Luc 15
15
Zezi ayamba anga ambiini
1Atoniŋi ma lepo bla anga ambiini, atsiini mpili e Zezi na yuha nde. 2Afarizi bla ayisihi ma angri aya mawobo o mpanihi e bo ndi: «Lemono mvuuru yu ayamba anga ambiini. Nde adza bla bo!» 3Ŋa Zezi oti bo ntsintsami ndi: 4«O mpanihi e be mvuuru omo otu oka na ekuumi kuumi ma endoombo. Omana ondoombo omo otu onyuoŋi. Nde aka sa nyila endoombo ma ekuumi wa na endoombo wa ntsa ntsehe, ma odze na saha ondoombo enyuoŋi tii ngo e nde asuolo tso ni? 5Nde osuolo tso, nde osueri, osaari, olehi o yula aduu, 6oyeni ndzo e nde. Nde otsuoli andihi bla baari a paani ndi: “Ledza saabe letsaba ma oma, me emi suolo ondoombo oki oma nyuoŋo!” 7Ŋa me eduha be osuere edze oka o yulu mo nga ambiini omo otu, akaala lebihi le nde, evula ekuumi wa na baari wa, ma ali tele, bo kaama ma okaala lebihi le bo kali.»
Doro a nkoso a mvunu anyuoŋi ami suolo
8«Si kali dzua okaasi ali na adoro a nkoso#15.8 Mpili a Greeke na asi Rome eki doro ma atuologo o drasme bla denye: wura e dzandza odziila omo. a mvunu, kuumi. Ŋa doro omo onyuoŋo nde i sa naasa lapi, okuomi ndzo, osahi yemiŋi, tii ngo e nde asuolo ni na? 9Ntini e nde asuolo, nde otsuoli andihi bla akaasi a paani, nde oduhi bo ndi: “Lesuere bla me, obila me emi suolo doro a nkoso aki ama nyuoho!” 10Ŋa me eduha be, osuere oli na abaandzi a Ndziami ma onga ambiini omo otu akaala lebihi le nde.»
Ntsintsami e muana anyuoŋi
11Nde ovurihi oduhi ndi: «Balaha mo eki na baana ma abalaha vuele. 12Mwarihi na taara ndi: “E taara mpa o me obari o wanda.” Taara se okabi osolo o mpanihi e baana a vuele. 13Etsuhu eyira, muarihi otonihi e nde eso, otehi ma obaha adoro. Oyeni osi ola, ma osa lebihi lo otsa otsa. 14Ntini e nde amani okaba adoro aso, ndzala e nini evi ma osi kia, emana nde oya o ntsa kaama. 15Nde oyeni na adzandza mpili e mvuuru omo ama osi kia. Otumi nde ntsa anguunu a nde na akiele enguu. 16Nde aki na ndzala odza mburu e karube,#15.16 Karube mva mburu oyanda. biila ma edzihi enguu, ŋa mvuuru aka mpa nde ni.
17Nde oya atsimiha ndi: “Mpili e taara a me adzandzi aso na biila ema vula bo, ŋa kuuni me ekua o ndzala! 18Me edze mpili e taara a me. Me eduha nde mbri: E taara me emasa mbiini o miisi a we bla a yulu. 19I ma buuna otsuolo me o muana we ni. Yaha me mva odzandzi a we.” 20Nde oyeni mpili e taara.
Nde oki okini la, taara otaali nde, omoni nde nkerihi, odumi ntsini na ayamba nde, ompi nde amfemfe. 21Muana na nde ndi: “E taara, me ema sa mbiini o miisi a we bla yulu. I ma buuna otsuolo me o muana we ni.” 22Ŋa taara na adzandzi a nde ndi: “Lesa asisari, leya na nde oringa ove, lelaasa nde yo. Lelehe nde nkuere ma oliemi, na akoroho o ntaami. 23Leya na muana ngoombo ali na maari be lebuma, ledza, lesuere, 24obila muana a me yu oki oma kua, omi nyusuha, nde se aki omi nyuoŋo, nde omi suoho.” Bo aya ma sa tsinda.
25Ŋa muana okuuru aki ntsa anguunu. Ntini e nde ayi na vuruha, nde otsiina tuha na ndzo, oyuhi anguomi bla akini. 26Nde otsuoli odzandzi omo, opisi nde ndi tso kua oma. 27Odzandzi okaali na nde ndi: “Mwarihi a we omi ya na avuruha. Taara a we ama buma muana ngoombo ali na maari, obila nde omi ya na avuriha yemiŋi.” 28Ŋa okulu obie nkala, nde aki ndzala onyunuha o ndzo kali. Taara a nde otsuuhi na avuono nde ma onyunuha o ndzo. 29Ŋa nde okaali na taara a nde ndi: “Me emi dzandza bla we esibi kuna, me ekini onyura angri a we ni. We kini ompa me si muana ondoombo omo, mo obu mbri me sa tsinda bla andihi a me ni. 30Ŋa ntini e muana a we a balaha yu ayi, nde adzi osolo a we bla akaasi, we omi buma nde muana ngoombo ali na maari!” 31Taara na nde ndi: “Muana a me, we oli bla me antini aso, biibi e me eso, e we. 32Ŋa ove eki, saabe lesi tsinda, lesueri obila muarihi a we yu oki oma kua, nde oli muo, nde oki omi nyuoho, lemi suolo!”»
ที่ได้เลือกล่าสุด:
Luc 15: MDT
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES