Makị 9
9
Isi Nke Itenẹi
1Jesu nọ sịzị wẹ, “Ezioku kẹ m rị a gwa ụnụ, o nwọnghọ ndị wuzo ebeni jẹnkọlẹni d'a nwụnhụn d'e ru mgbe wẹ hụn Alị-eze Osolobuẹ k'o gi ikẹn hi-ogbe bịa.”
Kẹ Jizọsị Dọn Nwọnhutọ
(Mat 17.1-13; Luk 9.28-36)
2Akpọhịn isin a ghafegụ, Jesu nọ weri Pita lẹ Jemisi lẹ Jọnụ, we wẹ shi elu-ugu jẹn elu ọda-ọda, ya lẹ wẹ sụọ, ọ nọ nọ idẹnya wẹ nwọnhutọ: 3ẹkwa a nọ gbukepụma ọda-ọda, onwọnni onyẹ rị elu ụwa k'a saẹka sụnwun ẹkwa ẹrịra. 4Ya kẹ Ẹlaịja lẹ Mozizi nọ nwọnpụha, sọn Jesu kumẹ oku. 5Pita nọ sị Jesu, “Onyẹ-nkuzi, ọ rịka mma nị ẹnyi rị ebeni! Nị ẹnyi mẹmẹ ọdụ ẹtọ, ohu wụ nke i, ohu wụ nke Mozizi, ohu wụ nke Ẹlaịja.” 6(Pita amarịnzị ihiẹn o k'e ku, makẹni egun rị a tụ wẹ). 7Orukpu nọ pụha d'e kpumẹ wẹ; olu nọ gha imẹ orukpu hụ sị, “Ọnwan wụ ezi Nwa m; gọn n'ẹ ntịn!” 8Wẹ nọ lehunmẹ ẹnya ozigbo, kanị ahụnzịnị wẹ onyẹ ọwụlẹ karị Jesu sụọ.
9Ogẹn wẹ lẹ Jizọsị gi gha elu-ugu hụ hidanla, ọ nọ sị wẹ, “Agwakwọlẹ ni onyẹ ọwụlẹ ihiẹn ụnụ hụn d'e ru ni Nwa nke Ịhịan a gha ọnwụn lihi.” 10(Agwanị wẹ onyẹ ọwụlẹ; kanị wẹ sụọ nọdị, wẹ hụ e ku ẹ, a jụ ihiẹn wụ “ịgha ọnwụn lihi.”)
11A jụghọ wẹ Jesu ogẹn ahụn, sị, “Kị haịn nwan ndị-nkuzi Iwu gi sị nị Ẹlaịja k'a bịagụ Kraịstị kebe bịa?” 12Ọ nọ sị wẹ, “Ezioku rọ nị Ẹlaịja sikọ d'a bịagụ d'a kwademẹchanrịn ihiẹn ile. Kị ụnụ rozi nwan nị ya haịn Ẹkụkwọ-nsọ gi sị nị Nwa Nke Ịhịan jẹnkọ d'a ta okẹn afụnfụn, nị wẹ sikọ d'e legberi ẹ? 13M rị a gwa ụnụ nị Ẹlaịja a bịagụọ, e mẹ w'ẹ ihiẹn sụọnị wẹ — ihiẹn ile Ẹkụkwọ-nsọ sị wẹ k'e mẹ ẹ.”
Jizọsị A Zụọ Nwata Okẹnnyẹ Eje-mmọn Rị Imẹ Ẹ
(Mat 17.14-21; Luk 9.37-43)
14Ogẹn wẹ gi ru ebe ndị nsọnmazụụn a ndị ọzọ rị, wẹ nọ hụn igunrun hi-ogbe fihunmẹni wẹ lẹ ndị-nkuzi Iwu rị e sọn wẹ a dọ ndọndọ. 15Hụn igunrun hụ ile gihụ hụn Jizọsị, ọ tụ wẹ ẹnya ọda-ọda, ya wẹ nọ gbaburu ẹ d'e kele ẹ. 16Jesu nọ jụ ndị nsọnmazụụn a, sị, “Kị ụnụ lẹ wẹ rị a dọ?” 17Onyẹ ohu rị igunrun hụ nọ sị a, “Onyẹ-nkuzi, m wẹhẹn'i nwa m okẹnnyẹ; eje-mmọn ghalẹni a nị a e ku oku rị imẹ ẹ: 18o kwọndọn ẹ, o bu ẹ gbe alị, ụfọfọ a ghama a ọnụ, ọ tama nkwẹnrẹn-eze, ẹhụ a ile e shiri. M te sị ndị nsọnmazụụn ị chụpụ eje-mmọn hụ, ọ nịnị wẹ.”
