Matiyò 12

Ghɨt a Falàsî ghɨ le buf yi gha kum tuk wu laku ghɨt a Jûs

(Mâk 2.23-28; Lûk 6.1-5)

1Tuku tî yû wu tuk wu lak wule, Jisòs ghê jùmtìbàmsù wunsu hì tohne chyâ yi bat yi saŋa bota yile, jɨ̀ŋ hì yafa jùmtìbàmsù wunsu, ghɨna shìki yole tû saŋu, kutâ. 2Ghɨt a Falàsî ghɨ le yen shìki jîs ha Jisòs na “Yen gha ye jùmtìbàm sasu nè wu tuk wu laku saki bime wi!”

3Jisòs fîsì ha ghɨna na, “Ghàn tà taŋ yu jə gha ye Defìt tì ne te jɨ̀ŋ ndùku yafa wun nì ghɨt a wuna agha? 4Wù lyi yen a ndâ Fùyèn nì ghɨt a wuna, lyi yə mwə̀ mù yə̂mù Fùyèn, saki chwûtè na à yə kə ngàŋsù ndâ Fùyènsu. 5Ghàn tà taŋ yu kəbi sak yi Musìs na à mò nâbi wùni tuk wu laku ngàŋsù ndâ Fùyènsu hì mò hi ne yi fêt, hi khɨma sak ye yi kumà tuk mu we, biyani ma yi hi chwûtè wi na ghɨna ti ni bobhi gha agha? 6Mu jìsà ha ghàn na gha fè làwû afân, chyâ gha ndâ Fùyèn yì chìk. 7Ghàn yê hì khə gha ye luk wu ŋwàklù Fùyèn wûn jìsà ma ghàn jìsà wi na ghɨta ti ni bobhi gha teka ghɨna ni. Luk wu tɨnu jìsà na “Gha ye mu khɨŋa mò na ghàn hi kwohe seni ha ghɨta, kə ghàn hi tuhe kə nyamsu ha mu.” 8Wâ Wùt kətalò jyaka hi jìs na ghɨ ni nâbi ghə wu tuk wu laku.”

Jisòs chwuk kpen wu wûtù te wu kpo

(Mâk 3.1-6; Lûk 6.6-11)

9Te Jisòs tì jìsa mihe ni, lo yen lye a ghɨna ndâ yì chìntena. 10Wùt lè mô afû ma kpen wu wunu wule ti kpû. Ghɨt ale shìki khɨŋa wu lum hi tè ngane Jisòs, ki buf ha wun na, “Saki bimelò na ghɨ làhi chwuk a wùt wu tuk wu laku ma yi bime wi agha?” 11Jisòs fîsì ha ghɨna na, “Wùt ha ghàn shìki kəta njyə̀ à wûn, yì fən a yi be wu tuk wu laku, ma wù faŋ hi fihi? 12A wùt kokne chyâ wi njyə̀ agha? Yi ni chwùtè na saki bimelò na ghɨ ni jùŋ wu tuk wu laku.” 13Jisòs jis ni, ki jîs ha wùt mu we na, “Nàhi kpen wa.”

Wùt atɨ̂n nâhì kə wu yu, kpen wu tɨnu tâ hì mô kəbi te wule. 14Ghɨt a Falàsî fwu kə wu yu hi bakte hì ywe Jisòs.

Jisòs mò wùt wù fètana ha Yènfù

15Jisòs khɨli gha ye ghɨt a Falàsî ndùku bakte kum wûn lo afû. Ghɨta yen a wun yi bàm dô kə ni. Wù chwuk ghɨt ghe ghɨ ndùku yable a ghɨna fùtɨ̂n nâ à jɨ̀m, 16chîhì ha ghɨna na kə wùt nè fôktè gha kum yi ha wùt. 17Wù tì ni gha ye Yènfù tì jìsa tohne a fòktì Ìsayà na: 18“Wuna mò wùt we mu chwoka na wù fet ha mu. Mu kòŋàlò wûn, wù nê mu saŋlê. Mu nè folò yohnà ma ha wûn ma wu hì fòktè sak yi mi ha tumu. 19Wù bè hì gufnà wijə gha ghê wùt; wù bè hì bwate wi ha wùt, wùt bè hì ywo wi jyə̀ wûn wu fwəh. 20Jaŋ bè khɨma wi wu lùk ma ni wûn, wù bè nê wi kəbi nâ gha yi be ha wùt wù yolena hi tàn wu yu afa wù bè nê ma chilichili tâ chya be. 21Ghɨt a mbye bè hì chyə yikte kə wun wu wùn.”

