LUKAS 22
22
Peseket ke lematai Yesus
(Un te neng Matius 26.1-5; Markus 14.1-2; Yaya 11.45-53)
1Dalau ina lepa nyeng ne tegoʹ pemung uman Ruti iaʹ abeʹ un Lamut, ina Adet Menting Patai, nadan ne Paska. 2Diaʹ detaʹu lataʹ ngan diaʹ guru Adet Yahudi mita ukan kumpin aken nte ke lematai Yesus. Miat tekaʹ de ten ke mita janan, moʹ de takut dulu diaʹ kadoʹ dina.
Yudas ngahaʹ ke mencai Yesus
(Un te neng Matius 26.14-16; Markus 14.10-11)
3Kenai Sitan, iaʹ tuʹa bali, nelasek Yudas iaʹ ipa ngadan ne Iskariut, ina ca mida diaʹ puloʹ dua usa didai are. 4Sulo ketai Yudas palaʹ diaʹ detaʹu lataʹ ngan diaʹ lataʹ jagaʹ Umaʹ Palan, peseket neng puyan ne ke naʹ Yesus mida. 5Saheʹ laleʹ le ida, mentung nte petuket ke naʹ ligit mia. 6Ngahaʹ ne Yudas, penco ho mita ca awang iaʹ tiga, ukoʹ o ke naʹ Yesus mida neng puyan iaʹ suhuk.
Yesus peteneng Bunut Adet Paska
(Un te neng Matius 26.17-25; Markus 14.12-21; Yaya 13.21-30)
7Kudaʹ tau ʹo dulu pemung uman Ruti iaʹ abeʹ un Lamut ina, ketai ie ke abeʹ neng tau re ke lematai anak dumba neng adet bioʹ Paska ina. 8Kun Yesus cuk Peterus ngan Yaya, un dau ue: “Tai ne ikem dua, petenup penguman Paska le, ukoʹ le pemung uman ʹo.”
9Un dau re dua mia: “Kempi Tuhan ubaʹ ameʹ ketai petenup penguman Paska le ina?”
10Un dau Yesus: “Buk kem tai kedalem lepoʹ ina ʹo, un ca laki iaʹ ngkin tajau sungai. Ngan ne ikem dua ke petegoʹ, sulo tai hem dua bayaʹ ia kedalem amin iaʹ ukoʹ ketai ie. 11Un dau hem neng laki iaʹ un amin ina: ‘Ban Guru cuk ameʹ lemutu ikoʹ: Kempi amin ukoʹ o ke pemung uman Paska ngan diaʹ bayaʹ katuk ke ʹo?’ 12Ia ke badaʹ mikem ca amin iaʹ bioʹ, tahaʹ mpau te, ngan dengkep seʹ e kuʹun gelam iaʹ tiga. Kina hem ke petenup pe ʹo.”
13Penco tai re, ngan lan lete ida taʹan koʹ baʹan iaʹ Yesus lepa badaʹ mida. Kun nte petenup peguman Paska re kina.
Bunut Tuhan
(Un te neng Matius 26.26-30; Markus 14.22-26; 1 Kurintus 11.23-25)
14Ketai abeʹ de ke uman, tai kun Yesus pemung madung ngan diaʹ lawa ha. 15Un dau Yesus neng ida: “Keloʹ laleʹ tekaʹ keʹ ke pemung uman neng adet Paska ini ngan ncem kena heʹ ke sihoʹ tuyen. 16Dau heʹ mikem, abeʹ keʹ ke uman ini laʹa pa abeʹ ketai adet Paska ke palup lan kedalem puyan pengaren Allah.”
17Sulo Yesus alaʹ sawan telang anggur ina, penco ho nyuaʹ tiga saheʹ palaʹ Allah. Un dau ue laʹa: “Tiga hem alaʹ ini. Petulat ne mikem mung. 18Lan dau heʹ mikem, cen naʹkini abeʹ keʹ ke nisep telang anggur ini laʹa pa ke kenai puyan pengaren Allah ʹo.”