19Jizọsị nọ sị wẹ, “Agbọ nwọnlẹni okukwe! Elebe mmẹ lẹ ụnụ a nọru?! Elebe m'e dinruni ụnụ?! Wẹhẹni ni m nwata hụ!” 20Wẹ nọ wẹhẹni Jesu nwata hụ. Hụn eje-mmọn hụ gihụ hụn Jesu, ọ dọma nwata hụ, nwata hụ nọ dan alị, kperemẹ, ụfọfọ a ghama a ọnụ. 21Jesu nọ jụ nẹdi nwata hụ, sị, “Elee mgbe ihiẹnni bidọn ẹ?” Ọ nọ sị, “K'ọ rị nwa-ndu. 22Ọ tụ a e ye imẹ ọkụn lẹ imẹ mirin mbụ-lẹ-ẹbụọ, n'o gbu ẹ. Omẹni o nwọn ẹka ị k'a saẹka yeni ẹnyi, dodo, mẹni ẹnyi omikẹn.” 23Jesu nọ sị a, “Ị sị, ‘Omẹni ị k'a saẹka?’ Onwọnni ihiẹn wẹ ghalẹni a saẹka e mẹni onyẹ nwọn okukwe.” 24Ya kẹ nẹdi nwata hụ nọ dankpọpụ ẹkwan ozigbo, sị, “E kwerighọ m, yeni m ẹka ebe m nọlẹni nwọn okukwe!”
25Ogẹn Jesu gi hụn nị igunrun rị a gbaha, ọ nọ jụgbọ eje-mmọn hụ, sị a, “Ịyụ wụ eje-mmọn odin ghalẹni a nị nwatanị e ku oku mọbụ a nụ ihiẹn, m sị ị gha imẹ ẹ pụ! Abanzilẹ imẹ ẹ!”
26Eje-mmọn hụ nọ yi oro; ọ dọgụ nwata hụ ọda-ọda, ọ nọ gha imẹ ẹ pụha. Nwata hụ emẹhunmẹzini, nke wụnị ndị bu ọda nọ sị, “Ọ nwụnọlẹ!” 27Kanị, Jesu nọ kwọndọn ẹka nwata ahụn, weli ẹ, ọ nọ turu ọtọ.
28Ogẹn Jizọsị gi banye imẹ ụlọ, ndị nsọnmazụụn a nọ jụ a nzuzue, sị, “Kị haịn ẹnyi gilẹni saẹka chụpụ a?”
29Ọ nọ sị wẹ, “Ekpere#9.29 Ekpere lẹ ibu-ọnụ. sụọ kẹ wẹ gi a sa ẹka a chụpụ ụdịnị.”
Jesu E Kuzi Ẹ N'o K'a Nwụn, Lihizi
(Mat 17.22-23; Luk 9.43-45)
30Jizọsị lẹ ndị nsọnmazụụn a nọ pụ ebahụn, ghashi Galili. Jesu achọnị nị ịhịan marịn ebe wẹ rị, 31makẹni ọ rị a kuzi ndị nsọnmazụụn a, a sị wẹ, “Wẹ sikọ d'e we Nwa nke Ịhịan ye ndị k'e gbun'ẹ; kanị, wẹ gbugụ a, o lihi nke akpọhịn ẹtọ.” 32Kanị aghọtanị wẹ ihiẹn ọ rị e ku, bụ egun anịnị wẹ jụ a ụtaa.
Onyẹ Kachanrịn Ibe Ẹ Imẹ Ndị Nsọnmazụụn Jesu?
