Svun Mateo 14
14
Ja' li' yaloj ti c'u x'elan icham ti Juan j'ac'-ich'vo'e
(Mc 6.14-29; Lc 9.7-9)
1Yeche ora chac taje, ja' o ta scoviernoal tey ta Galilea ti Erodese. Iya'i ti c'u x'elan vinajem sc'oplal c'usitic tspas ti Jesuse, 2iyalbe ti much'utic tey ch-abtej yu'une: «Taje ja' ti Juan j'ac'-ich'vo' icha'cuxie yech'o ti oy syu'ele.» ―Xi.
3Yu'un li Herodese ja' ixchuc ta carina ti Juane, ja' ta scoj ti iyic' Herodiás li Herodese, ja' li yajnil Felipe ti yits'in no'oxe. 4Yu'un ti Juane ja' yech iyalbe ti Herodese: «Ma'uc yech smelol ti avic'ojbe yajnil li avits'ine.» —Xut.
5Ti Herodese yo'onuc smil ti Juane pero ixi' to'ox o ti crixchanoetique, yu'un scotolic xch'unojic ti ja' yaj'alc'op Rioxe. 6Ti c'alal iloc' sjabilal ti Herodese, ispas squ'inal. Ti stseb Herodíase i'ac'otaj ta o'lol yo' bu tsobolique. Lec tajmec iyil ti Herodese, 7c'anbon ti c'usi chac'ane, yilojriox chacac'be ―xut li tsebe.
8Li tsebe itic'bat c'op yu'un li sme'e, xi iyalbe ti Herodese:
—Ja'uc ac'bon tal ta plato sjol li Juan j'ac'-ich'vo'e —xut.
9Ti reye iyat yo'on, ta scoj ti isva'an ta rextico ti Rioxe, xchi'uc ti ya'yojic ti much'utic tey xchi'uc ta mexae, yech'o un iyal ti xu' chich'be sjol ti Juane. 10Yech'o un iyal mantal ti ac'u ba stuch'beic tal sjol ta yut chuclebal ti Juane; 11ispachbeic tal ta plato, iyac'beic li tsebe. Ti tsebe ba yac'be li sme' uque.
12Ic'otic ti yajchanc'optac ti Juane, ay yich'beic loq'uel tal li spat xocone, ba smuquic. Ti c'alal laj smuquic comele, ja' o ba yalbeic ti Jesuse.
Ja' li' yaloj ti ismac'lin vo'mil crixchanoetic ti Jesuse
(Mc 6.30-44; Lc 9.10-17; Jn 6.1-14)
13Ti c'alal iya'i ti Jesuse, ixch'ac sba loq'uel stuc, i'och ech'el ta canova, ibat ta xocol balamil yo bu xch'ijyane. Ti c'alal iya'iic li crixchanoetique ti ibat ti Jesuse, ba staic ta yoquic, tey i'ech'ic ta jteclumetic. 14Ti c'alal iloc' ta canova ti Jesuse, iyil ti tey xa tsobol ep crixchanoetique, ic'uxubaj ta yo'on, iyet'esbe xchamel li jchameletic tey yic'ojic ech'ele. 15C'alal ch-ic'ub xa'ox osile inopojic ech'el li yajchanc'optaque. Ja yech iyalbeic chac li'i:
—Li'toe xocol balamil xchi'uc imal xa c'ac'al noxtoc. Más lec taco ech'el li crixchanoetique, ac'u ba sman sve'elic ta bic'tal parajeletic ―xutic ti Jesuse.
16Itac'av ti Jesuse:
—Mu persauc xbatic, mac'linic vo'oxuc ―x'utatic.
17Istac'beic ti Jesuse:
—Mu c'usi oy cu'unticotic, c'ajomal vo'p'ej pan xchi'uc cha'cot choy li' quich'ojticotique ―xutic.
18I'albatic yu'un ti Jesuse:
―Ich'becontal li'toe ―x'utatic.