19Kun Yesus alaʹ ca luʹung ruti, penco ho nyuaʹ tiga saheʹ palaʹ Allah, kun ne pepiding pepiding nge, mentung nge naʹ a mida. Un dau ue: “Ini ne usa heʹ, ca pengencai moʹ suaʹ ikem. Ikem uyan koʹ baʹan ini are, man ncem ke nawai akeʹ ʹo.” 20Pekina lete seʹ e naʹ mida sawan telang anggur laʹa, tai ke lepa re uman. Un dau ue: “Sawan ini ne tuket mading iaʹ Allah nyalet man dahaʹ keʹ, iaʹ ke musa moʹ suaʹ ikem.
21“Un sepuʹo, ikem naʹat, un te laki iaʹ ke nyelem tai pebeli akeʹ pemung bijaʹ ngan nceʹ kini. 22Moʹ akeʹ iaʹ Anak Sio ini ke matai bayaʹ tengangan tuket ceʹ kuʹun Allah. Un sepuʹo, siʹau pe laki iaʹ tai nyelem pebeli akeʹ ne.”
23Ina tading nte lemutu ida semaheʹ: “Aheʹ neng ahang ilu iaʹ ban pekimet uyan pekina tupe?”
Dau re paseʹ aheʹ iaʹ pengebioʹ de
24Tai maho dau re paseʹ neng ahang ida diaʹ bayaʹ katuk Yesus, aheʹ iaʹ tekep ke bioʹ mida. 25Un dau Yesus neng ida: “Diaʹ paren kusun tanaʹ ini un penyukat ke pisiu lepoʹ de. Ngan aheʹ iaʹ ngkang lepoʹ, dulu ke pisiu ida Peniga re. 26Un sepuʹo ayen ncem pekina puyan, di lareʹ iaʹ bioʹ neng ahang ikem tekep pe tai koʹ baʹan diaʹ iʹut, ngan un diaʹ ke tuʹa hem tekep pe tai koʹ baʹan diaʹ ke pubo are. 27Aheʹ iaʹ lapa bioʹ: diaʹ bang madung uman, buk ke are diaʹ pubo? Moʹ sematu ue iaʹ madung uman lete iaʹ bioʹ. Un sepuʹo akeʹ ini ne iaʹ un neng ahang ikem koʹ baʹan ca diaʹ pubo are.
28“Ngan ikem ne iaʹ lemuto petugung ngan nceʹ ceng dadoʹ pengeten neng akeʹ are. 29Koʹ baʹan Amai heʹ lepa naʹ puyan pengaren makeʹ, pekina te akeʹ ke petuket te mikem, 30apan ncem ke uman ngan nisep ca le bijaʹ ngan nceʹ kedalem puyan pengaren nceʹ. Ngan kina hem ke madung neng adan pengaren, ke pebetep ukum neng diaʹ puloʹ dua lepoʹ Israil ʹo.”
Peterus ke nyepati Yesus
(Un te neng Matius 26.31-35; Markus 14.27-31; Yaya 13.36-38)
31Un dau Yesus: “Simun, Simun, ngeringa dau heʹ. Tuhan Allah iaʹ dayo Sitan ke ten ikem mung, koʹ baʹan ca kelunan ke napan baha apan ulek ke ketai pesau. 32Un sepe lepa ne akeʹ lemameʹ mikoʹ Simun, apan pengelan ncoʹ are tai supeʹ. Tegoʹ koʹ ngeliwet nai palaʹ akeʹ pelaʹa, tekep koʹ petangen diaʹ cenganak koʹ ʹo.”
33Un dau Peterus neng ia: “Iaʹ lan Tuhan, akeʹ iaʹ tenup tekaʹ ke pampin ngan ncoʹ, naʹ pe ke sihoʹ sepin, naʹ pe matai, ahaʹ pe baʹan nceʹ.”
34Un dau Yesus mipa ia: “Peterus, abeʹ lepe iap nekuʹuk tau ini, lepa telu liwai ne ikoʹ ke badaʹ abeʹ koʹ tisen akeʹ.”
Bahan, belanyat ngan bahing
35Un dau Yesus neng ida laʹa: “Dalau heʹ cuk ikem tai masat are, abeʹ keʹ cuk ikem ngkin bahan ncem, pekina pe belanyat cem, pekina pe sepatu hem. Kumpin, un tai hem tepa neng inu dalau idai are?”
Un dau re: “Naʹun.”
