Yaaya 3
3
Nikodem deeɗiya gassa Iisa
1Lekka miiɗi kaƴi min oko giimi maa gu kolaa goo Pariziyennigee maa gu semeetee goo Nikodem. Gata pa ay kaƴi min oko taattuweeco Yawudigeyyo. 2Gaa meene kaƴi ma aandoŋ, ga asiyya gassa Iisa gaa beneyyiyyee gaa: «Garaawa! Ni lekka kabarre kadar ga ay Mella ma n̰akammum ki asinni gaara beneyyi, asan ga lekka ɗa gimu ma gederra ga leeɗo garaawi ku ajjibiti aleŋ maa ki leewa, gaa Mella aaye ɗa ma gata.» 3Gaa Iisa tiiliyyee gaa: «Giyyu ƴa! Na beneyyamca seene: Lekka ɗa gimu ma gederra ga gassiɗo darjane ta mulunniti Mellayi, guu weyya ɗa wiyaw ta marawta.» 4Gaa Nikodem inniyya gaa: «A gaa gimu baabaŋguwe appe, ga gederra pe gaa me ga yookiɗo aattí yaati, gii ɗilliyya wiyaawi?»
5Gaa Iisa beneyyiyyee gaa: «Giyyu! Na beneyyamca seene, gaa gimu gu weyya ɗa ma ammi o ma Ruuhanti Mellayi, ga gederra ɗa ga un̰n̰iɗo mulunniti Mellayi. 6Hayaatane ma asaa min oko gayyeetee ay ta gayyeetee. A hayaatane soopa ma asaa min oko Ruuhanti Mellayi, ay ta Ruuhanti. 7Addo ajjiba ɗa asan na beneyyiyam naa gu weyya wiyaw ta marawta. 8Ussu pa azakka were maa ga aŋkiɗo. Ki geewaca azawti, o ki ibinya ɗa were maa ga asawɗo, o were maa ga katawɗo. Ay goŋŋa appe, guu giimi kulla maa gu weewe ma Ruuhanti Mellayi.»
9Gaa Nikodem beneyyiyyee gaa: «A keeke pa, deewa pe gaa me?» 10Gaa Iisa tiiliyyee gaa: «Kii ma ay garaawa tatta ka giimi ku Isirayel, o ki ibinenta, ki alɗiy ibina ɗa gaari kooko? 11Giyyu! Na beneyyamca seene: Ni beneyya oko gaari maa ni ibina, o ni deewa suyuudigee oko gaari maa ni elelle, kuu alɗo amanna ɗa oko beneytini. 12Kuu amanna ɗa naa beneyyatoŋ ma gaari ku dunuune teete, ku akka amanna pe kuu me, naa beneyyatoŋ ma gaari ku samaani? 13Lekka ɗa gimu ma kalpe kaytiŋ samaani, illa ay Runti Gimi ma beere min samaani.
14«Tippa, maa ga Muusa alɗo goosigeyyo ma gimtee Isirayel, ga onne barwu ka sarni itti, gaa cipiliyya ettu ga atiyya, asan gu giimi ma cokollaa ga Mella pirɗiy min muuti#3.14 Oko wikinniti Muusa, ga Mella boŋsiyoo oko giimi ku Isirayel asan gu pooce jobbiti beneyti. Gaa n̰aamiyyoo barwee gu omoɗɗiy. Gaa beneyyiyyee oko Muusa gaa ga taɓilu sarna gaa kalliyya ga deeɗo barwu. Gaa caariɗo bunne, gaa atiɗo ettu siƴƴa gaa ziwwiyya uwwa. Kaaka pa, ga gimu maa gaa barwu oomiya, gaa asiyya cukila barwu ka sarni ka ziwwenta ga gasakkaca saa aapiya koɗok. Elloŋ Gemmico Giimi ku Isirayel 21.9.. Runti Gimi kulla gu akkiya paapa pe aleŋ taata aɗe guu atiyya, 15ku maa gu giimi paracco ma dowwiy galbigeeco oko gata gassiɗo hayaatane ma gakamma ɗa ta kaw. 16Ku ella, Mella ƴekkiy maani ta kaw giimi ku dunuune teete, namma ga biriyya Runti ka kayti ka, ku maa ga kulla gimu aɗe ma dowwica galbanti oko gata alɗo masila ɗa, innasoopa, ga gassicca hayaatane ma gakamma ɗa ta kaw. 17Mella n̰aamiya ɗa Runti dunuuniti ku maa ga asiyyo caaɗa parlane oko giimo, innasoopa, ga n̰aamiya ku maa ga asiɗiy najjiya. 18Giimi ma dowwiy galbigeeco oko gata gi parlanti Mellayi bagay ɗa, ay ma dowwiy ɗa soopa, gi bagay, asan gu dowwiy ɗa oko gata ma ay Runti Mellayi ka kayti ka. 19Mella n̰aamica bahaarane ta seene dunuune teete, guu giimi ƴekkiɗe namtuwe ƴiila min bahaaranti, asan gu gaarco maa gu leewa miɗɗa ka. Ay keeke appe ay botol ka caaɗiti parlanti Mellayi. 20Gimu ma leewa miɗɗa ɗakattica bahaarane, o ga asaa ɗa bahaaranti, asan ga ɓayakka gu giimi elliɗiy gaartee ku miɗɗa maa ga leewa. 21Gimu ma jobokkaca seene soopa, asaa bahaaranti, asan gu giimi elliɗiy gaartee ku seeniti maa ga leewa o gu leeɗo kabarre kadar ga jobokka gaartee Mellayi.»