(Mat 18.1-5; Luk 9.46-48)
33E ru wẹ Kapanọm, a banyegụ wẹ mmụlọ, Jizọsị nọ sị ndị nsọnmazụụn a, “Kị ụnụ rịdẹ a dọ kẹ ẹnyi rị ụzọ?” 34Ya wẹ nọ gba nkịtịn, makẹni kẹ wẹ rị ụzọ, wẹ hụ a dọ onyẹ kachanrịnnị imẹ wẹ ile.
35Jesu nọ nọdị alị, kpọzụnhan wẹ mmẹbụọ, sị wẹ, “Onyẹ chọ n'ọ wụrụ onyẹ ibuzọ, ya wụrụ onyẹ ikpanzụụn, ya wụrụ odibo ụnụ ile.” 36Ya ọ nọ weri nwata ohu, bu ẹ tumẹ ihun wẹ. Ọ parị a, sị wẹ, 37“Onyẹ gi ufiri m nabanhan onyẹ ohu imẹ ndịnị, mmẹ k'ọ nabanhan; onyẹ hụn nabanhannị m ẹlẹ mmẹ k'ọ nabanhan, onyẹ hụn zini m k'ọ nabanhan.”
Onyẹ Rịlẹni A Lụsọn Ụnụ Ọgụn Rị Azụụn Nke Ụnụ
(Luk 9.49-50)
38Jọnụ#9.38 Ẹlẹ hụn e mẹ mirin-Chuku. nọ sị Jesu, “Onyẹ-nkuzi, ẹnyi hụn okẹnnyẹ ohu k'ọ rị e gi ẹfan ị a chụpụ eje-mmọn, ẹnyi nọ kụsị a, makẹni ara sọn ẹnyi.”
39Kanị Jesu nọ sị a, “Akụsịlẹ n'a; makẹni onwọnni onyẹ gigụhụ ẹfan m rụn ọrụn-atụmẹnya hụn sikọ d'e kujakẹnrin oku m. 40Makẹni onyẹ rịlẹni a lụsọn ẹnyi ọgụn rị azụụn nke ẹnyi. 41Ezioku kẹ m rị a gwa ụnụ, onyẹ ọwụlẹ hụn k'e ye ụnụ mkpu mirin ohu ra makẹni ụnụ rị a za ẹfan Kraịstị jẹnkọ d'a narịn ụgwọ ọrụn a.
Ihiẹn E Buhẹ Njọ
(Mat 18.6-9; Luk 17.1-2)
42“Onyẹ han onyẹ ohu imẹ ụmụẹka ndịnị kwerinini m mẹ njọ, ọ ka mma nị wẹ yimẹ ẹ ọlọ hi-ogbe olu, tụ a ye imẹ ohimin. 43Ya wụ, ẹka ị haịn ị mẹ njọ, bepụ a. Ọ ka mma n'i gi ẹhụ zulẹni oke banye ndụn karị n'ị nwọn ẹka ẹbụọ bụ y'a la ọkụn-mmọn, ọkụn hụ ghalẹni e tinyụn. 44Ọhọrị rị ebahụn ara nwụn; ọkụn rịn'a ara tinyụn. 45Ụkụ ị haịn ị mẹ njọ, bepụ a: ọ ka mma n'ị dan ngụrọ banye ndụn karị n'ị nwọn ụkụ ẹbụọ bụ y'a la ọkụn-mmọn. 46Ọhọrị rị ebẹhụ ara nwụn; ọkụn rịn'a ara tinyụn. 47Ẹnya ị haịn ị mẹ njọ, gụpụ a, ọ ka mma n'i gi ẹnya ohu banye Alị-eze Osolobuẹ karị n'ị nwọn ẹnya ẹbụọ, a tụ wẹ i ye ọkụn-mmọn. 48Ọhọrị rị ebẹhụ a ra nwụn; ọkụn rịn'a ara tinyụn.
49“Wẹ k'e gi ọkụn mẹ ịhịan ihiẹn wẹ gi nnu e mẹ. 50Nnu a rịka mma; kanị, o mẹ nwan n'ọ sụọzịnị ụsụọ, nanị y'a dọn mẹ ẹ sụọmazị ụsụọ? E nwọnni nnu imẹ ndụn ụnụ, e mẹ ni nị udọn a rị ẹgbata ụnụ lẹ ibe ụnụ.”
ప్రస్తుతం ఎంపిక చేయబడింది:
Makị 9: ikkBI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.