36Penco dau Yesus neng ida: “Naʹkini aheʹ iaʹ un bahan, buk are belanyat pe, ngkin ne. Buk aheʹ iaʹ are un bahing, tiga ha pebeli sapai ie man ne lemeli bahing. 37Lan dau heʹ mikem, atek ketai lete palup tiraʹ Kitap iaʹ pekini dau: ‘Ida ke naʹ ia pemung ngan kelunan diaʹ pepuk kuʹun penyalaʹ.’ Moʹ mung inu iaʹ pegawa Tuhan lepa nyurat neng puyan cen naʹaʹ, ketai ie nuyan lete ini.”
38Un dau re: “Ahaʹ Tuhan, naʹat ne, ini dua re bahing kini.”
Sulo dau Yesus neng ida: “Pa ina ne.”
Yesus lemaleʹ kaʹ Mudung Ampang
(Un te neng Matius 26.36-46; Markus 14.32-42)
39Tai kun Yesus pemung ngan diaʹ bayaʹ katuk ke, tai kaʹ Mudung Ampang koʹ baʹan kelayan ne. 40Lepa re abeʹ kukoʹ de kina, un dau Yesus neng ida: “Lemameʹ ne, nyat apan ncem are ketai supeʹ dalau pengeten.”
41Uʹo ina tai kun Yesus ngerada ida kediʹut de, kihoʹ kihoʹ koʹ baʹan coʹ lemulo ca batu are. Kun ne sutlep ngan lemameʹ. 42Un dau ue: “Amai, buk ke sihoʹ neng pengubaʹ koʹ, ngecoʹ ne sawan penuyen iaʹ sangan kuʹun penyalaʹ kelunan ini neng akeʹ. Neng puyan ini, abeʹ e pengubaʹ keʹ, bang bayaʹ pengubaʹ koʹ tengen iaʹ ketai nuyan.” 43Kenai ca melikat cen surga luhaʹ kata ia, naʹ pengali mia. 44Tai pali kuʹo ke Yesus lemameʹ dalem penuyen ne, pa nidoʹ sana ha koʹ baʹan seʹ dahaʹ nite kaʹ tanaʹ.
45Nai ie beteʹ cen ukoʹ o lemameʹ, sulo tai ie palaʹ diaʹ bayaʹ katuk ke are, dalau seʹ de luntoʹ, moʹ re lumai kuʹun tekaʹ kelesau tawai re neng ia. 46Un dau ue neng ida: “Moʹ inu hem luntoʹ tupe? Taga ngan lemameʹ ne, idi hem are tai supeʹ dalau pengeten.”
Nai dulu dakep Yesus
(Un te neng Matius 26.47-56; Markus 14.43-50; Yaya 18.3-11)
47Dalau Yesus pisiu pekina, idi kenai ca mpun kelunan abeʹ kina. Yudas iaʹ nai ngkin ida, ia ca usa cen diaʹ pulo dua usa diaʹ bayaʹ katuk Yesus are. Penco kenai Yudas ngenyeng Yesus, kun ne maʹoʹ ia. 48Un dau Yesus neng ia: “Moʹ inu ne Yudas? Adeʹ man ca paʹoʹ le ikoʹ ke mencai Anak Sio ini?”
49Dalau diaʹ bayaʹ katuk Yesus diaʹ nyeng kata ia taʹan seʹ puyan ina, un dau re: “Ahaʹ Tuhan, ameʹ ke ti re man bahing meʹ dini?” 50Un ca mida iaʹ meta ulaʹ laki Pengebioʹ Detaʹu, lajap telinga ha tahaʹ taʹu.
51Un dau Yesus neng ida: “Ayen pekina.” Penco ho mekem telinga ha ngeliwet, sulo malit.
52Un dau Yesus neng diaʹ detaʹu lataʹ dina, ngan diaʹ lataʹ jagaʹ Umaʹ Palan Allah, ngan diaʹ pengencam lepoʹ diaʹ nai alaʹ ia. Un dau ue neng ida: “Moʹ adeʹ kem nai ngkin bahing ngan petung koʹ baʹan seʹ neng ca usa iaʹ ban ngebareng lepoʹ are neng akeʹ. 53Singket tau ne akeʹ pemung ngan ncem kaʹ Umaʹ Palan Allah. Abeʹ pe ikem nai dakep akeʹ dalau ina. Un sepuʹo ketai sihoʹ tulat cem ngan penyukat ntem ne dalau ini.”
