Chɔɔn 1
1
Dě Wlu̍ ja̍a̍ bo feɛ nɛ
1Kmɔ̌ iě-a nui-ɛɛ, nɛ̀ ɔ̀ kɔn nynɛ̌ nu̍-a Wlu̍-ɛ nɛ̀ ɔ̍ nɛ wɛ̀ se̍e̍. Ɔ̍ nɛ dǒ Nyɔsoa we̍, ɔ̍ se̍ nɛ wɛ̀ Nyɔsoa se̍ nɛ. 2Sɔ dě tɔ̀blɔ̍ɔ̍-ɛ, nɛ̀ ɔ̍ nɛ dǒ Nyɔsoa we̍. 3Dě ɔ̍ ja̍a̍ bo Nyɔsoa nui dɛ̍ᵻ kli̍hgbɛ̍. Dɛ̍ ɛ̀ se̍-a nui-ɛ dě ɔ̍ ja̍a̍-ɛ, nɛ̀ ɛ̍ se̍ nɛ. 4Dě ɔ̍ ja̍a̍ bo feɛ nɛ. Feɛ laa̍ bo ɛ̀ nu̍ sɔ̀npli dǒ nyi̍ɔ̍ we̍. 5Sɔ̀npli laa̍ bo ɛ̀ fa̍n dě kwile-e, wɛ̀ kwile se̍ ɛ̍ mɔ̌-ɛ bɛ̌ɛ.
6Jɔ̍gbau due bo Nyɔsoa dbo̍, ɔ̍ nynɛ̌ bo Chɔɔn. 7Ɔ̍ ji̍-i ɔ̍ iě sɔ̀npli laa̍ ɛ̍ sàànsi̍i̍h nu̍, wɛ̀ ɔ̍ iě ɛ̍ tìh nyɔ̍ wlùh sèàɛ̍. Nɛ̀ nyɔ̍ kli̍hgbɛ̍-a mu̍ ɔ̍-ɔ jii wɛ̀ u̍h iě ɛ̍ tìh chɛ̀ po̍. 8Ɔ̍ chɛ̀ nɔ̀ɔ̍, ɔ̍ se̍ sɔ̀npli, jɛ ɔ̍ ji̍-i wɛ̀ ɔ̍ iě ɛ̍ sàànsi̍i̍h nu̍. 9Tìh-a taǐn sɔ̀npli ɛ̀ fa̍n-a dǒ nyɔ̍ kli̍hgbɛ̍ we̍-ɛ, ɛ̍-ɛ bo ɛ̀ ji̍ la̍ nɔ̌ kmɔ̌ we̍.
10Ɔ̀ kɔn nynɛ̌ nu̍-a Wlu̍-ɛ, ɔ̍ nɛ nɔ̌ kmɔ̌, iě kmɔ̌ nui-ɛ dě ɔ̍ ja̍a̍. Jɛ kmɔ̌-a nyɔ̍ se̍ ɔ̍ juo. 11Ɔ̍ ji̍ dǒ ɔ̍ chɛ̀ blǐ, iě ɔ̍ chɛ̀-a blǐ nyɔ̍ se̍ ɔ̍ tìh i̍ gbɛ̍n. 12Jɛ nyɔ̍ juh gbɛ̍n-a ɔ̍ tìh i̍ iě u̍h gbaɛ-a ɔ̍ wlùh-ɛ, ɔ̍ nu̍ ɛ̍ iě u̍h nu̍ Nyɔsoa-a nynuu̍. 13Nyɔsoa-a chɛ̀ bo ɔ̀ nu̍ u̍h ɔ̍ nynuu̍ we̍i̍. U̍h se̍ wlǔh plǒai ka. U̍h-a wlǔh-ɛ se̍ dě nyi̍ɔ̍ we̍ sɔ-ɛ.
