Svun Mateo 16
16
Ja' li' yaloj ti tsc'an tsq'uelbeic syu'el Jesús ti jfariseoetique xchi'uc ti jsaduceoetique
(Mc 8.11-13; Lc 12.54-56)
1Tey ic'otic jayvo' jfariseoetic xchi'uc jayvo' jsaduceoetic. Oy c'usi isjac'beic ti Jesuse yu'un tsc'an cha'iic c'uxi chtac'av. Ac'bon quilticotic sq'uelobil ayu'el ta vinajel ―xutic.
2Itac'av ti Jesuse: «C'alal chch'ay xa ech'el li c'ac'ale, ja' yech chavalic li vo'oxuque “ti oc'obe q'uepel yu'un tsoj li vinajele”; xachiic. 3Ta sobe “tsoj li vinajele, macal osil chtal vo' tana xachiic” Li vo'oxuque xana'beic smelol ti c'alal chavilic c'ux'elan li vinajele. ¿C'u yu'un ti ja' mu xana'beic smelol li c'usitic chc'ot ta pasel lavie? 4Li chopol crixchanoetique, xchi'uc ti much'utic mu junuc yo'onic ta stojol ti Rioxe, tsc'an tsq'uelbeic slequilal syu'elal. Pero mu x'acbat yilic. Ja' no'ox ta x'acbat yilic chac c'u cha'al ic'ot ta pasel ta stojol ti Jonase.» ―X'utatic yu'un ti Jesuse.
Tey lamal iscomtsan, ja' o ibat.
Ja' li' yaloj ti muc'bu lec ti c'u x'elan ta xchanubtasvanic ti jfariseoetique xchi'uc ti jsaduceoetique
(Mc 8.14-21)
5C'alal ijelavic ech'el ta jech nab ti yajchanc'optac ti Jesuse, ch'ay xa'iic ech'el spanic. 6Ti Jesuse ja' yech iyalbe ti yajchanc'optaque:
—Q'uelo me abaic p'ijanic me ta svuquesobil xch'ut span li jfariseoetique xchi'uc li jsaduceoetique ―x'utatic.
7Ti yajchanc'optaque tey lic yalbe sbaic:
—¡Ja' ti muc' jna' tal jpantique! ―Xut sbaic.
8Ti Jesuse iyac' cuenta ti c'usi tey chalbesbaique, xi i'albatique:
―¡Yu'un mu to bu lec ach'unojic! ¿C'u yu'un ti xavalvalbe abaic ti muc' xana' tal la panique? 9¿Mi mu to xa va'ibeic smelol? ¿Mi ich'ay xa xava'iic ti vo'p'ej no'ox pan ive'ic o cu'un vo'mil (5,000) viniquetique, xchi'uc ti jayib moch atsob-beic sovrae? 10¿Mi ich'ay xa xava'iic noxtoc ti vucp'ej no'ox pan ive'ic o ti chanmil (4,000) viniquetique, xchi'uc ti jayib moch atsob-beic sovrae? 11¿C'u yu'un ti muc' xava'ibeic smelol ti ma'uc chcalbe sc'oplal pan c'alal ical ti tsc'an cha q'uel abaic ta svuquesobil xch'ut span li jfariseoetique xchi'uc ti jsaduceoetique?
12Ja' to yech iya'ibeic o smelol ti ma'uc svuquesovil xch'ut pan ti tsc'an tsq'uel o sbaique. Ti ja' tsc'an tsq'uel o sbaic ta scuenta ti c'ux'elan ta xchanubtasvanic li jfariseoetique xchi'uc ti jsaduceoetique.
Ja' li' yaloj ti jamal iyal ti Pedroe ti ja' tacbil tal yu'un Riox ti Jesuse
(Mc 8.27-30; Lc 9.18-21)
13Ti c'alal ic'ot ta yosilal Cesarea ta Filipo ti Jesuse, isjac'be ti yajchanc'optaque:
—Vo'on ti Xch'amal crixchano li c'ote. ¿Much'uon ti yalojic li crixchanoetique? ―X'utatic.
