɛ nɛ̀n dú ɛgbàn-hán-wrɔn nɛ́n?” Kɩ ɛsɔ̀n-vɔyan bru yɔ ɛmɛ̀n. 17Ɔwɔ-nyanmàn-sùva-wá-bɔ̀ vru ke yrɛ anvɛ̀-boyɛ-wrɔn léyi nkɔrɛ̀ nɔn le: “Vɛ tɛn, ankà tán de ɛ dɔ́ tán ɔwrɔn léyi hán anvɛ̀ gbá mɛ́n nɛ́n?” Nɛ́n mrɛ́n ɔmùan le: “Nɛ̀n dú Ɔwɔ-mùanwú-ankà-dɔ́-wrɔn tɔ̀n.”
18Ɔmu tɛ̀kɩ Zhüifɛ̀n-bɔ̀ cüìcüì hɔ̀n ke sɩ́ ji kè bùtan ankaẅì le ɔwrɔn lɔ kè sɩ̀ gɔ̀ kán ɛyri, kɩ zɛtɛ̀ lɔ nɛ kán ɛyri tɛ̀, hɩ le kruhú de ye bi n'ɛmɛ̀n-bɔ̀, 19ô ye yrɛ̀ yɔ ankà. Yɔ yrɛ n'ɛmɛ̀n-bɔ̀ le: “Ɔwrɔn ndɔ lɔ ny'ɛnẅìɛ? Nyɛ́n yrì le nɛ́n sɩ́ kán ɛyri ɛcɛ mɛ̀n hán hɛ́n? Anwɔntan hán cì kɛ nɛ kán ɛyri zɛtɛ̀ lɔa?” 20N'ɛmɛ̀n-bɔ̀ mrɛ́n ɔmùan le: “Bɔ nyri ɔmu le bɔ́ ẅì, kɩ nɛ́n sɩ́ kán ɛyri ebîemɛ̀n. 21Tɛ́n bɔ́ sɩ̀ nyrì ɔmu le hán cì hɩ nɛ kán ɛyri zɛtɛ̀ lɔ nɔn. Kɩ bɔ́ sɩ̀ nyrì ɔwrɔn léyi gbá nɛ̀n anvɛ̀ nɔn. Nyɛ́n yrɛ nɛ̀n ankà: nɛ̀n krɔn ankà-dɔ́-mùan!” 22N'ɛmɛ̀n-bɔ̀ lɔ kɛ dɔ́ ɔmu lɔ ɔmuhi, yɔ sú Zhüifɛ̀n-bɔ̀ cüìcüì hɔ̀n lɔ nɔn. Annànwɔrɛ mɛ̀n lɔ ɛcüìcüì-bɔ̀ ɔmùan krɔn, ô yɔ wrɔ́ Ɔwɔ-sɛ́n-wɔn lɔ mɛ̀n, ɔwrɔn totɔtɔ̀n léyi kɛ lɛ dɔ̀ le Zhezü dú ebɩ̀die-wrɔn nɔn. 23Nyàn eci le kruhú léyi n'ɛmɛ̀n-bɔ̀ kɛ dɔ̀ le: “Nɛ̀n krɔn ankà-dɔ́-mùan, nyɛ́n yrɛ nɛ̀n ankà!”
24Ɔwɔ-nyanmàn-sùva-wá-bɔ̀ bi ɔwrɔn léyi kɔrɛ̀ nɔn andɛ̀n-anhyrɛmɛ̀n kɩ kɛ dɔ́ nɛ̀n le: “Dɔ̀ ankà mùan zri Ɔwɔ zìwú. Bɔ nyri ɔmu le ɔwrɔn ndɔ lɔ dú ɛgbàn-hán-wrɔn.” 25Nɛ́n mrɛ́n ɔmùan le: “Mɛ̀n sɩ̀ nyriɛ̀n ke dú kɛ ɛgbàn-hán-wrɔn dú nɛ̀n. Tɛ́n mɛ̀n nyri eci zri: mɛ́n sɩ́ kán ɛyri, kɩ mɛ kán ɛyri zɛtɛ̀ lɔ.” 26Yɔ yrɛ nɛ̀n le: “Ecitan nɛ̀n hán mɛ́n hán? Anwɔntan nɛ̀n hán nɛ̀n gbá mɛ́n anvɛ̀a?” 27“Mɛ́n gɔ̀ hɛ́ ezì mɛ́n dɔ́ nyɛ̀n, kɩ nyɛ́n sɩ̀ die mɛ̀n nukùɛ. Cɛci kruhú kɛ nye ji le mɛ̀n vru mɛ̀n dɔ́ nyɛ̀n nyɛ́n yá andɛ̀n-anhyrɛmɛ̀n hán? Nyɛ́n mán nye ji nyɛ́n srɔ n'ɛsɛ̀nkɛn-bɔ̀a?” 28Yɔ wɔra nɛ̀n kɩ yɔ dɔ́ nɛ̀n le: “Vɛ́n de, è dú ɔwrɔn ndɔ lɔ n'ɛsɛ̀nkɛn-wrɔn nɔn! Bɔ tɛn, bɔ́ dú Mohizì sɛ̀nkɛn-bɔ̀. 