19Ti Jesuse iyalbe ti crixchanoetique ti ac'u chotlicuc ta stentejtique. Ixch'am ti vo'p'ej pane xchi'uc ti cha'cot choye, isq'uel vinajel, “colaval” xut ti Rioxe. Ja'o ixut li pane, iyac'be li yajchanc'optaque, li yajchanc'optaque ja' xa ixch'acbe li crixchanoetique. 20Ive' scotolic, lec inojic. Istsob-beic li sobra ti c'u yepal muc' xlaj yu'unique. Inoj lajcheb (12) moch. 21Oy nan vo'miluc viniquetic ive'ic. Muc'bu nitbil li antsetique xchi'uc li c'oxetique.
Ja' li' yaloj ti ixanav ta yoc ta ba nab ti Jesuse
(Mc 6.45-52; Jn 6.15-21)
22Ts'acal to iyalbe ti yajchanc'optaque ti ac'u ochicuc ech'el ta canovae, ti t'ab ac'u baticuc ta jech nabe. Ti Jesuse stuc xa isc'opon comel ti crixchanoetique. 23Ti c'alal laj sc'opon comel li crixchanoetique, imuy ech'el ta vits, ba sc'opon Riox stuc. C'alal i'och ac'ubale, stuc tey ta vits, 24ti c'alal o'lol xa'ox nab xloq'uic ech'el ta canovae, xyuc'yon xa tajmec li nabe yu'un ital tsots ic' ta stuq'uilic. Mu xa xanav li canovae. 25C'alal po'ot xa'ox sacube, ti Jesuse tal sta li yajchanc'optaque, chanav tal ta yoc ta ba nab. 26Ti c'alal iyilic li yajchanc'optac ti chanav tal ba nab ti Jesuse, x'avlajetic xa ta xi'el:
—¡Q'uelavilic li ch'ulelale! —Xiic.
27Ora ic'opoj ti Jesuse:
―¡Anchanic, mu xa xi'ic vo'on Jesuson! ―X'utatic.
28Itac'av li Pedroe:
—Cajval, mi yech xaval ti vo'ote, alo ti xu' chital ta ba nab uque, chtal jnupot ―xi.
29―La' ―x'utat yu'un ti Jesuse.
Iloc' ta canova li Pedroe, ixanav ta yoc ta ba nab, ba snup ti Jesuse. 30C'alal iya'i ti tsots li iq'ue, ixi'. Chmuc xa'ox yalel ta vo' ja' o i'avan:
―¡Cajval, coltaon! ―Xut.
31Ti Jesuse ora istsacbe sc'ob ja yech iyalbe chac li'i:
―¡Ch'abal to lec xch'unojel avo'on vinic! ¿C'u yu'un ti ilo'ilaj avo'one?—X'utat.
32C'alal i'ochic ta canovae, ipaj li iq'ue. 33Ti much'utic teyic ta yut canovae isquejan sbaic ta stojol ti Jesuse, iyich'ic ta muc', ja' yech iyalic chac li'i:
―¡Ta melel vo'ot Xch'amalot ti Rioxe! ―Xutic.
Ja' li' yaloj ti iyet'esbe xchamel ep jchameletic ta Genesaret ti Jesuse
(Mc 6.53-56)
34Ti c'alal ic'otic ta jech nabe, iloq'uic ta canova, ic'otic ta Genezaret. 35Li crixchanoetic teyo'e iyojtiquinic ti ja' ti Jesuse. Ora ivinaj ta sjunlej yosilal Genezaret ti tey ic'ot ti Jesuse. Iyic'beic tal scotol li jchameletique, 36isc'anbeic vocol ti Jesuse ti ja'uc no'ox ac'u yac' ta piquel li sne spimilc'u'e. Scotol ti much'utic ispiquique i'ech' o li xchamelique.
ప్రస్తుతం ఎంపిక చేయబడింది:
Svun Mateo 14: LeqAC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Sociedad Biblica de Mexico AC