ሀዋረታ 2
2
ጌሻ አያና ዎ
1ጰንፀቆስፀ ጋላሳይ ጋክዳ ዎደ አማንያ አሳ ኡባይ እስፈ እስ በሳን ሺቅድ ደኦሶና።#ሌወ 23:15-21፤ ዛረ 16:9-11. 2ቆፖና ዎልቃማ ጎተዳ ጉምያ ጉንይ አኬኮና ሳሎፐ ይድ ኤንቲ ደእያ ኬ ኩምስ። 3ቃስ ታማ ላጮ ዳንያ እንፃርሳት ኤንታዉ በንትሸ፥ ሻከት ሻከት ኤንታ ኡባ ቦላ ዎዶሶና። 4ኤንቲ ኡባይ ጌሻ አያናን ኩምድ ዱማ ዱማ ዶናን ኦደታና መላ ጌሻ አያናይ ኤንታ ዳንዳእስን ሃሳያ ዶምዶሶና።
5ሄ ዎደ ቢታ ኡባፈ ይዳ ፆሳስ ባቢያ አይሁደት የሩሳላመን ደኦሶና። 6ሄ ጉን ስእዳ ዎደ ዳሮ አሳይ ሺቅዶሶና። አማንያ አሳይ ኤንታ ቃላን ኦደትሽን ስእዳ ግሾ፥ 7ማላለትድ፥ “ሀ ኦደትያ አሳ ኡባይ ጋልላ አሰ ግዶኮናዬ? 8ያትን፥ ኑኒ፥ ኑ የለትዳ ቢታ ዶናን ኤንቲ ኦደትሽን ዋንድ ስአናዉ ዳንዳእዶ? 9ኑኒ ጳርፀን፥ ሜዶናን፥ ኤላማን፥ ማሰጰፆመን ደኤይሳት፥ ይሁዳን፥ ቃጳዶቃን፥ ጳንፆሳን፥ ኢሰን፥ 10ፕርገን፥ ጵንፍለን፥ ግብፀን፥ ቃረና ማታን ደእያ ሊበን ደኤይሳታ። ኑፐ ባጋትካ ሮመፐ ይዳ አሳታ። 11አይሁደትነ አይሁደተ አማኖ ገልዳ አሳት፥ ቃርፄሳነ አራበ አሳት፥ ፆሳይ ኦዳ ግታ ኦሱዋ ኑ ቃላን ኦደትሽን ስኦስ” ያግዶሶና። 12ኡባይ ማላለትድ፥ ጋናባ ይድ፥ “ላ ሀይስ አይ ጉሴ?” ያግዶሶና። 13ሽን ሀራት፥ “ሀይሳቲ ዎይነ ኡይድ ማትዶሶና” ያግድ ቀልቅስዶሶና።
ጰፅሮሳ ሃሳያ
14ሽን ጰፅሮስ፥ ታማነ እስ ሀዋረታራ ደንድ ኤቅድ፥ ባ ቃላ ቁ ኦድ፥ ኤንታዉ ሀይሳዳ ያግድ ኦድስ፦ “አይሁደቶ፥ የሩሳላመን ደእያ ኡባቶ፥ ታኒ ኦደይሳ ስእተ። 15ዎንታፈ ሄ ሳተ ግድያ ግሾ ህንተ ቆፐይሳዳ ሀ አሳት ማትቦኮና፤ ሄስ ህንተዉ ኤረቶ። 16ሽን ሀይስ ሀንዳይ ናበይ እዩኤል ኦድዳይስ ፖለታና መላሳ።
17“ ‘ፆሳይ፥ ዎድያ ዉርሰን ሀይሳዳ ሀናና ያጌስ፦
ታኒ አሳ ኡባ ቦላ ታ አያና ጉሳና።
ህንተ አደ ናይትነ ማጫ ናይት፥
ትንብተ ኦዳና።
ህንተ ያላጋት ቆንጨ በአና፤
ህንተ ጭማት አሙሆ አሙሀና።#እዩ 2:28-32.