Ghɨt a Falàsî hì jîsà na Jisòs fyi a jyak ha Bèlsibùl

(Mâk 3.20-30; Lûk 11.14-23)

22Ghɨt ale tî ben nì wùt ha Jisòs wu yena wi luktu, jîsà wi ma à ni a yohnà be. Jisòs chwuk wùt àtɨ̂n, wù kaha yen tu luk hì fê jîsà. 23Nâ ghɨt à jɨ̀m ghe ghɨ ndùku mô afû hì mô nì kani buf na “Ghɨ ni jìsà na wùna mò kə nâ wâ fə̀n Defìt agha?”

24Biyani ghɨt a Falàsî yu gha tɨni hì jîsà na, “Wù jùmà fihe yohnù mu wun ni beka Bèlsibùl fə̀n à yòhnù wu be fo jyaka ha wûn.”

25Jisòs khɨli kwâktì ghɨna ki jîs na, “À hì mô kəbi ghɨta a yìni laki kəta a jyàhè wùna ma lak mi ye bef à mihi. À hì mô nâbi ghɨta yi tèk makə yi sah yi nda hì kəta yi bef a ghɨna fùtɨ̂n, ma tèk mi yê makə yi sah yi nda mi ye tê timî. 26Kum ni Satàn shìki nô ngɨŋ à wûn ma fə̀n wù wunu nê timi yàni. Satàn shìki nî ni ma hi mô na wù fê kəta wi jyaka a tô mwə̀ me wù saka. 27Mu shìki jûmà fihe yohnù be nì jyaka ma à fo Bèlsibùl, ma ghɨt ghana ghe ghɨ jûmà fihe ma hi fo nde jyaka tɨna ha ghɨna? À nè chwùtè kə ghɨt mɨ ghɨ̂n na ghàn wamalò ma, ghàn jìsà hamok agha. 28À fo a yohnà Fùyènà jyaka na mu hi jûmà fihe yohnù be wûn. Te yi mò ni, yi chwùtè na fə̀n wù Fùyènù ti ben ha ghàn.

29“Ghàn fê kwâktè na wùt ni mo yàni hi lye a wùt wu tâ a ndâ hi kumte fihe mwə̀ mù wûn, bu na wù yìti kwut khɨti wùt a jyak mu we agha? Wù ki nî yani, ma wù ki chwoŋa ndâ à wûn mi yê.

30“Nâbi nde wù bu ghàh à wûn yi gha yì mòk wù ya nò mu. À hì gâmtè wi nâbi nde mu hi bakte ghɨt a Fùyènà ghàh à wûn, ma hi mô na wu sàhà yi sâh. 31Mu jìsà ha ghàn na, Yènfù làhi lèhèfo nâbi yìni be te wùt ne, hi fè lèhèfo nâbi yìni ndi ghɨ te wûn atɨ̂n, biyani à sùli nâbi nde Yohnà Yulena, ma Yènfù bê tê lèhèfo jə̀ wûn. 32À jis nâ nâbi nde gha be kum Wâ Wùt, Yènfù làhi lèhèfo wûn, biyani ma à jis nâbi nde gha be kum Yohnà Yulena, ma Yènfù bê tê lèhèfo wûn à mbye afân nì à mbye afa yì bè bênà.

Ghɨ yena khɨle fukâk a wu tam

(Lûk 6.43-45)

33Jisòs tî fi yiki na, “Wò ki jîs na kâk fù jwòfàlò wò hi kəta hi jìs na tam wu tɨnu jwòfàlò, wò ki jîs na kâk fù befalò wò hi kəta hi jìs na tam wu tɨnu befalò. Ghɨ yena khɨle kə fukâk wu tam afa fu mo. 34Ywosu be sîn, gha jûŋì wi hi fwo a ghàn a yi jwô beka ghàn mò kə nâ ghɨt a be. Jyə̀ yì jwo mò ni jîsà kə gha ye yi mô yi təm ma yi ti lûn. 35Wùt wù jùŋ nè jùŋ ma yì fwu kə atɨn a gha jûŋà fa wù bakte lema a wun yi təm, wùt wù be hi nê kə be ye a yì hì mô ma wù tî bakti lem a wun a yi təm.

36“Mu jìsà ha ghàn na à bè hì mô wu tuk wu saku Fùyènù ma nâbi nde bê hi fîsè kum nâbi ghə wù ti time jisa, nâbi ghe wù ndùku kəta wi hi jìs. 37Ghàn be yə sak kə gha afa ghàn jìsa, ma ghàn fən sak kə gha afa ghàn jìsa.

