Mlk 13
13
Yesu ombɔ lɔnda aliko la mpanjolama ba lulu la Kanamombe
(Mat 24.1-2; Luk 21.5-6)
1Laango Yesu wiiki atapase e lulu la Kanamombe*, ɔmɔɔ a Baeki* bande aosimeli: «Weekisi, ndaka! Babwe nke balɔti! Biphikeli nke binɛnɛ binɛ!» 2Yesu obuuchisa: «Ɔmwɛna biphikeli binɛ binɛnɛ? Phakatikalaki anɛ libwɛ limɔɔ aliko la linkinɛ, lalikuli yakondo mphanjolamaka»!
Tosoya la njakema
(Mat 24.3-14; Luk 21.7-19)
3Yesu asɛlɛlaki eliko la bɔɔkɔ ba Miseituni*, boleka ba lulu la Kanamombe*. Pɛtɛlɛ la Yakɔbɔ la Yɔani la Andele baotani ango la mbo wuumbola: 4«Otosimele: Eleko nke epaselaki bingo la imbali nke iyɛnyaki engo lalikuli biiyaki»?
5Laango Yesu waanji mbwaasimela: «Ayeka nyo! Bonto lalikuli atakolimbake nyo»!
6«Aliko, banto ike baandaki e lokombo lami la balɔndaki: ‹Lemi kole Kilisito*!› La Bakondo limbaka banto ike. 7Weengo biina, aokaka nyo banto batalɔndɛ aliko la lisɛ kaama lalikuli. Kinaki kolawake nyo, aliko kasana bingo lalikuli biiye. Kinaki kakondo yala kotaiye jɛ e kantunda ba wooni. 8Banto bamɔɔ bakondo chwa njakyana la bankinɛ banto, la ekeleka ɛmɔɔ kekondo chwa njakyana la ekeleka enkinɛ. Lɔmɔtu yakondo sɔkaka kaama ike, la kakondo yala botala. Bingo lalikuli bekondoyalaka phoke belando betango be mbota».
9«Kinaki nyo, ayeka nyo, nyo amɛlɛ. Aliko banto bakondo kɔtɔla nyo e tumilali; bakondo kophoma nyo o Basaŋanelo. Bakondo kɔtɔla nyo ele Bɛkɔta, bakondo kɔtɔla nyo ele Bɛkɔta be wooni, aliko lami, aliko la mbobaɛnya usuula bami otamboka baɔ. 10Kinaki, kasana obi besako be Kanamombe* beekyame ele banto lalikuli.
11«La ango ayalaka bako batakotɔlɛ nyo otamboka ba tumilali, ko aŋangake nyo la mbuiyumbola: Nke ɛlɔnda iso. Kinaki lɔnda nyo besao bengo besimelaki nyo weengo eleko. La bengo besao pheepasaki kanyo, kinaki yatapase ele Lɔkɛngɛ Lɔɛlɔ.
12«Aotwa la onto akondo ophakaka aotwa lande ajakeme, phapha akondo phaka bɔna ande ajakeme. Bana bakondo yalaka bitamba be baoti babɔ, la bakondo atɔla batande ba mbwa. 13Banto lalikuli bakondo ko nina aliko la lemi, kinaki, ongo akinyaka nende ekantunda, akondo kakolama».
Toakola tɔnɛnɛ
(Mat 24.15-28; Luk 21.20-24)
14Yesu alɔndi lonkinɛ: «O longo luina akondo ɛna nyo enino, la lɔfutɔ lomo emala kaama kale phakasane njala. Ɔnɛ lalikuli asɔma bene besao aeye bɔlɔti. Laango, bango bayalaka e wooni ke Yudeya balawe nchwa o bɛɔkɔ; 15Ongo atanemwaka eliko la nsambe e lulu, atakitelake lonkinɛ mbɔsa ekambwa otema ba lulu lande; 16Ongo atanemwaka weebeli ende atautolake lonkinɛ kande mbɔsa esenda ende. 17Longo luina, lakondo yala ŋandi ele bainto baakundu la bango ba nɔmya! 18Lɔmba nyo Kanamombe* aliko ingo itakuiyelake nyo weeleko ba mbula. 19Aliko biina bengo, banto bakondo baaka toakola ike. Koo onto jɛ amwɛnaka toakola phoke tongo manja katango nende lɛlɔ. La koo onto aɛnaka lonkinɛ toakola phoke tongo. 20Iya Bɔkɔta koo mumbeya biina bingo, koo onto aɔsɔna nkakolama. Kinaki, aumbeisa aliko la banto basɔni ndako.
21«Weengo eleko, iya bonto ɔmɔɔ akosimelake nyo: ‹Lenda! Kilisito* ole nde anɛ›! Aɔ alɔndake: ‹Lenda! Kilisito* olende eni›! Koo wimeyake nyo. 22Aliko, banto ike ba elimbo bakondopasela la nɔnda: ‹Lemi ko Kilisito*›. La kakondo pasela Baɛni* baelimbo, bango lalikuli, bakondo kɛɛ bintɔmpɔ, aliko, iya kasana balimbe, koonga bango basɔni Kanamombe*. 23Lonkinɛ nyo, ayeka nyo! Aliko Lemi la kɔɛphɔli nyo wiingo lalikuli otamboka la bianda»!
Mbutola ya Bɔna a Onto
(Mat 24.29-31; Luk 21.25-28)
24Yesu olɔndi lonkinɛ: Weengo eleko, ɔɔkɔngɔ ba nkangi,
Yaani ya kondo tulwaka wiilima.
La ŋɔndɔ, phekepashaki lonkinɛ ekowa.
25Tɔɔtɔ la tako, takondo kwaaka nkwaaka mina e loola.
La, lalikuli ile la nkulu e loola bekondo sɔkaka#13.25 Ɔsɔmɛ: Isaya 13.10; 34.4..
26«Laango, banto bakondo mɛna Lemi Bɔna a Onto latakitela nde atei ba longe, la nkulu ike la bokuchu. 27Lakondo tomaka biphongo* bemi o tokumba tako tɔnɛi ta booni aliko la saŋanya bango ba sɔni Lemi».
Jɔmbɔ ba bote ba mutini
(Mat 24.32-35; Luk 21.29-33)
28Yesu alɔndi lonkinɛ: «Wiiyekya nyo, mbetela jɔmbɔ ja bote ba mutini: Ango aɛnaka nyo bitaphi be ongo bote bata mɛnɛ, la ntiti yande yata tephatepha, eya nyo nte, eleko elɔchi kembosukama. 29Ŋango akɔ, ango aɛnaka nyo bingo bikambwa lalikuli bimboɛnamwa, eya nyo nte, Lemi Bɔna a Onto mbosukama. 30Mbokosimela nyo, kolende sɔlɔ: banto ba lɛlɔ phaabwaki lalikuli otamboka ba ingo mbiya. 31Loola la wooni bekondo eta, kinaki, besao bɛmi pheetaki jɛ».
Koo onto aeya luina laandaki Yesu
(Mat 24.36-44)
32Yesu alɔndi lonkinɛ: «Aliko la longo luina la eleko, bengo besao biiyaki, koo onto aeya: koonga biphongo be Kanamombe*, koonga Lemi Bɔna phalaeye. Phapha nɛmɛlɛ kaeya.»
33«Ayeka nyo! Kolalake nyo. Aliko, phaeye nyo eleko eiyaka bingo lalikuli. 34Kakondo yalaka phoke bonto ɔmɔɔ achwe ɛ lɔkɛndɔ. Oke ntika lulu lande waakambi bande. Ombo ɔya kila onto bolemo bande, la nsimela bochungi ba lɔkukɛ aliphole baiso.
35«Yala nyo baiso phololo, aliko, phaeye nyo wiina nke ɔmɛlɛ lulu wiiyaki. Kamɔɔ kaɔsɔna njala likɔlɔ ao asamba ilumu, ao ango aekaka nkɔkɔ ntango ao mpendu. 36Yala baiso phololo, atakuitolake nyo la nkotana nyo atalale. 37Inɛ yatakosimela nyo Lemi, landasimela banto lalikuli: yala nyo baiso phololo»!
ప్రస్తుతం ఎంపిక చేయబడింది:
Mlk 13: oml
హైలైట్
షేర్ చేయి
సరిపోల్చండి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
2025 Forum Communautairre des Traducteurs de la bible et Alphabetisation