INṬANNA 29
29
Rakil le Leah hlaw dinga Jakobin Laban rawng a bâwl
1Chu hnunga chun Jakob chu a fe pei a, khawsak nauhai ram chu a hung tlung tah a.
2A hang en chun phûla tuisunsuo um hi a hmuh a, a kâwla chun berâm ruol thum hi an um zing a; chu tuisunsuoa inthawk chun berâm ruolhai chu tui an indâwntir hlak a nih: tuisunsuo kawta lung um chu a lien hle el a.
3Chutaka chun berâm ruol po po chu an fe khâwm hlak a, tuisunsuo kawta lung chu an inhlum hmang a, berâmhai chu tui an indâwntir a, lung chu tuisunsuo kawta a umna pângngaia chun an sie nâwk hlak a.
4Jakob chun an kuomah, “Ka unauhai, khawtienga mi am in nih a?” a tih a. Anni chun, “Harana mi kan nih,” an tih a.
5Ama chun an kuomah, “Nahor naupa Laban in hriet am?” a tih a. Anni chun, “Hre e,” an tih a.
6Ama chun an kuomah, “A dam lai a ni?” a tih a. Anni chun, “A dam lai a nih ie, en ta, a naunu Rakil khawm berâm ṭhuoiin a hung saw,” an tih a.
7Ama chun, “Ngai ta u, nisa khawm a lân sâng hleh a, ran ṭhuoi khâwm khawm a la hun nawh a: berâmhai hi tui indâwntir unla vân thla ro khai,” a tih a.
8Anni chun, “Thei naw ning ungah, berâm ruol po po an fe khâwm a, tuisunsuo kawta lung hi an inhlum sawn hmakhat chu; chu hnunga chun berâmhai chu tui kan indâwn tir hlak a nih,” an tih a.
9Anni a la biek lai chun Rakil chu a pa berâmhai ṭhuoiin a hung tlung a; ama chun a vêng hlak a nih a.
10Chun, Jakob chun a nu ṭapa Laban naunu Rakil le, a nu ṭapa Laban berâm ruol chu a hmu chun a va hnai a, tuisunsuo kawta lung chu ân hlum hmang a, a nu ṭapa beramhai chu tui ân dâwntir tah a.
11Chun, Jakobin Rakil chu a fâwp a, inringtakin a ṭap tah a.
12Chun, Jakobin ama chu chu minu pa tupa a nizie le Rebeka naupa a nizie Rakil chu a hril a; chuong- chun, Rakil chu a tlân a, a pa a va hril tah a.
13Laban chu a farnu naupa Jakob chanchin a hriet chun, a tuok dingin a tlân a, a kuo a, a fâwp a, ama chu a inah a ṭhuoi tah a. Chun, Jakobin chuong thu po po chu Laban a hril tah a.
14Laban chun a kuomah, “Ka tisa le ka ru ngei i ni chu tie,” a tih a. Chun, thla khat a kuomah a um tah a.
15Chun, Labanin Jakob kuomah, “Ka tupa i ni leiin a thlâwnin ka rawng i bâwl ding am a nih? Iengam hlâwng i ta? mi hril raw khai,” a tih a.
16Laban chun naunuhmei pahni a nei a,a upa lem hming chu Leah a nih a, a naupang lem hming chu Rakil a nih.
17Leah chu mitmeng inkhup deutak a nih a, Rakil ruok chu pieng ṭhatak, hmêl ṭhatak a nih.
18Jakob chun Rakil chu a hmangai a; chuongchun, “I naunu- hmei naupang lem Rakil hi nei dingin kum sari i rawng bâwlpêk ka ti che,” a tih a.
19Laban chun, “Ama chu mi dang kuoma ka pêk nêk chun i kuoma ka pêk chu ṭha lem a tih, ka kuomah um zing el rawh,” a tih a.
20Jakob chun Rakil nei ding chun kum sari chu rawng a bâwl tah a, nisienlakhawm, Rakil chu a hmangai êm leiin ni sâwt nawte ang chauin a hriet a.
21Chun, Jakobin Laban kuomah, “Ka pâwl theina dingin ka nuhmei chu mi pe raw le, ka hun a kim ta sih a,” a tih a.
22Chuongchun, Laban chun chu khuoa mi po po chu a khâwm vawng a, ruoi a ṭheh a.
23Chun, thimbut hin a naunu Leah chu a ṭhuoi a, Jakob kuomah a ṭhuoi lût a; ama chun a lo pâwl a.
24(Laban chun a suoknu Zilpah chu a naunu Leah kuoma chun a suoknu dingin a pêk a).
25Chun, zîngtieng a hung ni chun Leah a lo ni zing el a; chuongchun, Jakobin Laban kuomah, “Ka chunga i thilthaw hi iengtizie am a nih a? Rakil nei dingin i rawng ka bâwl ni lo am a nih? Iengdinga i mi hlêm am?” a tih a.
26Laban chun, “Kan rama hin chuong anga nau a u hmaa a naupang lem infetir chu dân a ni nawh ie.
27A pakhata inneina chawlkâr chen chu tlingtla phawt la, chun, kum sari dang ka rawng i bâwl nâwk ding chun a dang khawm chu pêng kan ti che,” a tih a.
28Jakob chun chuong ang chun a thawh a, chu nu chawlkâr chu a tling- tlah a, chuongchun, a naunu Rakil chu a nuhmei dingin a pêk tah a.
29(Laban chun a suoknu Bilha chu a naunu Rakil suoknu dingin a pêk a).
30Jakob chun Rakil khawm chu a pâwl a, Leah nêk chun Rakil chu a hmangai lem bawk a, Laban rawng chu kum sari dang a bâwl nâwk tah a.
Jakob nauhai
31Chun, LALPAIN Leah chu theidain a um ti a hriet a, chuong- chun, a sul a hawngpêk a. Rakil ruok chu a ching a.
32Chun, Leah chu ân rai a, naupasal a nei a, a hmingah Reuben a sak a: “LALPA chun ka rinumzie a hmu leiin a ni hi; tuhin chu ka pasalin mi hmangai tâng a tih,” a tih a.
33Chun, ân rai nâwk a, naupasal a nei nâwk a, “LALPA chun theidain ka um ti a hriet leiin hi khawm hi a mi pêk a ni hi,” a tih a; chuongchun, a hmingah Simeon a sak a.
34Chun, ân rai nâwk a, naupasal a nei nâwk a, “Tu zêt hin chu naupasal pathum ka neipêk tah a, ka pasalin mi zâwm tâng a tih,” a tih a: chuleiin, a hmingah Levi sak a nih a.
35Chun, ân rai nâwk a, naupasal a nei nâwk a, “Tuta ṭum hin chu LALPA chu inpâk ka tih,” a tih a; chuleiin, a hmingah Juda a sak a, chu hnung chun nau a nei nâwk ta nawh.
ที่ได้เลือกล่าสุด:
INṬANNA 29: HMARCLBSI
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.