Luka 20
20
Efiyo Eleittaha Yesu te Elaballok Honyi
Mt 21:23-27; Mk 11:27-33
1Teyya hettiyenio Yesu asayyo hun oyiji jyo laati ihaji imojit eneittok, ofwonni ehumak eleittaha iko egyorok bwo amarwak jihonyi. 2Ojori isi jihonyi jo, Iramak hohoi ta anani elaballok an ihanio iye erre huna. ?Ŋai isyo jihoi elaballok? 3Ette inyi itarraŋ jihosi ojo, Efiyo adi ni itai obo efi, itarraŋata jihoŋ. 4?Ottu elaballok ono Yoane an ibatisyere inyi laati tai? ?Ottu inyi jyo Hollum kuyya jyo aati? 5Ette isi ikikyana ta ahwattek hosi ojori, Kuyya ejo hohoi ottu elaballok honyi jyo Hollum, ojo adi inyi, ?Nyo ibyaŋata tai iruhoto inyi? 6Ati kuyya ejo hohoi, ottu elaballok honyi jyo aati, irwoŋye adi laati hohoi nyo iruhi isi daŋ jo ara Yoane aheyani sayyo. 7Tania ojori isi, Ebeŋ hohoi emijak. 8Ojo Yesu jihosi, Abeŋ bwo fe ni eramak itai ta anani elaballok an ehanio ni erre huna.
Narryamara ono Atulo ol Owon iko Amana Ajalaŋi
Mt 21:33-46; Mk 12:1-12
9Itteryo Yesu iramana laati arryamara ana. Idulak nya obo atulo ajalaŋi imana honyi ette inyi duma omuk laati icyari imana bwo olo inyi jyo obo afau ette itoŋo fur. 10Al ottu ayafa on odyarak aati aŋer ajalaŋi ifak inyi apit jyo ecyak mana imojuniere omuk aŋer jihosi. Ati abahi ecyak apit alya ette fuhara inyi ahania. 11Ifak inyi obo apit ette isi bak lya bwo fe, ette ihanio on orroho bebe jihonyi ette fuhara inyi ahania. 12Ifak inyi obo apit ette isi inyyak bak lya bwo fe ette fuhara inyi. 13Ojo lamonye ajalaŋi, ?Ehanio adi ni anyo? Efak adi ni lonyi hoŋ al amuno ni. Kuyya abaŋi adi isi inyi. 14Ati al igonyuni ecyak lonyi honyi ojori isi, Arutani al attu lya, hattohoro inyi oŋida hohoi erutak erre honyi. 15Ette isi fuhara inyi to mana ette ’tohoro inyi. ?Tania ihanio adi lamonye ajalaŋi anyo jihosi? 16Ottu adi inyi ’tohoro ecyak hulya ette isyarana amana jyo lomuk. Al itaniŋuni isi ana ojori isi, Helaha ara ihwania. 17Ati omijo Yesu jihosi ette jaran, ?Anyo attadi igyoroni? Igyoroni ojo,
“Amorwo#20:17 amorwoAra amorwo ania Kristo. inya ihari aduhok
Ottu ratan moi etteri lohitir.”
18Lya ol okwaharo’to jyo amorwo ania, owuro adi, ati al isyak amorwo ania atulo, atad adi ahwan honyi.
19Ta asaa ania awahi egyorok iko ehumak eleittaha inefuniere Yesu nyo omijani isi ikyana inyi arryamara ana tesi, ati abaŋi isi laati.
Eram ono Amusuru
Mt 22:15-22; Mk 12:13-17
20Attati egyorok iko ehumak eleittaha irrirrya Yesu ette ifahina omuk aati hul itoŋoi ikonyi ihwa aati hul olibori itaniŋuniere ekyanita honyi jo oŋida isi arrasani inyi jyo okuma iko hobu olo okuma. 21Ifiye isi inyi ojori, Hettiyanani emijak hohoi jo ikyana iye bwo fe ittiyenio on obis, bwo ibeŋ iye igigya obo atulo ati ittiyenio iye ekoi ono Hollum ahode. 22?Oyyu jihohoi idumari amusuru jyo hobu Cesare kuyya obeŋ? 23Ati omijak inyi enyobita hosi ette jaran jihosi, 24Iyaŋuniete arobia. ?Anaŋai arrijori ana bwo fe anaŋai afure ana? Ojori isi huno Cesare. 25Ette inyi jaran jihosi, Isyatta jyo Cesare erre Cesare bwo fe jyo Hollum erre huno Hollum. 26Obeŋi isi oremehini rasana inyi ihosyere wati ta ekyana ana, attati isi illilliha te ekyanita honyi ette dwa.