14Ɔ̀ kɔn nynɛ̌ nu̍-a Wlu̍-ɛ, ɔ̍ ji̍-i dě nyi̍ɔ̍tu di̍i̍ iě ɔ̍ tǐn nɔ̌ à nynɛ̌. Ɔ̍ toe àɔ̀ blɛ ke tìh-a taǐn kli̍hgbɛ̍ ìh kɔ̍-a dǒ Nyɔsoa pùn i̍-ɛ. Wɛ̀ à jě ɔ̍ tìh-a i̍ bɛ̌-ɛ ɛ̀ kɔn-a dǒ ɔ̍ we̍ ka ɔ̍ nu̍-a Baa Nyɔsoa-a Jǔ jɔɛ̍ due gbài̍-ɛ.
15Chɔɔn bla̍ ɔ̍ tìh. Ɔ̍ we̍le-aɛ, iě ɔ̍ la̍a̍, “Ɔ̀ la ɔ̍ kɔn tìh bo ǐn bla̍, wɛ̀ na̍a̍, ‘Ɔ̀ mu̍-a ǐn kɛ̍n i̍ ji̍-ɛ, ɔ̍ ku̍ wɔ̍n ɔ̍ sìì m̀. Dɛ̍nu̍ɛ, ɔ̍ nɛ kmɔ̌ sasǎ wɛ̀ ǐn dǔ wlǔh-ɛ.’ ”
16Blɛ ɛ̀ jǐ-a dě ɔ̍ ja̍a̍-ɛ, ɛ̍ bo ɛ̀ jě-e à kli̍hgbɛ̍ pɔ̀ìě dɔu dɔu. 17Nyɔsoa-a telě jii dě Mose ja̍a̍, jɛ ɔ̍ blɛ ke tìh-a taǐn kli̍hgbɛ̍ ìh kɔ̍-a dǒ ɔ̍ pùn i̍-ɛ, i̍h jii dě Jusu Klai ja̍a̍ iě à jě i̍h. 18Nyɔ̍-ɔ se̍a Nyɔsoa jě. Jɛ Jǔ jɔɛ̍ due gbài̍ ɔ̀ nɛ-a dǒ Baa Nyɔsoa pùn-ɛ, ɔ̍-ɔ bo ɔ̀ nɛ kmɔ̌ iě nyɔ̍-a juo Nyɔsoa.
Chɔɔn sèàɛ̍ ɔ̍ dbo̍ nu̍ tìh we̍ i̍
(Matio 3.1-12; Maɛ 1.1-8; Luu 3.1-18)
19-20Dǒ ti̍ laa̍ di̍i̍-ɛ, iě Juu nyɔ̍-a nyɔ̍ klaaᵻ nɛ-a dǒ Juluslɛn wlɔ̀ di̍i̍-ɛ, u̍h dbo̍ Nyɔsoa-a slaǎ sà nyɔ̍ ke Liifaɛ nynuu̍ dě Chɔɔn we̍, u̍h iě ɔ̍ i̍ tèle-ɛ ka dǎ, “Mɔ̀ nyɔ̍we̍ ɛ?”
Ɔ̍ se̍ ɛ̍-ɛ nynii ke, iě ɔ̍ sà u̍h-a wlu̍ pɔ̀n we̍. Ɔ̍ flɔn-ɛ ɛ̍ we̍i̍, ɔ̍ la̍a̍, “Ǐn se̍ Nyɔsoa-a Chèɛ̀ Tba̍ju.”
21Iě u̍h tèle ɔ̍ i̍ dɛ, u̍h la̍a̍, “Mɔ̀ nyɔ̍we̍ la̍ ɛ? Mɔ̀ Ilaɛja ae?”
Wɛ̀ ɔ̍ la̍a̍, “Ǐn se̍ ɔ̍ mɔ.”
Iě u̍h la̍a̍, “Mɔ̀ Nyɔsoa-a tu̍owli po̍ nyɔ̍ ɔ̀ kɔn tìh à gbaɛ-a ae?”
Wɛ̀ ɔ̍ la̍a̍, “Iěe.”
22U̍h la̍a̍ dě ɔ̍ we̍, “Mɔ̀ nyɔ̍we̍ ɛ? Flɔn-ɛ dě à di̍i̍ wɛ̀ à iě nyɔ̍ dbo̍-a àɔ̀-ɛ kunǎ wlì gba̍ ka̍ jě. Ka àn tìh nɛ ɛ?”
23Wɛ̀ Chɔɔn la̍a̍, “Mɔ̍ ɔ̀ nu̍-a Nyɔsoa-a tu̍owli po̍ nyɔ̍ Asaia-a dǎ-a,
‘Ɔ̀ we̍le-a dě kwlǎslò we̍,
mɔ̀ slɛ̌-ɛ wìè-i dǒ Joi we̍-ɛ,’ mɔ̍ la.”
24Nyɔ̍ ùh Fɛlesii nyɔ̍ dbo̍-aɛ 25iě u̍h tèle Chɔɔn i̍, u̍h la̍a̍, “Nàa̍ ìn se̍-a Chèɛ̀ Tba̍ju, iě ìn se̍-a Ilaɛja, iě mɔ̀ɔ̍ ìn se̍-a Nyɔsoa-a tu̍owli po̍ nyɔ̍ ke-ɛ, nɛ̀ dɛ̍nu̍ àn po̍ nyɔ̍ nǐ dlǔ la̍ ɛ?”
26Wɛ̀ Chɔɔn la̍a̍, “Ǐn po̍ nyɔ̍ nǐ dlǔ dǒ nǐ we̍, jɛ nyɔ̍ due nyna i̍ dě mɔ̀ nynɛ̌ mɔ̀ se̍ ɔ̍ juo. 27Ɔ̍ bo ɔ̀ mu̍ ǐn kɛ̍n i̍ ji̍. Ǐn se̍ i̍ blaɛ iě ɔ̍ bu̍hdih-a chɛ̀ i̍ tǔh.”
28Ìh kli̍hgbɛ̍ la dǒ Bɛtani wlɔ̀ di̍i̍ bo i̍h nɛ-ɛ dě Jɔɔdɛn nǐ-a fɔ̌ dɛɛ we̍, tà Chɔɔn-a poe-a nyɔ̍ nǐ dlǔ-ɛ.
Jusu bo ɔ̀ nu̍ Nyɔsoa-a Blawɛ̌ Jǔ
29Sɔ̀n dɛɛ sɛ̀n-aɛ, wɛ̀ Chɔɔn jě Jusu nɛ̀ ɔ̍ ji̍ ɔ̍ wlì. Iě ɔ̍ la̍a̍, “Gbɛ̀n-e, Nyɔsoa-a Blawɛ̌ Jǔ ɔ̀ sà-a gblɛ̍n sɔ̀ɛ̀n i̍ da̍a kmɔ̌ we̍-ɛ la. 30Ɔ̀ la ɔ̍ kɔn tìh bo ǐn bla̍, wɛ̀ na̍a̍, ‘Ɔ̀ mu̍-a ǐn kɛ̍n i̍ ji̍-ɛ, ɔ̍ ku̍ wɔ̍n ɔ̍ sìì m̀. Dɛ̍nu̍ɛ, ɔ̍ nɛ kmɔ̌ sasǎ wɛ̀ ǐn dǔ wlǔh-ɛ.’ 31Ǎn chɛ̀ ǐn se̍ ɔ̍ juo de, jɛ ǐn ji̍ i̍ iě ǐn po̍ nyɔ̍ nǐ dlǔ dǒ nǐ we̍, wɛ̀ iě ɔ̍ Eslɔɛ nyɔ̍ tà sà-ɛ.”
