3 యోహాను 1

1పెద్దనైన నేను,

సత్యంలో ప్రేమించుచున్న నా ప్రియ స్నేహితుడైన గాయికు వ్రాయునది:

2ప్రియ మిత్రుడా, నీవు ఆత్మలో వర్ధిల్లుతున్నట్లు, మంచి ఆరోగ్యాన్ని కలిగి అన్నిటిలో నీవు వర్ధల్లాలని నేను ప్రార్థిస్తున్నాను. 3కొందరు విశ్వాసులు వచ్చి, నీవు సత్యంలో ఎలా జీవిస్తున్నావో చెప్తూ, మీ సత్య ప్రవర్తన గురించి సాక్ష్యమిచ్చినప్పుడు నాకెంతో ఆనందం కలిగింది. 4నా పిల్లలు సత్యంలో జీవిస్తున్నారని వినడంకంటే నాకు సంతోషకరమైన విషయం వేరొకటి లేదు.

5ప్రియ మిత్రుడా, సహోదరి సహోదరులు నీకు పరిచయం లేకపోయినప్పటికి, వారి పట్ల నీవు చేస్తున్నదాంట్లో నమ్మకంగా ఉన్నావు. 6నీ ప్రేమ గురించి వారు సంఘానికి చెప్పారు. దయచేసి దేవుని ఘనపరచే విధంగా వారిని వారి మార్గంలో పంపు. 7దేవుని ఎరుగనివారి నుండి ఏమి తీసుకోకుండా ఆయన నామం నిమిత్తం వారు బయలుదేరారు. 8మనం కలిసి సత్యం కొరకు పనిచేసేలా అలాంటి వారికి ఆతిథ్యం ఇవ్వాలి.

9నేను సంఘానికి వ్రాసాను, కాని మొదట ఉండాలని ఆశించే దియొత్రెఫే మమ్మల్ని చేర్చుకోవడంలేదు. 10కనుక నేను వచ్చినపుడు అతడు చేస్తున్న వాటిని వివరిస్తాను. అతడు మా గురించి అర్థంలేని ఆరోపణలు చేస్తున్నాడు. దానితో తృప్తి చెందకుండా, ఇతర విశ్వాసులను చేర్చుకోవడానికి కూడా అంగీకరించట్లేదు. చేర్చుకోవాలనుకునే వారిని కూడ అతడు ఆపివేసి, వారిని సంఘం నుండి వెళ్ళగొడుతున్నాడు.

11ప్రియ మిత్రుడా, చెడును కాక మంచిని మాత్రమే అనుసరించు. మంచి చేసేవారు దేవునికి చెందినవారు. చెడు చేసేవారు దేవుని చూడలేరు. 12దేమేత్రిని గురించి అందరు మంచియే చెప్తున్నారు, సత్యం కూడ సాక్ష్యం ఇస్తుంది. మేము కూడ అతని గురించి సాక్ష్యం ఇస్తున్నాము. మా సాక్ష్యం సత్యమని నీకు తెలుసు.

13నేను నీకు వ్రాయవలసినది ఎంతో ఉంది. కాని కలంతో సిరాతో వ్రాయాలని నాకు లేదు. 14త్వరలో నేను నీ దగ్గరకు వచ్చి, ముఖాముఖిగా నీతో మాట్లాడాలని నిరీక్షిస్తున్నాను.

15నీకు సమాధానం కలుగును గాక.

ఇక్కడ ఉన్న స్నేహితులు వారి శుభాలను పంపుతున్నారు. అక్కడ ఉన్న స్నేహితులందరికి నా శుభాలు తెలియచేయి.

ప్రస్తుతం ఎంపిక చేయబడింది:

3 యోహాను 1: TCV

హైలైట్

షేర్ చేయి

కాపీ