Luk Mben Ŋwuri Se Ŋwed Luk Abaŋade
Mben Ŋwuri Se Ŋwed Luk Abaŋade
Ewed Ŋwed Nken
Enye ekewedde ŋwed nken ikitiŋke enyiŋ ese. Uwak-uwak mme ada usuŋ ke otu mman se ekekenede Krais ke eched ekewed ke Luk ekede ewed ŋwed nken. Uwak mfufa ekpeb ikọ ŋwed Abasi enyiime sọ ke enye ekewedde ekede Luk. Luk ekede nkukwede ewed afufa ediomi emi ikidehe owom Yuu. Enye ekede abia usọbọ, anyaŋ amana enyine ukpeb mkpọ mfọn-mfọn ke ikọ Krik ma usuŋ edu uwem mmọ. Enye ekede ufan Pọọd asaŋa-utom Krais, anyaŋ asaŋa ma eme akaa usuk mme isaŋ ukwọọrọ ikọ ise. (Acts 16:10-17, Acts 20:5, 21:17). Luk ekewed ikọ ŋwed nken ke obio ukara Rum ke ufaŋ ini isua AD. 60 ma isua AD. 80.
Ntak Luk Ekewedde Ŋwed Nken
Luk ekewed ŋwed ese ọnọ owom ekekerede Tiofidọs. Ette eken ekede ata akpan owom keen ke otu mman ada ukara ke Rum. Luk ekeyem yak Tiofidọs ọdiọŋọ mbuk abaŋade Yisọs mfọn-mfọn. Enye ekeyem efri owom ke mfifien itie, kọrọ ma mman se ikidehe mman Yuu, yak mmọ ọdiọọŋọ nnehede-nnehede mbuk emi abaŋade enye Yisọs Krais ekedede. Enye ekeyem mmọ ọdiọŋọ se Yisọs ekekpebde amana anam. Ekeyaŋ eyem sọ mmọ ọdiọŋọ nte Yisọs ekedide inyaŋa efri mman se onumde eme ke akpanikọ.
Se Luk Ekewedde Abaŋa
Ke ŋwed nken, Luk atiŋ abaŋa se Yisọs ekedọhọde anyaŋ anamde man enye aŋwam anam aŋwaŋa mme owom nte Abasi anyaŋade mmọ osio ke idiọk mkpọ. Enye ewed abaŋa uwem Yisọs tooŋo ke idaha enye ekemanade tutu idaha enye ekemaanade akaa obio ubọọŋ Abasi. Enye ọnọ mbuk abaŋade emana Yọọn ọduọk mmuŋ ma Yisọs. Mme mbuk nken ọwuri ke Yisọs ede anyaŋa owom emi Abasi ekewuŋede idọŋ. Luk ewed sọ abaaŋa Yisọs nte eyen owom. Enye atiŋ nte Yisọs ekenwamde mman se ekedọŋọde ma mman se ekedede ubuene ma nte enye ekeyimede mman se mman owom ekechinde. Enye ọkọk udọŋọ mman owom, adahado ọnọ mmọ ke idiọk mkpọ mmọ, anyaŋ ọdọhọ mmọ abaŋa obio ubọọŋ Abasi.
Uwak mkpọ ke ŋwed nken abaŋa utom ma ukpeb mkpọ Yisọs ke Ikpehe obio ukara Kadidii. Luk amana ewed abaaŋa se Yisọs ekenamde ma se enye ekedọhọde ke idaha enye eketode Ikpehe obio ukara Kadidii akaa isaŋ ke obio Yedusedem. Yisọs ọdọhọ mme mbed nse ke ana eme ibọ ufen inyaŋ ikpa man eme inyaŋa mman owom isio ke idiọk mkpọ mmọ. Ndien Abasi eminanam eme ised ke mkpa. Yisọs amana ọdọhọ mmọ ke eme ised ke mkpa, eme imififiak idinam obio ubọọŋ ise ọchọŋọ adaa. Luk ewed abaŋa se eketibede kini Yisọs ekesimde obio Yedusedem. Nte Yisọs ima ikidọdọhọ, keen ke otu mbed nse atab eme ọnọ mkpa. Mme oku mman Yuu ma mme ada ukara ete ke enye odod mkpa, mmọ eben eme ọsọk ukara Rum, mmọ owod eme. Ke anam usen ita ke Yisọs ima ikpakpa, Abasi anam enye esed ke mkpa, Yisọs ọwọrọ ọwuri uwak mman owom idem anyaŋ anam mmọ ọdiọŋọ ke eme idu uwem, nkọ Abasi eben eme akaa obio ubọọŋ ise.
