Makị 14
14
Isi Nke Mmẹnọ
E Zuni Wẹ Jesu Eje-umẹ
(Mat 26.1-5; Luk 22.1-2; Jọn 11.45-57)
1Ogẹn o gi họdụ akpọhịn ẹbụọ nị Mmẹmmẹ-Nghafe lẹ Mmẹmmẹ Brẹdi nwọnlẹni yisti#14.1 Yisti kẹ brẹdi gi a fụ. ru, ndị-isi nchụn-ẹjan lẹ ndị-nkuzi Iwu hụ a chọ kẹ w'a dọn gi nzuzue nwụnrụn Jesu d'e gbu. 2Wẹ nọ sị, “Ẹnyi emẹkọkwọ a ogẹn Mmẹmmẹ, amamgbe isusu a rị.”
E Hukpu Wẹ Jesu Udẹn
(Mat 26.6-13; Jọn 12.1-8)
3Ogẹn Jesu gi rị obodo Bẹtani, iwe Saịmọnụ hụn emu oti te kụ, e ri ihiẹn-oriri, okpoho ohu nọ buhẹ ọgọ alabasta udẹn e kun fuẹin jun imẹ ẹ; udẹn ahụn ṅanran ọda-ọda, nadị kẹ wẹ gi mẹmẹ ẹ. Ọ nọ kụke ọgọ hụ, hu udẹn hụ ye Jesu isi. 4Kanị ụfọdụ ndị rị ebahụn nọ wemẹ iwe, a sị ibe wẹ, “Kị wẹ rị e wiwini udẹnni ṅanrannị? 5Nkẹ e re wẹ udẹnni hụn egho ọrụn akpọhịn ọgụn-mmisẹn ye ndị igbẹnnyẹ.” Ya wẹ nọ kọrịamanị okpoho hụ ọda-ọda.
6Kanị, Jesu nọ sị wẹ, “Hapụn'a! Kị ụnụ rị e sọngbun'ẹ? Ihiẹn rị mma k'o mẹni m. 7Ụnụ lẹ ndị igbẹnnyẹ rị ebeni ogẹn ile, ụnụ nwọn ikẹn mẹni wẹ ọhụnma ogẹn ọwụlẹ ụnụ chọ; kanị mmẹ nwẹn esọnkọ ụnụ nọdị ebeni ogẹn ile. 8Okpohoni a nwangụọ ikẹn ẹ; o hukpuọlẹ m udẹn wẹ te k'e te m wẹ gha a kwama ozun m. 9Nị m gwa ụnụ, ebe ọwụlẹ wẹ sikọ d'e zi oziọma imẹ ụwa, wẹ jẹnkọ d'e ku ihiẹnni o mẹ, e gi ẹ a nyanhan a.”
Judasị E Kweri N'o Re Jesu
(Mat 26.14-16; Luk 22.3-6)
10Judasị nwa Iskarọtụ, onyẹ ohu imẹ ndị nsọnmazụụn Jesu mmẹbụọ hụ, nọ jẹn d'e kunrun ndị-isi nchụn-ẹjan kẹni o re Jesu ye wẹ. 11Ogẹn wẹ gi nụ ihiẹn ọ bịanị, ọ sụọ wẹ; wẹ nọ kwe ẹ nkwa nị wẹ k'e ye ẹ egho. Ya k'ọ nọ chọma oghere o k'e gi we Jesu ye wẹ.
Kẹ Jesu Lẹ Ndị nsọnmazụụn A Dọn Ri Oriri-nghafe
(Mat 26.17-25; Luk 22.7-14,21-23; Jọn 13.12-30)
12O ru ụhụọhịn ibuzọ Mmẹmmẹ Brẹdi nwọnlẹni yisti o gi a fụ, ụhụọhịn hụ wẹ gi e gbu ebulu Oriri-nghafe, ndị nsọnmazụụn Jesu nọ jụ a, sị, “Elebe k'i chọ nị ẹnyi dọnkwama hụn y'a nọ ri Oriri-Nghafe?”
13Ya Jesu nọ zi mmadụ ẹbụọ imẹ ndị nsọnmazụụn a, sị wẹ, “Jẹn ni imẹ obodo, okẹnnyẹ ohu bu ite-mirin jẹnkọ d'e kunrun ụnụ; sọnmẹn'ẹ. 14Sị nị onyẹ nwọn ụlọ ahụn ọ banye, ‘Onyẹ-nkuzi sị, “Elee mmughẹ wụ nke m hụn mmẹ lẹ ndị nsọnmazụụn m k'a nọ ri Oriri-nghafe?” ’ 15O jẹnkọ d'a ghọsị ụnụ mmughẹ ohu shịanị hụn rị ibe elu wẹ butọgụ oche lẹ teburu; ebẹhụ kẹ ụnụ sikọ d'e dọnkwamanị ẹnyi.”
