Luka 20
20
Yuda Ŋei Ŋetneŋo Yesu Qesonka Rakoi, “Ge maŋo Biragange”
1Kaiwe maneo, Yesu eŋe Kaisale wane Bakom Urumgo okora more, ŋei ŋerep magu kisi maep don edange, pakiso Kaisale wane mosop ŋei suwaine ŋetne so Kaisale papa togon welaine ŋei, Skribe, so Yuda ŋei suwaine eŋe sari, 2Yesu qesonka rakoi, “Ge yatne Kaisale wane Bakom Urum koto qole qole ŋei esoponine, eya maŋo ra golatki okanine? Ge maŋo biragange?”
3Yesu eŋe yale waka mainge edange, “Na yaleka ŋine qeso qeson weku qesonŋunbe, nolatpi. 4Yohane doku tau tau wane urata, eya qeliwo ŋine wakonge, me ŋeiwo ŋine wakonge?”
5Eŋe yale ra qesonongi, eŋe dere more eŋe edomka sorin nagukoi, “Daleo raikene? Ŋene raikene, ‘Eya Kaisale wano ŋine wakonge,’ yale ra olatŋem, eŋe rayake, ‘Ŋine onoka wane eya mi dere malipkakoi.’ 6Ŋo, ŋene raikene, ‘Eya ŋeiwo ŋine wakonge,’ eyamo ŋei ŋerep magu eŋe mo detmami, Yohane eŋe Kaisale wane qelit ŋei mane, eya wane ŋene wesiŋo ŋenguwi seukkene.” 7Eya wane, eŋe don iwa yale mainge olatkoi, “Yohane wane urata eya diyao ŋine wakonge, ŋene mi detmaine.”
8Eŋe yale rauso, Yesuŋo edange, “Na yalewaka maŋo nolatki okanile, eya na maine mi ŋidanikale.”
Wain Eu Wane Don Rokop
9Pakiso, Yesu eŋe don rokop iwa yale edane rake, “Naso maneo, ŋei maneŋo wain eu ebore, eu yewa ŋei natne eŋane meteeno motki, edo urata yewa ware mageu, eŋine eya qelige lobo kepe amaŋ yewao ari geke. 10Yewa ari geki wain wele menaŋgi, eu welaine eŋe qelit medepine mane birakaki, eu ware warekoune eŋano ariki, eŋe wele natne manbi, ma sariyakane arike. Ŋo eu ware ware eŋe wiye qelit medep yewa malipka kiŋ quŋ qe esopkau, eŋe zinge yaup metineka arike. 11Arikiso, eu welaine eŋe qelit medep mane koso birakaki sariki, eya eŋe yalewaka manerop matalika esopkau, eŋe zinge metineka arike. 12Pakiso, eŋe soringe, koso qelit medep mane birakaki ariki, eŋe koso ziwem qe esopkakoi. 13Pakiso, eu welaine eŋe rake, ‘Na dalino okanikale? Na siluŋ koso gipone wekuku wemedep iwa birakaikale, eŋe naŋane medep nae kotoo ŋine, eya wane aŋaine maine teweke more ewine kitokei!’ 14Ŋo eu ware ware ŋei eŋe medep yewa ka more, auye rakoi, ‘Medep yewa eŋe ge mage, magainane eu iwa ŋebu ma more, eya wane welaine okane wareoniyake, eya wane ŋene qeŋem seukkiso, ŋedo eu iwa wane welaine okane warekene.’ 15Eya wane eŋe ma more euwo esopka ari mage qeu seukke.”
Yesu eŋe raki qoeki, qesonone rake, “Pakimo eu welaine eŋe ware ware eya korop daleo okanoniyake? 16Eŋe sari eu ware ware yewa korop enguki seukwarekei. Pakimo eŋe koso eu ware ware musele ma wakone biraoniyake.”
Ŋei ŋerep eŋe don eya dere more rakoi, “Eŋe masi yale mi mayake, midakaka!”
17Yesuŋo eŋano lolike pore more, qesonone rake, “Ŋine Kaisale wane ekap iwa wane kine mi detlukkamami,
‘Mat mama urata ŋei eŋe mat wane bosiŋ mane eya edo pelekine ra more, qikka more yeine birakoi, wane ŋado Kaisaleŋo bosiŋ eya maki mat wane banega bosiŋ togogole mane okange.’
