انجیلِ لوقا 11
11
دعا یاد دایَن
1ای روز عیسی یقایی دَ دِعاش کَردَی. وختی چُو دِعا تموم ببه، ای نفر اَز اَ چو شاگردِ بومه و اَجو بِوا: «ای آقا، دِعا کردن اَجَما یاد بده همنه که یحیی اِشتن شاگردونِش یاد بِدا.» 2عیسی اجون بوا: «وختی دِعا کَرا بوایا:
”ای چَما په که آسمانَ دَ اسی،
اِشته نوم مقدّس بیبی،
اِشته پاتشاهی با،
3چَما روزانه نانِ هَر روز اَجَما آدِه.
4چَما گناهون بِبَخش،
چون اَما هَمه ی اَوَنی که اَجَما دِین دارِنده بَخشوم.
و اَجَما امتحان مَکه.»
5اُخُری اجون بوات: «هِمنَه بِزونو که ای نَفر اَ شَما رِفِقی بِداره، و او نصفه شو را چُو وَر با و بوا: ”ای رِفِق، سه نان اَمِن قَرض آده، 6چون ای نفر اَ چِمِن رِفِقون سَفَر دَ اومیاسه و چیزی نِدارم تا چو پیش بِنیم 7و اَ رِفِق کییه دِلَ جواو دی: ”اَمِن زَحمت مدَه. بَر قفلِه، و چمن خوردخَیل رختخواوَ دَ خُتِنده. نِتونم چِمن یقا دَ اوپاب ببیم و چیزی اَتَه آدیم.“ 8شَمارا وام بِزونو که حتی اَگم رفِاقت خونین اوپاب مَبی و اَجو نان مَدی، چُو سماجت خونین اوپاب بی و هر چِه که اَو گَوه اَجو آدی.
9«پس شَما را وام بگوا که آدایه بی؛ بِگردا که وینا، بره بُکوعا که بر شَما دیمَ آبی. 10چون هر که بگوه، بِدست آیره و هر که بگَرده؛ آلَوِ؛ و هر که بر بکوعه، بر چُو دیمَ آبی. 11شَما میون کومین په ای اِسه، که وختی چو زا چو کودَ مایی بگوه مایی عوض، اَجو ماری آدی؟ 12یا وختی چوکودَ مُرغونَه بگوه، اَجو گِراژدِمی آدی؟ 13پس با اَم که شَما بَدَ آدم اِسییو، زونو که چه طره چاکَه چیون شَما خوردِگون بدیا، چَندَه ویشتر شَما آسمانیه پِه، روح القدس، هر که چوکودَ ای چی بگَوِ اَجو آدی.»
عیسی و بَعَلزِبول
14عیسی ای دیوی که لال بِه ای نَفَر دَ اَبَرِش بِکه. وختی اَ دیو اَبَر بشه لالَه مَردَک لاوِش بِکَه و مردم تعجبشون بکَه. 15امّا بَعضیون بواتِندِ: «عیسی دیون بَعَلزبول کمکییَم که دیون رَییسه، اَبَر کَره.» 16بعضی چِمه خونَین که عیسی آزمایش بکَرنده، چو کودَ آسمانییَه نشانه ایی بگوسشون. 17اَمّا عیسی چون فِکرش بزونس و اَجونش بوات: «هر حکومتی که دِ دسته ای دِگنه، نابود بی، و هر خونوادَه ای که دِ دسته ای دِگنه، اَوی نابود بی. 18شَما وایو اَز بَعَلزبول کمکییَم دیون اَبَر کَرِم ولی اَگم شیطان اِشتن ضد دِ دسته ای دراینییه چو حکومت چه طَرَه دوام آیره؟ 19اَگم از بَعَلزِبول کمکییَم دیون اَبَر کَرم، شَما شاگرده، چه که کمکییَم اَجون اَبَر کَرنده؟ اگَم شَما شاگردون کودَ آپرسا، اَوُن شَماهون محکوم کَرنده. 20و اَگم از خدا قدرتییَم دیون اَبَر کَرم، یقین بِزونو که خدا پاتشاهی شَماهون آرَسه. 21وختی قُدرتمَند مَردکی اِشتن تمام سلاح هونییَم اِشتن کییَه ویراجون بیبی، چو اَموال در اَمان مونه. 22امّا وختی ای نفر چو دَ زورمندتَر اَجو حمله بکَره، اَجو شکست دی و سلاح هونی که چو پِشت چواَم گرم به، چو کودَ ایگیره و چو دارایی تاراج کَره. 23هر که چِمِن خمنا مبی، چمن ضِده، و هر که چمن خمنا جمع مکره پخش و پلا کَره.
24«وختی که پلید روح ای نَفَر دَ اَبَر شی. خشکُ بی آو و علف یقایی شی تا استراحت بکره. اما چون یقایی پیدا نِکَره اِشتنییَم وا: اَ کیه ای که بِرَ اومَیم، آگردم.“ 25امّا وختی اَ کییَه آرَسه و اَ کییَه یَزِگ زیه و تر و تمیز وینه، 26شی و هفت روح اِشتن دَ بدتر اِشتن خمنا آیره. همَّه ی اَ روحه چو دِلَ شینده و بِر ساکن بینده. اَ مردکه حال و روز اولَ بدتر بی.»
27وختی که عیسی ام لاوعونش واتَی ای زَنَکی جماعت دَلَ بِلنده صَصییَم بوا: «خوش به حال اَ زَنَکی که اَتِش زَنتِه و اَتِش شِت داعه.» 28اَمّا عیسی بوات: «نه، خُش به حال اَوی که خدا کلامه اَشنَونده و اَنجام دینده.»
