Génesis 29
29
Jacob Haránnum jeaamu
1Tura Jacob nuiya jinki etsa watainmani shuar matsatmaunam wuwaiti. 2-3Tuma Haránnum jeaa yumirmatai amaunam tres shuar ovejartin aina nita ovejari ainan matsas ayamainak, ina tagkuri entsa aakarmi tusar matsamtatmaun wainkauwaiti. Nu yumirmataigka kaya uunjai nukukmau asamtai, oveja entsan umarartasa iruuntrarmatai, kayan jurusar entsan aarar nukujakaruiti. 4Jacob ovejan kuitamin ainan iniak: “¿Wina yatsur ainata atumsha tuiya ainarum?” tusa tinaiti. Tama nita aimainak: “Ika Haránnumia ainaji”, tusar tuina.
5Tuinakai ¿Atumsha Nacoran uchiri Labán nekatsrumek? tusa tinaiti. Tusa inimkai nita aimainak ee nekaji, tusar tuina. 6Tuinakai ¿pegkerak puja? tusa takai, pegker pujawai. Jui Raquel nina nawantri ovejan yaruak winawai, au iniasta tusar tuina. 7Tuinakai Jacob chichaak: Etsa akatsaigka oveja yaruakrika epenchataiyaiti. ¿Urukamtai entsa aakrum chirichirin yuawarti tusarum juatsrume? tusa tinaiti.
8Takai nita aimainak: Atsaa nuka turumaitsuji. Oveja ashi iruuntramtai, tura ovejan kuitamin aina ashi kaunkarmatai kaya nukukmau jusar, oveja entsa aartasar chikich aina kaunkarti tusar nakainaji, tusar tuina. 9Jacob nitajai chichaa wajai, Raquelsha apari ovejarin kuitamrin asa, ovejan yaruas taawaiti. 10Tumamtai Jacob nina nukuri umain Labánka nawantrin Raquelan wainak, jeari yumirmat kayajai nukukmau atatmaun jurus iichri tagkurin entsan aakuiti. 11Tura Jacob Raquelan pagkuk kugkuas útnaiti. 12Tumak wika Rebecan uchiriyaitjai. Tura Labánkan aweyaitjai, tusa tinaiti. Tama Raquel aparin ujaktasa tsekegnaiti. 13Tuma amina umaimin uchiri Jacob taayi, tusa ujakuiti. Turam igkug utittsa tsekegnaiti. Tura jeari pagkuk kugkuas nina jeen jukinaiti. Turam Jacob ni tumamurinka pachis Labánkan ashi ujakuiti. 14Turam Labán chichaak: Ameka nekas wina shir pataaruitme, tumau asam jui pujusta, tusa tinaiti. Tama chikichik nantu pujusuiti.
Jacob Labánkan takarsamu
15Iman tsawan pujusmatai Labán, Jacobon chicharuk: Ameka wina pataar akumsha akiachmaitiatmeka takartumaitsume. Urutma akirkati tusamea wakeram nu turutta, tusa tinaiti. 16Labánkan nawantri jimar ajakuiti. Iwairigka Lea naartin, tura ekeuka Raquel naartin ajakuiti. 17Leaka imanis shirmachu ajakuiti. Antsu Raquelka shir shiram ajakuiti. 18Jacob Raquelan wakera asa, Labánkan ayak: Wika amina nawantrum ekeuwa juna nuatkattsan siete uwí takarsatjame, tusa tinaiti.
19Tama Labán ayak: Chikich shuarnaka sutsuk, amina amastajai. Juig wijai pujusta, tusa tinaiti. 20Timau asa Jacob siete uwí takarsauwaiti. Iman uwí takasu akusha Raquelan shir senchi wakera asa, ishichik uwí takasua numamtin nekapsauwaiti. 21Jacob siete uwí ejé Labánkan chicharuk: Wii amina siete uwí takarsatjame tusan tinaitaj nuna tsawantan ejéjai. Tuma asamtai yamaika nawantrum surusta nuatkatjai, tusa tinaiti. 22Tama ayu tusa Labán yutain umik ni irutkamuri ainan ashi ipaa, nawantri aishrinkai jiistamawaiti. 23Tuma káshi jasmatai Jacob tepamunam, Labán Lean juki ejénaiti, turamtai Jacob Leajai kanaruiti. 24Labán nina inatairin Zilpa naartinan ame inarta tusa nawantrin susauwaiti. 25Kashin tsawaar Leajai kanarmaun Jacob nekaawaiti. Tuma Labánkan chicharuk: ¿Urukamtai winasha jutikruam wii Raquelan jukimij tusan takaschamkaj? ¿Urukamtai winasha tsanurame? 26Tama Labán ayak: Ii ainatika ekeuka surutsuk iwairiya surin ainaji. 27Ataksha siete uwí takarsatjame takumka ame Leajai nuwenamuram siete tsawan ejéta. Turawakmin Raquelan amastajai, tusa tinaiti.
28Tama nuna tsawantan ejémtai, Labán Raquelan susauwaiti. 29Tura nina inatairin, Bilha naartinan ame inarta tusa nawantrin susauwaiti. 30Turam Lea aneamun nagkas, Raquelan ima senchi anea asa, nu nuwanam siete uwí Labánkan takarsauwaiti.
Jacobo uchiri aina
31Jacob Lean imatikas aneachu asamtai, Yuus Lean uchin juren amajsauwaiti. Tura Raquelnaka uchin jurechu amajsauwaiti. 32Lea ajapruk uchin jurer, wii wake mesemar pujamun Yuus nekau asa, uchin surusai tusa Rubén anaikauwaiti. Tura yamaika wina aishur anentatui, tusa tinaiti. 33Tura ataksha Lea uchin jurer, wina aishur imatikas anenchau asamtai, Yuus surusai tusa Simeón anaikauwaiti. 34Tura ataksha uchin jurer, yamaika uchin tres jureru asamtai, wina aishur senchi anentatui, tusa Leví anaikauwaiti. 35Tura Lea ataksha uchin jurer, yamaika Yuusan ememattajai tusa Judá anaikauwaiti. Tura nuiyagka uchi juretan nagkankauwaiti.
ప్రస్తుతం ఎంపిక చేయబడింది:
Génesis 29: hubDBL
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2010, Wycliffe Bible Translators, Inc. All rights reserved.