16Ya kẹ ndị nsọnmazụụn a hụ nọ shi imẹ obodo, wẹ nọ hụn ihiẹn ile kẹ Jesu dọn ku; wẹ nọ kwademẹ ihiẹn mmẹmmẹ Nghafe.
17O ru ẹnyasị, Jesu lẹ ndị nsọnmazụụn a mmẹbụọ nọ bịa ebẹhụ. 18Ebe wẹ rị e ri ihiẹn-oriri, Jesu nọ sị wẹ, “M rị a gwa ụnụ ezioku, onyẹ ohu imẹ ụnụ jẹnkọ d'e re m, onyẹ mmẹ lẹ ya rị e ri ihiẹn-oriri.”
19Ẹfọ asụọzịnị ndị nsọnmazụụn a ụsụọ; onyẹ-onyẹ hụ a sị a, “Ẹlẹkwọ mmẹ! Mmẹ rọ?”
20Jesu nọ sị wẹ, “Onyẹ ohu imẹ ụnụ mmẹbụọ rọ, onyẹ hụn mmẹ lẹ ịya rị nwan e suru brẹdi imẹ afẹrẹ ohu. 21Ẹghẹẹ, Nwa nke ịhịan lakọ nwan kẹ Ẹkụkwọ-nsọ dọn ku, kanị nsọngbu rị e che onyẹ sikọ d'e re Nwa nke Ịhịan! O te ka onyẹ hụ mma nị amụnị w'a!”
Oriri-nsọ
(Mat 26.26-30; Luk 22.14-20; 1Kọ 11.23-25)
22Ebe wẹ rị e ri ihiẹn-oriri ahụn, Jesu nọ weri brẹdi, ọ kpanmịngụ Osolobuẹ, ọ nọ bebe ẹ, w'ẹ ye ndị nsọnmazụụn a, sị, “Weri n'ẹ; ọnwan wụ ẹhụ m.”
23Ọ nọ weri mkpu, ọ kpanmịngụ Osolobuẹ, ọ nọ buye wẹ ya. Wẹ ile nọ rarịsọnmẹ. 24Ọ nọ sị wẹ, “Ọnwan wụ ẹdeke m wẹ gi ufiri ndị bu ọda hupụ; ẹdeke m wẹ gi biye ẹka nkwerigbama Osolobuẹ tumẹ ẹgbata ya lẹ ndị nke ẹ. 25M rị a gwa ụnụ ezioku, arakọzị m manya vaịnị d'e ru ogẹn m jẹnkọ d'a ra nke ọhụn a imẹ Alị-eze Chuku.” 26Wẹ nọ bụ ẹbụ, ya wẹ nọ nwan gha ebahụn jẹnmẹ Ugu Olivu.
Jesu E Ku Ẹ Nị Pita Jẹnkọ D'a Sị N'ọ Marịn A
(Mat 26.31-35; Luk 22.31-34; Jọn 13.36-38)
27Jesu nọ sị wẹ, “Ụnụ ile jẹnkọ d'a gba m tọ. Makẹni, Ẹkụkwọ-nsọ sị,
‘M jẹnkọ d'e gbu onyẹ-ndu atụnrụn,
atụnrụn ile a gbayịya!’
28Kanị m ghagụ ọnwụn lihi, e shi m Galili d'e cheri ụnụ.”
29Pita nọ sị a, “Alakọ m'ị tọ! Ọsụọn'a nị ndị ọzọ ile a gba ị tọ!”
30Jesu nọ sị Pita, “M rị a gwa ị ezioku, nị tannị, imẹ abalịnị, ọkpa gini d'a kwan mgbe ẹbụọ, i jẹnkọ d'a ghọrị mgbe ẹtọ nị y'a marịn m.”
31Kanị, Pita nọ kushid'ẹ ikẹn, sị, “Onwọnni ogẹn m'e gi la ị tọ, ọsụọn'a nị mmẹ lẹ yụ k'a nwụn!” Ndị nsọnmazụụn a ile họdụnị nọ kuzikwọ ẹrịra.
Kẹ Jesu Dọn Mẹ Ekpere Imẹ Gẹtisẹmani
(Mat 26.36-46; Luk 22.39-46)
32Ya wẹ nọ shi ebe w'a kpọ Gẹtisẹmani. Jesu nọ sị ndị nsọnmazụụn a, “Nọdị nị alị ebeni, nị m jẹn d'e mẹ ekpere.” 33Ọ nọ weri Pita lẹ Jemisi lẹ Jọnụ jẹnmẹ.