Peterus nyepati Yesus
(Un te neng Matius 26.57-58, 69-75; Markus 14.53-54, 66-72; Yaya 18.12-18, 25-27)
54Kun nte dakep Yesus, penco tai re ngkin ia kaʹ amin laki Pengebioʹ Detaʹu. Ngan tai kun Peterus bayaʹ ia cen coʹ. 55Lepa ne dulu put luten neng beluaʹ lasan kaʹ juma amin ina. Penco kenai Peterus pemung madung neng ahang dulu diaʹ mentu kina. 56Un ca dekiʹit leto, ca ulaʹ neng amin ina. Dalau ue taʹan seʹ Peterus madung neng dema luten kina, kun ne nekeneng naʹat ia, sulo dau ue: “Laki ini ca diaʹ pemung ngan Yesus.”
57Un sepuʹo dau Peterus nyakat leto ina: “Abeʹ keʹ tisen aheʹ e.”
58Abeʹ lepe majan uʹo ina, nai kun ca laki taʹan Peterus, penco dau ue: “Ikoʹ ca diaʹ ngan Yesus ko?”
Un dau Peterus: “Abeʹ e akeʹ.”
59Kihoʹ ketai ca jam uʹo ina, un ca laki laʹa iaʹ teto dau neng Peterus: “Atek lan ne laki ini ca diaʹ pemung ngan Yesus are, moʹ nco pe ia ca lepoʹ Galilia.”
60Un dau Peterus: “Abeʹ keʹ tisen inu iaʹ baʹan ncoʹ ini.”
Dalau ue pisiu ina lete iap nekuʹuk. 61Kun Yesus nyileʹ naʹat Peterus. Penco Peterus petawai dau tiraʹ Yesus iaʹ lepa ia badaʹ mia idai are: “Ban kena iap ke nekuʹuk tau ini, lepa telu liwai ne ikoʹ ke badaʹ abeʹ koʹ tisen akeʹ.” 62Penco tai Peterus kawang ngan nange sereken-ken dau.
Ngelunyeʹ ngan lemeta Yesus
(Un te neng Matius 26.67-68; Markus 14.65)
63Mung nte diaʹ mengau Yesus dina ngelunyeʹ ngan lemeta ia. 64Kun nte mekep apeʹ neng silung Yesus, pa pekep mata ha. Kun nte lemutu ia: “Badaʹ ne, aheʹ iaʹ lemeta ikoʹ ini?” 65Ngan kadoʹ naʹan tiraʹ de iaʹ pejaʹat dau neng ia.
Yesus nyeripa Mpun diaʹ Lataʹ
(Un te neng Matius 26.59-66; Markus 14.55-64; Yaya 18.19-24)
66Dalau kenai dema, pempun ne diaʹ lataʹ lepoʹ Yahudi kina, peging diaʹ detaʹu lataʹ ngan diaʹ guru Adet Yahudi. Penco re ngkin Yesus tai nyeripa Mpun diaʹ Lataʹ. 67Un dau re: “Buk lan ncoʹ Keristus iaʹ ngkang pungu udip, badaʹ ne mameʹ.”
Un dau Yesus neng ida: “Buk keʹ ke badaʹ a, abeʹ pe ikem ke ngelan ne. 68Buk keʹ ke lemutu ca inu neng ikem, abeʹ pe ikem ke mipa ha puʹo. 69Cen naʹkini, un Anak Sio ini ke adung tahaʹ taʹu Tuhan Allah iaʹ atek bioʹ penyukat.”
70Un dau re mung: “Buk ke pekina, Anak Allah hoʹ tupe?”
Un dau Yesus neng ida: “Koʹ baʹan dau hem ne are, akeʹ lete ia.”
71Un dau re: “Inu titin le ke mengin dulu ke petugen ne laʹa, moʹ ilu tengen ne lepa kenahan dau leka isiu ue.”
ที่ได้เลือกล่าสุด:
LUKAS 22: KNT
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Kenyah New Testament © Bible Society of Malaysia, 1984.