Ghɨt a Falàsî nì chichàsù saksu hì khɨŋa hi yen a chwena

(Mâk 8.11-12; Lûk 11.29-32)

38Chichàsu saksu lesu nì ghɨt a Falàsî ale jis ha Jisòs na, “Chichà, ni gha kanani yile hi chwùtì ha ghàh te chwe nì jyak gha ghe ghɨ lo kə nâ ha Yènfù.”

39Jisòs fîsì jis na, “À mò kə ngwàk yì be te yìna yì fànà wi Yènfù a yì mò hi tè bufa chwe. Yì nè yena wi chwe yìlè bu kə yì fòktì Jonà. 40Jonà tî chyə a yili chiki wu là a mu tuk mù tât, Wâ Wùt mò hi nè kpû hi chyə kəbi tuk mù tât a chyə̂ shyəma wù kahà loti. 41À bè hì mô wu tuk wu saku ma ghɨta bê time a Yènfù ashyə̂, ma ghɨt a Ninifì bê hi ngane ngwàk yinâ beka ghɨna tì yu yiki Jonà kahi təm a ghɨna a ghɨna sùbe, ngwàk yina yi hì kəta wùt lè chîn wu chyâ Jonà, biyani kahe wi təm a ghɨna a sùbe. 42À bè hì mô wu tuk wu sak wu Fùyènù, a mô wut we wù ndùku saka bâh à mbye a bàh à nchwô ma wù bê timi ma wù hi ngane ngwàk mi yîn beka wù tì lo a wun a yi lak gbi lum wu dâ, ben hi yute yikî tofani fə̀n Sòlomùn. Biyani, ngwàk yina kəta wùt chîn wu chyà Sòlomùn, yute wi yikî wuni.

(Lûk 11.24-26)

43“À yè mô a wu yu afa yohnà be fwo a wùt wù wùn, ghɨ yen gbi kat yi lak yi sùsi yì jɨ̀m khɨŋa wu luk hi yùtì, ghɨ ki faŋ hi yên, 44ghɨ kaha jis kə ghɨna ngɨŋ na, ‘Mu nè kaha yênà lò kə ndâ afa mu tì fwo atɨ̂n.’ Jis yani, kaha yen yen ndâ àtɨ̂n yi yîm ma ghɨ ti fî fati yahû bakti mwə̀lû a fùtɨ̂n àtɨ̂n, 45ghɨ kaha yen lyi ben nì yohnù be wule sàmba, wu bəma chyâ ghɨna, wu chîntì lyi wu hi chyə a wùt wuna wu wùn. Yi gan nì wùt àtɨ̂n hi bəma chyâ te wù ndùku mô ashyə̂. À mò ni te yi bè gânà ha ngwàk yina.

Jisòs fôktì ghɨt ghe nè wûn nì wana ne wuna mò

(Mâk 3.31-35; Lûk 8.19-21)

46Te Jisòs ndùku baha jîsà ha ghɨt a dona ghe ghɨ ndùku gbê a wun yi bàm, nè wûn nì wana ne wuna ben time a bɨn hì khɨŋa hi jìs ha wûn. 47Wùt lè atɨ̂n à ghɨta afû jis ha wun na, “Nìni wâ, nì wana na mò a bɨn khɨŋa hi jìs ha wò.”

48Jisòs buf ha ghɨna na nom mò nde, “Wana noma mô nde?” 49Wù buf ni kaha sok yen nì jùmtìbàmsu wunsu jis na, “Nom nì wana noma mò ghɨt ghɨ̂n. 50Nâbi nde we wù nè gha ye Bom a nyə̂ khɨŋa ma wù nê hi mô wâ nôm fê mô jâmtè mì, mô nôm.”

ప్రస్తుతం ఎంపిక చేయబడింది:

Matiyò 12: bmv

హైలైట్

షేర్ చేయి

కాపీ

మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి

Ŋwàklù Fùyèn Kàn Mù Fê (Cameron) గురించి మరింత తెలుసుకోండి

Matiyò 12

Popular Bible Verses from
Matiyò 12

వినండి Matiyò 12

బైబిల్:

Bum

వర్షన్: Ŋwàklù Fùyèn Kàn Mù Fê (Cameron) - bmv

Matiyò 12

Matiyò 12

Popular Bible Verses from Matiyò 12

వినండి Matiyò 12

బైబిల్:

Bum

వర్షన్: Ŋwàklù Fùyèn Kàn Mù Fê (Cameron) - bmv

Matiyò 12

Popular Bible Verses from
Matiyò 12