18ሄ ጋላሳታን ታና አማንያ አደ አይለታ ቦላነ ማጫ አይለታ ቦላ
ታኒ ታ አያና ጉሳና፤
ኤንቲ ትንብተ ኦዳና።
19ቃስ ታኒ ቦላ ሳሎን ኦራባ፥
ጋርሳ ሳአንካ ማላ በሳና።
ሱይ፥ ታማይነ ዎልቃማ ጫጋናይ በንታና።
20ግታነ ቦንቾ ግድዳ ጎዳ ጋላሳይ
ጋካናፐ ስን አው ማና፤
አጌን ሱ ዳናና።
21ሄ ዎደ ሄሳዳ ሀናና፤
ጎዳ ሱን ፄግያ ኦንካ አታና’ ያግስ።
22“እስራኤለ አሳቶ፥ ሀ ቃላ ስእተ። ናዝረተ የሱሳ ኦናተይ፥ ፆሳይ ህንተ ግዶን ኦዳ ዎልቃማ ኦሱዋንነ ማላታታን ህንተዉ ቆንጮይሳ ህንተ፥ ህንተ ሁጰን ኤሬታ። 23ፆሳ ካሰ ኤራንነ እያ ሸነን፥ የሱሲ ህንተዉ አድ እመትስ። ህንተ፥ ናጋራንቾት እያ ማስቃለ ቦላ ካቅድ ዎና መላ አድ እምደታ።#ማቶ 27:35፤ ማር 15:24፤ ሉቃ 23:33፤ ዮሀ 19:18. 24ሽን ፆሳይ ሀይቆ ዎልቃ ድግድ እያ ደንስ። ሄሳ ግሾ፥ ሀይቆይ እያ ኦይካናዉ ዳንዳእቤና።#ማቶ 28:5-6፤ ማር 16:6፤ ሉቃ 24:5. 25ዳዊቲ እያባ ኦድሸ፥
“ ‘ታኒ ያርኮና መላ፥
ጎዳይ ታ ኡሻቻን ደኤስ።
ጎዳ ኡባ ዎደ ታ ማታን በአይስ።
26ሄሳ ግሾ፥ ታ ዎዛናይ ኡፋይትስ፤
ታ እንፃርሳን ኡፋይስ ኩምስ፤
ሀይቅያ ታ አሳተይ ኡፋይሳን ዳና።
27አይስ ጊኮ፥ ታ ሸምፑዋ ስኦለን አጋካ።
ቃስ ነ ጌሻ ናአ አሀ ዎቅሳካ።
28ኔኒ ታና ደኦ ኦገ ኤርሳዳሳ።
ኔኒ ታራ ደኤይሳን ታ ኡፋይሳይ ኩመ ግዴስ’#ማዝ 16:8-11. ያግስ።
29“አሳዉ፥ ኑ አዋ ዳዊታባ ታ ህንተዉ ጌሻዳ ኦዳና። ዳዊቲ ሀይቅድ ሞገትስ፤ እያ ዱፎይ ሀች ጋካናዉ ኑ ማታን ደኤስ። 30ዳዊቲ ናበ ግድዳ ግሾ፥ ፆሳይ እያ ሼሻፐ እሱዋ እያ ካዎተ አራታ ቦላ ኡትሳናዉ እያዉ ጫቅዳ ጫቁዋ ኤሬስ።#ማዝ 132:11፤ 2 ሳሜ 7:12-13. 31ሄሳ ግሾ፥ ክርስቶሳ ደንዱዋ ስን ፄልድ፥ ‘እያ ሸምፖይ ስኦለን አትቤና፤ እያ አሳተይካ ዎቅቤና’ ግድ ኦድስ።
32“ፆሳይ፥ ሀ የሱሳ ሀይቆፐ ደንዳይሳስ ኑኒ ኡባይ ማርካ። 33ሄሳ ግሾ፥ ፆሳይ ባራ ሃራና መላ ባፐ ኡሻቻ ባጋራ እያ ቁ ቁ ኦድ፥ እያዉ እማና ጌተትዳ ጌሻ አያና ኤክድ፥ ሀይሳ ህንተ ሀእ በኤይሳነ ስኤይሳ ኑ ቦላ ጉስስ። 34-35ጋሶይካ፥ ዳዊቲ ባ ሁጰን ሳሎ ብቤና ሽን ያግስ።
“ጎዳይ፥ ታ ጎዳ፥ ‘ታኒ ነ ሞርከታ
ነ ቶሆይ የያሶ ኦና ጋካናዉ
ሀይሳን፥ ታፐ ኡሻቻ ባጋራ ኡታ’ ” ግስ።
ያግስ።#ማዝ 110:1.
