INṬANNA 26
26
Gerar le Beer-sebaa Isak chanchin
1Chun, chu rama chun Abraham dam laia ṭâm tla hmasa lem ti lo khawm kha, ṭâm a hung tla nâwk a. Chuongchun, Isak chu Philistin mihai lai Abimelek kuomah, Gerarah a zu feh a.
2Chun, LALPA chu a kuomah a hung inlâr a, “Aigupta rama chun zu fe naw rawh; ram ka hril ding chea chun um rawh.
3Hi rama hin um hri phawt la, chuongchun, i kuomah um ka ta, mal ka sâwm ding che a nih: hieng ram po po hi i kuoma le i thlahai kuomah pein i pa Abraham kuoma kân khâmna kha ka sukdet ding a nih.
4Vâna arasi zâtin i thlahai chu la sukpung ka ta, hieng ram po po hi i thlahai kuomah la pe bawk ka tih; chun, i thlaa chun khawvêla chi tin la thawveng an tih:
5Abraham chun ka thu a awi a, ka hrilhai, ka thupêkhai, ka thuruothai, ka dânhai khawm a zâwm lei khan,” a tih a.
6Chuongchun, Isak chun Gerara chun umhmun a khuor tah a.
7Chu khuoa mihai chun a nuhmei chanchin an indawn a; ama chun, “Ka farnu a nih,” a ta: a hmêl a ṭhat leiin, “Hi khuoa mihai hin Rebeka lei hin mi that rawi an tih,” tiin, “Ka nuhmei a nih,” a ti ngam naw a nih.
8Chutaka chun sâwttak a um hnungin, Philistin mihai lal Abimelek chun tukvera inthawkin a hei thlîr a; chun, ngai ta, Isak chun a nuhmei Rebeka chu ân saipui lai a hei hmuh a.
9Chuongchun, Abimelekin Isak chu a ko a, “Ngai ta, i nuhmei a ni ngei hi, iengdinga ‘Ka farnu a nih,’ i ti am a na?” a tih a. Isak chun a kuomah, “Ama leiin thi rawi ka tih ka ti lei a nih,” a tih a.
10Abimelek chun, “Kan chunga i thilthaw hi iengtizie am a na? Mihai laia mi tukhawmin i nuhmei hi an lo zâlpui el thei i sawnnaw; chuong- chun, kan chunga hin thiemnawna i hung intlungtir a ni ding a nih,” a ta.
11Abimelek bawk chun, “Tu- khawm ama hi amanih, a nuhmei hi amanih tâwk tâwk chu sukhlum ngei ding a nih,” tiin, mi po po chu thu a pêk a.
12Chun, Isak chun chu rama chun bu a chîng a, chu kum chun a let za a hmuh a. LALPAIN ama chu mal a sâwm a,
13chuongchun, mi chu a hung hausa ta hleh a, nasataka mi neinung hung ni rau khawpin a hung lien ta duok duok a.
14Berâm ruolhai, ran ruolhai a nei a, sûnghai tamtak a nei bawk a; chuongchun, Philistin mihai chun an thîk tah a.
15A pa Abraham dam laia a siehlawhaiin tuisunsuo an cho po po khawm chu Philistin mihai chun an nel a, pilin an vur bit ta vawng el a.
16Chun, Abimelekin Isak kuom- ah, “Keini nêkin i hrât lem sih a, kan kuoma inthawk hin fe hmang dai rawh,” a tih a.
17Chuongchun, Isak chu chutaka inthawk chun a suok a, Gerar ruomah a puon in a zar a, chutaka chun umhmun a khuor a.
18Chun, Isak chun a pa Abraham dam laia an tuisunsuo chohai chu a cho nâwk a; Abraham thi hnung khan Philistin mihai chun an lo nel tâwl ta sih a; chun, a pain a lo inbûk ta ang pei khan an hming chu ân bûk a.
19Isak siehlawhai chun ruomah an cho a, chutaka chun tuisunsuo hnâr nei an hmu ta hlau a.
20Gerar ranpuhai chun, “Tui hi kan ta a nih,” tiin Isak ranpuhai chu an insêlpui a: chuonga ama leh an insêl leiin tuisunsuo hminga chun Esek#Esek chu “insêlna”, “insuklungninawna” tina a nih ân bûk tah a.
21Tuisunsuo dang an cho nâwk a, chu khawm chu lâkpêk tumin an insêlpui nâwk a; chuongchun, a hmingah Sitna#Sitna chu “inkhingna”, “inhmêlmâkna” ân bûk a.
22Chutaka inthawk chu ân tâwl a, tuisunsuo dang a cho nâwk a: chu ruok chu chu lâkpêk tumin an insêlpui ta nawh a: chuongchun, “Tuhin chu LALPAIN hmun lientak a mi siempêk tah a, hi rama hin chi tamtak thla tâng ei tih,” tiin, a hmingah Rehoboth#Rehoboth chu “hmun a um”, annawleh “hmun lientâwk” tina ân bûk a.
23Chutaka inthawk chun Beer- sebaah a hang feh a.
24Chu zân ngei chun LALPA chu a kuomah a hung inlâr a, “Kei hi i pa Abraham Pathien chu ka nih, ṭi naw rawh, i kuomah ka um annâwm, mal sâwm ka ti cheh a, ka siehlaw Abraham leiin i thlahai chu ka la sukpung ding a nih,” a tih a.
25Chuongchun, chutaka chun mâichâm a siem a, LALPA hming a lam a, chutaka chun a puon in a zar bawk a. Chun, Isak siehlawhai chun chutaka chun tuisunsuo an cho nâwk a.
Isak le Abimelek thuthlung
26Chun, Gerara inthawkin Abimelek chu ama thurâwntu#Ngaituopuitu, Adviser Ahuzzath le a sipai hotu Phikol leh a kuomah an feh a.
27Isak chun an kuomah, “In mi theida a in kuoma inthawkin in mîn fe hmangtir sih a, iengdinga ka kuoma hung am in nih a?” a tih a.
28Anni chun a kuomah, “LALPA chu i kuomah a um ti chiengtakin kan hriet a: chuongchun, ei kârah, keini le nangma kâr ngeia hin inkhâmna um sienla, i kuomah thu mîn thlungtir la kan ti a nih:
29i pawi iengkhawm kan tâwk nawh a, thil ṭha bak naw chu i chunga hrim iengkhawm kan thaw nawh a, tlangtaka kan infetir el che ang khan, nang khawma kan sietna ding hrim i thaw nawna dingin: tuhin nang chu LALPA malsâwmna dawngtu i ni ta hi,” an tih a.
30Chuongchun, an ta dingin ruoi an ṭheh a, an fâkin an dâwn tah a.
31Zîngtieng chun inhmatakin an tho a, ṭawng an inkhâm tuoh a. Chun, Isakin anni chu ân fetir tah a, a kuoma inthawk chu lungmuongtakin an suok tah a.
32Chu ni le le chun Isak sie- hlawhai chu an hung a, an tuisunsuo cho chanchin an hung hril a, a kuomah, “Tui kan hmu tah,” an tih a.
33 #
Gen 21.31 Chu tuisunsuo chu Shiba#Shiba chu Inkhâmna, or Pasari ân bûk a: chuleiin, chu khaw hming chu tu chen hin Beer-seba a ni zing.
34Chun, Esau chu kum sâwmli mi a niin Hit mi Beeri naunu Judith le Hit mi Elon naunu Basemath nuhmeiah a nei a;
35chuonghai chu Isak le Rebeka lungril sukrimsitu an nih.
ที่ได้เลือกล่าสุด:
INṬANNA 26: HMARCLBSI
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.