Luku 22
22
Isi Nke Ẹbụọ-kwasị-ọgụn
E Zuni Wẹ Jesu Eje-umẹ
(Mat 26.1-5; Mak 14.1-2; Jọn 11.45-53)
1Ogẹn Mmẹmmẹ ahụn wẹ gi e ri Brẹdi nwọnlẹni yisti hụn w'a kpọzị Mmẹmmẹ-Nghafe gi rumẹ, 2ndị-isi nchụn-ẹjan lẹ ndị-nkuzi Iwu rị a chọ nị wẹ gbu Jizọsị hụ a chọ kẹ w'a dọn mẹ ẹ, makẹni egun ndị alị rị a tụ wẹ.
Judasị E Kweri N'o K'e Re Jesu
(Mat 26.14-16; Mak 14.10-11)
3Ekwensụ nọ banye imẹ Judasị w'a kpọ Iskarọtụ, onyẹ ohu imẹ ndị nsọnmazụụn a mmẹbụọ hụ. 4Ọ nọ pụ, jẹnmẹ d'e sọn ndị-isi nchụn-ẹjan lẹ ndị-isi ndị-nche Ụlọ-nsọ ku kẹ o dọn re Jesu ye wẹ. 5Ẹfọ nọ sụọ wẹ ụsụọ, wẹ nọ kweri nị wẹ jẹnkọ d'e ye ẹ egho. 6Ya ọ nọ kweri, chọma ezigbo oghere o jẹnkọ d'e gi we Jesu ye wẹ ebe ịhịan rịkalẹni.
Oriri-nghafe
(Ọpụ 12.1-20; 13.3-10; Mat 26.17-25; Mak 14.12-21; Jọn 13.21-30)
7O ru ụhụọhịn hụ wẹ gi e bidọn Mmẹmmẹ wẹ gi e ri Brẹdi nwọnlẹni yisti, ụhụọhịn ahụn wẹ gi e gbu nwa-ebulu Nghafe, 8Jizọsị nọ zi Pita lẹ Jọnụ, sị wẹ, “Jẹnmẹ ni d'e dọnkwama ihiẹn nị ẹnyi ri Oriri-nghafe.”
9Wẹ nọ jụ a, sị, “Elebe k'ị chọ nị ẹnyi dọnkwama?”
10Ọ nọ sị wẹ, “Gọn ni ntịn: ụnụ banyekọnị imẹ obodo, okẹnnyẹ ohu bu ite-mirin jẹnkọ d'e kunrun ụnụ. Sọnn'ẹ banye ụlọ o k'a banye. 11Ụnụ a sị onyẹ nwọn ụlọ hụ, ‘Onyẹ-nkuzi sị ị, “Elee hụn wụ mmughẹ onyẹ-ọbịa ahụn mmẹ lẹ ndị nsọnmazụụn m k'a nọ ri ihiẹn-oriri Nghafe rị?” ’ 12O sikọ d'a ghọsị ụnụ mmughẹ ohu shịanị rị ibe elu, hụn oche lẹ teburu rị; ebẹhụ kẹ ụnụ k'e dọnkwama.”
13Ya wẹ nọ jẹnmẹ. Wẹ nọ hụnchanrịn ihiẹn ile k'o dọn gwa wẹ, ya wẹ nọ dọnkwama ihiẹn w'e gi ri Oriri-nghafe.
Oriri-nsọ
14Ogẹn e ru, Jizọsị nọ weri oche, ndị-ozi hụ pụ-ichẹn nọ sọn ẹ nọdị alị nị wẹ ri Oriri hụ. 15Jizọsị nọ sị wẹ, “A chọkẹnmẹkẹ m nị mmẹ lẹ ụnụ ri Oriri-nghafeni m gini d'a ta afụnfụn! 16Makẹni onwọnni ogẹn m'e gi rizi ẹ d'e ru mgbe w'e gi ri ẹ imẹ Alị-eze Osolobuẹ.”
17Ya ọ nọ weri mkpu, ọ kpanmịngụ Osolobuẹ, ọ nọ sị, “Weri ni rarịsọnmẹ. 18M rị a gwa ụnụ, arakọzị m manya vaịnị d'e ru mgbe Alị-eze Osolobuẹ bịa.”
