Jenesii̱s 17
17
Ni xi Néná índajo̱ Abra̱n
1Kjiꞌanga kamá ichítié ko̱jo yichán nijan noó Abra̱n, Néná jatjokjaà, kó bi̱ katsoó:
«Án boá kui Ne xi tsi̱ꞌe̱ ngayeje ngaꞌniuú, ndaꞌyéꞌínní ngatsjéni̱xtjin kó kixi̱ ti̱ńtje̱ ji. 2Ngo ni kꞌuínda ji ko̱jo an: Án boá xi sa̱ꞌin an nga ta̱nisién kjín ka̱ma xota̱ tji̱e̱ tse̱».
3-9Nga tsintꞌié Abra̱n kui nii̱, asiéntikoó ngaskande nga kisitꞌaa̱ xtjien tꞌanangii̱. Kósꞌe̱ Néná bi̱ katsoó:
«Kuí bí kui nii̱ xi tsꞌénꞌbindajoo̱ ji ngotꞌe̱: Jí boá xi ka̱ma ji na̱ꞌmii̱ kjín xota̱ na̱xi̱ńdá. Kó kuíni nga jè ngiti̱ Abra̱njín kꞌuin jaꞌée̱n ngotꞌe̱, jè Abraa̱n kꞌuiín, ngatꞌa̱ jí boá xi ka̱ma ji na̱ꞌmii̱ kjín xota̱ na̱xi̱ńdá, kó kjín xota̱ tji̱e̱ kꞌuieé, kó ki̱a̱ kjo̱tjojin xi re ka̱ma nga. Kui ni xi tsꞌénꞌbindajoo̱ ji ngotꞌe̱, ko̱jo xota̱ tji̱e̱ tse̱ boá xi tsꞌénꞌbindajo̱ an nga, kó jmíni̱xtjin kju̱i̱e̱ kui nii̱. Án boá xi Ne tse̱ ka̱ma an, ko̱jo Nee̱ xota̱ tji̱e̱ tse̱. Kó nangi Kanaa̱n nínga tindyin ji ngotꞌe̱ xikoó ngo xota̱ xi xín nangi, jí boá xi tjítsꞌenkꞌasꞌieen ngotꞌe̱ ko̱jo xota̱ tji̱e̱ tse̱, kó ngatsjéni̱xtjin nga tsa̱jún ka̱ma.
»Ta̱nga ji ko̱jo xota̱ tji̱e̱ tse̱ chjiéngá si̱ꞌankjatjosónjnú, 10kui kjo̱a̱ꞌbíndaa̱: Ngayeje jáxíꞌiín, chjiéngá si̱ꞌaa̱n sirkunsisioo̱n. 11Kui sirkunsisioo̱n kuí boá kui nii̱ xi chi̱bo̱a̱a̱ kui kjo̱a̱ꞌbíndaa̱ ka̱máná jún ko̱jo an. 12-13Kꞌi̱e̱ ku̱i̱ꞌítsꞌi̱yanii̱ ngotꞌe̱ ꞌne̱, nga ngayeje ndí xí stse̱n ngi̱jii̱n xota̱jnú, nga xi ma jin ni̱xtjin nga stse̱n, si̱ꞌaa̱n sirkunsisioo̱n. Kui kjo̱a̱ꞌbíndaa̱ chjiéngá sa̱ꞌínkjatjosón ndí xí stse̱n ndiꞌajnú, ko̱jo tsi ndií moso̱jnú, ko̱jo tsi ndií xota̱ xi xín nangi chji̱a̱ni, ndatsi xota̱ tji̱e̱ tse̱jín má. Chi̱bo̱a̱a̱ kui kjo̱a̱ꞌbínda xi tjítsꞌenjo̱jnúꞌun chjiéngá ngi̱jin yojojnú xꞌi̱a̱jnú, kui kjo̱a̱ꞌbíndaa̱ ngatsjéni̱xtjin nga kꞌuijñá. 14Kó kui nda̱ xi si̱ꞌánjiín sirkunsisioo̱n, tjítsꞌénkjátjosónjín kui kjo̱a̱ꞌbíndaa̱, kó ka̱májín ki̱a̱ kꞌuijñá ngase ngi̱jii̱n jún».
