Génesis 4
4
Abelta Caín wanutsishqan
1Tsaypitanami Adánwan tashpan Eva qeshyaq rikakurqan. Wawan yuriptinmi kayno nirqan: <<Tayta Dios munaptinmi olqu wawä yurishqa>>.
Tsaymi wawanpa jutinta churaparqan Caín#4.1 Caín ninanqa tarishqa ninanmi. jutin kananpaq.
2Tsaypitanami yapay olqu wamrata wachar jutinta churaparqan Abel jutin kananpaq. Abelqa uyshayuq y cabrayuqmi karqan. Caínnami chakra aruq karqan.
3Tsaypita watakuna pasarkuptinnami Caínqa mikuyta cosechashqanpita Tayta Diospaq aparqan. 4Tsaynömi Abelpis Tayta Diospaq aparqan uyshankunapa y cabrankunapa punta yuriq wawankunata. Apashqanta pishtarkurmi wirankunata Diospaq rupatsirqan. Tsaytami Tayta Dios kushishqa chaskirqan.#Heb. 11.4. 5Caín apashqan ofrendatami itsanqa mana chaskirqantsu. Tsaymi Caín pasaypa rabyaptin cäranpis jukaqyarqan.#4.5 Wakin runakunaqa juknasyarqan nipäkun.
6Tsawraqa Caínta Tayta Dios kayno nirqan: <<¿Imanirtaq rabyashqa y jukaqyashqa kaykanki? 7Alita rurarqa manami jukaqyashqa purinkimantsu. Mana alita ruraptikimi itsanqa jutsa ruray shuyaraykäshunki munayninman churashunaykipaq. Tsayno kaptinpis shumaq tantiyakurqa jutsa rurayman mana ishkinkipaqtsu>>.
8Tsaypita juk junaqmi Caínqa wawqin Abelta kayno nirqan: <<Jirkapa aku pasyamunantsipaq>>.
Jirkaman chayaykurnami traicionpita Abelta wanutsirqan.#Mat. 23.35; Luc. 11.51; 1Juan 3.12.
9Tsaymi Caínta Tayta Dios tapurqan kayno nir: <<¿Maytaq wawqiki Abelqa?>>
Tsayno tapuptin kayno nirqan: <<Manami musyätsu. ¿Acäsu wawqï cuidaq imaku kaykä?>>
10Niptin Tayta Dios kayno nirqan: <<¿Imatataq rurashqanki? Wawqikipa yawarninta jichashqaykimi qayakaykäman.#Heb. 12.24. 11Tsaymi kay patsacho maldicionädu kar qarqushqa kankipaq. Wawqikipa yawarninta jichashqaykipitami 12murushqaykipis mana wayunqapaqtsu. Tsaynölami jamayta mana tariypa maytsaypapis purikunkipaq>>.
13Tsayno niptin Caín kayno nirqan: <<Tsayjinanpa castigamaptikiqa manami awantämantsu, Tayta. 14Kaypita qarqamarqa nawpaykipita karumanmi qarqaykämanki. Tsayno karqa maytsaypapis mana jamaypachari puriykushaq. Tsayno puriykaqtachari pï runapis wanutsimanqa>>.
15Tsawraqa Tayta Dios kayno nirqan: <<Pipis wanutsishuqnikiqa qanchis kuti fiyupa castigashqami kanqapaq>>.
Nirkurna señalta churaparqan Caínta pipis mana wanutsinanpaq. 16Tsaymi Tayta Diospa nawpanpita Nod#4.16 Nod ninanqa purikuq ninanmi. partiman Caín aywakurqan tsaycho tänanpaq. Tsayqa karqan Edén huertaman inti jeqamunan lädupami.
Caínpita miraqkuna
17Tsaypita Caínpa warmin qeshyaq rikakur olqu wamrata wachakurqan. Jutintami churaparqan Enoc jutin kananpaq. Nirkur Caínqa juk markata sharkarkatsir tsay markapa jutinta churaparqan tsurinpa jutilanta. 18Enoc karqan Iradpa taytan. Irad karqan Mehujaelpa taytan. Mehujael karqan Metusaelpa taytan. Metusael karqan Lamecpa taytan.
19Lamec karqan ishkay warmiyuqmi. Jukaq warminpa jutin karqan Ada y jukaq warminpa karqan Zila. 20Adami wawanpa jutinta churaparqan Jabal jutin kananpaq. Jabalmi wakin runakunapita mas puntata toldukunacho tashpan uywakunata ashmakurqan. 21Jabalpa wawqinmi karqan Jubal. Jubalmi puntataqa arpata y kënata tukayta yachakurqan.
22Zilanami wachakurqan Tubal-caínta. Tubal-caínqa herrëru karmi broncipita y fiërrupita imaykatapis ruraq. Paninpa jutin karqan Naama.
23Juk kutichömi ishkan warminta Adata y Zilata Lamec kayno nirqan: <<¡Wiyapäkamay noqa nishqäta! Maqamaq runatami wanutsishqä. Mözu kaptinpis maqamaptinmi supayninta apatsishqä. 24Caínta pipis wanutsir qanchis kuti castigashqa kananpaq kaykaptinqa noqata yatamaq kaqqa qanchis chunka qanchis (77) kuti masmi castigashqa kanqa>>.
Set yurishqan
25Tsaypitanami Adánpa warmin yapay olqu wamrata wacharqan. Yuriykuptinmi kayno nirqan: <<Wawä Abelta Caín wanutsishqa kaptinmi Tayta Dios munashqa Abelpa trukan juk wawä kananta. Tsaymi paypa jutin kanqa Set>>.#4.25 Set ninanqa trukanta qoykushqa ninanmi.
26Setpa tsurin yuriptin jutinta churaparqan Enós jutin kananpaq. Enós kashqanpitaraqmi runakuna Tayta Diosta adorayta qalaykurqan.
ప్రస్తుతం ఎంపిక చేయబడింది:
Génesis 4: qvmB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2003, Wycliffe Bible Translators, Inc. All rights reserved.