19Ya ọ nọ weri ogbe brẹdi, ọ kpanmịn Osolobuẹ, bebe ẹ, we ẹ ye wẹ, sị, “Ọnwan wụ ẹhụ m, hụn wẹ rị e gi ufiri ụnụ e ye. E mẹ ni ihiẹnni e gi a nyanhan m.” 20Ẹrịra k'o dọnzikwọ weri mkpu hụ ogẹn wẹ gi rigụ, ye wẹ, sị, “Mkpuni wụ nkwerigbama ọhụn Osolobuẹ; ẹdeke#22.20 Ndụn. m hụn m rị e gi ufiri ụnụ e ye kẹ wẹ gi biye ẹ ẹka.”
21“Ka lee n'ẹ, mmẹ lẹ onyẹ jẹnkọ d'e reni m rị ebeni e ri ihiẹn-oriri! 22Nwa nke Ịhịan lakọ kẹ Osolobuẹ dọn ku, kanị nsọngbu rịnị onyẹ ren'ẹ!”
23Ya wẹ nọ jụma ibe wẹ kẹ onyẹ imẹ wẹ jẹnkọ d'e mẹ ihiẹnni.
Onyẹ Kachanrịn?
24O nwọnzighọ ogẹn ndị-ozi ahụn pụ-ichẹn gi rị a dọ onyẹ wẹ k'e weri nị ị ya kachanrịn imẹ wẹ ile. 25Jizọsị nọ sị wẹ, “Ndị-nze ụwa a kị wẹ nkịgbu; ndị ọkịkị wẹ e ri nzere ‘Omẹ-ọghọ!’ 26Kanị nke ụnụ ẹlẹ ẹrịra. Kama, onyẹ kachanrịnnị imẹ ụnụ ya mẹmẹ kẹ nwata; onyẹ-ndu ya nọ kẹ ojẹn-ozi. 27Onyẹ kadẹ ibe ẹ? Hụn rị e ri ihiẹn-oriri ra hụn rị e jẹn ozi rịn'a? Ẹlẹ hụn rị e rini? Kanị mmẹ nwẹn rị nwan e bi imẹ igunrun ụnụ nọkẹ onyẹ e jẹn ozi.
28“Ụnụ e sọngụọ m nọdị hụnnị ile wẹ lele m: 29m rị nwan e ye ụnụ ọkịkị kẹ Nẹdi m dọn ye m alị-eze kị, 30kẹni ụnụ sọn m ri, ra imẹ alị-eze m; onyẹ-onyẹ imẹ ụnụ sikọ d'a nọdị ukpo-eze, a hannị ikpụlọ mmẹbụọ rị Izrẹlụ eṅẹn.
Jizọsị E Ku Ẹ Nị Pita Jẹnkọ D'a Ghọrị N'ọ Marịn A
(Mat 26.31-35; Mak 14.27-31; Jọn 13.36-38)
31“Saịmọnụ, Saịmọnụ! Gọn ntịn! Ekwensụ a sịgụọ wẹ we ụnụ ile che ẹ ẹka, n'ọ yọ ụnụ kẹ ọka. 32Kanị, e mẹgụọnị m'ị ekpere Saịmọnụ, amamgbe okukwe i a dan. I rogharịgụ, y'e yeni umunẹ i ẹka turu.”
33Kanị Pita nọ sị, “Di-nwọnni-ẹnyi, ihiẹn ọ k'a wụ ya wụrụ, m k'e sọn i jẹn ngan, sọndẹ i nwụnhụn!” 34Jizọsị nọ sị a, “M rị a gwa ị ezioku Pita, ọkpa gini d'a kwan tannị, i sikọ d'a ghọrị mgbe ẹtọ nị y'a marịn m.”
Ẹkụkwọ-nsọ K'a Nọ Ẹhụ Jesu Bụn
35Ya Jesu nọ jụ ndị nsọnmazụụn a ajụjụ, sị, “Ogẹn m gi zipụ ụnụ, sị ụnụ ewerilẹ egho mọbụ ẹkpa mọbụ akpụkụ, o nwọnghọ ihiẹn kọnị ụnụ?” Wẹ nọ sị a, “Mba, onwọnni.”