14Istac'beic ti Jesuse:
—Jlom chalic ti vo'ot Juan j'ac'-ich'vo'ote; jlom chalic ti vo'ot Eliasote, jlom chalic ti vo'ot Jeremiasote, li jlome chalic ti vo'ot junuc ti yaj'alc'opot Riox ti ta más vo'nee ―xutic.
15―Li vo'oxuque, ¿Much'uon ti avalojique? ―X'utatic.
16Itac'av ti Simón Pedroe:
—Vo'ot Cristoot, ti xch'amalot cuxul Rioxe ―xut.
17Itac'av ti Jesuse:
―Junuc avo'on Simón screm Jonás, Yu'un ma'uc crixchano layac'be ana', ja' layac'be ana' ti Jtot tey ta vinajele. 18Li vo'one chacalbe ti vo'ot pedroote. Ja' yech chac'ot c'ucha'al ton, yu'un vo'ot ta acuenta ta jliques li jch'unolajeletique. Ac'u mi ch-chamic, pero muc' bu tey ilaj o sc'oplalic ta muquenal c'alal ch-chamique, yu'un ma'uc tspas mantal. 19Vo'ot chacac'be syaveal li vinajele, yo bu tspasvan ta mantal ti Rioxe. Scotol ti c'usi chachuc li' ta balamile, ja' no'ox yech chucul chc'ot tey ta vinajele, ti c'usi chajitun li' ta balamile, ja' no'ox yech jitujem chc'ot tey ta vinajele ―x'utat li Pedroe.
20Ti Jesuse tsots iyalbe ti yajchanc'optaque, ti mu to me much'u xalbeic ti ja' Cristo ti Jesuse.
Ja' li' yaloj ti iyal ti chmile ti Jesuse
(Mc 8.31—9.1; Lc 9.22-27)
21Ti Jesuse lic yalbe ti yajchanc'optaque ti persa chbat ta Jerusalene, ti tey chich' tsots svocol ta stojol ti moletic tsots yabtelique, xchiuc ti totil paleetique, xchi'uc ti much'utic ta xchanubtasvanic ta smantaltac Rioxe. Iyal ti tey chmilee, chi'uc ti ta yoxibal c'ac'al ta xcha'cuxie. 22Li Pedroe iloc'loc' ech'el xchi'uc ti Jesuse, ta ox spajes ti yaloje, ja' yech iyalbe chac li'i:
―¡Cajval, mu nan xal yech Riox ti chachame! ¡Mu me xc'ot yech ta pasel ta atojol chac taje! ―Xut.
23Ti Jesuse ijoyij, ja' yech iyalbe ti Pedroe:
―¡Loc'an ta jtojol Satanas, chapajeson ti avaloje! Li vo'ote ma'uc chanop ti c'usi tsc'an ti Rioxe, ja' yech chanop chac c'u cha'al tsnopic li crixchanoetique ―x'utat.
24Ti Jesuse ja' yech iyalbe ti yajchanc'optaque:
—Mi oy much'u tsc'an ch-och ta cajchanc'ope, tsc'an ti mu c'uxuc ta yo'on li spat xocone, ac'u scuch scruz, ac'u snap'letaon ech'el. 25Ti much'u mu sc'an xich' svocole, ti chi'o li milele, ta xch'ay xcuxlejal. Yan ti much'u muc' ta alel yu'un mi ja' xlaj o ta milel ta jcuenta vo'one, ta sta xcuxlejal. 26¿C'usi bal o ti mi tsta scotol li c'usitic oy li' ta sba balamil li crixchanoe, ti ta ch'ayel ono'ox chbate? ¿Mi oy c'usi xu' chac' yo' sta o xcuxlejal li crixchanoe? 27Vo'on ti Xch'amal crixchano li c'ote, ta to sta yora chital xchi'uc xojobal ti Jtote, chital xchi'uc caj-angeltac. Ti c'u x'elan ch-ech'ic jujun li' ta sba balamile, ja' yech chtal jtojic. 28Ta melel chacalbeic, ti jayvo' li' to cuxuloxuc lavie, oy mu to'ox chachamic ti c'alal xlic pasvancon ta mantal vo'on ti Xch'amal crixchano li c'ote ―x'utatic yu'un ti Jesuse.
ప్రస్తుతం ఎంపిక చేయబడింది:
Svun Mateo 16: LeqAC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Sociedad Biblica de Mexico AC