Wani 6
6
Kemɨtiwarumi 'auxɨwime miriyari
(Wa 6:1-13 – Mat 14:13-21, Mar 6:32-44, Ruk 9:10-17)
1Merikɨtsɨ yapaɨmexɨa 'anukayaku Ketsutsi kaneyani, Karereya harakunayaritsie Tiweriya mɨrakutewatsie 'anutaɨye kaneta'ani. 2Yumɨiretɨ mekanikuweiyatɨwekaitɨni teɨteri 'inɨarite memɨxeiyakaikɨ kemɨtiyurienekai tekwikwikate wahetsie. 3Hikɨ Ketsutsi hɨritsie kaneutiyune, mana kanetayerɨni, teyɨ'ɨkitɨwametemamata hamatɨana mekanetitekaitɨni. 4Merikɨtsɨ huriyutsixi wa'ixɨarari Patsikwa mɨtitewa kanahurakaitɨni.
5Hikɨ kepauka Ketsutsi munierixɨ, meta yumɨireme muwaruxei hepana me'ahume, mɨpaɨ Peripe katiniutahɨawe:
—¿Hakewa tepeinanaiyu paa 'ikɨ memɨtekwanikɨ?
6Mɨpaɨ kaniutayɨni 'i'inɨatanetɨ, mɨkɨ tsietɨ katinimaikaitɨniri kemɨtiyurienikekai.
7Hikɨ Peripe mɨpaɨ katinita'eiya:
—Paa huta tsienituyari 'inɨariyaritsie 'atɨ pɨkatinake wahetsiemieme yuxexuitɨ 'etsiwa xeikɨa memita'ɨixɨanikɨ.
8Xewitɨ teyɨ'ɨkitɨwametemama 'Atɨrexi mɨtitewakai Tsimuni Pekuru 'iwaya mɨpaɨ katinitahɨawe:
9—'Ena puyeika xewitɨ temaikɨ tsewara payari 'auxɨwime hexeiyatɨ meta tsapari yuhutame. ¿Perutsɨ 'ikɨ tixaɨtɨ pɨkatihɨkɨ yumɨireme wahetsiemieme?
10Hikɨ Ketsutsi mɨpaɨ kaniutayɨni:
—Xekeniwaranukayatsa teɨteri.
Mana waɨkawa kanaku'ɨxayakaitɨni. Hikɨ 'ukitsi mekananukayaxe 'auxɨwime miriyari meyupaɨmetɨ 'etsiwatɨkaku. 11Hikɨ Ketsutsi kanenu'ɨni paa, pamɨpariyutsi 'ipitɨaka Kakaɨyari katiniwarumini mana memɨtitekai. Yaxeikɨata tsapari kaniwarumini kememɨtewareukwaikukai.
12Hikɨ me'utihuxaku mɨpaɨ katiniwarutahɨawe teyɨ'ɨkitɨwamete:
—Xekeneukuxeɨri tarimeyari muyuhayewaxɨ kapa reuyewenikɨ.
13'Ayumieme mekanikuxeɨrieni, tamamata heimana huta tsikɨiwitiyari mekaniutihɨniya tarimeyari tekwa'amete memiku'eiri 'auxɨwime tsewara payaritsie mieme.
14Merikɨtsɨ teɨteri me'ixeiyaka 'inɨarikɨ kemɨtiuyuri mɨpaɨ mekaniutiyuanekaitɨni: «Kaniyuritɨni 'ikɨ kanihɨkɨtɨni Kakaɨyari niukameya kwiepa 'umamiekai». 15Hikɨ retimaika Ketsutsi kename me'axɨanikekai me'iwiyake tiwa'aitɨwame memayeitɨanikɨ, tawarita yuxaɨta mana hɨritsie kaneutiyune.
Ketsutsi kemɨtiuyeikakai harakunatsie
(Wa 6:16-21 – Mat 14:22-33, Mar 6:47-51)
16Merikɨtsɨ kepauka tau makayunixɨ teyɨ'ɨkitɨwamete mana mekaniukanexɨani harakuna mayema paitɨ. 17Kanuwatsie mekayaxeka harakunatsie me'uhukaku 'anutaɨye mehanɨkɨneke Kaperunaume paitɨ meye'axɨanike. Hikɨ kaniukuyɨrekaitɨniri Ketsutsi 'akuxi wahetsɨa pɨkanuawekai. 18Karima mu'ekakaikɨ harakunatsie hamewari waɨkawa kanixuawekaitɨni. 19Hikɨ yateewa 'auxɨwi yatɨni 'ataxewi kirumeturuyari me'uhutɨ kanuwa me'uwekirɨmetɨ mekanixeiya Ketsutsi harakunatsie 'umiekame kanuwatsie 'aye'aximeme, hikɨ mekaniutimamani. 20Peru mɨkɨ mɨpaɨ katiniwarutahɨawe: «Ne nepɨyɨane. Xepɨkamamaka». 21Hikɨ mekanipitɨani kanuwatsie mɨkayerɨnikɨ. Yapauka kanuwa kaneutaneni kwiepa hakewa memeukɨnekai.
