متّای انجیل 6
6
صدقه هَدَئن
1«واخُوب ببین که، شیمه صالحیه مردومِ چیشمونِ جلو بجا نأرین، اینه واسه که شمره بَینَن. وگرنه شیمه پئرِ ورجه که آسمونِ میئن ایسأ، پاداشی ندَئنین.
2«پس وختی که صدقه هَدی، جار نزن، هوطو که ریاکارؤن، عبادتگاه أن و کوچهأنِ میئن کوئنَن تا مردوم اوشونای تعریف بکونَن. راست راستِ شمره گونم که، ایشون خوشؤنِ پاداشِ هَیتن. 3اما وختی تو صدقه هَدای، کاری بکون که، تی چپِ دست از اوچیزی که تی راستِ دست کؤئنه، واخُوبَ نبی، 4تا تی صدقه هیشکی نینی و تی پئر که هیچی اونه چیشمونای دخوته نیه، تَه پاداش هدئنه.»
دعا گودن
5وختی که دعا کوئنی، ریاکارؤنِ مورسؤن نَبوُ. چونکه اوشؤن دوست دئنن، عبادتگاه أنِ میئن و کوچهأنِ گوشه کنار بیسئن و دعا بکونَن تا مردوم اوشؤنه بینَن. راست راستِ شمره گونم، ایشون خوشؤنِ پاداشِ هَیتن. 6امّا تو وختی که دعا کوئنی، تی اتاق میئن بشو، درِ دَوَد و خلوتی، تی پئره ورجه که بدِه نبنه، دعا بکون. و تی پئر که دخوته چی أنِ دینه، تَه پاداش هدئنه.
7«دعا وقت، پوچ گبونِ تکرار نکونین، هیطو که بتپرستونِ قوم کؤئنن، چونکه خیال کؤئنن زیادی گوتن أمره، ایشؤنه دعا مستجاب بنه. 8ایشؤنه مورسون نبین، چونکه شیمه پئر پیشتر از اوکه اونای تقاضا بکونین، شیمه احتیاجونِ دؤئنه.
9«پس شمه ایطوری دعا بکونین:
«ای امه پئر که آسمؤن میئن ایسای،
تی ایسم مقدّس ببی.
10تی پادشاهی بائ.
تی اراده هیطو که آسمؤنِ میئن هنه،
زمینِ سَرم بومؤنی.
11امه روزیِ، امروز اَمره هَدی.
12و امه قرضؤنِ ببخش،
هوطو که أَمرَم امِه قرضدأرؤنِ بخشنیم.
13و اَمره امتحون میئن توندی،
بلکه شریرَ جی رهایی بدی.
چونکه پادشاهی و قوت و جلال، تا آخر تیشِه. آمین.
14چونکه اگه مردومِ تقصیرات ببخشین، شیمه آسمونی پئر هم شمره بخشنه. 15امّا اگه مردومِ تقصیراتِ نبخشین، شیمه پئرم شیمه تقصیراتِ نبخشنه.
روزه
16وختی که روزه گینین، ریاکارؤنِ مورسون شمره زال بأرده نیشون ندین، چونکه اوشؤن خوشؤنه قیافِه رنگ و روئه وگردنئنن تا مردومِ ورجه خوشؤنِ روزه دار نیشؤن بدِئن. راست راستِ شمره گونم که خوشؤنِ پاداشِ هیتَن. 17امّا وختی تو روزه گینی، تی سرِ روغن وسین و تی دیمه بوشُؤر 18تا تی روزه مردومِ بِه معلومَ نبی، بلکه تی پئر که پنهؤن ایسّه اونه بَینی، و تی پئر که همه چیه دینه تَه پاداش هدئنه.
آسمونی گنج
19زمینِ سر گنج جومَه نکونین، هوره که بید و مِئرونه زئنه و اونه ازبین بِئنه و هوره که دوزؤن زمین کبِئنن و دوؤزَی کوئنن. 20بلکه شیمه گنجِ آسمؤن میئن جومَه کونین، اوره که بید و مئرونه اونه از بین نبِئنه و دوزؤن زمین نکِبِئنن و دوزی نوکُوئنَن. 21چونکه تی گنج هر جا هنّه، تی دیلَم اوره هنّه.
22«چیشم، تن چراغِ. اگه تی چیشم سالم ببی، تمؤمِ تی تن، روشنایی جَی پورا بنه. 23امّا اگه تی چیشم فاسد ببی، تی تن، ظلماتَ جی پورا بنه. پس اگه روشنایی که تی میئن ایسَه، ظلمات ببی، چي پیله ظلماتي بنه!
24«هیشکس دو ته اربابِ خدمت گوده منه، چونکه یا یکتَه جی نفرت دئنه و اوته دوست دئنه، و یا ینفره مینه و اؤته کوشتای دوئنه. منئین شمه، هم خدا بنده ببین و هم پولِ بنده.»
نیگرون نبین
25«پس شمره گونم، شیمه زیندیگی نیگرون نبین که چی بخورین یا چی وودوشین، و نه نیگرؤنِ شیمه تن ببین که چی دکونین. مگه زیندیگی خوردناجی و تن رختاجی مهمتر نیه؟ 26آسمونِ پرنده‌أنِ نیگاه بکونین که نه کأرَنن و نه بیئنَن و نه کندوج میئن ذخیره کؤنن، اما هنده شیمه آسمؤنی پئر اوشونه روزیِ هدِئنه. مگه شمه اوشأنای با ارزشتر نیئن؟ 27شیمه میئن کیسه که بتؤنی نیگرؤنی اَمره یه ساعت خو عمرِ اضافه بکونی؟
28«و چرِء رخت بِه نیگرؤن ایسین؟ صحرا میئن سوسنؤنِ نیگاه بکونین که چوطو پیلّه بؤدرن نه زحمت کشنن و نه بافنن. 29اما هنده شمره گونم که حتّی سلیمؤن پادشام خوشِ تمومِ شکوه و جلالِ اَمره، ایی سوسنؤن قشنگی مورسون نبو. 30پس اگه خدا صحرا وَش که، ایمروز ایسأ و فرده تنوره میئن باگده بنه، ایجور پوشنِئنه، ای کم ایمؤنؤن مگه شمره بهتر نپوشنِئنه؟
31پس نیگرؤن نبین و نوگوین چی بوخوریم و یا چی وودوشیم و یا چی دکونیم. 32چونکه ایی دونیا قؤمون، ایجور چیزؤن دومبال ایسّن. امّا شیمه آسمؤنی پئر دؤئنه که هَمَهء ایشونِ احتیاج دَئنین. 33بلکه شمه اوّل خدا پادشاهی و اونه عیدالت دومبال ببین، بازین ایشونَم همه شمره هَده بنه. 34پس، فرده نیگرؤن نبین، چونکه فرده خو نیگرؤنیِ دئنه. امروزِ سختی أن، امروز بِه بسّه!
ที่ได้เลือกล่าสุด:
متّای انجیل 6: EGB
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
@ 2024 Korpu Company