Luka 23
23
Eyaro Yesu Ihosyere Pilato
Mt 27:1-2, 11-14; Mk 15:1-5; Yn 18:28-38
1Teyya odyotoi laati hulya ette iyaro Yesu ihosyere Pilato. 2Ette isi ’rosyo inyi ojori, Enyurak hohoi atulo olo isusuyo laati hohoi bwo fe iramak inyi laati hotobyaŋahi odumai amusuru jyo Cesare. Ojo inyi bwo fe inyi Kristo#23:2 KristoAn ojo onyimoto olo Hollum., Hobu. 3Ifiyo Pilato inyi ojo, ?Ira iye Hobu olo Yudea? Tania itarraŋ Yesu, Ihwa ijo bu iye. 4Attati Pilato jaran jyo ehumak eleittaha iko eluluŋ wati ojo, Abeŋ ni anyurak obo epali jyo atulo olo. 5Ati ikyanai isi ta agolon ojori, Itipalyo inyi laati te ettiyenio honyi ifau Yudea daŋ, to Galilea many jyo amaji ana.
Eyaro Yesu Ihosyere Erode
6Ninya itaniŋu Pilato erre hunia ifiyo inyi ojo, ?Olo Galilea olo? 7Al itaniŋu inyi jo ara inyi olo afau an ilettohori Erode, ifak inyi Yesu jyo Erode ol owon’to Yerusalem jyo oŋitek hunia. 8Ninya igonyu Erode Yesu omuno inyi bebe nyo awak nya inyi igonyuna Yesu, nyo itaniŋu nya inyi eram honyi bwo fe awak inyi igonyuna obo etamijani an ihanio inyi. 9Ifiyo inyi Yesu efita arryai ati obeŋ Yesu itarraŋ obo ariŋ. 10Attati ehumak eleittaha iko legyorok rosyo inyi ta ajore. 11Itafitaŋye Erode iko oseŋer honyi Yesu ette suhotyere inyi. Itiyyafani isi aboŋo an ilaman jihonyi ette inyyaharo inyi jyo Pilato. 12To oloŋ ania ette Pilato iko Erode imwara nyo oliwai nya isi.
Aŋotonia ye jyo Yesu
Mt 27:15-26; Mk 15:6-15; Yn 18:39—19:16
13Attati Pilato iloŋuna ehumak eleittaha iko hobwok hulo aati, 14bwo ojo jihosi, Iyaŋuniete dwo itai atulo olo jihoŋ nyo ijatta tai ara inyi atulo al isusuyo aati. Ati imijyete, efiyo dwo ni inyi ihosyere hatai ati abeŋ ni anyurak arrohoji honyi te erre hun irrasana tai inyi. 15Obeŋ bwo fe Erode onyurak arrohoji honyi nyo inyyahuno inyi Yesu jihohoi. Teyya obeŋ obo ariŋ an ihanio inyi an osiru jihonyi ta aye. 16Tania aŋot adi ni jihonyi abahyo bwo ette hohina inyi. 17Nyo oŋida inyi ohou atulo abotye to babus iholoŋ ono neyom.
18Ati iwuwoŋitai laati arabotye ojori, Iyara atulo olo addi, ohou jihohoi Baraba. 19Ara nya Baraba amyotononi olo okuma ol ottohyo’to aati tania ifitani okuma inyi ibabus. 20Ati awak Pilato ihohiniere Yesu ette iloŋuna jihosi. 21Ati arasai isi iwuwoŋitai ojori, Isihonia inyi, isihonia inyi. 22Inyyak inyi jaran jihosi enyyahi etahunihi. ?Nyo, anyo ariŋ on orroho’to an ihanio inyi? Abeŋ ni anyurak obo ariŋ an osiru jihonyi ta aye. Aŋot adi ni abahyo jihonyi ette hohina inyi. 23Ati iwuwoŋitai isi bebe agalik ojori, Isihonia inyi. Ette isi itarisa iko Pilato fur ette ihara ekyana honyi. 24Attati Pilato ŋot jihonyi ihwa awahi dwo isi. 25Ette inyi hohina amyotononi olo okuma alya inya ifitani ibabus ta attohyo honyi aati, ihwa awahi isi. Ati isyo inyi Yesu jihosi ihaniere ihwa awahi isi.
