Lik 7
7
Iisa rayyaddaa lubaakati tattuwco asaakargee ku Rooma
(Elloŋ Matiye 8.5-13)
1Maa ga Iisa gaamiɗiy beneyyiŋgeetee kooko paracco oko giimi kotti, gaa un̰n̰iɗe geegar ka Kaparnawom. 2Iŋaa pa lekka tattuwco asaakargee orooruwee orro ku Rooma. Tattuwe kaaka pa lekka lubaaka maa ga oyowki ɗa, gaa parayɗo katta muuti. 3Maa ga tattuwe kaaka giyyikko gaartee Iisa, gaa n̰aamiyyee ajaawaŋgeeco Yawudigeyyo minnaw, ku maa gu deeɗiya inna gaa asiɗo ga asiyyeega rayyida lubaakati kaaka. 4Guu ajaawaŋgee kotti asiɗe saripti Iisa. Guu malmalɗiya goo: «Gata keeke ay tirta appe ki rayyidiyyeega lubaakati, 5asan ga ƴekkay gimtine o ga gata appe ma geewineega girtine ka giraaniti.» 6Gaa Iisa kaatiɗe ma ajaawaŋgee guta kotti. Gata ƴa sare katta girti tattuwwi, gaa tattuwe gata pa n̰aamiyyeegu lanjigeetee ku maa gu deeɗe beneyya goo: «Tattuwtini gaa ni beneyyam nii: Miltu, addo diigiya ɗa payya, asan ga naa saabayye ɗa gimu maa ki un̰n̰iɗo girtu. 7Ay kaaka appe na mooyiɗe naa na saabayye ɗa gimu maa na kaatiyam saripcum ga naa ma kayaatu. Haŋka pa ki iyyu biicum ka gaa lubaakatu rayyidiɗo. 8Naa beneyyiya keeke pa, ay asan ga naa kulla ma kayaatu lekka taattuweetaw ma kakawwino maa na jobokka, o na lekka kulla asaakargee maa na kakee ma jobokkano. Naa beneyyiyee oko kaƴi naa: “Addo!”, ga kataa, o naa beneyyiyee oko kaƴi naa: “Asu!”, ga asaa, o naa beneyyiyee oko lubaakatu naa: “Leyya keeke!”, ga leewaa.» 9Maa ga Iisa giyyiɗiy beneyyiŋgeetee kotti, gaa ajjibiyyee oko tattuwe kaaka, gaa ribiliyyoo oko giimi ku maani kotti ma jobokkiya, gaa beneyyiyyoo gaa: «Na beneyyatoŋ ƴa! Min aattí kiɗa ta Isirayel kulla, na gasse ɗa ya gimu kaytiŋ maa gi amanniti yaata aleŋ tee ta gimu keeke!» 10Guu giimi maa ga tattuwe n̰akamme koo yookiɗe giiri. Guu deeɗiya gassa lubaakati tattuwe kaaka gaa rayyadde caŋ caŋ.
Iisa naɗakkaa runtí kur̰aar̰ati
11Gaa min iŋaa ga Iisa kaatiɗe payya geegar kaƴi aɗe maa gu kolaa goo Nayin. Guu jobookeetee o giimi maani joboɗɗiya. 12Gaa oko wikinne maa ga saraɗɗo biití burgo ta geegarri, ga wagikkiko giimi ma ecekke ɗibilu ma matee, guu katawɗiki kayyeyyo. Gata pa kayti ka oko yaati o gita pa ay kur̰aar̰a. Guu giimi maani ku geegarri joboɗɗiy giimi ma ecekkiya. 13Maa ga Miltine kee Iisa ellicca yaati, gaa elliɗe saamuwti. Gaa beneyyitti gaa: «Addo erca ɗa!» 14Gaa saapiɗe, ga eesicca tarma, guu giimi ma ecekkica tarma warriɗe. Gaa Iisa beneyyiɗe gaa: «Ɗibilu, na beneyyam, wacu!» 15Gaa ɗibilu ma matee gata waciɗe ga nuntiɗe gaa beneyɗo. Gaa Iisa damittiiga oko yaati. 16Guu giimi kotti paracco ga ɓayaw galiyyoo. Guu logoɗɗiya Mella goo: «Nabiinice tatta ase aattine! Mella ase moogico gimtee!» 17Gaa beneyyi ka gaartee Iisa kooko tacilɗe kiɗa ta Yudee parattí ya diyargee ma aaye sariptí.
