Marcos 16
16
Jesús rubaane lu yëla gut
(Mt 28:1-10; Lc 24:1-12; Jn 20:1-10)
1Gdëëd dza tu'ueak'laadxi'ke bënni Judea, Salomé len María xhne'e Santiago gla'u'nu le rla' xhixh naar lagu'u'nu xhpeele'e Jesús. 2Bayën ziil'a kati rugie'la' seman yajak'nu ga de ba kie' Jesús, kati zia'a r'roj'z gbiidz, 3te' lza'a'nu:
—¿Nuxh kua kieeru giaj'a nusiaj ra ba ni?
4San, kati guluyuunu, gulale'i'nu ki giaj'a tir da' xhlatji. Giaj ni le xhën nak'tzka. 5Kati gulane'nu lu baa, gulale'i'nu'bi tuubi bi'i kuidi naku'bi laari xhkich le tunn rë'bi kuiti'le'elk'nu yubeel. Nguul ni glaadxi'nu, 6San leebi guudx'kbi'nu:
—Ti gaadxi'li. Lbi'ili rugiilj'li'ne Jesús ki Nazaret, bënni'a gulude'e lu yaag kruuz. Ti zue' ni chi bubaane lu yëla gut. Guluyu'tzka ga guluxue' Le'. 7Gultzajëëdxe Pedro len ye la'ke bënni useed kie': “Galilea ziije naar utzaage lbi'ili yubl; ni' gle'i'li'ne, ka'teez gudxe lbi'ili Le'.”
8Na' nguul ni gulaxhunj'nu ra baa koma taxhiiz'nu tzka'ti'ga taadxi'nu. Len nutunu gulagixhji'nu koma taadxi'nu.
Jesús rlui'lau'e len María Magdalena
(Jn 20:11-18)
[9Bayën ziil'a rugie'la' seman gdëëd bubaane Jesús lu yëla gut, yajlui'lau'e zia'a len María Magdalena, nguul'a bubiije'nu gaadx bë' xëwi. 10Leenu yajtixhjik'nu'ne bënni'a guladáke len Jesús koma zua'yechi'ke len tabëëdxe. 11Kati gulayëën'de ki Jesús yu'u yëla naban kie' ati leenu ble'i'nu'ne, ti gulayajle'ke.
Jesús rlui'lau'e len chope' bënni useed kie'
(Lc 24:13-35)
12Gdëëd le ni Jesús blui'lau'e len chope' bënni dzë'ë'ke nëëz zjake lau'gixi. 13Bënni ni yajtixhji'kde ye la'ke bënni useed; san lekz'ka' ti gulayajle'ke leke.
Jesús rka'ane le luune bënni useed kie'
(Mt 28:16-20; Lc 24:36-49; Jn 20:19-23)
14Gdëëd'a, Jesús blui'lau'e len chi'niaj'ke bënni useed kie' tzal leke ta'we. Gdil'leene leke koma ti nap'ke yëla rajle' len laadxi'dau'ke nak tzutzu, koma ti gulayajle'ke bënni'a chi gulale'i'de Le' bubaane lu yëla gut. 15Len gudxe leke: «Gultziaj gdu gabi'i yëdz'lyu len gultzajtixhji'kde yugute'ke diidza kub dxia'a. 16Bënni tzajle'e len udiile nis, ule'; san bënni ti tzajle'e ubaage'e xhgia'. 17Ati bënni layajle'ke le runn'be' yëla wak ni tzjak'leen leke: lu La' lubiije bë' xëwi; lui'ke diidza kub; 18lazëëne'ba bel'; len ka nak'tza li'aj'ke le nak bach gdëëdi leke tibi gun kieke; len lekz'ka' luxua'naa'ke bënni we' len leke lu'ueake.»
Jesús rubeene yewayuba
(Lc 24:50-53)
19Gdëëd be'leene leke diidza, Jesús bubeene yewayuba len grë'e kuiti'le'e yubeel kie' Dios. 20Bënni useed kie' Jesús gularooje len gaaz yajtixhjë'ke ka diidza'a; len Xan'ru rda'kuudze'e leke len rlui'e yëla wak xhën.]
ที่ได้เลือกล่าสุด:
Marcos 16: PZD
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© Sociedad Biblica de México AC