Lulkavq 21
21
Miqtsiq miqma teevq gaq phul danq-a nail ganl
1Yeiqsul hel daiq gai aivq-u phao neq, hulmeeq hul bhao juq phul danq duq bhai phul danq danq nail bhai ya moel-a nail ngaol. 2Aq-u phao, haq nail aoq nail miqtsiq miqma teevq gaq, giqheel meivbhaiq nvq bhaiq oil bhoel nail bhai iqsanl ya moel-a nail ngaol. 3Aq-u phao, Yeiqsul ge nail: “Ngal nul juq bhai mal dil dai, ge lavq bhel. Haq nail aoq nail miqtsiq miqma niil gaq, aqyu juq iqsanl nee mail maq tsil danq-a nail ngaol. 4Khul khi mail dai ngal-aq neq, aqyu juq neq, mao dai jiav nail lavqkhoel nee oil dov khi danq-a nail ngaol. Thail hai ngaol-aoq, yaqmai-aq niil gaq neq, mao ail haq nail lavqkhoel nee, aivq aqdoevq doevq nail haqbhoil khal jiav nail iqsanl mail oil dov khi danq-a nail ngaol” dai, ge bhiq-a nail ngaol.
“Uqhuq thaoq nail ilkhaol il ma luq ail seil ail nail ngaol” dai, Yeiqsul ge nail ganl
5Tsaol-aq teevq pav ga nav juq, uqhuq thaoq nail ilkhaol il ma nail lavqkhoel khe meeq dee dee nail lovmav khi Miqyail bhai khal hai laol bhiq nail ganl juq bhai, tsiq phoiq nail ngaol. Thail hai ngaol-aoq, Yeiqsul aqyu juq bhai niail hai ge bhiq-a nail: 6“Niil aq-il nul juq-i mail ya moel nail niil juq bhai peiv ail leiv ail nail aqn kev lee nail ngaol. Aq-u phao, lovmav teevq heeq nail kovtavq bhai teevq heeq maq jiav nia-u kev dai, peiv ail leiv ail gil naol” dai, ge bhiq-a nail ngaol.
Miltsaq dao loi loi lai nail yanq kev lal-u phao, pevq lal nail bhiq heeq bhiq moel nail ganl
7“Saq laq-ol, al juq khaq mao pevq lal nail-aiq. Al juq pevq lal-u phao, nv juq khal hai khi ya heeq kivq nail-aiq” dai, tsaol-aq al juq Yeiqsul bhai nal daiq-a nail ngaol.
8Yeiqsul aqyu juq bhai ge bhiq-a nail: “Yu nul juq bhai maq ya hevq bheel aivq dai, yaol phaol yaoq. Khul khi mail dai ngal-aq, tsaol-aq mao dai ngaq nail aqmil bhai juq juq ail khi, ‘Ngal neq, Khali ngaol. Aq yanq kev lee-aoq nail ngaol’ dai, ge nail ngaol. Thail hai ngaol-aoq, aqyu juq nail haoqnaol thaq tsao thel aivq. 9Genl dev nail aqthel khi milkhaoq suq saq nail ganl juq bhai nul juq ya gaiq-u phao, gee sil nail neema thaq aol. Khul khi mail dai ngal-aq neq, al juq iqmoeq ya pevq lal nail ngaol. Thail hai ngaol-aoq, teevq pov taivq-ail daoq loi loi lai nail yanq maq kev lal haq-al” dai, ge bhiq-a nail ngaol.
10A bhai nee pultavq, Yeiqsul gaoq ge nail: “Jeq-e teevq jeq-e khi mail teevq jeq-e, milkhaoq teevq khaoq khi mail teevq khaoq genl dev pheel jaq nail ngaol. 11Milluv luv dee dee lal nail ngaol. Teevq dao khai-aq teevq dao moevq nail sivq nail phaq khi aqjao jao ma nal nail nalgoel aqkav phaq kev lee nail ngaol. Nqtavq nee mail gee sil dee dee lal nail phaq khi mail, eeq dee dee nail bhi heeq bhi moel nail juq dov lee nail ngaol.
