Makị 3
3
Isi Nke Ẹtọ
Okẹnnyẹ Ẹka Ohu Nwụnhụn
(Mat 12.9-14; Luk 6.6-11)
1Ya Jizọsị nọ banyezi ụlọ-ofufe. Okẹnnyẹ ohu ẹka ohu nwụnhụn rị ebẹhụ. 2Ya wẹ nọ kemẹ Jesu nke kẹn'ọ zụọ a Ụhụọhịn Ezumikẹn, nị wẹ gi ẹ ma a ikpe. 3Ya ọ nọ sị okẹnnyẹ hụ ẹka nwụnhụn, “Pụha ihun ebeni.” 4Ọ nọ sị wẹ, “Elee hụn Iwu kwadọn nị wẹ e mẹ Ụhụọhịn Ezumikẹn? Imẹ ihiẹn rị mma ra imẹ eje-ihiẹn? Ịzụọ ịhịan ra igbun'ẹ?” Kanị a gba w'a nkịtịn.
5Jizọsị nọ gi iwe lehunmẹ wẹ, makẹni ọ fụka a nị obi wẹ e zekẹ. Ya ọ nọ sị okẹnnyẹ hụ, “Tịnpụ ẹka ị.” Ọ tịnpụ a, ẹka a nọ rị mma. 6Ndị Itu-Farisi nọ pụ, wẹ lẹ ndị itu Hẹrọdụ nọ zumẹ umẹ ozigbo kẹni wẹ gbu Jesu.
Eje-mmọn Hụn Kọma Jizọsị Ẹnya
7Jesu lẹ ndị nsọnmazụụn a nọ pụ, jẹnmẹ mkpẹnrẹn mirin Galili; igunrun bugbu enwẹn ẹ ọda nọ gha Galili sọnmẹ ẹ, wẹ lẹ ndị gha Judia 8lẹ Jerusalẹm lẹ Idumịa lẹ nfetu Iyi Jọdanị lẹ ẹgbẹrẹ Taya lẹ Sidọnụ bịa. Ndịnị bịa makẹni wẹ nụ ihiẹn ile Jesu rị e mẹ. 9Ọ nọ sị ndị nsọnmazụụn a kwademẹn'ẹ ụgbọ-mirin ufiri igunrun hụ, makẹ wẹ gha a fụfa#3.9 Fa a nfa. a. 10Makẹni ọ zụọgụọ ndị bụ ọda, ndị ile emu rị a kụ rị a fụfa nị wẹ mẹtụ a ẹka. 11Ndị eje-mmọn rị imẹ wẹ hụn a, a dannị w'a alị ozigbo, yi, “Ị wụ Nwa Osolobuẹ!” 12Ọ hụ a jụgbọ eje-mmọn ndị hụ, sị wẹ ekulẹ onyẹ ọ wụ.
Jizọsị E Tumẹ Ndị-ozi Pụ-ichẹn Mmẹbụọ
(Mat 10.1-4; Luk 6.12-16)
13Omẹgụ, Jesu nọ shi elu ugu, kpọ ndị hụn ọ chọ, wẹ nọ bịa d'e kunrun ẹ. 14Ọ nọ tumẹ mmadụ mmẹbụọ, kpọ wẹ ndị-ozi pụ-ichẹn, nị wẹ du ẹ nọdị, n'o zipụ wẹ d'e ku oku-Chuku 15lẹzi n'o ye wẹ ikẹn w'e gi a chụpụ eje-mmọn. 16Mmadụ mmẹbụọ hụ o tumẹ wụ: Saịmọnụ (hụn o tu Pita, ya wụ Ọmụma); 17Jemisi nwa Zẹbẹdi lẹ Jọnụ nwẹnẹ Jemisi. Uwẹ k'o tu Bonagẹsị, ya wụ Ụmụ akpara (akpabọ); 18ndị ọzọ wụ Andrụ lẹ Filipu lẹ Batolomi lẹ Matiu lẹ Tamọsị lẹ Jemisi nwa Alịfịọsụ lẹ Tadịọsụ lẹ Saịmọnụ hụn te rị ndị gi ẹka-ikẹn e mẹ ni wẹ chụpụ ndị Rom rị a kị alị wẹ, 19lẹzi Judasị nwa Iskarọtụ hụn ren'ẹ ogẹn ikpanzụụn.