Ẹhụ efuzin'ẹ kaka; obi eruzin'ẹ alị. 34Ọ nọ sị wẹ, “Obi e d'a gbawapụ m. Nọdị nị ebeni, ụnụ e we ẹnya ru alị.”
35Ọ nọ jẹnzụka, tụha enwẹn ẹ ye alị, kpe ekpere, nị omẹni ọ rị nfe, ogẹn afụnfụn hụ ya ghafe ẹ, 36ọ sị, “Baba; Baba Nẹdi m! Onwọnni ihiẹn ị ghalẹni a s'ẹka e mẹ. Napụ m mkpu afụnfụn lẹ ọnwụnnị. Kanị uche i ya mẹ, ẹlẹ nke m.”
37Ogẹn o gi kin azụụn, ọ hụn wẹ kẹ wẹ rị ụran. Ọ nọ sị Pita, “Saịmọnụ, ị rị ụran? Ya wụ y'a s'ẹka mụ ẹnya ogẹn nọ ẹnịna#14.37 Mgbahunmẹ ọkụrọkụ ohu sụọ.?” 38Ọ nọ sị wẹ, “Mụnrụn nị ẹnya; e mẹ ni ekpere, amamgbe ụnụ a danban imẹ ọnwụnwan; mmọn ịhịan a chọghọ, kanị ndụn gụ ẹhụ.”
39Ọ nọ pụzị, mẹzikwọ ekpere ohu hụ. 40O kinhẹn ebe ndị nsọnmazụụn a rị, hụnzị wẹ kẹ wẹ rị a ranhịn, asadẹni wẹ ẹka shịapụ ẹnya. Amarịnzị wẹ ihiẹn wẹ sikọ d'a sị a.
41O kinhẹn nke mgbe ẹtọ, ọ nọ sị wẹ, “Ụnụ rịkwọ nwan a ranhịn, e zuru ikẹn? Ogẹn e rugụọ. Lee n'ẹ, e we wẹ Nwa nke Ịhịan che ẹka ndị-njọ. 42Lihi ni nị ẹnyi jẹnmẹ. Lee n'ẹ, onyẹ rị e reni m e rugụọ ebeni!”
A Nwụnrụn Wẹ Jesu
(Mat 26.47-56; Luk 22.47-53; Jọn 18.3-12)
43Jesu rịhụ e ku oku hụ kẹ Judasị hụn wụ onyẹ ohu imẹ ndị nsọnmazụụn a bịa; ya lẹ igunrun busọnmẹ ọpịa-agha lẹ ẹgbe. Ndị-isi nchụn-ẹjan lẹ ndị-nkuzi Iwu lẹ ndị-isi zi wẹ. 44Judasị rị e ren'ẹ gwatọ wẹ ihiẹn wẹ sikọ d'e gi marịn Jesu, sị, “Onyẹ hụn m jẹnkọ d'e susu ọnụ, ịya wụ onyẹ ụnụ chọkọ; nwụnrụn n'a, ụnụ e kwọnkẹnmẹ ẹ, duru ẹ jẹnmẹ.” 45Ogẹn Judasị gi nwan bịa, ọ nọ jẹnburu Jizọsị, sị a, “Onyẹ-nkuzi!” O susu ẹ ọnụ. 46Ya ndị hụ o duhẹ nọ kwọndọn Jesu, nwụnrụn a. 47Kanị, onyẹ ohu imẹ ndị nsọnmazụụn a ndị ahụn turu ebẹhụ nọ sepụha ọpịa-agha, banpụ odibo Onyẹ-isi nchụn-ẹjan ntịn.
48Jesu sị wẹ, “Kị ụnụ buhẹni ọpịa-agha lẹ ẹgbe d'a nwụnrụn m, nọkẹ sị m wụ onyẹ-ohin? 49Mmẹ lẹ ụnụ rị imẹ Ụlọ-nsọ ụhụọhịn ile kẹ m rị a kuzi, ụnụ anwụnrụnnị m. Kanị ihiẹn ndịnị rị e mẹ kẹni ihiẹn Ẹkụkwọ-nsọ ku mẹzu.”
50Ndị nsọnmazụụn a ile nọ la a tọ, gbama ọsọ. 51Okorọbịa ohu yihụ ẹkwa linẹ w'e yiye elu ẹ nọ sọnmẹ Jesu. A dọdọn w'ẹ ẹkwa hụ, chọ nị wẹ nwụnrụn a, 52kanị ọ nọ la ẹkwa tọnị wẹ, gi ọtọ gbapụ.