یونس نشانه
29وَختی مردم عیسی دویر جمع ببنده، عیسی بِوا: «اَم نسل مردم چنده شرورنده، اَون نشونَه ای گَوَندِه اما هیچ نشونه ایی اجون ندییوم مگم یونس پیغمبره نشونَه. 30چون همنه که یونس، نینوا مردم را نشونه ایی به، انسانه زا، نی اَم نسله را نشونه ایی بی. 31داوری روزَ صَبا ملکه اَم نسل مَردُمییَم زنده بیی و مردمِ محکوم کره، چون اَو دِنیا اَ سَرَ بومه تا سلیمان پاتشاه حکمتِه بَشنَوه، و اَ کسی که بییا اسه، سلیمان پاتشاه دَ نی پیله تره. 32نینوا مردم داوَریه روز اَم نسل مردمییَم زنده بینده و چون ضد شهادَتی دینده، چون نینوا مردم یونس پیغام خونین توبِشون بِکه، و اَ کسی که بییا اِسِه یونس پیغمبر دَ نی پیله تره.»
جان چراو
33«هیچکس چراوِ اونِگیره تا اَجو قایم بِکَره یا اَجو قداره ای بِن بِنی، بلکم چراوِ چراودونه سر اونی تا هر که دِلَ بِشی چُو نوره بِوینِه. 34اِشته چشم اِشته بَدنه چراوِ. اَگم اشته چَشم سالم بِبی، اِشته تموم وجود روشُن بی. اَما اَگم اِشته چَشم سالم مَبی تموم اِشته وجود تاریک بی. 35پس ویراجون بِبه نوری که اشته وجودَ اسه، تاریکی مَبی. 36پس اَگم اِشته تموم وجود روشن بیبی و هیچ یقایی تاریک مبی، اِشته وجود هِمنَه روشَن بی کِه انگار چراوی اشتن نور اَته تاوونه.»
وای بر مذهبیه رهبرون
37وَختی عیسی اِشتن لاوِش تموم بکه، ای فریسیی فرقه علما اَوِش غذا خُردنِ را دعوت بِکه. پس عیسی بِشه اَ فریسی کیه و سِفره سَر بنشتشه. 38امّا اَ فَریسی وختی بوینتشه که عیسی اِشتن دَسون غذا خُردنه را نِشوردشه تعجبش بِکه. 39اُخُری عیسی خداوندِ اَ فریسیش بِوا: «شَما فریسی علما قَداره دویره بَرِه تمیز کرا، اَما شَما دِل بدی و طمعییَم پِرِ! 40ای نادانان، اَ کسی که بَرِش رچ کرده، دِلِش رچ نِکرده؟ 41پس از اَ چیونی که دارا صدَقه بدییا تا شَما ظاهر و باطن پاک ببی.»
42«وای بر شَما ای فَریسیان! شَما حکم ده یک آداینه حتی نعنوع و خالیواش و همه جورَه سبزی را انجام دیا، امّا خدا محبته و عدالته اهمیت ندیا. اَم چیونی اِسنده که شَما گَوَن انجام بدیا بی ام که علایده چیونَ دَ غِفلت بِکرا.» 43«وای بَر شَما ای فَریسیان! چون خُش دارا یهودیان عبادتگاهان سَرون ورَ بِنِشا و خُش دارا بازارَ دَ مردم شَما را سلام بکرنده. 44وای بر شَما! چون بی نوم و نشونه قبرون شارینیون که مردم نزوننده و چون سَرَ دَ مِجنِده.»
45ای شریعت قاضی عیسیش بوا: «استاد، تَه اشته ام لاوَعونییَم اَجَمار توهین کری.» 46عیسی بوا: «وای بر شَما ای شریعت قاضیان، شَما پِه سنگینه بارون مردم دوش سرَ اونییَه و اِشتن ای اَنگوشتَه اجو نزنه. 47وای بر شَما! چون که شَما اَ پیغمبرونی را مقبره رَچ کرا که، شَما په عون اجون کوشتنده، 48و هِمنَه شَما په عون کاره تایید کَرا. و چون سَرَ سَر پوش نییا چون اَون قتلِشون کَرده و شَما چون مقبرون رَچ کرا. 49چِمه خونَینِ که خدا حِکمت وا: ”از چون را پیغمبر و رسولون خِرسم. امّا بعضیون کوشنده و بعضیون اجون اذیت آزار کرنده.“ 50پس، اَ پیغبرون خون که دنیا اَوَلَ تا هارویین روز ایکیرده شونه، ام نسله گَردَنه، 51هابیل خون گَتِه تا زکریا خون که قربانگاه و معبده محرابه میون بِکوشتشونه. ها، شَما را وام که اَم نسل مردم همه چی را گَوَن حساب پس بدی.» 52وای بر شَما ای شریعت قاضیان! چون معرفت بَره آچاره رون اوگَتِه. اِشتن دله نِشا و نارزا هیچکه دِلَه بیشی.»
53وختی عیسی اَبَر بشه تورات معلمین و فَریسی فرقه علما چو اَم مخالفتشون بِکَه و اوِشون سوال پیچ بِکه تا اَجو تحریک بِکرنده، 54و فرصتی پَش گردِسَینده تا عیسی عه چو لاوَعونییَم تَله دِراینِنده.
ที่ได้เลือกล่าสุด:
انجیلِ لوقا 11: KTT
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
@ 2024 Korpu Company