Iisa beneyya ma gaartee Yaaya
(Elloŋ Matiye 11.2-19)
18Gaa Yaaya gu jobookeetee jeppiyyeegu gaartee Iisa kooko paracco. Gaa kolliɗe seera min aacco. 19Gaa n̰aamiɗiy ku maa gu deeɗiya inna Miltine kee Iisa goo: «Ay kii aɗe ma ay Masi, gata maa ga Mella aparre ma asaa e, e ni ucu missa kaƴi?» 20Guu jobookeetee Yaaya ku seera guta pa asiyya gassa Iisa, guu inniyya goo: «Yaaya ma batasayya giimi n̰aamini gaa ni asum inna nii: “Ay kii aɗe ma ay Masi, gata maa ga Mella aparre ma asaa e, e ni ucu missa kaƴi?”» 21Oko wikinne kaaka pa maa gu asiyyee, ga Iisa rayyadda giimi maani ma lekka paraayi pay pay o ma deegeyye ta tirta ma paraayi, o giimi maa gu awaaradgeeco deegeyye ga petekkayoogu o koor̰ee maani ga eyayoogu iɗiico. 22Gaa tiiliyyoo oko n̰amaakeetee Yaaya kotti gaa: «Yookoŋ ku deeɗineegu jeppa oko Yaaya gaari maa ku elle o maa ku giyye kuu: Koor̰ee gu iɗiico ella, o mugulee tan̰aa samaane, o majaddimnigee rayyide gu deeɗe samaane unti Mellayi, o ambuukee geewa, o ma matakke naɗe, o kabarre ta daana deero taasenta oko giimi ku saamo#7.22 Elloŋ Esaya 35.5-6, 61.1.. 23Baarikenta ay gimu maa na deewee ɗa botol ku maa ga poociɗo amanno oko naa.»
24Maa gu gimtee Yaaya maa ga n̰akamme yookiɗe, gaa Iisa inniɗiy giimi ku maani kotti ma gaartee Yaaya gaa: «Maa ku kaatiɗe kayni ku aŋakke ku deeɗo ella we? Ku kaate ku deeɗe ella gimu maa gi kayaati lamatta ka aleŋ coori maa ga ussu azakka iŋee o iŋee e? Haha. 25A ku dee ella we? Ku dee elle gimu ma esekke kaɗiŋgee samaane e? Haha. Giimi ma esekke kaɗiŋgee ku ayaaweyyo o gu teewica pa aaye karaayigeeco salaataŋgeyyo. 26A ku dee ella we kayni? Nabiinice e? Haa, na beneyyatoŋ ƴa, ku dee ella ma ƴiila kulla nabiinice. 27Yaaya ay gata appe maa ga Mella beneyya gaartee Kitamniti gaa:
“Omma min oko kii, na n̰akammaa palaynicitu,
ga deeɗamga pana butulcum#7.27 Elloŋ Malasi 3.1..”»
28Gaa Iisa beneyyiɗe payya gaa: «Na beneyyatoŋ ƴa! Yaaya tatta ƴiila unti Mellayi min oko giimi paracco ma ellica paato. Gaa ma kaaka aɗe pa, ga ka rootta ƴiila mulunniti Mellayi alɗo tatta ƴiila min oko Yaaya.»
29Guu giimi paracco ya sokookee ku miiri giyyiya beneyti, guu leeɗe kabarre kadar ga Mella ɗayaŋ, guu oyyiɗe ga Yaaya batisiyɗiy. 30A Pariziyennigee ma aalimnigee ku Kitamniti Muusa soopa oyye ɗa ga Yaaya batisiyɗiy. Ma kaaka pa gu poociya maa ga Mella aŋakkiyoo.
31Gaa Iisa beneyyiɗe payya gaa: «Giimi ku haŋka kooko na massallay pe ma ini we? Guta saabayye aleŋ ini we? 32Guta saabayye aleŋ miici ma nowotte were ka timmiti, guu daare kolowɗiy gicco goo: “Ni paanitoŋ teelo, kuu alɗe waara ɗa. Nii reeɗitoŋ riyaawiŋgee ku haziniyti, kuu alɗe erca ɗa.” 33A gata pa, Yaaya ma batasayya giimi maa ga asiɗe ga teewa ɗa mappa, o ga ar̰aa ɗa mirmi ku mor̰mor̰oskeyyo, gaa kuŋ beneyɗo kuu ga lekka aarinne. 34A Runti Gimi pa aseero, gaa tewɗo o ga ar̰aa. Gaa kuŋ beneyɗo kuu: “Elloŋga ƴa miiɗi keeke! Gata keeke leewe kee ka aatti ka o ka mowwiti. Gata ay lanjinco oko sokookee ku miiri o oko giimi ma leewa zunubgee!” 35Giimi paracco soopa ma oyaaca ibino ta gaaro ma asaa min Mellayi lekka kabarre kadar gi ɗayaŋ.»