Esihonia Yesu
Mt 27:32-44; Mk 15:21-32; Yn 19:17-27
26Orihoroi isi Yesu addi, ette isi inefuna Simone olo Cirene ol ottu’to to mana ette italororo inyi akruce ihalu Yesu. 27Ijifarai eluluŋ wati arryai ehalu honyi, iko aŋorwo hun oyyoi bwo fe ijiriŋai bebe. 28Oyito Yesu jihosi ette jaran, Ŋarryok Yerusalem, heyyoti toni, ati oyyoti ta ahwattek hatai iko aduri hatai. 29Nyo imijyete, ofwonni oŋitek hun ojori adi laati, Ijara aŋorwo hun iholofiji’to hotomunohi bwo fe hun obeŋi’to isiuni aduri iko hun obeŋi’to itadasye. 30Ojori adi laati jyo adoŋyok, Okwahuniete jihohoi bwo fe imuluhana hohoi. 31Al ihanie isi erre huna ta atahas, ?ihanie adi isi anyo ta ameyyu?
32Orihoroi isi bwo fe omuk aati arrihai hul orrohoji’to ittohori iko Yesu. 33Afanyi isi jyo obo amaji an iloŋoi amaji hou, ette isihonia Yesu dia iko hyodwo wati hul orrohoji’to, abotye ette ŋet bwo abotye ette horroŋ. 34Ojo Yesu, Monye obusak isi nyo otimoi isi anyo an ihanie isi. Awahi isi horyo aboŋojin honyi ette isi bak agumar. 35Owotyai laati dia ette iŋiŋyala inyi. Osuhotyerek bwo fe eleittaha inyi ojori, Italahu nya inyi omuk. Ikejara inyi italahu ahwan honyi kuyya ara inyi Kristo onyimoto olo Hollum. 36Osuhotyerek bwo fe oseŋer inyi ette isyarana jihonyi aari hun irwatiŋoi’to. 37Ette jaran, Kuyya ira iye Hobu olo Yudea, italahu ahwan hoi. 38Igyoroni isi ihide kruce honyi jo, Ara olo Hobu olo Yudea.
39Abotye olo aati hul orrohoji’to hul isihoni ikonyi omoryo inyi ojo, ?Ibeŋ iye ira Kristo? Italahu ahwan hoi ikohoi. 40Ati isiŋyo obotye inyi ette jaran, ?Ibeŋ iye ibaŋ Hollum? Bwo orrijori aŋoco hoi iko ononyi. 41Obis jihohoi, nyo efwotu hohoi edumit on osiru jihohoi, ati obeŋ atulo olo ihanio obo ariŋ on orroho. 42Ette inyi jaran jyo Yesu ojo, Ogilu ani al ifany iye ilobye hoi. 43Ojo Yesu jihonyi, Ahode ajo ni jihoi, ahana ewon adi iye ikoŋ imaji Hollum.#23:43 imaji HollumIloŋoi laati omuk amaji ana paradisyo.
Naye ono Yesu
Mt 27:45-56; Mk 15:33-41; Yn 19:28-30
44Ta akilfanni many otoryai iryok afau daŋ edumele ’tir ’tir. 45Iryok bwo fe oloŋ attati aboŋo ono aji imojit eneittok gwasa hama tehiji. 46Attati Yesu iloŋo bebe on okwat ojo, Monyoŋ, esyo ni oloyiri hoŋ ihas hoi. Hekyana inyi ihwania ette inyi ye. 47Al igonyu eleittok olo oseŋer erre hun ihanie, itahabuyo inyi Hollum ojo, Ahode ara atulo olo atulo ol olibo. 48Ottubanie aati hyodwo omijye’to ette naŋyo asuhyara hosi ta abaŋi ette caharu. 49Bwo fe mottyarak honyi iko aŋorwo hun ijifatye inyi to Galilea, owotyai alamarai imijyere erre huna.
Anuhana ono Yesu
Mt 27:57-61; Mk 15:42-47; Yn 19:38-42
50Attati obo atulo ’tuna al anya’to Yosefo al ara olo aŋotok wati. Ara inyi atulo ol obis bwo fe olibo. 51Obeŋ dwo bu inyi iruk aŋoco hosi on orroho. Ara inyi olo Arimatea amiji ono Yudea, bwo fe itilatyo inyi to olobye Hollum. 52Attati inyi leten jyo Pilato ifiyere ahwan Yesu. 53Ette inyi dutuna ahwan Yesu to kruce ette bubunana inyi ta aboŋo on obwor ette itaferehina inyi ilume an ikyafani ibak jyo amaji an hobyaŋarik onuhanierek obo atulo. 54Ara nya inyi oloŋ an ihuhumyerek erre to sabato. 55Attati aŋorwo hodwo ofwonni’to ikonyi to Galilea, jifaro imijuniere elume iko ahwan honyi. 56Ette isi caharo ihuhumyere eyali on oŋwo’to gir gir. Bwo fe to sabato oyiri isi ifahari efahita.
ที่ได้เลือกล่าสุด:
Luka 23: LOT1969
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
This text was originally published by the British and Foreign Bible Society in 1969.