Mat 15
15
Yesu apani ní baka ba bidɔ basɛbasɛ ʋɛ su
1Lɛ kede e, Farisianɛatɔ ni Ɔsã nɔ badɔbasɛ batɔ bɛdɔ ní Yerusalem i ba Yesu klɔ, lɛ beʋi ye si, 2“Ege lɛ loso wɔ badɔkpasi ba bɛyurɔ blɔ bakatsi ba bidɔbasɛbasɛ ʋɛ na a? Baʋíplo awla ní ɔkɔ lɔ onu xe bizɛŋa bidɔ ɔ!”
3Lɛ Yesu ebu le onu si, “Ege lɛ loso mlɛɛta Aya isã nɛ ese xe mlevu mlɔ ɔtutɔ mlɔ bidɔbasɛbasɛ ʋɛ awla na a? 4Lɛ ese linu si Aya apani si ‘Kpɛ kubùbù ní wɔka ni wone su,’ lɛ ‘Ɔnɔ kakaa gi izeexo ifi ikpɛ yɛka loo yene e, lilɛ si beye ye. 5Pɔ̀ mlɛbasɛ bidɔ si, xe kidɔ kiliɛ obi ɔtɔ awla gi aatani kɛ kukɔpɔni yɛka loo yene e pɔ̀ xe apani si, ‘Aya bidɔ binu i,’ 6líziã si odi yɛka loo yene aʋa tɔ ɔ. Gani kude uliɔ ya aʋa ɛ, mlegbe Aya yɛ ɔsã nɔ, lɛ mlekuni mlɔ tutɔ mlɔ ɔkɔ lɔ kude e. 7Aŋu mɛ beboebitɛ mlenu! Anukwarɛ Yesaya edo aplɛ ní mlɔ su si! Aya apani si;
8‘Banɔaya, bɛkpɔ̀ mɛ nì ba enugumeboe la,
pɔ̀ ba ina nɛ idzi kede ni mɛ su u.
9Libi i tɔtɔ líma lɛ mɛ si besumu me e,
lɛ ese linu si bɛ basɛ banɔ batrɔtrɔ ŋwisi bɛ binu mɛ ba isã nɛ na a.’ ”
Kidiliɛ gi kize lulu ɔnɔ ɛ
10Lɛ Yesu axwa linɔkpi le mani isu ya lɛ asi ba si, “Mláta kutu tɔ mlenu! 11Aní kidiliɛ gi kize eku ɔnɔ onugu lo me e, kɛ kize lulu ye ní ɔkɔ lɔ onu u, boŋu i eboa la gi izedo edɔní yɛ onu i, la izelulu ye.”
12Lɛ yɛ badɔkpasi ba bɛba yɛ klɔ lɛ beʋi ye si, “Wote si eboa la gi wɔpani i eeyeʋi Farisianɛ ma na a?”
13Yesu ebu le onu si, “Ose kakaa elu gi aní Mɔka ní lifunu ne yɛ akpɛ lɔ ɛ, biakpaʋi lɔ. 14“Mlakífuɛ ni ba; Kuŋupo benu xe bɛgbani kuŋupo o, lɛ xe kaŋupo kɛgbani kaŋupo e, ba tiaʋa pɔ́ biìdɔ eku ní lizokpo me.”
15Petro azɛ liboe le yɛ onu si, “Dra abee liɛ ya su ki blɔ.”
16Lɛ Yesu asi ba si, “Kɔ mlenu mɛ badɔkpasi pɔ̀ mlenu liboe lɛ ya ese ŋwi banɔ gɔgɔ ba lo o?” 17Kɔ mléte si kidɔ kakaa gi kiza eku ɔnɔ yɛ onugu lo me, yɛ lipo le me kizɛtrɛ kɔ ɔniɛ azɛɛdzi bɛ na a? 18Pɔ̀ eboa la gi izeedo ega onugu lo me e, edɔ yɛ ɔna nɔ mɛ, lɛ la enu kidiliɛ gi kizelulu ɔnɔ ɔ. 19Lɛ ese linu si, dɔni yɛ ɔna nɔ mɛ ɛ, niklɔ begyodi nyani nyani ʋa, kí kunɔye, kihasiwawa, ɔnɔ su kuzizizizi; adzɛ ni enyimeboe, kuzé, ni asia kusɛsɛ, kalɔa ani ligbãzeze zimizi kakaa elu bizɛdɔ. 20Kiboebitɛ liɛ ya elu i, kɛ kizelulu ɔnɔ. Pɔ̀ tɔ ŋa bidɔ awla moplo e, biʋílulu ɔnɔ.”