32Wɛ̀ Chɔɔn sà dɛ̍ ɔ̍ jě-a tìh i̍, ɔ̍ la̍a̍, “Ǐn jě Nyɔsoa-a Sùù nɛ̀ ɛ̍ sɔ dě ja̍i̍wlɔ̀ ɛ̍ ji̍ wlù ka gbɔ̀lǐh-ɛ, iě ɛ̍ gbǎ ɔ̍-ɔ. 33Ǎn chɛ̀ ǐn se̍ ɔ̍ juo de, jɛ ɔ̀ dbo̍-a m iě-a nyɔ̍ nǐ dlǔ po̍ dǒ nǐ we̍-ɛ, ɔ̍ bo ɔ̀ la̍a̍ dě ǐn we̍, ‘Jɔ̍gbau àn mu̍-a jě Nyɔsoa-a Sùù iě-a wlù ji̍ wɛ̀ ɛ̍ iě-a ɔ̍-ɔ gbǎ-ɛ, nɛ̀ ɔ̍-ɔ bo. Nyɔsoa-a Sùù bo ɛ̀ mu̍ nǐ nu̍ ɔ̍ iě mɔ̀ dlǔ po̍.’ 34Wɛ̀ ǐn jě ɛ̍ nɛ la̍, iě ǐn nu̍ ɔ̍ sàànsi̍i̍h, na̍ ɔ̀ la Nyɔsoa-a Jǔ bo.”
Jusu-a kòà-a sàì naɛ la
35Sɔ̀n sɛ̀n-a dɛ-ɛ, nɛ̀ Chɔɔn ke ɔ̍ kòà sɔɔ̌n nyna-ɛ pùn, 36dǒ ɔ̍ jě-e Jusu nɛ̀ ɔ̍ sì-i. Iě ɔ̍ la̍a̍, “Gbɛ̀n-e, ɔ̀ la Nyɔsoa-a Blawɛ̌ Jǔ bo.”
37Dɛ̍ ɔ̍ bla̍-ɛ, ɛ̍ bo ɔ̍ kòà nɛ-a sɔɔ̌n-ɛ u̍h wɔ̌n iě u̍h gbǎ dǒ Jusu de̍e̍. 38Jusu fèàɛ̀, iě ɔ̍ jě u̍h nɛ̀ u̍h wɔ̀ dǒ ɔ̍ de̍e̍. Wɛ̀ ɔ̍ la̍a̍, “Dɛ̍ mɔ̀-a pɔ̀n i̍ ɛ?”
U̍h la̍a̍, “Wlaɛbaɛ, tà ìn tǐn ɛ?” (Wlaɛbaɛ-a gbɔ̀ nu̍ Nǎ Po̍ Nyɔ̍.)
39Jusu la̍a̍, “Mɔ̀ ji̍-o jě.” Nɛ̀ jlǔh te̍le i̍ wɛ̀, iě ɔ̍ ke u̍h mu̍, wɛ̀ u̍h jě tà ɔ̍ tǐn-aɛ. Iě u̍h sì weɛ̍-a dɛ̍ sie-aoɛ dǒ ɔ̍ we̍.
40Ùh sɔɔ̌n wɔ̌n-a Chɔɔn-a wlu̍ wɛ̀ ùh gbǎ-a dǒ Jusu de̍e̍-ɛ, u̍h-a due-a nynɛ̌ nu̍ Andlu. Samo Pitɛ de̍di̍i̍ bo. 41Sàǐtòò dɛ̍ Andlu nu̍-aɛ, ɔ̍ pɔ̀n ɔ̍ de̍di̍i̍ Samo i̍ iě ɔ̍ sèàɛ̍ ɔ̍ wlùh. Ɔ̍ la̍a̍, “À jě Nyɔsoa-a Chèɛ̀ Tba̍ju wɛ̀.” (Ɔ̍ nynɛ̌ la ɛ̍ gbɔ̀ nu̍ Klai dě Klii wlu̍ di̍i̍.) 42Wɛ̀ ɔ̍ gba̍ Samo dě Jusu we̍.