15Kó Néná ti̱ bi̱ ti̱ katsó ngasee̱ Abraa̱n nga:
«Ngotꞌe̱ ꞌne̱ chjóo̱n kui xi ꞌmí na̱ Saraii̱, jè ngiti̱ bo̱a̱jín kꞌuin, na̱ Sara̱ tsí kꞌuin jaꞌeén. 16An sa̱ꞌinchikonñé an tsi̱ꞌe̱ nga kꞌuieé ngo ndí xí tse̱, kó xota̱ tji̱e̱e̱ kui, kjín xota̱ na̱xi̱ńdá ka̱ma, kó ki̱a̱ kjo̱tjojinni xi re ka̱ma nga».
17Kósꞌe̱ Abraa̱n asiéntikoó ngaskande nga kisitꞌaa̱ xtjien tꞌanangii̱ ngindyi̱ko̱n Néná, kó tsajnó, sꞌe̱ bi̱ tsꞌén katsꞌénkjó: «Kótsꞌèn kꞌuié ngasena ndí nga je úchán nóna». Kó kótsꞌèn nga na̱ Saraa̱ kꞌuieé ngo ndí nga je ichítié ko̱jo yichán noó. 18Kó Abraa̱n bi̱ katsoó Néná:
—¡Te̱ꞌée̱ Ismaee̱l kui kjo̱a̱niꞌánchikonñée̱ nga!
19Sꞌe̱ bi̱ katsó Néná:
—Ndatsi sꞌijinjiín, ta̱nga ja̱koxi̱ boá nga na̱ Saraa̱ tsjaá jí ngo ndí, kó Isaa̱ kꞌuítꞌe jaꞌén jí. Ngatsjéni̱xtjin nga kꞌuijñá kui ni xi tsꞌénꞌbindajoo̱ ji ngi̱jin xota̱ tji̱e̱ tse̱. 20Kó ti̱ jè tsintꞌie an ni xi kichjiéꞌéní kjo̱a̱a̱ Ismaee̱l nga, kó tsꞌénxiyaa nga sa̱ꞌinchikonñé án kuí nga tsjàa̱ kjín xota̱ tji̱e̱, kó ki̱a̱ kjo̱tjojinni tiejó re, kó nga xota̱ tji̱e̱e̱ xi ka̱ma ngo na̱xi̱ńdá xí ꞌniú je. 21Ta̱nga ta̱ Isaa̱ tsí boá xi tjítsꞌenjo̱ an kjo̱a̱ꞌbíndana, kui ndí xí stse̱én na̱ Saraa̱ ngotꞌe̱ ngo noó.
22Ngije kamaá nga tsíchji̱a̱jo Abraa̱n, Néná xín kijí. 23-27Kó ti̱ kuii̱ ni̱xtjin Abraa̱n iskjíbé Ismaee̱l kui xi ndií, kó katsꞌeén sirkunsisioo̱n ko̱jo ngayeje já xí katsen ndiꞌaa̱ ko̱jo moso̱ xi tsꞌatsie. Kó Abraa̱n ti̱ katsꞌeén yojoo̱ sirkunsisioo̱n nga, kó bo̱a̱ tsꞌén katsꞌénkjatjosón kui ni xi Néná tsíꞌaá nga sa̱ꞌín. Ichítié ko̱jo yichán nijan noó Abraa̱n, kó Ismaee̱l tie ján noó nga kiniꞌaán sirkunsisioo̱n.
ที่ได้เลือกล่าสุด:
Jenesii̱s 17: MAIX
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014