Teɨteri kememɨte'ikuwautɨwekai Ketsutsi
22Merikɨtsɨ 'uxa'arieka teɨteri harakuna 'anutaɨye memɨti'ukai mekaniuneniere mana mukateikɨ xewitɨ kanuwa xeikɨa. Mepunenierixɨ Ketsutsi mɨka'akayerɨwekai mɨkɨ kanuwatsie teyɨ'ɨkitɨwamete wahamatɨa, matsi teyɨ'ɨkitɨwamete yuxaɨtame memekɨnekaikɨ. 23Hipatɨta kanuwate mekaneyekɨne Tiweriya. Mana 'ahurawa mekaniu'axɨani hakewa paa memetikwaitsie Ti'aitame pamɨpariyutsi 'ipitɨaku Kakaɨyari. 24Me'uneniereka teɨteri Ketsutsi mana mɨka'uyeikakaikɨ, meta teyɨ'ɨkitɨwametemama mana memɨka'u'uwakaikɨ, mɨkɨtari kanuwatetsie mekayaxeka mekanekɨne Kaperunaume paitɨ Ketsutsi mekuwautɨwetɨ.
Ketsutsi paa tukari tiyupitɨwame pɨhɨkɨ
25Harakuna 'anutaɨye meheitaxeiyaka mɨpaɨ mekatenitahɨawe:
—Ti'ɨkitame, ¿kepauka pepunua 'uwapaitɨ?
26Ketsutsi mɨpaɨ katiniwaruta'eiya:
—Yurikɨ mɨpaɨ nekanaineni, xepɨkanetsikuwautɨwe 'inɨarite xemuxeikɨ. Paa xemetikwaikɨ xemetihuxaikɨ pɨta xepɨnetsikuwautɨwe. 27Xepɨkate'uximayaka 'ikwai mɨtipɨniwe xema'iwakɨ xeikɨa. Xeketene'uximayaka pɨta xeme'iwakɨ 'ikwai 'amɨtiteriwe tukari mɨkaxɨwe mɨxepitɨatsie Yuri Tewi mɨtixemini. 'Ukiyarieya Kakaɨyaritɨtɨ mɨkɨ kaniu'inɨaritɨani.
28'Ayumieme mɨpaɨ mekatenita'iwawiya:
—¿Keri teteyurieka Kakaɨyari 'uximayatsikayatsie temɨte'uximayakakɨ?
29Ketsutsi mɨpaɨ katiniwaruta'eiya:
—'Ikɨ kanihɨkɨtɨni Kakaɨyari 'uximayatsikaya: yuri xemɨte'eriekakɨ mɨkɨ meiyenɨ'atsie.
30Mɨkɨ mɨpaɨ mekatenitahɨawe:
—Merikɨte, tita 'inɨari petiyuriene, temixeiyakɨ, yuri temɨmeteta'eririenikɨ. Kepemɨtiu'uximayata. 31Tame tatutsima manana payari mekanikwakaitɨni makumawetsie, kemɨre'uxa: “Hatsi muyuawitsie mieme kaniwarumini”.
32Hikɨ Ketsutsi mɨpaɨ katiniwarutahɨawe:
—Yurikɨ mɨpaɨ nekanaineni, Muitsexi pɨkahɨkɨtɨkai kemɨ'ane mɨxe'umi mɨkɨ paa taheima mieme. Ne'ukiyari pɨta katinixemikwani tita yurikɨ paa mɨtihɨkɨ taheima mieme. 33Kemɨ'ane taheima makaneika, tukari mɨwamikwa kwiepa memɨtama, mɨkɨtɨtɨ paa kanihɨkɨtɨni Kakaɨyari hetsɨa mieme.
34Mɨkɨ mɨpaɨ mekatenitawawirieni:
—Ti'aitame, 'aheyemekɨ yaketatineumikwani mɨkɨ paa.