Ɔdzɛ ɔtɔ yɛ kuziŋa
21Agi Yesu asɛ ní niklɔ ɛ, atrɛ ní kesea klɔ mɛ gi Tiro ni Sidɔn balɛ ɛ. 22Lɛ Kanandze ɔtɔ gi ádɔ ní kusio klɔ ɛ, aba Yesu klɔ lɛ akpɛ ozi si, “Ɔkaɛ Dawid yɛ lipo me obi ye! Di me asigaga! Ɔfuɛfuɛ zimizi ɔtɔ ɔkpasi mobidzɛ mɛ, lɛ ɛkpɛ yɛ kunugu yo o.”
23Pɔ̀ Yesu ɔ́yaka yɛ ɛ. Lɛ yɛ badɔkpasi ba beti apɔni yɛ lɛ bɛki yɛ litukpo si, “Kítɔ ɔsɛ! Ɔlɛ ni blɔ kude gi ɛkpɛ blɔ kutoku u!”
24Lɛ Yesu ebu le onu si, “Israel ɔlɛ ŋwisi iʋesi lɛ klɔ gi ilila ɛ, lɛ bakɔ ko bɛkpɛ mɛ ɛ.”
25Niklɔ ɔdzɛɛ aba dɔ yɛ aklamasi na aʋa ní Yesu ketu ya lɛ asi yɛ si, “Ɔkaɛ, pɔni mɛ!”
26Lɛ Yesu ebu le onu si, “lima si bakɔ banuvɔ ba bidɔŋaŋa ʋɛ aŋwia aplɛ akí kudroʋio.”
27Lɛ ɔdzɛɛ ebu le onu si, “Nite ɖii lilɛ, Ɔkaɛ, pɔ̀ kudroʋio fɛ kuzɛɛŋa bɛ klɔ gi biwɔli dɔnɔ kɔ ɔkaɛ yɛ ɔdɔŋakplɔ nɔ aʋa ɛ.”
28Lɛ Yesu ebu le onu si, “Ɔdzɛ wɔ kuziŋaa kwikeme koŋ! Kidiliɛ gi wɔɛpɛ ɛ kiaba kɛ mɛ ɔki wɔ.” Lɛ ní lipoe lɛ klɔ mɛ ɖi i yebidzɛ ayɔ.
Yesu ayɔ nì banyanya glegle
29Agi Yesu asɛ niklɔ ɛ, edzi aba Galilea limu ne kutu. Emu ketokpaa lɛ eze ní kesea ɛ. 30Anɔkpi ʋidi atɔ ɛba yɛ klɔ, gi ɛmani bafa ba, kuŋupoo, banɔ klɔʋiklɔʋi ba, imumu ne ani bànya ede ede banyanya ba ní Yesu klɔ, nite si ayɔ ni ba pɔ́. 31Banima inugu itse gi bɛmɔ imumu ne gi iigu kunugu yo, banɔ klɔʋiklɔʋi ba gi bɛɛga, bafa ba bɛyɔ ɛga, lɛ kuŋupoo fɛ kwimɔ ɛ. Nite si bɛkpɔ̀ Israel Aya.
Yesu aga ni banɔ akpe tiene
32Yesu axwa yɛ badɔkpasi ba amanɔ ní yɛ isu ya, lɛ asi ba si, “Banɔaya ba liboe liiga mɛ asigaga, lɛ ese linu si balɛ ní mɛ su ewe tata lɛ abla ɛ, kididɔ fɛ kíma gi biaŋa a. Mápɛ si basɛ nì lipo me pluplu u, xegi ani nite e, biatɔ ɔpiti ní kudeo me e.”
33Lɛ yɛ badɔkpasi ba beʋi ye si, “Nifɔ kwitramɔ kiŋaŋa ɛki linɔkpii lɛ ní ɔyaya klɔ ya na a?”
34Yesu eʋi si, “Aklã tasɛ alɛ ní mlɔ awla a?”
Lɛ bebu le onu si, “Aklã tegloele ni akpa sisami atɔ.”
35Lɛ Yesu aki si linɔkpi le lize ní kesea ɛ. 36Lɛ akɔ aklã tegloele la ni akpa la, lɛ gi edo Aya ɖase e, ayaʋi la mɛ, lɛ akɔ la aki yɛ badɔkpasi ba ɛ; lɛ yɛ badɔkpasi ba bɛkɔ la ɛki banima ɛ. 37Ba pɔ́ bɛŋa gi beke e. Lɛ kede e, biŋaŋa gɔgɔɛ klɔ gi badɔkpasi ba bɛhali i, biyi kusɔʋi tugloele. 38Banama gi bɛŋa bidɔ mɛ ɛ, ba kiklaklaɛ mɛ kize benyime akpe tiene gi bákla badzɛ ni bebi akpɛ lɛ mɛ ɛ.
39Agi Yesu akpɛ ba kude pɔ ɛ, eku katapokpaa trɛ ní Magadan kesea mɛ ɛ.
ప్రస్తుతం ఎంపిక చేయబడింది:
Mat 15: avn
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc