Neto'te 9
9
Nsi wat kàn bo Noa
1Nsi #Net. 1.28yab kàn Noa boa bon tse tse bandum, ntshob bo ndù: Bin bwe bon, njàme, kà ndun num nsitsha'a. 2Njoṅ nyàm fa num nsitsha'a, njoṅ nsaṅ fa mfe kamànyam, boa njoṅ tshu fa tse bo be nzinte num nsitsha' là nsi ke bwôg zine. Me fà njoṅ ngontse fa tse bo be mum dibantse là bin. 3Njoṅ tshu fa ts'a be nkumte, nke njôg là nsi be jujù zine, me fà bin ndaṅndaṅ mba nenà là. Me fà njoṅ yen nà fa bin. 4Nda' #Lev. 7.26-27; 17.10-14; 19.26; Neb. 12.16,23; 15.23ndù bin ke nsi fèt mbàb bo lem, nummbe yôg num ntùm lem. 5Mbe se' mba lem tsin nà, me nsi bètt'é ndaṅndaṅ mba zwiag sin nà; me nsi bètt'é njoṅ nyàm fa, me nsi bètte zwiag mènntùn mènntùn, bètte zwiag mba we lo mfèl i.
6Mèn #Net. 1.26; Netu. 20.13z'a fètte lem mènntùn nà, mba mènntùn nsi fètte tse ze, nummbe Nsi lo nabte mènntùn à num mfuni Nsi.
7Mba #Net. 1.28bin nà, bin bwe, njàme, nsa mum njù, nke ntô i.
8Nsi tshob Noa boa bon tse tse bandum ndù:
9Tshù, me wat kàn bag à bin mba nzwit zin z'a nsi tum mànjam nà, 10boa njoṅ tshu fa tse bin à bo be ndù bo ghù zwiag là: Nsaṅe, nyàm nke'nke'e, nyàm tshwèt fa tse bin à bo be là. Nekebte, me tshob à njoṅ tshu fa tse bo tum ntùm sitima là, njoṅ nyàm fa num nsitsha'a. 11Me wat kàn bag à bin. Dibambaṅ ke nsi bèn bagte benntùn, dibambaṅ ke nsi bèn be, biagte tsha'a.
12Nsi tshob ndù: Tshù keki kàn ze me yab netèl àm bag à bin mba njoṅ nyàm fa bin à bo be li. Yen nu là nsi be ngu'ngu':
13Me yab kôngamnyu sàm mfe kamànyam. A nsi be keki kàn netèl àm mba njù. 14Ngelaṅ me nsi kùmte ba ndot num nsitsha'a, kôngamnyu tum mfe kamànyam nà, 15me nsi kwimte kàn s'a netèt be, njoṅ tshu fa tse bo ghù zwiag mba njoṅ benntùn fa là. Yen ngelaṅ nà ntse ke nsi bèn tù' dibambaṅ biagte benntùn. 16Ngelaṅ ze kôngamnyu nsi be mfe kamànyam, me yen i là, me nsi yen i, kwimte kàn matmat s'a be netèl àm bag à njoṅ tshu fa tse bo ghù zwiag mba njoṅ benntùn fa num nsitsha' là.
17Nsi tshob Noa ndù: Tshù keki kàn ze me yab netèl àm bag à benntùn fa tse bo be num nsitsha' là.
Bon Noa tat
18Bon Noa tse bandum tse bo tum ntùm sitima là na' mb'a Sém, Kam, Yafét; Kam b'a tà Kanaan. 19Tshen ben tat li b'a bon Noa tse bandum; a nzwit yub bèn ndo' njù nsitsha' fa.
20Noa to' nedù' nà, mbwe nkùa. 21A nu ndu' mbume, mfin nzwe ngwù mum ntàb i. 22Kam tà Kanaan yen tàab tunntôg, nsoṅ fèt tse tse bàa tse bo be ntshundà là. 23Là Sém mba Yafét lo' kummbaṅ ma' num nkembe' yub ntu bàa, mbènte tuntun ndo' nkabte tàa yub z'a be ntôgtun nà yi, nkaṅ se yub njam ke yen tàa yub ntôgtun.
24Noa bam num miaglo ndu' nju' ju ze kebatnjab ghù num i là. 25Ndùlala ntshob ndù: Ndon tsho tu Kanaan. A bwô ndù a be miagte nkuan netèt fèt tse. 26Mbèn ntshob mba ndù: Ghamte be Tshùaben, Nsi Sém, a bwô ndù Kanaan be nkuan Sém. 27A bwô ndù tunndà Yafét ke ntswe netèt tunndà Sém, Kanaan be nkuan Yafét. 28Dibambaṅ lo tôg Noa bèn ntswe mum njù ngu'njù bon tàn nkù tat. 29Noa lo tswe ngu'njù bon tàn nkù bwe'e, nkwù.
ప్రస్తుతం ఎంపిక చేయబడింది:
Neto'te 9: BMa
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
La Sainte Bible en Bamiléké-Medùmba © Alliance Biblique du Cameroun, 1993. All rights reserved.