Matthew 2
2
Mhaküsethoko-e Khristao kütso küvori
1Süze Herod küde-o tüce Judea cejü lü Bethlehem rüna lü Jisu münu küyice, Yhie! Nathoco mhaküsemi kropüh Jerusalem lü vori die sü; 2Münu züh küba Jewmi küde-o sü dice ba? Kükrenamori, ha nathoco Pu thünyio ngo die pu rüsu to vori küzüna zidie kütsota. 3Herod küde-o mha hiko se küsüce; pu mo Jerusalem thüma mütüri pu züh die ulü krokrühyi mota. 4Sidie pu pethiküzhoko mo lüsiküseko mütü ci künguyi die pukoce; Khristao sü dipühce münu tozu ta ra ha? Zi kütso. 5Puko sü, puce, Judea cejü lü Bethlehem li küti lü to, Kükrenamori, sadzühküseo po hibi die thopüh müta tina; 6Mo no Judea cejü lü Bethlehem, no, Judea cejü lü küzhoko dolü künyithoo motazo. Kükrenamori, n yono Küdenumi püh parito, mo süo tho a thüma Isrealko kükhü thi zoto küti na zita. 7Süsa Herod mükhrüh mhaküseko cizüh vori die pukoce, dipühküthice u thünyio pari ta shi küti pu tütso thizo die kütsoyi. 8Sidie pu süko kütsüh püh Bethlehem lü sü die püko yisü, neko vo die neko tütso thi die unu-o phute. Sidie pu ngoyi lize la vori die ace po süte, a pori Pu rüsu küto na, zisü. 9Süze puko küde-o zü rünyiyi die ta zo vota, mo puko nathoco küngo thünyio puko mhuzü ra vo die unu-o khapüh kümüzü thüthi-o pitü lü bata. 10Puko thünyio ngoküyice puko nü shühta. 11Sidie puko ce-olü lü küyice, unu-o Pu zu Mary züh ba die ngoyi, süna puko nürhüh prü Pu rüsuta. Sidie puko mhadzühko phrühyi die suna, dhunatsa mo mha rüh küthünyiko püh Pu prü sü. 12Süsa puko mholüno Jihova puko po Herod ce sala vo hino küta na; puko sho kükre züh sü puko tho puko rünana lü vota.
Jisu züh Egypt lü küvo
13Süze puko ta küta sa, Yhie, Nyepoo shoyi-o Joseph mholü puce vori die sü; no süyite, sidie unu-omo Pu zu unyi züh Egypt lü vo tate, mo I nce po sü kümothe sülü batate, kükrenamoli Herod-e nu tsüo müka va tozu phu zoto kütina, zita. 14Süsa pu süri die unu-o mo Pu zu unyi zühyi die tüzühzüh ta Egypt lü prüta. Sidie Herod sata kümothe sülü bata. 15Süosü Nyepoo sadzühküse-oe po die; “I Egypt lüno a nuo cipüh pariyi;” zipüh kümüta züo thi tsühyi kütona.
Thüpunumiko dokhri küva
16Sücesü Herod-e mhaküse süko pu shüh küva seyi die pu nümo shüh ta, sidie mi kütsüh püh mhaküseko celüno putü-o setü küyi bi die Bethlehem mo sushi sümhü küba thüpunumi tse küna mo sükhroko mütü dokhri tsova. 17Süosü Jeremiah sadzühküse-oe po püh kümüta; 18Rama lü mhakhü püh se, kra mo thükri thi shüh; Rachel po pu nuneko kri krakra, sidie di kütako na pupo pulü luyi mota; süzi küsüo po tsühyi küto na.
Egypt lüno Jisu züh la vori küta
19Süsa Herod sata mütha, Yhie, Nyepoo shoyimi püh Egypt lüno Joseph mholü puce vori die pu yisü; 20Sürite, die unu-o mo Pu zu unyi züh ta Israelmi cejülü lavo tate, kükrenamoli unu-o kürhühro phu kübako sü sata kütina. 21Süsa pu süri die unu-o mo Pu zu unyi züh ta Isrealmi cejü lü la vori ta. 22Eli, pu Archelaus pupo sühlü Judea cejülü küde thi küba seyi die sülüvo müprüh ta. Süri pu mholü Nyepoo celü zü seyi die ta sü Galilee co vota. 23Sidie pu vo Nazareth li küti rüna pühlü lhü bata süosü Pu yisü Nazarethmi li die cito; zidie sadzühküsemiko po püh kümüta züo tsühyi küto na.
ที่ได้เลือกล่าสุด:
Matthew 2: NAG5BSI
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chakhesang Chokri Naga New Testament © Bible Society of India, 2015. Used by permission. All rights reserved worldwide.