San Juan 3
3
Nicodemo Jesú meꞌrã ucũꞌque niꞌi
1Niꞌcʉ̃ fariseo masʉ̃ Nicodemo wãmetigʉ niwĩ. Cʉ̃ ãpẽrã judío masã wiorã meꞌrã niwĩ. 2Niꞌcã ñami Nicodemo Jesú tiropʉ ĩꞌagʉ̃ etawĩ. Jesure ucũwĩ:
—Ʉ̃sãrẽ buꞌegʉ, Õꞌacʉ̃ mʉꞌʉ meꞌrã nimi. Tojo weegʉ cʉ̃ tutuaro oꞌoro meꞌrã mʉꞌʉ weeĩꞌomasĩꞌi. Mʉꞌʉ weeĩꞌoꞌquere ĩꞌarã, ʉ̃sã aꞌtiro masĩꞌi. Õꞌacʉ̃ ʉ̃sãrẽ buꞌedutigʉ mʉꞌʉrẽ oꞌópĩ.
3Jesú cʉ̃rẽ niwĩ:
—Mʉꞌʉrẽ nirõta nigʉ̃ti. Ne niꞌcʉ̃ ne waropʉ cʉ̃ bajuanʉꞌcãꞌcaro weronojõ bajuaapotigʉ, ne Õꞌacʉ̃ tiropʉ waꞌamasĩtisami.
4Nicodemo cʉ̃rẽ sẽrĩtiñaꞌwĩ:
—¿Deꞌro basiobosari marĩ bʉcʉáca beꞌro apaturi majãmisãjãa, marĩ paco ya paapʉ bajuacã tja? Marĩ pacopʉre apaturi bajuamasĩtisaꞌa.
5Jesú cʉ̃rẽ yʉꞌtiwĩ:
—Mʉꞌʉrẽ diacjʉ̃ta nigʉ̃ti. Ne aco meꞌrã wãmeyenoꞌtigʉ, tojo nicã Espíritu Santu dʉcayunoꞌtigʉ, Õꞌacʉ̃ tiropʉ sãjãamasĩtisami. 6Masã põꞌrã masãta nima. Náta tja Espíritu Santu meꞌrã bajuaaporã, Õꞌacʉ̃ põꞌrã waꞌasama. 7Yʉꞌʉ “Nipeꞌtirã ne waropʉ bajuanʉꞌcãꞌcaro weronojõ apaturi bajuaaporoʉaꞌa” nisere tʉꞌogʉ, tʉꞌomarĩaticãꞌña. 8Espíritu Santu meꞌrã dʉcayusere ucũgʉ̃ weeꞌe. Espíritu Santu wĩꞌrõ weronojõ nimi. Wĩꞌrõ noꞌo ʉaro bʉsʉ wẽetuuwãꞌcãsaꞌa. Masĩnoꞌña marĩꞌi, ¿noꞌopʉ cjase aꞌtiapari? “Topʉ waꞌaro weeꞌe”, ninoꞌña marĩꞌi. Te weronojõ Espíritu Santu masãrẽ apaturi bajuaapocã weese ĩꞌanoꞌña marĩꞌi, niwĩ Jesú.
9Nicodemo sẽrĩtiñaꞌwĩ tja:
—¿Deꞌro wee Espíritu Santu meꞌrã bajuata basiosari?
10Jesú cʉ̃rẽ yʉꞌtiwĩ:
—¿Mʉꞌʉ Israe curuacjãrãrẽ Õꞌacʉ̃ ye cjasere buꞌegʉ nimigʉ̃, aꞌtere masĩweti? 11Mʉꞌʉrẽ diacjʉ̃ta nigʉ̃ti. Ʉ̃sã masĩsere, ʉ̃sã ĩꞌaꞌquere mʉsãrẽ werewʉ. Mʉsã ẽjõpeoweꞌe. 12Aꞌti nucũcã cjasere yʉꞌʉ ucũcã marĩcãrẽ, mʉsã ẽjõpeoweꞌe. Ʉꞌmʉse cjasere yʉꞌʉ werecãma, nemorõta yʉꞌʉre ẽjõpeotibosaꞌa.