Jusu gbɛ̀n-a ɔ̍ ja̍-ɛ, iě ɔ̍ la̍a̍, “Mɔ̀ Chɔɔn-a jǔ Samo. Àn nynɛ̌-a mu̍ Sifa nu̍ ti̍laa.” (Nynɛ̌ la ɛ̍ gbɔ̀ nu̍ Pitɛ dě Klii wlu̍ di̍i̍.)
Jusu dǎ Felɔ ke Natanio
43Sɔ̀n sɛ̀n-a dɛ-ɛ, wɛ̀ Jusu po̍ tìh gbɔ̀ ɔ̍ iě dě Kaladii fɔɔ mu̍. Wɛ̀ ɔ̍ pɔ̀n Felɔ i̍, iě ɔ̍ la̍a̍ dě ɔ̍ we̍, “Gbǎ dǒ ǐn de̍e̍.” ( 44Bɛseida wlɔ̀ due kɔn di̍i̍ Andlu ke Pitɛ sɔ-aɛ, dǒ Felɔ sɔ-ɔ ke.) 45Felɔ pɔ̀n Natanio i̍, iě ɔ̍ la̍a̍ dě ɔ̍ we̍, “Ɔ̀ kɔn tìh Mose sà-a dě telě chlǐh-dɛ̍ di̍i̍ wɛ̀ Nyɔsoa-a tu̍owli po̍ nyɔ̍ sà-a ɔ̍ tìh i̍ ke-ɛ, à jě ɔ̍ wɛ̀. Josɛ-a jǔ Jusu bo, ɔ̍ sɔ dǒ Naaslɔɛ wlɔ̀ di̍i̍.”
46Wɛ̀ Natanio la̍a̍, “Dɛ̍ chɛ̀ bɛ̌ɛ ɛ̍ iě dǒ Naaslɔɛ sɔ ae?”
Iě Felɔ la̍a̍, “Ji̍ jě sǔh.”
47Dǒ Jusu jě-e Natanio nɛ̀ ɔ̍ ji̍ ɔ̍ wlì. Iě Jusu bla̍ ɔ̍ dɛ we̍i̍, ɔ̍ la̍a̍, “Ɔ̀ la bo ɔ̀ nu̍ Eslɔɛ jǔ gbe̍i̍n, si̍h dɛ se̍ dě ɔ̍ ja̍a̍ nɛ.”
48Wɛ̀ Natanio tèle ɔ̍ i̍, ɔ̍ la̍a̍, “Ka ìn nu̍ iě ìn juo m ɛ?”
Jusu la̍a̍, “Ǐn jě m̀ dǒ fei-tu̍ sɔ̀n sasǎ wɛ̀ Felɔ dǔ ìn dǎ-a.”
49Wɛ̀ Natanio la̍a̍, “Dlǔtu, mɔ̀ Nyɔsoa-a Jǔ, mɔ̀ Eslɔɛ nyɔ̍-a Blǔh Baa.”
50Wɛ̀ Jusu la̍a̍, “Na̍ ǐn jě m̀ dǒ fei-tu̍ sɔ̀n dɛbo ɛ̍ kɔn ìn gbaɛ ǐn wlùh ae? Bɔ̌, àn mu̍ wɔ̍n ku̍ dɛ̍ᵻ diih jě i̍h iě jɛ la sìì.” 51Iě ɔ̍ la̍a̍ dě u̍h we̍, “Ǎn sèàɛ̍ mɔ̀ tìh-a taǐn wlùh, mɔ̀-a mu̍ ja̍i̍wlɔ̀ jě ɛ̍ iě wɔ̍i̍n pɔ̀ni, wɛ̀ mɔ̀ iě Nyɔsoa-a ǐnchɔ̀ jě, i̍h iě mu̍ ja̍i̍ ji̍ wlù nu̍ dǒ Nyi̍ɔ̍-a Jǔ dlǔwèàì.”
ที่ได้เลือกล่าสุด:
Chɔɔn 1: KDNT
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
The New Testament in Western Krahn published as KU̍O̍ DELEE © The Bible Society in Liberia, 1999.