18Na ŋidanmaile, ŋei maneŋo banega bosiŋ eya wane kutno ket rasuyakeo, eŋane solaine korop sisi sisi kitatwareyake, so bosiŋ eyaŋo ŋei mane kutno kesiyakeo, eŋe rasu pelelekki siukeyake.”
Ŋei Edo Roma Kepe Ware Ware Suwaine Takis Manikei Wane Yesu Qesonkakoi
19Yesu eŋe yale ra edangi qoekiso, Kaisale wane mosop ŋei suwaine ŋetne so Kaisale wane papa togon don wane welaine ŋei, eŋe Yesu malipka wokom-kaikei wane okangoi, eya mo eŋe detpi, Yesu eŋe don rokop eya eŋano more rake, eya wane. Ŋo ŋei ŋerep eŋe Yesu wane don dere siminonge, yewa wane Yuda ŋei ŋetne eŋe kaetongi, Yesu qeliŋkakoi. 20Yuda ŋei ŋetne eŋe sotene osike, paki eŋe numa mane maratka more, Yesu liwek-kaikei wane zuwaŋgoi. Eŋe yale okane ŋei natne wesi ebone more edangoi, “Ŋine Yesu wano ari qeso qeson isisine liwek kaikei wane arikei.” Eŋe Yesu Roma kepe ware ware suwainane, ŋei waom Yuda kepeo geke, eŋane meteo birakaikei wane okangoi. 21Ŋei isisine eyaŋo Yesu wano ari olatkoi, “Kito ebo ebon, ŋene ge detganmaine. Ge ŋei ŋerep koboboine kito edanmaine. Ge ŋei mane wane mi kaetgan okanmaike. Ge ŋei ŋerep natne don mane edane more, ŋei ŋerep magu natne mane mi edane okanmaine. Ge don wele so Kaisale wane masi koboboine ŋei ŋerep korop sikanon okanmaine. 22Ŋenze ra rokop donze eya wane ge dalino detmaine? Maine ŋene takis Roma kepe ware ware suwaine manikene, me mida?”
23Ŋo Yesu eŋe isisiene eya mo detone more, edane rake, 24“Ŋine wesi yewa mane ma sari sikannanikei.” Yesuŋo wesi eya ka more qesononge, “Oŋa oŋa wesi solaino iwa so eŋet iwa maŋane?”
Eŋe rakoi, “Kepe ware ware suwaine, Sisa eŋane!”
25Pakimo, Yesuŋo eŋane donene mainge rake, “Ŋine kepe ware ware suwainane kine kine biŋek eya maine eŋe eŋine manikei. Ŋo, Kaisale wane biŋek kine kine eya maine Kaisale eŋe eŋine manikei.”
26Yewao ŋei ŋerep eŋane kaitko, Yuda ŋei ŋetne eŋe koso maine mi liwek kakoi, eŋe yeine oŋaene qaekiso, mepene qoeki metkoi.
Ŋei Edo Ŋei Seu Seuwo Ŋine Wisikae Wiye Wiye Eya Wane Yesu Qeson-kakoi
27Sadusi natne eŋe Yesu wano sarikoi, tego yewa eŋe ra okangoi, ŋei seuseune eŋe koso mi wisikae wiyekei, eya wane eŋe Yesu qesonka rakoi, 28“Kito ebo ebon, Moseŋo don mane iwa yale qeke, ‘Ŋei mane eŋe seukeyake, eŋe medeune midaine, ŋo, ŋanomine eŋe yeka geyake, pakimo, ŋei seukke eŋane ŋole eŋe tatine qesiŋka more, ŋerep yewa oŋo koso ma more, medep mane tatinane tungo geyakane ma wakoniyake.’ 29Ŋenane don kisi iwa detnom, naso maneo, tatiŋon 7 yale eŋe gekoi, wane tatene suwaine eŋe ŋerep mage more, medep mane mi ma wakone more, eŋe yaupka seukke. 30Pakimo, ŋole kebaŋine oŋo tatinane mala eya make, eŋe yaleka medep mane mi ma wakone more, eŋe yaupka seukke. 31Pakimo, ŋole ŋorikine eŋe yalewaka okange, yalewaka tatiŋon 7 yewa eŋe ŋerep yewa makoi, ŋo medep mane mi ma wakone more, eŋe yaup seukwarekoi. 32Pakimo, ŋerep yewa eŋe yalewaka boaŋ ŋado ge mage more seukke. 33Eya wane boaŋ ŋei seuseune eŋe wisikae wiyekei, naso yewao ŋerep yewa eŋe maŋane ŋerep biŋek okaniyake? Ŋei tatiŋone 7 eŋe ŋanomene weku yewa makoi.”