29Bɔ́ nyri ɔmu le Ɔwɔ dɔ́ Mohizì ankà; tɛ́n nɛ tɛn, bɔ́ sɩ̀ nyrì ɛyri léyi nɛ́n dù nɛ và nɔn!” 30Ɔwrɔn lɔ mrɛ́n yɔ ɔmùan le: “Nyàn eci léyi dú anvɛmɛ̀n-frɛ́n-ci nɔn: nyɛ́n sɩ̀ nyrì ɛyri léyi nɛ́n dù nɛ và nɔn, ɔmu tɛ̀kɩ nɛ̀n gbá mɛ̀n anvɛ̀! 31Bɔ́ nyri ɔmu le Ɔwɔ ke sɩ́ die ɛgbàn-hán-bɔ̀ nukùɛ, tɛ́n ne die ɔwrɔn léyi ẅɛn n'anhyɛ-yì, hɩ kɛ hán n'ɛkɔrɛzì-ci nɔn nukùɛ. 32Yɛ vá yá mrìmrì ɛnbì zriɛmɛ́n le, ɔwrɔn tɔ̀n gbá ɔwrɔn léyi n'ebîemɛ̀n ke sɩ́ kán ɛyri nɔn anvɛ̀. 33Ke dú kɛ ɔwrɔn ndɔ lɔ kè sɩ̀ dù Ɔwɔ yri kɛ̀ và hô, nɛ́n sɩ̀ hán eci zriɛmɛ́n rɔ́.” 34Yɔ mrɛ́n nɛ̀n ɔmùan le: “È dú vɛ́n mùmù lɔ fɛn ɛgbàn mɛ̀n v'ebî vra hàn kɩ cɔ́ zɛtɛ̀ lɔ, kɩ e ji ɛ̀ kran ankà è yé bɔ̀a?” Kɩ yɔ wrɔ́ nɛ̀n Ɔwɔ-sɛ́n-wɔn lɔ mɛ̀n.
Ɛnhɛ́n mɛ̀n anvɛ̀-bɔyɛ
35Zhezü cɔ́ yá le yɔ wrɔ́ ɔwrɔn léyi nɛ́n kɔrɛ̀ nɔn. Nɛ̀n srɔ́n yi ɛsù kɩ nɛ dɔ́ yi le: “E bú ɔwrɔnẅì Ẅì ankà ɛ tán ankaẅìɛ?” 36“Dɔ́ mɛ̀n, ɔwrɔn léyi dú nɛ̀n nɔn, Ankà-yé-wrɔn, ô mɛ̀n bú n'ankà mɛ̀n tán ankaẅì.” 37Zhezü kɛ dɔ́ nɛ̀n le: “Ɛ kán nɛ̀n; nɛ́n de nɛ dɔ́ mɛ́n ankà zɛtɛ̀ lɔ nɔn.” 38“Me bútan ankaẅì Ɛẅɛnwrɔn.” Kɩ ɔwrɔn lɔ shɛ́n Zhezü ezìwúɛ annankruemɛ̀n. 39Zɛtɛn Zhezü kɛ dɔ̀ le: “Mɛ̀n vá ɛnhibù ndɔ lɔ wú, ô ɛmrɛ̀n-cì tɔ̀n kè dù: ô anvɛ̀-bɔyɛ-bɔ̀ kɛ kán ɛyri, ô anwrɔn hɔ̀n léyi kɛ kán ɛyri nɔn kɛ srɔ anvɛ̀-bɔyɛ-bɔ̀.” 40Ɔwɔ-nyanmàn-sùva-wá-bɔ̀ janbɔ̀ léyi nyɔn nɛ̀n ɛtɛsɛ̀n nɔn, yá ankà hɔ̀n léyi nɛ́n dɔ̀ nɔn kɩ kɛ yrɛ nɛ̀n le: “Bɔ́ mán bɔ́ dú anvɛ̀-bɔyɛ-bɔ̀a?” 41Zhezü mrɛ́n yɔ ɔmùan le: “Ke dú kɛ nyɛ́n dú anvɛ̀-bɔyɛ-bɔ̀ hô, nyɛ́n sɩ́ dú ɛgbàn mɛ̀n; tɛ́n ɔmuhi nyɛ dɔ̀ le: ‘Bɔ́ kán ɛyri’, nyɛ́n dú ɛgbàn mɛ̀n.”
ప్రస్తుతం ఎంపిక చేయబడింది:
Zhan 9: ƐAA03
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.