YOHANA 3
3
Yesu ea Nikodemu
1Asi gwanda siispa Farisaayajeega siguura Nikodemu, nea ghoahaaghwa fuga Yahudi. 2Siisi Gaweesa Yesu eawa ak gwayeesha, “Rabi, aseasa geanali gideaba ang'iing'i guwoosi giinealshoocheanda ak gileabu heeda ASEETA; aba gideaba manda siida ammu gwasin gwadeagwajeesu isinayiin, geaghus siida mideayi sea ASEETA.” 3Ghwasha Yesu ak gwayeesha niny, “Aba huumwa, aba huumwa geayeeshiineey siida iimeebiikta eeji deaba iyeenya ea mayghwadaah sugoocheanduumeeda ASEETA.” 4Gwayeesha Nikodemu niny, “Iijea eebiikta eeji siida niheedu? Gayghoamu gideaba gaygabiikta jeeda ghaamwat deaba iyeenya ak geeji?” 5Ghwasha Yesu ak gwayeesha, “Aba huumwa, aba huumwa, geayeeshiineey, siida iimeejiilana beega ea Guroorooda ea mayghoammu gawa jeeda sugoocheanduumeeda ASEETA. 6Gissijiila saseeda gaba saseeda, nea gisijiila guroorooda gaba Guroorooda. 7Adihami ng'eanyi aba gideaba geayeeshiineey, ‘Siida geaghus eebiikta eeji.’ 8Jeammeeda iissa gagal heeda gasa, ak giyiinyi ghuuta ak ea minali heelleabu ghana heeda gal, ea giduurji siidida sijiila Gurooroodean.” 9Gwayeesha Nikodemu niny, “Ng'asheesu iijeagwasa?” 10Ghwasha Yesu ak gwayeesha niny, “Eara ang'iing'i giwoosi giinealshoocheanda Israeli ak ea minali ng'asheesu? 11Aba huumwa, aba huumwa, geayeeshiineey, aseasa geeruku gida sinalli ak geemuuwu gidaghayi sidaayi; amaduuku agooga ghanyea moamwasi ng'asheega simuuwu. 12Asi iyearukuneegwa ng'asheega badayda ng'eanyiida ak ea moamwasi, abeeda iyearukuneegwa ng'asheega mida humng'eeda gajamwastaan? 13Manda siida ghayi nidiyeada ea gawa humng'eeda geaghus Orjeeda Siida ghayi rarang'aana humng'eeda 14Gawuurji gida ghayi atoasta Musa ichibooda aba dareapcheeda, gwasunu eara Orjeeda Siida gajeatoastunu. 15Abeeda siida jea ghamwas niny gayghwanyas eaweega manda muudeanooda.”
16Aba gideaba ASEETA ghabwariiy ng'eanyiida ea eeyi bwak ea ghoadayda Orjeedaanyi asakaleala, ak abeeda siida wassean mwas niny ea mwaroada ak abeeda ghwanyas eaweega manda muudeanooda. 17Aba gideaba ASEETA ghayi moojeakna Orjeeda ghwaan ng'eanyiida, ak goorgweaksa ng'eanyiida, geegasa ghwalaalaan ng'eanyiida aba badaydaanyi. 18Siida mwas niny majeergweaksa; nea siidida mamwasaan ea ning'ata girgweaksinda, aba gideaba mamwasa gheawunga Orjeeda assakalealla bea ASEETA. 19Ak girgweaksinda ea nihi, ghwahidu weeshinda jeeda ng'eanyiida, ak ghabwariiy buuneeda misaneeda ea ghoadaraam weeshinda, aba gideaba sinaweega nyaawa ea munyas. 20Siida sina ng'asheega munyas iissa ghwasit weeshinda, nea ghanyea mayghoan heedeesh aba gideaba gajiidu geataajiit sinaweagaaschi munyas. 21Nea siidida sina huumeandean gayghoan heedeesh, ak geesikteawa sinaweagaaschi gideaba ghoawal gheang'da ASEETA.
Yesu ea Yohana
22Iing'ata ng'asheesu gawa Yesu sea ginealangaaschi ea ghwahita ng'eanyiida Yudeya, goobiida hoowa sea ginealangaaschi nea goobaatiisan. 23Abeeda eara Yohana goobaatiisan aba Ainoni, neekeewa Salemu, aba gideaba hoowa gwanda beega saang'a; iissa gaweay buuneeda heeda ak goobaatiisan. 24Aba damandida Yohana miyeayaat ghealooniga.
25Iidu ghoaptu sheang'nyeeda aba jeeda giinealanga Yohana ea siispa Yahudi aba ng'asheega giimiinnooda. 26Hean iidu gaweay heeda Yohana ak gwayeesha, “Rabi, siida heeta indeawi aba giigheawda Yordani ghayi imuuwu ng'asheagaaschi eara niny ghamneawa goobaatiisan, nea gaweay headaanyi buuneesean.” 27Gwayeesha Yohana, “Siida moamu ghwanyas gida wassean geaghus dea siitaw leabu humng'eeda. 28Nea eara agooga ghoamuuschi amuuwuuni gideaba geayeenyi, aniini meawoosi Gristo, aniini geecheaknean deashoayna niny. 29Siida mideawa gatmooda bea nyeangiida niny siida geeshi, amaduuku siituupchi siida geeshi, iissa ghamiinaada nea gooleeysiit nea gahoosan muuchi iiyiiy ghuuteaba siidida geeshiin; asi aba sareani hooseaneegeasu niheedu. 30Gammiisa niny gideaba gajea ghaloamwaat ak ea meawoosi aniini ghaloamwaat.”
Siida leabu humng'eeda
31Siida leabu humng'eeda eahaweewa sean, nea siida mida badayda ng'eanyiida gaba ng'eanyiida, ak gabaloola ng'asheega ng'eanyiida; nea siidida leabu humng'eedean eahaweewa sean. 32Niny iissa gamuuwu ng'asheega dea ea gea iiy, ak ghanyea manda siida mwas muuwuunoadaanyi; 33amadu siidida mwas muuwuunoadaanyiin, abeeda eara niny ea niiroor gideaba ASEETA huumwa. 34Aba gideaba siida ghayi ajeagu ASEETA iissa gabaloola ng'asheega ASEETA ak ghoadaw guroorooda nea moodeena; 35Bwaabwa ghabwariiy Orjeeda, ak ea niyiin haleanjeeda sean geatindaanyi. 36Siida mwas Baleanda gwandeawa eaweega manda muudeanooda; nea siidida moawala gheang'da Baleandean ea mayghwanyas eaweega, abeeda gaygwanda badaydaanyi nyarasta ASEETA.
ที่ได้เลือกล่าสุด:
YOHANA 3: BG15
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
The Bible in Datooga © Bible Society of Tanzania, 2015.