Iisa aaye girti Simo ma ay Pariziyennice
36Gaa lekkiɗo Pariziyennice kaƴi aɗe maa gu semeetee goo Simo ma kolliya Iisa girti gaa gu addo tee. Gaa Iisa kaatiɗe. Gaa nuntiɗe ga tewɗo. 37Aatti geegar kaaka pa, gi lekka daate ma ay suɓaana ibinenta ma giyye kadar ga Iisa aaye wikirti Pariziyennice kaaka ga tewɗo. Gii kaatiɗe o gi bakamme koloŋgane ta albatir#7.37 Albatir pa ay dambu kaali ma purta ga cerewɗo maa gu kolkolla gu panaɗɗikiy koloŋgiŋgee. unenta ma itir ma nobokka daana o ga kaali. 38Gii asiɗe joppa taarti Iisa ma ta asintee. Gii erecɗo. Gii baasiyyeegu asintee ma tootti. Gii sawwiyyeegu ma laawti ku kayaatí. Gii gogowɗiy o gi kalaayo itir. 39Maa ga Pariziyennice ma kolowwiya Iisa elliyya liyawtí kaaka, gaa beneyyiɗe ma galbanti ka gaa: «Gaa gimu keeke alɗo aɗe goŋŋa nabiinice ma seene, ga ebennaca daate teete ma esay asintee baŋ gi ay we o ga ebennaca kadar gi ay suɓaana.» 40Gaa Iisa beneyyiyyee oko Pariziyennice kaaka gaa: «Simo, na lekkam beneyyi.» Gaa Simo tiiliyyee gaa: «Beneyyu garaawatu.» 41Gaa Iisa beneyyiyyee gaa: «Lekka miɗi seera ma ecekke ɗannanni min oko miiɗi kaƴi ma beraa. Kaƴi ƴa ecekkiyee gurus ma deewa aleŋ lubbi kee ka miyaŋgee beeƴa meeni, ka kaƴi pa ay aleŋ lubbi kee ka orooruwee beeƴa meeni. 42A mileŋ ga serco gu gederre ɗa pa pilkico ɗannannico, ga saamiyyoogu. A min oko giimi ku seera kooko, ay ŋawwa pe ma ƴekekka ƴiila gimu ma biryoo ɗannanni?» 43Gaa Simo tiiliyyee gaa «Oko kanni ka naa walaŋ ga ma ecekkiyee ɗaane ta yaata ƴiila gaa saamiyiyyeeca.» Gaa Iisa beneyyiyyee gaa: «Beneycum keeke aaye pe butuuli aɗe.»
44Gaa Iisa ribilitti oko daatti, gaa beneyyiyyee oko Simo gaa: «Ki ellaca daate teete e? Na un̰n̰e gircum, kii alɗiyaw bira ɗa ammi ku apilti asintaw. A gita soopa apilawgu asintaw ma tootti o gi sawwawgu ma laawti ku kayaatí. 45Ki joobinoo ɗa ma googo. A gita soopa min maa na un̰n̰iɗe gi nambe ɗa googico asintaw. 46Kii kalliyaw ɗa sewen kayaatu ku maa ki un̰n̰inno, a gita soopa kalliyaw itir asintaw. 47Ay ɗakko appe na beneyɗam naa gi ƴekkití ta maani teete maa gi gaare, garaa kadar gu zunubgeeti ku maani kooko deero saamiyenta. A gimu soopa maa gu saamayyee paalta, garaaca ƴekkiti kulla paalta ka.» 48Gaa Iisa beneyyitti oko daatti gaa: «Na saamiyteegu zunubgeete.» 49Guu giimi kotti ma teewa ma gata moyowɗo galbigeeco ka goo: «Ay me gimta keeke ma beneyya gaa ga saamayya zunubgee kulla?» 50Gaa Iisa beneyyitti payya oko daatti gaa: «Mileŋ ka dowwica galbante oko naa, ka najjiye. Addo ma aapiya.»
ప్రస్తుతం ఎంపిక చేయబడింది:
Lik 7: mmy
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2019, Wycliffe Bible Translators, Inc. All rights reserved.