36“ሄሳ ግሾ፥ ሀ ህንተ ማስቃለ ቦላ ካቅዳ የሱሳ፥ ፆሳይ ጎዳነ ክርስቶሳ ኦዳይሳ እስራኤለ አሳ ኡባይ ቱማ ኤሮ” ያግስ።
37አሳይ ጰፅሮስ ግዳይሳ ስእዳ ዎደ ባንታ ዎዛናን ቦሸትድ ጰፅሮሳነ ሀንኮ ሀዋረታኮ፥ “እሻቶ፥ ያትን ኑኒ አይ ኦኖ?” ያግዶሶና።
38ጰፅሮስ ኤንታኮ፥ “ህንተ ናጋራይ አቶ ጌተታና መላ ናጋራፐ ስሚድ፥ ህንተ እሶይ እሶይ የሱስ ክርስቶሳ ሱንን ፃማቀትተ። ፆሳይ እምያ ጌሻ አያና ህንተ ኤካና። 39ጋሶይካ ፆሳይ እማና ግዳ ኡፋይሳ ቃላይ ህንተዉ፥ ህንተ ናይታስነ ጎዳይ ኑ ፆሳይ ባኮ ፄግያ ሃሆን ደእያ ኡባሳ” ያግስ።
40ጰፅሮስ ኤንታዉ ሀራ ቃላካ ጉጅ ማርካትድ፥ “ሀ ዎድያ ጌላ አሳ ቦላ ያናዉ ደእያ ፕርዳፈ ህንተ ሁጵያ አሽተ” ያግድ ዞርስ። 41ጰፅሮስ ኦድዳይሳ ኤክዳይሳት ፃማቀትዶሶና። ሄ ጋላስ ሄ ሙኩሉ ግድያ አሳይ አማንዶሶና። 42ኤንቲ ሀዋረታ ትምርትያን፥ እስፈተን፥ ኡይ ሙሳንነ ዎሳን ምኖሶና።
43ሀዋረታ ኩሸን ዳሮ ኦራባይነ ማላት ኦሰትያ ግሾ አሳ ኡባይ ያይዶሶና። 44አማንዳ ኡባይ እስፈ ደኦሶና፤ ባንታዉ ደእያባ ኡባ እስፈ ሻከቶሶና።#ሀዋ 4:32-35. 45ኤንቲ ባንታዉ ደእያባ ባይዝድ ሚሽያ እሱዋስ እሱዋስ ኮሽዳ መላ ሻኮሶና። 46ኡባ ጋላስ እስ ዎዛናን ግድድ ፆሳ ኬን ሺቆሶና። ባንታ ኬን እሶይ እሱዋ ፄግድ ኡፋይሳንነ አሽከ ዎዛናን ካ ሞሶና። 47ፆሳ ጋላትሸ አሳ ኡባን ሳበትዶሶና። ጎዳይ አተይሳታ ጋላስ ጋላስ ኤንታ ቦላ ጉጄስ።
ที่ได้เลือกล่าสุด:
ሀዋረታ 2: GFBEVF
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
The Word for the World International and The Word for the World Ethiopia