కీర్తనలు 74

కీర్తన 74

ఆసాపు ధ్యానకీర్తన.

1దేవా, మమ్మల్ని శాశ్వతంగా ఎందుకు తిరస్కరించారు?

మీ పచ్చికలోని గొర్రెల మీద మీ కోపం ఎందుకు రగులుకొంది?

2మీ స్వాస్థ్య గోత్రాన్ని మీరు పూర్వం సంపాదించుకుని

విమోచించిన మీ వారసత్వ సమాజాన్ని,

మీరు నివసించిన సీయోను పర్వతాన్ని జ్ఞాపకం చేసుకోండి.

3ఈ నిత్య శిధిలాల వైపు,

శత్రువు పరిశుద్ధాలయం మీదికి తెచ్చిన ఈ విధ్వంసం అంతటి వైపు

మీ అడుగులు తిప్పండి.

4మీరు మాతో కలిసిన ప్రదేశంలో మీ శత్రువులు గర్జించారు;

వారు తమ ధ్వజాలను సంకేతాలుగా ఏర్పరచుకున్నారు.

5దట్టమైన పొదలను నరికే పురుషుల్లా

వారు గొడ్డళ్ళు పట్టుకున్నారు.

6చెక్కిన పలకను వారు

తమ గొడ్డళ్ళతో చేతిగొడ్డళ్ళతో పగల కొట్టారు.

7మీ పవిత్రాలయానికి నిప్పు పెట్టి నేలమట్టం చేశారు;

మీ నామం కలిగియున్న నివాస స్థలాన్ని అపవిత్రం చేశారు.

8వారు తమ హృదయాల్లో, “దేవుని ఆరాధన స్థలాలను పూర్తిగా ధ్వంసం చేద్దాం!” అనుకుని,

దేశంలో దేవుడు ఆరాధించబడే ప్రతీ స్థలాన్ని తగలబెట్టారు.

9దేవుని నుండి మాకు ఏ సంకేతాలు లేవు;

ప్రవక్తలు లేరు గతించిపోయారు,

ఇదంతా చివరికి ఏమవుతుందో చెప్పే వాడెవడూ మా మధ్యలేడు.

10దేవా, ఎంతకాలం శత్రువు మిమ్మల్ని వెక్కిరిస్తాడు?

శత్రువు శాశ్వతంగా మీ పేరును దూషిస్తాడా?

11మీరు ఎందుకు మీ కుడిచేతిని వెనక్కి తీసుకున్నారు?

జీవబల ప్రభావాలను ఎందుకు ఉపసంహరించుకున్నారు?

పిడికిలి బిగించి, చేయి చాచి వారిని దెబ్బకొట్టు. నాశనం చేయి!

12అతి ప్రాచీన కాలం నుండి దేవుడే నా రాజు;

దేశమంతా మీరే నాకు మహారక్షణ అనుగ్రహించావు.

13ఎర్ర సముద్రాన్ని మీ బలం చేత రెండు పాయలుగా విభజించావు,

సముద్ర దేవత తలల్ని చితకకొట్టావు.

14లెవియాథన్ తలలను చితక్కొట్టింది మీరే

మహా మొసలి తల చితుక కొట్టావు.

15మీ ఆజ్ఞమేరకు నీటిబుగ్గలు నదులు ప్రజలకు మీరు సరఫరా చేశారు.

జీవనది యొర్దాను ప్రవాహాన్ని ఇంకి పోయేట్టు చేసి వారికి దారి ఏర్పరచింది.

16పగలు మీదే. రాత్రి కూడా మీదే.

వెలిగే నక్షత్రాలు మీవే! సూర్యున్ని మీరే చేశారు.

17సమస్త ప్రకృతి మీ చేతుల్లో ఉంది.

మీరే వేసవికాలం చలికాలం ఏర్పరిచారు.

18దేవా! ఈ శత్రువులు నిన్ను ఎలా ఎగతాళి చేస్తున్నారో చూడు.

ఓ యెహోవా దేవా! ఈ మూర్ఖపు జనం మీ నామాన్ని దూషించారు జ్ఞాపకం తెచ్చుకోండి.

19మీ పావురపు ప్రాణాన్ని అడవి జంతువులకు అప్పగించవద్దు;

నీ బాధించబడిన ప్రజల జీవితాలను ఎప్పటికీ మరచిపోవద్దు.

20మీ వాగ్దానాన్ని జ్ఞాపకం చేసుకో,

దేశమంతా చీకటితో నిండి ఉంది. క్రూరులతో నిండి ఉంది.

21నలిగినవారిని మరల అపకీర్తి పాలు కానివ్వకండి.

బీదలు అవసరతలో ఉన్న ఈ ప్రజలు మీ నామం స్తుతించుదురు గాక.

22దేవా, లేచి, మీ కారణాన్ని సమర్థించండి;

బుద్ధిహీనులు రోజంతా మిమ్మల్ని ఎగతాళి చేసేది జ్ఞాపకముంచుకోండి.

23మీ విరోధుల గొడవను,

నిరంతరం పెరిగే మీ శత్రువుల గందరగోళాన్ని విస్మరించవద్దు.

ప్రస్తుతం ఎంపిక చేయబడింది:

కీర్తనలు 74: OTSA

హైలైట్

షేర్ చేయి

కాపీ

మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి

Biblica® ఉచిత తెలుగు సమకాలీన అనువాదం™

Biblica® Open Telugu Contemporary Version™

Biblica® ఉచిత తెలుగు సమకాలీన అనువాదం గురించి మరింత తెలుసుకోండి