34Yesu eŋe don kisi dere more mainge edange, “Kepo naso iwao, ŋei so ŋerep eŋe ŋao ŋanom gemami, 35Ŋo ŋei so ŋerep koboine okanmami, Kaisaleŋo eŋe deŋesereo ŋine maki wisikae wiyekei, naso yewao, eŋe koso ŋao ŋanom mi gekei.
36Eŋe qeliwo aŋelo yale gekei, eŋe maine mi seukkei, Kaisaleŋo ŋei ŋerep eya deŋesereo ŋine maki wisikae wiyekei, naso eyao eŋe Kaisale wane medewekoune okanikei. 37Ŋei seuseune eŋe wisikae wiyekei, eŋane don mo Moseŋo kibiwo qeke eyaŋo sikanŋonmaike, eki nigatne zeke, naso yewao Waom Kaisale wane iwa yale ra more qeke, “Eŋe Abraham wane Kaisale, so Isak wane Kaisale, so Yakop wane Kaisale gemaike. 38Kaisale eŋe ŋei wisika gemami, eŋane Kaisale, eŋane deo ŋei ŋerep eŋe korop ge waremami. Eŋe ŋei seuseune eŋane midakaka.”
39Yale rakiso Kaisale papa togon welaine ŋei natne, Skribe, eŋe olatkoi, “Kito ŋebo ŋebon, ge don eya wekumane ramaine!” 40Ŋo Sadusi eŋe zonomene midaki kaet okane more eŋe koso qeso qeson mane mi qesonkakoi.
Yesu Eŋe Ŋei Ŋerep Mesiya Wane Edange
41Pakiso, Yesu eŋe ŋei ŋerep qesonone rake, “Ŋei natne eŋe dalino Mesiya wane ramami, eŋe Dawit wane ŋaboine kepeo ŋineka? 42Dawit oŋomka Bakom Eŋet ekapko qeke,
‘Kaisale Magak Suwaineŋo naŋane suwaine Mesiya iwa yale olatke, ge naŋane wonnoken mesikene, 43Ŋado noŋo geŋane ŋabakopŋone, eŋe eya biraonbe, geŋane kiyeŋonane bano mesikei.’
44Dawit oŋom Mesiya iwa yale orake, ‘Naŋane Waom suwaine,’ ŋo, ŋei natne naso iwao gemami, eŋe ra okanmami, Mesiya eŋe Dawit wane ŋaboine kepeo ŋineka. Mi kopkemaike! Kristo eŋe Dawit wane ŋaboine so Kaisale wane gipole weneŋ.”
Yesu Eŋe Kaisale Papa Togon Welaine Ŋei Skribe Eŋane Girem Don Yale Ra More Dokoine Edange
45Ŋei ŋerep magu eŋe Yesu wane don dere metpiso, Yesu eŋe zinge dokoine edange, 46“Ŋine Kaisale papa togon welaine ŋei, Skribe, eŋane kaulukkei, eŋe takot kiroine kibinerop bira more arikei wane siminon okanmaike. Eŋe lewa lewaŋ sobego geu ŋei ŋerep edo one mawa one more, eweene kitou ge okanmami, eya wane siminonmaike. So epa kebu eyao, so Yuda lewa lewaŋ urum koto eŋe metmet ŋetno mesikei wane okanmami. 47Yale okane more, ŋerep mala isione more, eŋane mat omaon okanmaŋkei. Omaone more, eŋe ari Kaisale wane Bakom Urum koto ŋei ŋerep eŋane deo okora, Kaisale wano meŋe meŋen kiroroine meŋenka okanmaŋkei. Ŋei yaline yewa eŋe ge mage ŋado Kaisaleŋo wikile suwaine eboniyake.”
ప్రస్తుతం ఎంపిక చేయబడింది:
Luka 20: onsNT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2012, Wycliffe Bible Translators, Inc. All rights reserved.