E We Wẹ Jesu Jẹnni Ndị-isi Nkịkwama
(Mat 26.57-68; Luk 22.54-55,63-71; Jọn 18.13-14,19-24)
53Wẹ nọ weri Jesu shi iwe onyẹ-isi nchụn-ẹjan. Ndị-isi nchụn-ẹjan lẹ ndị-nkuzi Iwu lẹ ndị-isi ile zu ebẹhụ. 54Pita sọnkọ Jizọsị; kanị ẹgbata wẹ e teyezighọ. Ọ nọ sọn ẹ banye ezi ọgwa onyẹ-isi nchụn-ẹjan, sọn ndị-nche rị ebẹhụ nọdị alị, nyanma ọkụn. 55Ndị-isi nchụn-ẹjan lẹ Ndị-isi Nkịkwama ile hụ a chọ ihiẹn w'e gi hangbu Jizọsị eṅẹn kẹni wẹ gbu ẹ, kanị ahụnnị wẹ; 56ọsụọn'a nị ndị bu ọda e buokingụọ Jesu ọnụ, oku wẹ adangbamanị. 57Ya kẹ ụfọdụ ndị rị ebẹhụ nọ lihi ọtọ, buokinzi Jesu ọnụ, sị, 58“Ẹnyi nụ k'o ku n'o jẹnkọ d'e tikpọ Ụlọ-nsọnị wẹ gi ẹka tụn, gi akpọhịn ẹtọ tụn hụn wẹ gilẹni ẹka tụn.” 59Kanị, ẹri ndịnị shịa adangbamazịkwọnị.
60Ya kẹ onyẹ-isi nchụn-ẹjan nọ nwan lihi ọtọ ihun wẹ ile, jụ Jesu ajụjụ, “Y'e nwọn ihiẹn y'a shịarị imẹ ihiẹnni ile wẹ rị e kin?”
61Kanị Jesu nọ gba nkịtịn, ọ shịarịnị ihiẹn ọwụlẹ. Onyẹ-isi nchụn-ẹjan nọzị sị a, “Ịyụ wụ Kraịstị, Nwa Onyẹ Hụ Rịchanrịn Mma?”
62Jesu nọ sị, “Mmẹ rọ; ụnụ jẹnkọ d'a hụndẹ Nwa nke Ịhịan ebe ọ nọdị alị ẹka-nni Osolobuẹ Onyẹ nwọn ikẹn ile, hụnzị a k'ọ rị elu orukpu o gi lala!”
63Ya kẹ onyẹ-isi nchụn-ẹjan nọ tika ẹkwa ye enwẹn ẹ olu, sị, “Kị ẹnyi rịzị a chọnị ọshẹri?! 64Ụnụ a nụgụọ arụnị o ku. Kị wụ uche ụnụ?” Wẹ ile nọ sị nị ikpe-ọnwụn a magụọ a.
65Ụfọdụ nọ jụma Jesu ẹsọn, kpumẹ ẹ ẹnya, fịan a ihiẹn, sị a, “Bu amụma!” Ndị-nche nọzị weri ẹ, gbu ẹ ili.
Kẹ Pita Dọn Ghọrị N'ọ Marịn Jizọsị
(Mat 26.69-75; Luk 22.56-62; Jọn 18.15-18,25-27)
66Pita rị ibe alị imẹ ezi-ọgwa hụ, okpoho ohu imẹ idibo onyẹ-isi nchụn-ẹjan nọ bịa ebẹhụ. 67Ọ hụn Pita ebe ọ rị a nyan ọkụn, ọ nọ bu ẹnya tụma a, sị a, “Ịyụ lẹ Jizọsị onyẹ Nazarẹtị wị.”
68Kanị Pita nọ ghọrị, sị, “Amarịn m ihiẹn ị rị e ku; aghọtanị m ihiẹn i rị e ku!” Ọ nọ pụ ebẹhụ, shi ọnụ-mgbọn. Ya kẹ ọkpa nọ kwan.
69Okpoho-odibo hụ a hụnzị a ebahụn, ọ nọ gwama ndị wuzo ebẹhụ, “Okẹnnyẹni wụ onyẹ nke wẹ!” 70Kanị Pita a ghọrịzị.
O tebe, ndị turu ebahụn nọzị sị Pita, “Ezioku-ezioku, ị wụ onyẹ nke wẹ, makẹni ị wụ onyẹ Galili.”
71Kanị, Pita nọ bụma enwẹn ẹ ọnụ, e kundẹ Osolobuẹ, a sị, “Amarịn m okẹnnyẹni ụnụ rị e ku oku ẹ.”
72Ya kẹ ọkpa nọ kwan nke mgbe ẹbụọ, ya Pita nọ nyanhan oku Jesu gwa a, “Ọkpa gini d'a kwan mgbe ẹbụọ, i jẹnkọ d'a ghọrị mgbe ẹtọ nị y'a marịn m.” Ndụn a gụ a, ọ nọ kwanma ẹkwan.
ప్రస్తుతం ఎంపిక చేయబడింది:
Makị 14: ikkBI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.