Ede Saŋa-saŋa Ke Enye Ndinọ Nnyin Nnehede-nnehede Usen Ọfiọŋ Totooŋo Ke Ntooŋo Ukwọrọ Ikọ Yọọn Ọduọk Mmuŋ. Enye Anam Emi Man Enye Anam Enye Asaŋa Ma Ini Ukara Mbọọŋ Rum.
Luk ekeyem isio ọkpọsọŋ usem ma ikọ mman Ibru mfeb ke ŋwed nse. Enye ekekama «Ette-ufọk» ma «Ekpeb mkpọ» utuke «Rabbi.» Enye ekekood Luk ekpe ikpe utuke «Ekpeb ibed» Enye ese ama ibe ke Yisọs ebe «ke akpanikọ.» Utuke «Emen.» Enye okood mkpọdiọhọ mmuŋ, utuke enye ndikood inyaŋ Kadidii. Emi idehe mkpọ mkpaidem sia Luk ekede owom Krik enye anyaŋ ewed ŋwed nse ọnọ owom emi enyinede enyiŋ Krik. Luk ese ama itiŋ ikọ mbaaŋa mman se mmọ osiode ke otu. Matio atiŋ ikọ abaaŋa mme nta ifiọk edide iche Yisọs ke uyen ise, ede Luk enehede atiŋ ikọ abaŋa nte mman ekpeme edọŋ ekedide. Luk edibede ọwuri mman ubọ taksi nte Sakiọs ke ibuod 19:2-8. Difai ke ibuod 5:27-29. Enye atiŋ sọ mbuk abaŋa owom Farisi ma owom ọbọ taksi ke ibuod 18:10-13.
Luk atiŋ ikọ abaŋa mman Samedia ke mbuk eti owom Samedia ke ibuod 10:33-42 ma sọ owom akpamfia ndo ekedide edikọm Yisọs emi ekedede owom Samedia ke ibuod 17:16.
Luk atiŋ ikọ abaŋa utom Yisọs ke abaŋade mman ubuene, ada mbuk enyine mkpọ owom ma ubuene ekekerede Dasọdọs ke ibuod 16:20 31. Enye atiŋ ikọ abaŋa item Yisọs, ekebede mfo isin usọrọ, ikood mman ubuene, mbuŋọ, nnan ke ibuod 14:13. Anyaŋ amana ọdọhọ nnyin ke Yisọs ekebọ uyede adan mman enye ọkwọrọ etietop ọnọ mman ubuene, ọkwọrọ ubọhọ ọnọ mman se esinede ke ukad, amana anam anyin atada mman nnan, anyaŋ anam owom ukuud ọbọhọ ke ibuod 4:18.
Luk enehede atiŋ ke etimbuk Yisọs ana ọnọ efri owom, kọrọ ma mman Yentais ma mman Yuu, mme anam idiọk mkpọ ma mman edinen owom, mman ubuene, ma mman enyine mkpọ. Awak mme mbuk ke ŋwed Luk ọwuride mme mkpọ nken. Uwak mbuk nken odu ke ŋwed Luk ọkpọọŋ, iduhe ke mme ŋwed idiken. Emi ede usuk mme uwud mkpọ. Mma ndo ekeduọkde adan ke ikpad Yisọs.
Luk 7:36-50, Eti owom Samedia 10:30-37, Eyen Deen ido ekechopde (Mbuk idiọk udọ) 15:11-32, Mbuk owom inyine ma owom ubuene 16:19-31 Sakiọs owom ọbọ taksi 18:9-14.
Mme Ibuod Ikọ Ŋwed Luk
1:1-4 Luk atiŋ ke ŋwed nken abaŋa Yisọs.
1:5—4:13 Abasi ọdọŋ Yisọs man anyaŋa mman owom.
4:14—9:50 Yisọs ọkwọrọ ikọ ke Kadidii.
9:51—19:27 Yisọs ọkwọrọ ikọ ke usuŋ enye akade obio Yedusedem.
19:28—21:38 Yisọs ọkwọrọ ikọ ke Yedusedem.
22:1—23:56 Yisọs akpa.
24:1-53 Yisọs esed ke mkpa.
ที่ได้เลือกล่าสุด:
Luk Mben Ŋwuri Se Ŋwed Luk Abaŋade: ITM
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Itu Mbon Uzo Bible by Beyond Translation is licensed under Creative Commons Attribution-ShareAlike 4.0 License.