13»Ne niꞌcʉ̃ masʉ̃ ʉꞌmʉsepʉre waꞌañaꞌdijatiꞌcʉ marĩmi. Yʉꞌʉ niꞌcʉ̃ta ʉꞌmʉsepʉ níꞌcʉ dijatiwʉ. Yʉꞌʉ Õꞌacʉ̃ macʉ̃ masʉ̃ weronojõ upʉtigʉ ʉꞌmʉsecjʉ̃ niꞌi. Tojo weegʉ yʉꞌʉ ʉꞌmʉse cjasere masĩꞌi.
14»Dʉporopʉ yucʉ marĩrõ, masã marĩrõpʉ Moisé aña queose na weeꞌcʉre ʉꞌmʉarõ yucʉgʉpʉ yoocʉ niwĩ. Moisé añarẽ weeꞌcaronojõta masã yʉꞌʉre ʉꞌmʉarõpʉ yoorãsama. 15Nipeꞌtirã yʉꞌʉre ẽjõpeorã, pecameꞌepʉ waꞌasome. Õꞌacʉ̃ meꞌrã catinuꞌcũrãsama, niwĩ Jesú.
Õꞌacʉ̃ cʉ̃ macʉ̃ niꞌcʉ̃ nigʉ̃rẽ oꞌóꞌque niꞌi
16Õꞌacʉ̃ aꞌti nucũcãcjãrãrẽ ʉpʉtʉ maꞌígʉ̃, cʉ̃ macʉ̃ niꞌcʉ̃ nigʉ̃rẽ oꞌócʉ niwĩ. Te meꞌrã nipeꞌtirã cʉ̃ macʉ̃rẽ ẽjõpeorã, pecameꞌepʉ waꞌasome. Na cʉ̃ meꞌrã catinuꞌcũcãꞌrãsama. 17Õꞌacʉ̃ aꞌti turicjãrãrẽ buꞌiri daꞌregʉti nígʉ̃ mejẽta cʉ̃ macʉ̃rẽ oꞌócʉ niwĩ. Narẽ yʉꞌrʉogʉ peꞌe tojo weecʉ niwĩ.
18Õꞌacʉ̃ cʉ̃ macʉ̃rẽ ẽjõpeorãrẽ buꞌiri daꞌresome. Cʉ̃ macʉ̃ niꞌcʉ̃ nigʉ̃rẽ ẽjõpeoticã pũrĩcãrẽ, buꞌiri daꞌregʉsami. 19Aꞌtiro niꞌi. Jesucristo sĩꞌose weronojõ nimi. Cʉ̃ Õꞌacʉ̃ yere ĩꞌogʉ̃ aꞌtiwĩ. Cʉ̃ aꞌticã, aꞌti nucũcãcjãrã cʉ̃rẽ ʉaticãrã niwã. Cʉ̃rẽ ʉaronojõ oꞌorã, ñaꞌarõ weese peꞌere ʉaripejayurã, naꞌitĩꞌarõpʉ nirã́ weronojõ nicãrã niwã. 20Nipeꞌtirã ñaꞌarõ weerã́ Õꞌacʉ̃ macʉ̃rẽ ʉatima. Na ñaꞌarõ weesere bajurẽcã ʉatirã, cʉ̃ pʉꞌto nisĩꞌrĩtima. 21Añurõ weerã́ peꞌe cʉ̃ pʉꞌto sirutuma. Na tojo weecã, nipeꞌtise na weesere “Õꞌacʉ̃ ʉaronojõ weema”, bajuyoropʉ ni masĩnoꞌo.
Juã wãmeyeri masʉ̃ Jesú yere ucũꞌque niꞌi
22Jesú Nicodemorẽ ucṹca beꞌro Judea wãmetiropʉ ʉ̃sãrẽ cʉ̃ buꞌerãrẽ sʉꞌori waꞌawĩ. Topʉre masãrẽ wãmeyerã, yoacurecãpʉta niwʉ̃. 23-24Juã wãmeyeri masʉ̃ cʉ̃rẽ buꞌiri daꞌreri wiꞌipʉ sõrõatji dʉporo cʉ̃ quẽꞌrã wãmeyegʉ weewĩ Enón wãmetiri macãpʉ. Enón Salim wãmetiro pʉꞌto niwʉ̃. Topʉre dia pajiri maa niwʉ̃. Masã cʉ̃ tiropʉ wãmeyedutirã waꞌawã.
25Cʉ̃ tojo weeri cura niꞌcã nʉmʉ Juã buꞌesere siruturã niꞌcʉ̃ judío masʉ̃ meꞌrã dʉꞌsasowãꞌcõcãrã niwã. Judío masã coewʉasenojõ meꞌrã dʉꞌsasocãrã niwã.