36Jesu nọ sị wẹ, “Kanị ujeni, onyẹ nwọn egho ya weri ẹ, onyẹ nwọn ẹkpa ya buruzikwọ a. Onyẹ nwọnlẹni ọpịa-agha ya re ẹwuru o yiye elu ẹ, gi ẹ ṅọnrin ọpịa-agha. 37M rị a gwa ụnụ, ihiẹn ahụn Ẹkụkwọ-nsọ ku, nị ‘Wẹ jẹnkọ d'a gụn a yeni ndị a dan iwu’ jẹnkọ d'a nọ ẹhụ m bụn. Eziẹ, ihiẹn Ẹkụkwọ-nsọ ku banyeni m hụ e mẹ.”
38Ya kẹ ndị nsọnmazụụn a nọ sị a, “Di-nwọnni-ẹnyi, e lee ọpịa-agha ẹbụọ ebeni!”
Ọ nọ sị wẹ “O higụọ!”
Kẹ Jesu Dọn Mẹ Ekpere Elu Ugu Olivu
(Mat 26.36-46; Mak 14.32-42)
39Jesu nọ gha imẹ Jerusalẹm pụ, shi Ugu Olivu k'o dọn e mẹ mbụ, ndị nsọnmazụụn a nọ sọnmẹ ẹ. 40O ru ebẹhụ, ọ nọ sị wẹ, “Mẹ ni ekpere makẹ ụnụ gha a danban imẹ ọnwụnwan.”
41Ya ọ nọ jẹnshi ihun ẹkẹrẹ, ihiẹn rịkẹ ebe mbụrụ e ru, gbu osekpu, mẹ ekpere, 42sị, “Baba, omẹni y'a chọghọ, napụ m mkpu afụnfụn lẹ ọnwụnnị; kanị, uche i ya mẹ, ẹlẹ nke m.” 43Ya mmọn-ozi elu-igwee nọ pụha d'e yechen'ẹ ikẹn. 44Ọ nọ gi okẹn-ụfụ ọ rị mẹkẹnmẹ ekpere; ọbanje ẹ nọ kẹ ẹdeke rị a tantuni.
45Ogẹn o gi gha ebahụn ọ rị e mẹ ekpere lihi, ọ nọ bịa d'e kunrun ndị nsọnmazụụn a; ọ nọ hụn nị wẹ rị ụran — ẹhụ rọ wẹ makẹni wẹ rị a kwan. 46Ya ọ nọ sị wẹ, “Kị ụnụ rị a ranhịnnị? Lihi ni mẹmẹ ekpere, amamgbe ụnụ a danban imẹ ọnwụnwan.”
Kẹ Judasị Dọn Re Jizọsị
(Mat 26.47-56; Mak 14.43-50; Jọn 18.3-16)
47Ebe Jizọsị rịkwọ e ku oku, idẹnmizi, igunrun ịhịan nọ bịa. Onyẹ hụ w'a kpọ Judasị hụn rị imẹ ndị-ozi pụ-ichẹn mmẹbụọ hụ duhẹ wẹ. Ọ nọ jẹnburu Jizọsị d'e susu ẹ ọnụ. 48Kanị Jizọsị nọ sị a, “Judasị, isusu-ọnụ k'i gi e re Nwa nke Ịhịan?”
49Ogẹn ndị nsọnmazụụn Jesu ya lẹ wẹ wị gi hụn ihiẹn jẹnkọ d'e mẹni, wẹ nọ sị Jesu, “Di-nwọnni-ẹnyi, nị ẹnyi gi ọpịa-agha mẹ wẹ ihiẹn?!” 50Onyẹ ohu imẹ wẹ nọ gi ọpịa-agha banpụ odibo onyẹ-isi nchụn-ẹjan ntịn ẹka-ihiẹn.
51Jesu nọ sị wẹ, “Kụsị nị ihiẹnni!” Ya ọ nọ mẹtụ okẹnnyẹ hụ ẹka ntịn, zụọ a.
52Ya Jizọsị nọ sị ndị-isi nchụn-ẹjan lẹ ndị-isi ndị-nche Ụlọ-nsọ lẹ ndị-isi hụn wẹ ile gba bịa ebẹhụ d'a nwụnrụn a, “Kị ụnụ buhẹni ọpịa-agha lẹ ẹgbe, rịkẹ sị m wụ onyẹ-ohin? 53Mmẹ lẹ ụnụ rị imẹ Ụlọ-nsọ ụhụọhịn ile, ụnụ anwụnrụnnị m. Kanị hụnnị wụ ogẹn ụnụ lẹ ogẹn ishi gi a kị!”
