Matteyo 14
14
Aye ono Yoane Etifuotoni Batisimo
(Mar 6:14-29; Luk 9:7-9)
1To oŋitek hua, itaniŋu nyia Erode, Elettok olo Galilea, eram ono ehanita Yesu, 2ette inyi iramana egiamak honyi jio, “Yoane Etifuotoni Batisimo alia luŋa. Itubuhuni inyi toye. Inyi anna awanari inyi iko agolon ihaniere eduariti.”
3 #
Luk 3:19-20
Nyio, itinefu nyia Erode Yoane, ette itifit, ette itifitana inyi ibabus. Ihan nyia inyi ihuo nyia, te eram ono Erodias, ŋoruoi illanyi Filipo. 4Nyio, iramak nyia Yoane inyi jio, “Obeŋ obis jihoi itadetuniere Erodias!” 5Awak nyia Erode ittohoro Yoane, ati abaŋ nyia inyi aati Yudei, nyio, iruhi nyia isi jio ara Yoane ahekianani Hollum.
6Ohia nyia ŋarri Erodias ihosiere iluluŋ waati 'daŋ to ninyia awanari agari ta agiluna ono esiuna Erode. Omuno nyia Erode bebe 7many ocoroniere inyi jihonyi jio, “Ettuŋo ni jio, esio adi ni iyye ariŋ enne iwak iyye!”
8Ihuo iramak honyonyi jihonyi, ette inyi jiaran jio Erode jio, “Esiarak ani ihuania ahou Yoane Etifuotoni Batisimo itua arrany ana.” 9Attati Hobu ijiriŋa, ati ihuo ittuŋo nyia inyi ihosiere tamonok honyi 'daŋ, ette inyi iramana oŋida ihani ihuo awak neto nyia. 10Ania, ette inyi ifahina aati ibabus iŋotuniere ahou Yoane, 11ette iyaŋuno ahou honyi itua 'rany, ette isiarana jio neto nyia, buo inyi ette iyaru jio honyonyi. 12Teya ofuonni nyia lejifak Yoane, ette iyaru ahuan honyi ette inuhana. Attati isi ifuatan iramana Yesu.
Itaŋiyo Yesu Eluluŋ Waati enne Ittok
(Mar 6:30-44; Luk 9:10-17; Yoa 6:1-14)
13Ninyia itaniŋu Yesu eram ania, olo nyia inyi teya ta atogol jio obo amaji onno oyur 'to. Ati itayiruni nyia aati aleten honyi, ania, ette isi to borejin gala hosi ijifaru inyi te eejek. 14Ninyia afany inyi ilotifor, ette inyi igonyuna eluluŋ waati enne ittok, ette ataji honyi imehino jihosi, ette inyi itaŋida aŋuak hosi.
15Nyia kekai, ofuonni nyia lejifak jihonyi, ette jiaran, “Oyur amaji ana buo fe attu attari. Itatturok eluluŋi waati hunia itua misihi, ijiara ofuoi inyiaŋuniere aŋiyo hosi.”
16Itarraŋ nyia inyi isi ojio, “Hèlaha isi ofuoi obo amaji. Itai, ta ahuattek hatai, isiatta obo aŋiyo jihosi.” 17Oliahini nyia isi jihonyi jio, “Ewon hohoi iko emunio miyet buo aham arrihai ijiai.”
18Attati inyi jiaran jihosi, “Iyaŋuniete isi jihoŋ dini.” 19Attati inyi iramana aati hétetoŋohi imiyaŋ, ette iduhuna emunio huna miyet buo aham hula arrihai, ette ibonno ahide idou, ette isio ahumo jio Hollum, ette ibibeny emunio hunia, ette ihiharana jio lejifak honyi; buo lejifak ette isiarana jio aati. 20Anyai nyia isi 'daŋ many ifuaŋarik. Attati lejifak ihuhuruna ofitot itua afeehien 'tomon harrihai 'daŋ 'lullur. 21Arai nyia aliawa hama hinyia oŋiyei 'to diya ihuo alif miyet (5,000), elle ebeŋ ehianak aŋoruo iko iŋiayai.
Adaharu Yesu Ta Ahide hari
(Mar 6:45-52; Yoa 6:15-21)
22Attati Yesu itadahina lejifak itogol oŋida allaŋi to osiere honyi ifohor tole ono atafar enne ittok, buo inyi itatturok eluluŋ waati. 23Ninyia itatturok inyi eluluŋ waati, ette inyi leten idoŋe inyi hama imojori. Ninyia ara akekai arasa nyia Yesu diya hama. 24Ta asaa ania, alama nyia atogol bebe itua tafar. Itaburaŋio nyia apoŋia poŋia hari atogol ania, nyio, ohut nyia oloyyami bebe ajihonyi.
25Ninyia iliaha ataŋatio motie, ette Yesu ittuna jio lejifak alla adahuno ta ahide hari. 26Ilafuhoi nyia isi bebe ninyia igonyuni isi inyi adahuno ta ahide hari, ette isi jiaran, “Etieŋ alia!” ette ituruho ta abaŋi. 27Teya teya, ette inyi ikiana jihosi ojio, “Itagoloto atajia hatai. Ani alia, hèbaŋata!”
28Attati Petro jiaran jihonyi jio, “Lettok, alla ara iyye hode alia, iramak ani adahuno jihoi ta ahide hari.”
29Teya, itarraŋ nyia Yesu inyi jiojio, “Waŋ!” Ania, ollu Petro to togol, ette idaharu jio Yesu ta ahide hari. 30Ati ninyia igonyu inyi oyyami ohut bebe, ette abaŋi inef inyi, ette inyi itterio adioro itua hari. Attati inyi iluaha, “Lettok, eluak ani!”
31Teya Teya, ihalamak Yesu aani honyi, ette inef inyi, ette jiaran jihonyi, “Aii! Iyye ollo omuta eruk olo! Nyio ikuaya iyye?”
32Ninyia adahini isi 'daŋ arrihai itogol, ette oyyami iwotia dee. 33Attati lejifak hutto tua togol itahabuyo Yesu, ette jiaran, “Hode, iyye Lonyi Hollum!”
Itaŋida Yesu Aŋuak Hutto Genesaret
(Mar 6:53-56)
34Ninyia allaŋi isi afohor hari tole, ette isi ifanyan Genesaret. 35Ninyia aheruni aati huttono abore gala ania Yesu, ette isi itisarrahina eram jio afau ania 'daŋ jio, ijiara iyaŋunie aŋuak 'daŋ jihonyi. 36Attanai nyia isi inyi hataŋatak aŋuak hia ittiriere ara duadi bu esidi boŋo honyi; buo aati hinyia ottiri 'to aboŋo honyi ette iŋidari 'daŋ.
ที่ได้เลือกล่าสุด:
Matteyo 14: EA2003
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© The Bible Society in South Sudan 2003