Jone 2
2
Gaghamu tholaghi jare Kena
1Phei narane ke leghugna igne, mare ne eni kaisei gaghamu tholaghi ka namono te kiloi Kena, ka provins Galili. Eghuteuna idogna mae Jisas na ne au langau baludi keha naikno teke mei ka gaghamu tholaghi na. 2Hatimare ne toreni mae Jisas baludi nogna mae fanomhore mala au langau ka gaghamu tholaghi igne. 3Fari hoteigna gaghamu na, waen te mala koꞌu mare ka vido tuana na la gnafahi. Aonu idogna mae Jisas na ne mei cheke eghu ka mana, “Thuguo, rehati la theo waen te mala koꞌu na.”
4Mae Jisas ne cheke eghu ka idogna na, “Ido, thosei cheke ka iara unha te mala eni gognarona, naugna nogu narane iara te mala fatakleni nogna nolaghi God na theome thoke mei ngau.”
5Aonu, idogna mae Jisas na tei ne cheke eghu ka mae glokure, “Eni unha te chekeni mana ka ghotilo na.”
6Aonu mae Jiu au nodi kmana vetula te mala titihi na. Naugna igne mare au namno botol biꞌo mala toho khoꞌu ka suga na. Botol igre thono biꞌo fara, fodudire jame naba kaisei gobi lita.
7Mae Jisas ne cheke eghu ka mae glokure, “Ghotilo toho fafodu botol biꞌo igre ka khoꞌu.” Mae glokure leghuni nogna cheke mae Jisas na ne toho fafodu ne ngata botol biꞌo igre.
8Aonu mana ne cheke eghu ka mae glokure, “Ghotilo totoho fakasa katha khoꞌu mala atha tei ka mae biꞌo te areꞌare gna gaghamu gne.”
Mare leghui chekegna mae Jisas igne ne atha ne tei katha khoꞌu teke vuhai waen na ka mae biꞌo na. 9Mana gnaignami ne nongharini khoꞌu teke vuhai waen igne. Eghuteuna mana ne thofno jaglo nogna fara, naugna mana theome laseni waen te keli igne neke mei funugna aheva. Nu mae gloku teke toho khoꞌu na laseni igne. Mae biꞌo mala areꞌare gna gaghamu na ne kilo meini mae te tolaghi na, 10ne cheke eghu ka mana, “Funu tifa te mei na tahati kulu tufa koba waen te keli na ka naiknore. Ke leghu, kate koꞌu fara mare waen te keli na, ame tufa nga waen te theome raꞌe keli na leghu lahu eghu sia. Nu iagho ne tathaji neu ngala waen te keli na ne ghilei thoke gognaro gne.”
11Igne kofubobhoi ulu lahu teke eni mae Jisas ka namono Kena ka provins Galili. Jare mae Jisas ne falalase nogna nolaghi biꞌo God na, eghuteuna nogna mae fanomho manare ne fatutuani ni mana.
12Ke leghugna igne mae Jisas ne tei baludi idogna, thabusigna nei nogna mae fanomhore. Eghuteuna mare ne kafe au jare keha narane.
Mae Jisas ne brue fajifladi naiknore ka Sugablahi na
(Mat 21:12-13; Mak 11:15-17; Luk 19:45-46)
13Aonu, mae Jisas ne haghe Jerusalem. Naugna nodi narane Gaghamu Ghasa-Polho mae Jiure la namohi. 14Ka glalabagna Sugablahi na, mae Jisas ne filodi naikno te sabiri buluka, sipu, nei balhu teure. Keha naiknore gnokro ka tevo re tutughu sileni neu. 15Aonu, mae Jisas ne horo kaisei phukri. Mana ne kafe brue fajifladi naikno, sipu nei buluka teure ka Sugablahi na. Eghuteuna, mana ne pili fapogru nodi tevo mae te mala tutughu silenire, nei tofa tafri nodi sileni re. 16Mana diꞌatagna ne cheke eghu ka naikno te sabiri balhure, “Atha tei nomi gobigna lepo gre! Thosei jateula suga mala maket eghu sugagna mae Mama gne!” 17Kate chekeni mana igne, mae fanomhore neke ghatho fapuloni unha te cheke eghu ka grioriso te blahi na ia, “God, leghu fata na iara ghatho tahuni koba nou suga iagho gne.”#2:17 Sam 69:9.
18Kate filoni unha te eni mae Jisas igne, mae biꞌodi mae Jiu gre ne diꞌatadi fara ne ghusna eghu ka mana, “Unha kofubobhoi nate eni iagho te mala laseni ghehati God neke tusu ari ka iagho nolaghi te mala edi glepo igre na?”
19Mae Jisas ne cheke eghu ka mare, “Jame paꞌe soru ghotilo Sugablahi igne na, iara ginauna ke babana fapulo ka fatilo narane na.”
20Mae biꞌodi mae Jiu re ne cheke eghu ka mana, “Ghema, tangomana nigho ngau sagho te loku kolho thilo narane na suga ignea? Phiatutu namno finogha si mare teke loku gna na Sugablahi ignea!” 21Nu Sugablahi te chekeni mae Jisas igne thofno gaoghathogna eigna thinigna thegna na kolho. 22Ke leghugna teke karha fapulo mana ka glehe na, nogna mae fanomho manare neke ghathoni unha teke chekeni mana igne. Eghuteuna, mare ne fatutuani ni unha teke chekedi mae Jisas re nei grioriso blahi na.
23Kate au teu mae Jisas Jerusalem malagna u narane Gaghamu Ghasa-Polho na, kmana naikno filodi u kofubobhoi teke edi mana re ne fatutuani ni mana. 24Nu mae Jisas ne theome snakredi ka naiknore naugna mana thofno lase fakelidi nagnafadi naikno te gnafare. 25Neubane theo kaisei naikno te cheke fajiflani kaisei glepo ka mana eidi naiknore, mana kulu lasedihi unha te au ka gaoghathodi naiknore.
ప్రస్తుతం ఎంపిక చేయబడింది:
Jone 2: mrn
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022, Wycliffe Bible Translators , Inc. All rights reserved.