Eram ono Nebuhuna
Mt 22:23-33; Mk 12:18-27
27To obo oloŋ ofwonni omuk hulo Saducehyen jihonyi hul ojori jo obeŋ nebuhuna. 28Ette isi ifiyo inyi ojori, Hettiyanani, ittiyenio nya Mose jihohoi efahi on ojo, Kuyya oye illa obo, bwo idyaharo ŋorwoi on obeŋ hito jihonyi, oŋida illanyi ojuŋori aŋotte nya isiuniere omuk aduri te illanyi. 29Owoni nya illarak hattarik. Oyemu oloŋeu aŋotte ette ye hobeŋi duri. 30Ihanio etarrihi bwo fe ihwo nya. 31Ihanio etahunihi ihwo nya. Attati isi daŋ hattarik ihanio ihwo nya ette ye obeŋi duri. 32Ihalu daŋ oye bwo fe aŋotte. 33?Iholoŋ ono ebuhuna ottu adi inyi itoŋoi ŋorwoi ŋai? Nyo isi daŋ hattarik ojuŋorik inyi.
34Ojo Yesu jihosi ojo, Ayamai aati hutta fau ana, bwo isyori iyamari. 35Ati hul osiruni’to ifanyari idou bwo fe hul ibuhuni’to to ye, obeŋi adi ayamai. 36Obeŋi adi bu isi inyyahi ye nyo orrijori isi iko anjelohyen bwo fe te ebuhuna hosi arai adi isi lonyirok Hollum. 37Itahutak nya Mose jo ibuhuni adi layak nyo iŋati buk honyi ehenio hohoi eram ono ayyani on owulo’to bwo iloŋo inyi Hobu, “Hollum olo Abramo, Hollum olo Isako, Hollum olo Yakobo.” 38Obyaŋara inyi Hollum olo ayak, ati ara inyi olo eswok, nyo isui laati daŋ tenyi. 39Itarraŋi omuk hulo egyorok jihonyi ojori, Hettiyanani, ikyana iye on oyyu. 40Nyo abaŋi isi ifiyere inyi obo ariŋ.
Efiyo ta Lonyi Davide
Mt 22:41-46; Mk 12:35-37
41Ette inyi ifiyo isi, ?Aŋai ojori laati ojo ara Kristo lonyi Davide? 42Nyo ojo nya Davide ta ahwan honyi ibuk ono Afureta ojo,
“Ojo Hobu Hollum jyo Hobu hoŋ,
Itoŋoi oŋyatai hoŋ,
43Many ehananiere ni amyorok hoi ebalori hejek hoi.”
44?Kuyya iloŋo Davide inyi Hobu, nyo ati ara inyi lonyi honyi?
Esiŋyo Yesu Farisei iko Legyorok
Mt 23:1-6; Mk 12:38-40; Lk 11:37-54
45Ette Yesu ikyana jyo leyiyanak honyi bwo laati daŋ itaniŋuni. 46Ojo inyi, Ihumata mijo egyorok hul awahi’to adaha iko aboŋojin hun ohodori bwo fe omunoi isi laati hutto suk ifonya isi ta abaŋi. Awahi isi itoŋori imasik hun oyiji ihaji imojit, bwo fe imasik huno etahabuyo al oŋiye isi akarama. 47Ohoruni isi asaŋ to hasik ihidahi, ati omwanani isi arrohoji hosi te emojiti hun obolori’to. Ifwotuni adi isi abahyo on obolo bebe.
ที่ได้เลือกล่าสุด:
Luka 20: LOT1969
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
This text was originally published by the British and Foreign Bible Society in 1969.