35Ketsutsi mɨpaɨ katiniwarutahɨawe:
—Ne nekanihɨkɨtɨni paa tukari tiyupitɨwame. Kemɨ'ane nehetsɨa mɨye'ani pɨkaheuhakamɨkɨni meta kemɨ'ane nehetsie yuri mɨti'erie hawaikɨ pɨkaheuharimɨkɨni hatsuaku. 36Matsi yanepɨtixekɨhɨawekai, xepɨnetsixeiya peru yuri xepɨkate'erie. 37Naime ne'ukiyari mɨnetipitɨa nehetsɨa pɨye'ani. Kemɨ'ane nehetsɨa mɨye'ani, takwa nepɨka'enuyehɨani. 38Ne taheima nepɨka'akane tita mɨnetinake yanemɨtiyurienenikɨ, matsi tita mɨtinake 'iya mɨnetsiheyenɨ'a pɨta yanemɨtiyurienenikɨ. 39'Ipaɨ katininakeni 'iya mɨnetsiheyenɨ'a, naime mɨnetiupitɨa nixeime nemɨkaheuyehɨanikɨ, matsi nemenukuketɨanikɨ tukari 'aye'ayu kepauka mɨtapare. 40'Ipaɨrita katininakeni ne'ukiyari, yunaitɨ memixeiya nu'aya, yuri memɨte'erie hetsiena, tukari mɨkaxɨwe memexeiyanikɨ. Ne nepɨwaranuku'uitɨani tukari 'aye'ayu kepauka mɨtapare.
41Hikɨ huriyutsixi mekaniniukixiekaitɨni hepaɨtsitana mɨpaɨ mutayɨkɨ: «Ne paa nekanihɨkɨtɨni taheima makane». 42Mɨpaɨ mekaniutiyuanekaitɨni: «¿'Ikɨ Ketsutsi katihɨkɨ Kutse nu'aya? Tame paapaya meta maamaya tepɨwamate. ¿Ketɨtɨ putaine: “Ne taheima nepakane”?»
43Ketsutsi mɨpaɨ katiniwaruta'eiya:
—Xepɨkaniukixieka yutsata. 44Xewitɨ pɨkayɨwe nehetsɨa mɨye'ani, xɨka ne'ukiyari mɨnetsiheyenɨ'a 'enayexeiya xeikɨa pɨyɨwe. Ne tukari 'aye'ayu kepauka mɨtapare nekanenukuketɨamɨkɨ. 45Kakaɨyari niukametema waxapatsie mɨpaɨ katine'uka: “Kakaɨyari katiniwa'ɨkitɨaka yunaime”. Yunaitɨ memɨ'enana ne'ukiyari kemaine, memɨteyɨ'ɨkitɨa, mɨkɨ nehetsɨa mekaniye'axɨakuni. 46Perutsɨ xewitɨ pɨka'ixeiyawe ne'ukiyari. Kemɨ'ane Kakaɨyari hetsɨa miemetɨtɨ 'amuyeika, mɨkɨ xeikɨa kanixeiyaweni ne'ukiyari. 47Yurikɨ mɨpaɨ nekanaineni, kemɨ'ane nehetsie yuri mɨti'erie, tukari mɨkaxɨwe kanexeiyani. 48Ne paa tukari tiyupitɨwame nekanihɨkɨtɨni. 49Xetutsima manana payari mekanikwakaitɨni makumawetsie, peru mɨkɨ mekaniukwini. 50Peru 'ikɨ kanihɨkɨtɨni paa mayeniere taheima makane tewi mitikwanikɨ mɨkamɨnikɨ. 51Ne nekanihɨkɨtɨni paa mayeniere taheima makane. Xɨka tewi 'ikɨ paa 'utikwani, yuheyemekɨ payeniereni. 'Ikɨ paa nemɨyetuani ne, newaiyari kanihɨkɨtɨni, kwiepa memɨtama watukari mɨhɨkɨtɨnikɨ.
52Hikɨ huriyutsixi mekaniyuxamurietɨwekaitɨni yameteyɨkɨhɨawetɨ: «¿Ketiyɨwe 'ikɨ yuwaiyari mɨtatsiminikɨ temitikwanikɨ?»
53Ketsutsi 'ayumieme mɨpaɨ katiniwarutahɨawe:
—Yurikɨ mɨpaɨ nekanaineni, xɨka xeka'itikwani Yuri Tewi waiyarieya, xɨka xuriyaya xeka'anu'ieni, tukari yuhetsie xepɨkahexeiya. 54Kemɨ'ane newaiyari mɨkwa'a nexuriya mɨ'ie, tukari mɨkaxɨwe kanexeiyani. Tukari 'aye'ayu kepauka mɨtapare, nekanenukuketɨamɨkɨ. 55Ne newaiyari yurikɨ kani'ikwaitɨni, nexuriya yurikɨ kananu'iwani. 56Kemɨ'ane newaiyari mɨkwa'a nexuriya mɨ'ie, mɨkɨ nehetsie tiwiyatɨ kaniyuhayewamɨkɨ, neta hetsiena netiwiyatɨ netinehayewa. 57Ne'ukiyari mayeniere kwiepa kemɨnereyenɨ'a hepaɨ, ne kenemɨrayeniere ne'ukiyarikɨ, mɨpaɨrita yaxeikɨa kemɨ'ane mɨnetsikwa'a, mɨkɨta kanayenierekamɨkɨ nekɨmana. 58'Ikɨ kanihɨkɨtɨni paa taheima makane. Xetutsima manana me'utikwaka memukwi, mɨpaɨ pɨka'ane. Kemɨ'ane 'ikɨ paa mɨkwa'a yuheyemekɨ kanayenierekamɨkɨ.
59Mɨpaɨ kaniutayɨni Kaperunaumetsie ti'ɨkitatɨ tukita.
Niuki tukari mɨkaxɨwe hepaɨtsita
60Hikɨ 'ayumieme teyɨ'ɨkitɨwametemama yumɨiretɨ me'u'enanaka mɨpaɨ mekaniutiyuani: «'Ikɨ niuki kanikwaniweni. Kepaikɨ pɨyɨwe mi'enienikɨ».
61Ketsutsi yu'iyaritsie retimaika memɨniukixiekaikɨ teyɨ'ɨkitɨwametemama 'ikɨ hepaɨtsita, mɨpaɨ katiniwarutahɨawe:
—¿'Ikɨkɨ xetetiketamɨrike? 62¿Ketiɨyɨwetsɨ xɨka xe'ixeiyanike Yuri Tewi mana 'utimiekame hakewa meripaitɨ mekateitsie? 63'Iyari kanihɨkɨtɨni tukari tiyupitɨwame, waiyari 'atsipɨkatiuyuriwe. Tita nemɨtixekuxaxatɨwa ne, mɨkɨ kani'iyaritɨni kanitukaritɨni. 64Peru hipatɨ xeme yuri xepɨkate'erie.
Ketsutsi matɨari paitɨ kaniwamaikaitɨni kehate mɨkɨ yuri memɨkate'eriekai, meta katimaikaitɨni kemɨ'ane miyetuanikekai.
65'Ayumieme tawarita mɨpaɨ kaniutayɨni:
—'Ayumieme nepɨtixekɨhɨawe, xewitɨ mɨkayɨwe nehetsɨa mɨye'ani xɨka ne'ukiyari mɨpaɨ katipitɨaka.
66Mɨkɨkɨ yumɨiretɨ teyɨ'ɨkitɨwametemama yukutama mekanitakɨne, hamatɨana mepɨka'u'uwakairi. 67'Ayumieme Ketsutsi mɨpaɨ katiniwarutahɨawe tamamata heimana memɨyuhuta:
—¿Xemerita xeteyuwaɨriya xemɨyehu?
68Tsimuni Pekuru mɨpaɨ katinita'eiya yuku'imawatɨ:
—Ti'aitame, ¿kepaikɨ rahetsɨa tepɨteyehu? 'Ekɨtsɨ tukari mɨkaxɨwe niukiyari pekanexeiyani. 69Tameri yuri tekateniuta'erieni, tekamenetimani 'ekɨ Mɨpatsie pekanihɨkɨtɨni Kakaɨyari hetsɨa mieme.
70Ketsutsi mɨpaɨ katiniwaruta'eiya:
—Xeme nekanixe'anayexei tamamata heimana yuhutame. Perutsɨ xewitɨ xeme kauyumarie hepaɨ kani'aneni.
71Mɨkɨ Kura Tsimuni nu'aya 'Itsikariutitanaka kanixatakaitɨni, mɨkɨ kaniyetuanikekaitɨni tamamata heimana memuyuhuta mɨwanɨkai.
ప్రస్తుతం ఎంపిక చేయబడింది:
Wani 6: hch
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2020, Wycliffe Bible Translators, Inc.