E Sị Wẹ Nị Eje-mmọn#3.20 Bẹzibọlụ. Rị Imẹ Jesu
(Mat 12.22-32; Luk 11.14-23; 12.10)
20Jesu e mẹmẹgụ, ọ nọ lashi iwe ẹ; igunrun ịhịan nọzị bịa, nke wụnị ya lẹ ndị nsọnmazụụn a ahụndẹni efe ri ihiẹn-oriri. 21Nnẹ lẹ umunẹ Jesu a nụ a, wẹ nọ bịa nị wẹ weri ẹ, makẹni wẹ nụ kẹ wẹ rị e ku oku ẹ, a sị “Ẹra a pụmagụọ a!”
22Ndị-nkuzi Iwu hụn gha Jerusalẹm bịa hụ a sị, “Onyẹ-isi eje-mmọn ile wụ Bẹzibọlụ rị imẹ ẹ; ikẹn Bẹzibọlụ onyẹ-isi eje-mmọn ile k'o gi a chụpụ eje-mmọn.”
23Ya kẹ Jizọsị nọ kpọzụnhan wẹ, gi ilu gwa wẹ oku, sị, “Nanị kẹ Ekwensụ a dọn chụpụ Ekwensụ? 24Alị-eze ọwụlẹ kebeni, asakọ ẹka turu. 25Ikpụlọ kebeni, asakọ ẹka turu. 26O mẹ nwan nị Ekwensụ e bugụọ nụmanị enwẹn ẹ, omẹni o kebegụọ, ọ sakọ nwan ẹka turu; nke ẹ a gụgụọ!
27“Kanị, onwọnni onyẹ a saẹka a banye iwe dikẹn, kịrị ihiẹn ẹ, mmanị o kẹnmẹgụ a. O kẹnmẹgụ a, ya k'ọ nọ saẹka banye, kịrị ihiẹn ẹ.
28“M rị a gwa ụnụ ezioku, nị wẹ gbagharịghọ njọ ile ịhịan mẹ lẹ eje-oku ile wẹ ku; 29kanị onwọnni ogẹn w'e gi gbagharị onyẹ kuja oku Mmọn-nsọ; o mẹọlẹ njọ itẹbitẹ.”
30Jesu ku ihiẹnni makẹni wẹ sị, “Eje-mmọn rị imẹ ẹ.”
Onyẹ Wụ Nnẹ Lẹ Umunẹ Jesu?
(Mat 12.46-50; Luk 8.19-21)
31Nnẹ Jizọsị lẹ umunẹ Jizọsị nọ bịa, turu ihun-ezi, zi wẹ d'a kpọ a. 32Igunrun nọhunmẹ ẹ; ya wẹ nọ sị a, “Nnẹ i lẹ umunẹ i ikẹnnyẹ lẹ umunẹ i ikpoho rị ihun-ezi, a jụ ukwere i.” 33Ọ nọ shịarị wẹ, sị, “Onyẹ wụ nnẹ m? Elee ndị wụ umunẹ m?” 34Ọ nọ lehunmẹ ndị hụ nọhunmẹn'ẹ, sị, “Lee nnẹ m lẹ umunẹ m ebeni! 35Onyẹ ọwụlẹ hụn e mẹ uche Osolobuẹ wụ nwẹnẹ m okẹnnyẹ lẹ nwẹnẹ m okpoho lẹ nnẹ m.”
ప్రస్తుతం ఎంపిక చేయబడింది:
Makị 3: ikkBI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.