Yaaya ay suyuudinti Iisa
22Gaa maa gu gaari kooko ƴiiliɗe, ga Iisa ma jobookeetee kaatiɗe kiɗa ta Yudee gu deeɗe nunta wikinne paalta, ga batasayɗo giimi. 23Oko wikinne kaaka pa, ga Yaaya kulla batasayya giimi baale ta Enon ma aaye saripti Salim, asan ga were kaaka lekka ammi maani. Guu giimi asawɗo, ga batasayɗiy, 24asan ga wikinne kaaka gu bakammiya ɗa missa daŋayi.
25Gaa meene kaƴi, gu jobookeetee Yaaya daare icciɗe meela ma Yawudince kaƴi ma gaarco Yawudigeyyo ku apilti ku maa gu deeɗo samaane unti Mellayi wikinne ka lollikiti. 26Guu kaatiɗe gu deeɗiya gassa Yaaya. Guu beneyyiyyee goo: «Garaawatini, ki moyaa aɗe miɗi kee ma aaye diɗɗiŋ ma kii ta tappiti ƴiiro ta Yurden, gata maa ki beneyye gaartee, haŋka ga batasayya kulla giimi, o giimi paracco katee.»
27Gaa Yaaya tiiliyyoo gaa: «Lekka ɗa gimu ma gederra ga leeɗo maatiki, gaa Mella oyowwiyee ɗa. 28Kuŋ kulla ay suyuudigee maa na beneyyiɗe naa ga naa ay Masi ɗa maa ga Mella aparre, innasoopa, ga Mella n̰akamminoo omma min oko gata. 29Daate maa ga miiɗi ecekke ay tanti, o lanjinti pa, ay gata ma aaye saripti, o gaa geewaa beneyti gi daanee ta kaw. Naa kulla haŋka gi parhantu yaata aleŋ taata appe, lekka ɗa payya maatiki ma koyowwiti. 30Gata ɗe ga tattuwti gaayu, o naata pa ga tattuwtu koyyu. 31Ma asaa min samaani ƴiilay giimi paracco. Ma ay ka kiɗaati soo, ay ka kiɗaati o ga beneyya ma gaari ku kiɗaati ka. Ma asaa min samaani pa, ƴiilay giimi paracco. 32Gata beneyya gaari maa ga elle saa o maa ga giyye. Gaa alɗo lekka ɗa ya gimu kaƴi ma amanna oko beneyti. 33Gimu ma amanna oko beneyti, oyaa kadar ga beneyti Mellayi ay seene. 34Gimu maa ga Mella n̰akamme beneyya beneyyiŋgeetee Mellayi, asan ga Mella berewweeca Ruuhanti maani ta kaw. 35Mella Baaba ƴekka Runti o ga kappeeca darjanti ta lawwi paracco. 36Gimu ma dowwica galbanti oko Runti gasakkaca hayaatane ma gakamma ɗa ta kaw, ma pocaa duwawtí oko gata soopa gasakkaca ɗa hayaatane taata, asan ga bogorti Mellayi jeree.»
ప్రస్తుతం ఎంపిక చేయబడింది:
Yaaya 3: mmy
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2019, Wycliffe Bible Translators, Inc. All rights reserved.