Tuk 12
12
Ciöt Kuɔth kɛ Ab-ram
1Nɛ̈nɛ jɛ, täämɛ cu Kuoth Nhial Ab-ram ku jiök i̱, “Jiɛc rɔ ro̱o̱lu kɛnɛ watku kɛ thok duëël guur kä wër ro̱o̱l mi bä nyuɔ̱th ji̱. 2Bä do̱r mi di̱i̱t cak kɛ ji̱. Bä ji̱ poth kä bä kɛ̈kdu jak kä jɔc kɛ ɣöö bi naath nöŋ puɔ̱th. 3Bä nɛy diaal tin puɔthkɛ ji̱ poth, kä bä tin diaal tin lamkɛ ji̱ lam. Kä döör diaal wi̱i̱ muɔ̱ɔ̱n baakɛ poth kɛ ciötdu.”
4Min cɛ min ca la̱r jɛ ɛ Kuoth Nhial liŋ, cuɛ jiɛn ni kä kɛɛl, kä cu Lɔt wä kɛ jɛ kɛɛl. Kä mëë jiɛcɛ kä Ɣa-ran, Ab-ram runkɛ kɛ run ti jiɛn bärɔw wi̱cdɛ dhieec. 5Kä cuɛ ciekdɛ ni Tha-ray naŋ kɛnɛ gat däman ni Lɔt kɛnɛ kuak diaal tëë la nyinkiɛn, kɛnɛ nɛy diaal tëë ci kɛn kɛ jëk rɔ kä Ɣa-ran, kä cukɛ tɛth raar a wäkɛ ro̱o̱l Kɛ-naan. Mëë cikɛ cu cop ɛn thɔ̱ŋi i̱, 6cu Ab-ram rɛy wec cu luk a räth guäth jiaath Morɛ in di̱i̱t kä Cɛ-kɛm. Ɛn guäth ɛmɔ te ji̱ Kɛ-naan thi̱n ɛn wi̱c. 7Ɛ jɛn cu Kuoth Nhial rɔ cu nyuɔ̱th Ab-ram kä cuɛ jɛ jiök i̱, “Bä wec ɛmɛ ka̱m kuayku.” Inɔ cu Ab-ram Kuoth Nhial in ci rɔ nyuɔ̱th jɛ ta̱th yi̱k. 8Ɛn wi̱ni cuɛ ɣo̱th pe̱e̱k wec in te kä käny ca̱ŋ dhɔaar in cɔal i̱ Beth-ɛl, dhɔɔr in tekɛ bi̱eli, kä cuɛ kɛmɛdɛ pua̱t piny thi̱n, te Beth-ɛl kui̱ konyä ca̱ŋ kä te Aay kui̱ känyä ca̱ŋ. Kä ɛn wi̱ni cuɛ Kuoth Nhial ta̱th yi̱k kä cuɛ jɛ pal. 9Kä cu Ab-ram ja̱lɛ cuɔ̱p ɛ lɛm lɛm wädɛ pe̱e̱k rööl Kɛ-naan in cɔal i̱ Nɛ-gɛb.
Ab-ram kä I-jëp
10Kä mëë ci wec ku tekɛ buɔth mi di̱i̱t, cu Ab-ram rɔ bar ro̱o̱l I-jëp kɛ ɣöö bɛ wä cieŋ thi̱n ala ram mi duundɛ puɔt kɛ buɔth kɛ ɣöö ci buɔth di̱t. 11Mëë ci ku thia̱k ni ɣöö bɛ ro̱l I-jëp ŋäthikä, cuɛ ciekdɛ ni Tha-ray jiök i̱, “Täämɛ guic ɛ, ɣän ŋa̱cä jɛ ɛn ɣöö ɛ ji̱n ciekdä mi tekɛ maan. 12Kä mi wä ji̱ rööl I-jëp ji̱ wä nɛn, bikɛ jɛ cu lar i̱, ‘Mɛmɛ ɛ jɛn ciekdɛ,’ kä bikɛ ɣä cu näk, kä min te ni jɛn thi̱n bikɛ ji̱ päl a tëk. 13Mal ɛ lar i̱ ɛ ji̱n nyimaar kɛ ɣöö dëë mal cu jek kɛ ji̱, kɛnɛ ɣöö dëë tëkdä kän kɛ kui̱du.” 14Mëë ci Ab-ram coth rɛy rööl I-jëp cu ji̱ I-jëp Tha-ray nɛn ɛn ɣöö ɛ ciek mi tekɛ maan mi di̱i̱t. 15Kä mëë ci kua̱r lätni Pɛro jɛ nɛn, cukɛ jɛ wä liëk gɔɔy ciek ɛmɔ, kä cua jɛ naŋ cieŋdɛ. 16Kä cu Pɛro Ab-ram ciɛŋ ni gɔaa kɛ kui̱dɛ. Kä cuɛ rɔ jëk det kɛnɛ ɣɔ̱k kɛ tut muɔ̱li kɛ kuaany wutni kɛnɛ män kɛ ŋut muɔ̱li kɛnɛ thɔ̱a̱rɔa̱a̱li. 17Kä nɛ̈nɛ jɛ, cu Kuoth Nhial Pɛro kɛnɛ ji̱ cieeŋdɛ moc kɛ riɛk mi di̱i̱t kɛ kui̱ ciëk Ab-ram ni Tha-ray. 18Mëë ci riɛk ɛmɔ cop, cu Pɛro Ab-ram jäk kä raan kä cuɛ jɛ jiök i̱, “Ɛŋu ɛnɛ ci lät kä ɣä mi? Ɛŋu mi /keni ɣä jiök i̱ jɛn ɛ ciekdu mɔ? 19Ɛŋu mëë laari jɛ i̱ ɛ nyimaar? Kɛ kui̱c ɛmɔ cä jak kä ciekdä. Kä täämɛ, ciekdu mɔn, naŋ ɛ kä wër.” 20Kä cuɛ jɛ kuëny wutni ti ba jɛ nam kɛnɛ ciekdɛ kɛ nyinkɛ diaal.
ที่ได้เลือกล่าสุด:
Tuk 12: nusNHB
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Nuer Bible © Bible Society in South Sudan 1998,2012.