12Niil juq iqsanl mail maq pevq lal-u phao, yu nul juq bhai nieivq khi khoeq lavq jiovq lavq nail ngaol. Yu nul juq bhai uqhuq thaoq nail ilkhaol bhai maqkhaiq, thaonq bhai maqkhaiq, av bhiq nail ngaol. Nul juq ngaq nail aqmil bhaq da nee, uv thaiq nail juq khi mail heeqphaq juq nail sivtavq bhai, yu nul juq bhai hel aivq lavq nail ngaol. 13Al hai nl lavq-u phao, nul juq ngaq nail ganl salkhil khanq kivq nail ngaol. 14Al heel ngel-i mail, khal hai ya ge kovq bhiq nail dai, aqyanq maq kev lal-u nee mail ngal maq saol-nvq ail dai, nul juq nail neema lavqkhoel bhai nul juq noeqceiv-ai thaq yaoq. 15Khul khi mail dai ngal-aq neq, nul juq bhai neejiav jiav nail juq maq ge gaq nia nail daoq khi neenoeq neekha, ngal nul juq bhai bivq naol. 16Nul juq nail aqbhu aqma, aqivq jaqbheq, jeq-e jaq-a khi mail aqtsaoq juq, nul juq bhai yu nail aqlavq lavqkhoel bhai av bhiq nail ngaol. Aqyu juq nul juq teevq pav ga nav juq bhai deeq heivq nail ngaol. 17Ngaq nail aqmil bhaq da nee tsaol-aq iqsanl mail nul juq bhai neejiav jiav lal nail ngaol. 18Thail hai ngaol-aoq neq, nul juq nail tsailkheel teevq deeq iqsanl maq ya ga-ail. 19Nul juq neema ivq haq neq, nul juq doevq nail phaq ya nail ngaol” dai, ge bhiq-a nail ngaol.
Yeiqlulsaqlaiq meenq luq ail seil ail nail ganl
20Yeiqsul gaoq ge nail: “Yeiqlulsaqlaiq meenq bha genl dev nail munl munl ma lovq jaoq-ai thaq nail bhai nul juq ya moel-u phao, meenq al meenq luq ail seil ail nail yanq kev lee aoq thaq nail nial dai, heeq kivq yaoq. 21Aq-u phao, Yuldav milkhaoq bhai jaol nail tsaol-aq, daoltavq bha tsaoq dal laivq yaoq. Meenq lavqkhoel bhai jaol nail tsaol-aq dov-ail yaoq. Meenq lavqniil phao jaol nail tsaol-aq, meenq lavqkhoel bhai thaq aol lai. 22Khul khi mail dai ngal-aq neq, Jal liq lavqkhoel bhai gevq-ai thaq nail iqsanl mail bhee lal dai, aqyanq al neq, Miqyail nl kovq bhiq nail aqyanq ngaol. 23Aqn aqyanq al kev lee-u phao, aqhaq aqmaol liq nail juq khi, aqtsil cuvq yaq jaol nail aqma juq ya noeq haq dee dee nail ngaol. Khul khi mail dai ngal-aq neq, noeq haq dee dee nail phaq milkhaoq niil khaoq nail kovtavq bhai kev lee khi, neema phail nail phaq Ilsaqleiqlav nail jeq-e jaq-a nail kovtavq bhai kev lee nail ngaol. 24Aqyu juq neq, thaoma-i mail heivq nail bhai ya daq nail ngaol. Yu aqyu juq bhai pheel aivq khi, yu nail milkhaoq bha yaqkav ya jiovq ail nail ngaol. Yu nail jeq-e jaq-a juq, aqyu juq nail aqyanq kev lee-u phao kev dai, Yeiqlulsaqlaiq meenq bha ya naoq thaiq nail ngaol” dai, ge bhiq-a nail ngaol.