26Tojo waꞌáca beꞌro cʉ̃ buꞌerã Juãrẽ nicãrã niwã:
—Ʉ̃sãrẽ buꞌegʉ, sõꞌonícatero Jordã́ siaquijipʉ mʉꞌʉ meꞌrã níꞌcʉ, ʉ̃sãrẽ mʉꞌʉ wereꞌcʉ niꞌcãrõacãrẽ cʉ̃ wãmeyegʉ weeami. Nipeꞌtirã cʉ̃rẽ siruturã weeama.
27Juã narẽ yʉꞌticʉ niwĩ:
—Õꞌacʉ̃ dutíticã, masã cʉ̃rẽ sirututibosama. 28Mʉsã yʉꞌʉ wereꞌquere tʉꞌotojawʉ. Yʉꞌʉ “Õꞌacʉ̃ beseꞌcʉ mejẽta niꞌi”, niwʉ̃. Yʉꞌʉ cʉ̃ dʉporo oꞌóyumʉꞌtãꞌcʉ niꞌi. 29Aꞌtiro peꞌe niꞌi. Niꞌcʉ̃ omocã dʉꞌtecã, cʉ̃ nʉmo cʉ̃ yago seꞌsaro nisamo. Cʉ̃ meꞌrãcjʉ̃ cʉ̃ dʉꞌtecã ĩꞌagʉ̃, eꞌcatitamusami. Jesú ãꞌrĩ omocã dʉꞌteꞌcʉ weronojõ nimi. Masã cʉ̃rẽ siruturã cʉ̃ nʉmo weronojõ nima. Tojo weegʉ yʉꞌʉ cʉ̃ meꞌrãcjʉ̃ masã cʉ̃rẽ sirutucã ĩꞌagʉ̃, eꞌcatitamuꞌu. 30Masã ĩꞌorõpʉ cʉ̃ siape meꞌrã yʉꞌʉ buꞌipʉ waꞌagʉsami. Yʉꞌʉ peꞌe mejõ nigʉ̃ tojagʉ́saꞌa, nicʉ niwĩ Juã cʉ̃ buꞌerãrẽ.
Õꞌacʉ̃ macʉ̃ ʉꞌmʉsecjʉ̃pʉ aꞌtiꞌque niꞌi
31Juã cʉ̃ buꞌerãrẽ ninemocʉ niwĩ tja:
—Jesú ʉꞌmʉsepʉ aꞌtiꞌcʉ nipeꞌtirã yʉꞌrʉoro nimi. Aꞌti diꞌtacjʉ̃ aꞌto cjasere ucũsami. Ʉꞌmʉsepʉ aꞌtiꞌcʉ peꞌe nipeꞌtirã yʉꞌrʉoro nimi. 32Cʉ̃ ʉꞌmʉsepʉ ĩꞌaꞌquere, cʉ̃ tʉꞌoꞌquere ucũsami. Ne niꞌcʉ̃ cʉ̃ ucũsere ẽjõpeotisami. 33Tojo nimicã, noꞌo niꞌcãrẽrã cʉ̃rẽ ẽjõpeoma. Na cʉ̃rẽ ẽjõpeorã, “Õꞌacʉ̃ diacjʉ̃ta ucũmi”, ni ĩꞌoma. 34Õꞌacʉ̃ Jesucristore Espíritu Santure cʉoyʉꞌrʉmajãcã weecʉ niwĩ. Tojo weegʉ cʉ̃ pacʉ yere ucũmi. 35Õꞌacʉ̃ cʉ̃ macʉ̃rẽ maꞌígʉ̃, nipeꞌtisere, nipeꞌtirãrẽ dutimasĩsere oꞌocʉ niwĩ. 36Cʉ̃ macʉ̃rẽ ẽjõpeorãnojõ catinuꞌcũsere cʉoma. Cʉ̃rẽ ẽjõpeosĩꞌrĩtirã peꞌe Õꞌacʉ̃ tiropʉ waꞌasome. Õꞌacʉ̃rẽ ʉpʉtʉ buꞌiri daꞌrenoꞌrãsama.
ప్రస్తుతం ఎంపిక చేయబడింది:
San Juan 3: touC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2005, Wycliffe Bible Translators, Inc. All rights reserved.