Pita A Ghọrị, Sị Ọ Marịnzị Jizọsị
(Mat 26.57-58,69-75; Mak 14.53-54,67-72; Jọn 18.12-18,25-27)
54Ya wẹ nọ nwụnrụn Jesu, duru ẹ shi iwe onyẹ-isi nchụn-ẹjan. Pita hụ ebe teni e sọn wẹ d'e ru ebẹhụ. 55Ogẹn ndị rị ebẹhụ gi fiye ọkụn ahanmahan ezi-ọgwa onyẹ-isi nchụn-ẹjan hụ, fihunmẹ ẹ a nyan a, Pita nọ nọdịyeni wẹ. 56Ogẹn nwagbọọ ohu wụ odibo gi gi ọkụn ahụn wẹ fiye legha Pita k'ọ nọdị ebahụn a nyan a, ọ nọ bu ẹnya tụma Pita, sị, “Okẹnnyẹni rịzị ndị wẹ lẹ Jizọsị te wị!”
57Kanị Pita nọ ghọrị, sị, “Okpoho, amarịn m'a!”
58O tebe ẹkẹrẹ, onyẹ ọzọ a hụn Pita, ọ nọ sị a, “Yụ lẹ wẹ wị!” Pita nọ sị a, “Di-ẹnyi, ẹlẹ mmẹ!”
59Ihiẹn nọ kẹ mgbahunmẹ ọkụrọkụ ohu a ghagụ, onyẹ ọzọ nọzị sị, “Ịrụ-ụka arịa, okẹnnyẹni lẹ Jesu wị, makẹni onyẹ Galili k'ọ wụ!”
60Pita nọ sị a, “Di-ẹnyi, amarịn m ihiẹn i rị e ku!”
Ebe Pita rị e ku okuni, ọkpa nọ kwan.
61Ya Di-nwọnni-ẹnyi nọ gbehutọ ebe ọ rị, bu ẹnya zinmẹ Pita. Pita nọ nyanhan ihiẹn Di-nwọnni-ẹnyi ku, k'o dọn sị a, “Ọkpa gini d'a kwan tannị, i k'a ghọrị mgbe ẹtọ nị y'a marịn m.” 62Pita nọ pụ, kwan ezigbo ẹkwan.
E Gbu Wẹ Jizọsị Ili, Gi Ẹ Gu Egu
(Mat 26.67-68; Mak 14.65)
63Ikẹnnyẹ ndị ahụn gi Jesu nọ gi ẹ gumẹ egu, e gbu ẹ ili. 64E kẹnkin wẹ ẹ ẹnya, sị a, “Bu amụma gwa ẹnyi, onyẹ fịan ị ihiẹn?!” 65A gwasọnmẹ w'ẹ eje-oku bu ọda.
E We Wẹ Jizọsị Shi Ọgwa Ndị-isi Nkịkwama
(Mat 26.59-66; Mak 14.55-64; Jọn 18.19-24)
66Eki e fọn, Ndị-isi ile nọ zu, kẹ ndị-isi nchụn-ẹjan kẹ ndị-nkuzi Iwu. Ya wẹ nọ wẹhẹ Jizọsị Ọgwa Ndị-isi nkịkwama. 67Wẹ nọ sị a, “Omẹni ịyụ wụ Kraịstị, gwa ẹnyi?” Ọ sị wẹ, “M gwa ụnụ, ụnụ ekwerikọ; 68m jụ ụnụ ajụjụ, ụnụ azakọ. 69Kanị, gha kikẹnni jẹnmẹ, Nwa nke Ịhịan jẹnkọ d'a nọdị alị ẹka-nni Chuku Onyẹ nwọn ikẹn ile.” 70Wẹ ile nọ sị, “Ịyụ wụ nwan Nwa Chuku?”
Ọ nọ sị wẹ, “Ụnụ e kugụọ a nị ya kẹ m wụ.”
71Wẹ nọ sị, “Kị ẹnyi rị a chọzịnị ọshẹri! Ẹnyi a nụgụọ a ọnụ a!”
ప్రస్తుతం ఎంపిక చేయబడింది:
Luku 22: ikkBI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.