Tsaol-aq nail Yaqyov yavq kha lee nail ganl
25Yeiqsul gaoq ge nail: “Aq-u phao, nl ma, bhala khi aqgil nail lavqkhoel bhai bhi heeq bhi moel nail juq dov lee nail ngaol. Iqyaq iqma khi ulcuvq eel khaol juq aqthel meel dee dee-i mail, miltsaq khe jeq-e jaq-a juq noeq-u maq dov dai, pevq-ail khi, noeq haq dee dee nail ngaol. 26Miltsaq kovtavq bhai jaol nail tsaol-aq juq, kev lee thel lee thail thaiq nail ganl al juq bhai saol-nvq daiq-u phao, gee sil dee dee nail ngel-i mail, mavq lai-a nail ngaol. Khul khi mail dai ngal-aq neq, nqtavq khe bhaqaoq juq luv luv dai, dao lal nail ngaol. 27Aq-u phao, tsaol-aq nail Yaqyov neq, eeq dee dee nail seiqleiq khaoqsail khi bhaqaoq nail lavqkhoel nee nqdil jeeq khi yavq kha lee nail bhai aqyu juq ya moel nail ngaol. 28Niil juq iqmoeq ilmoeq pevq lal-u phao, uqhuq bavq dil khi hel daiq yaoq. Khul khi mail dai ngal-aq neq, nul juq bhai hevq kovq lee nail aqyanq aqjail jail lal-aoq nail ngaol” dai, ge bhiq-a nail ngaol.
Heeq guq aqbhaol bhai hel daiq khi tsel pav kivq nail ganl
29Yeiqsul aqyu juq bhai daoqma uqhuq daoq nee cavq bhiq cov bhiq-a nail: “Heeqpuv aqbhaol khi aqbhaol iqsanl bhai hel daiq yaoq. 30Bhoenaiq naiq lal haq neq, jaolla yanq dov lee aiq nial dai, nul juq yovqgavq bhai yovqgavq hel daiq khi heeq nia nail ngaol. 31Al hai dul dai, nul juq al juq iqsanl mail pevq lal nail bhai ya moel-u phao, Miqyail Milkhaoq kev lee-aoq thaq nail ngaol dai, heeq kivq-ai thaq yaoq.
32Ngal nul juq bhai mal dil dai, ge lavq bhel. Yeel niil yeel maq gil-u nee mail, al juq iqsanl mail pevq lal nail ngaol. 33Nqtavq khi miltsaq peivq ail nail ngaol. Thail hai ngaol-aoq, ngaq nail daoq neq, maq peivq ail dei-eiq” dai, ge bhiq-a nail ngaol.
Aqgeel geel dai, jaol yaoq
34-35Yeiqsul gaoq ge nail: “Nul juq aqmeeq-ai yaol phaol yaoq. Maq yaol phaol haq neq, al jaiq jaq jel khi, jil pheeq daol bov khi, miltsaq bhai jaol-u phao khaoqlaol nail phaq bhaq da nee, nul juq nail neema noeqdee noeqdeel khi jaol-u phao, bavgavq bhai phee lai nail khe-ai aqn aqyanq al, nul juq nail kovtavq bhai thaiq phuq dai, kev lee nail ngaol. Aqn al n neq, miltsaq khe khal jaol nail tsaol-aq iqsanl nail kovtavq bhai kev lee nail ngaol. 36Al heel ngel-i mail, kev lee thail thaiq nail al juq iqsanl bhai nul juq ya jel-ail khi, tsaol-aq nail Yaqyov nail sivtavq bhai thul phaol kivq dai, khaq mao iqsanl, geeqlaoq hal hal ail aqgeel geel dai jaol yaoq” dai, ge bhiq-a nail ngaol.
Yeiqsul uqhuq thaoq nail ilkhaol il ma bhai cavq bhiq cov bhiq nail ganl
37Yeiqsul neq, yaoq n yaoq n nee n-gaol phao uqhuq thaoq nail ilkhaol il ma nail lavqkhoel bhai cavq bhiq cov bhiq nail ngaol. Nqkiv phao neq, Saqloq gaoqjaoq bha yavq lai nail ngaol. 38Tsaol-aq iqsanl mail Yeiqsul-i mail cavq nail cov nail daoq bhai nal daiq nail dai khi, nqhao navqmav ail uqhuq thaoq nail ilkhaol il ma nail lavqkhoel bhai, aivq jaol nail bha jil lal nail ngaol.
ప్రస్తుతం ఎంపిక చేయబడింది:
Lulkavq 21: aeu
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2016, Wycliffe Bible Translators, Inc. All rights reserved.