Muthuvan NLCI; Non-Drama (NT)

Muthuvan NLCI; Drama (NT)

ഏശു പന്തറണ്ട് ശിശിയൻമാരയം കിട്ട വിളിച്ച് അവ്ങ്ങ്ക്ക് പൂതങ്ങള പൊറത്താക്ക്‌വാനിക്കും ഒക്ക ചീക്ക്കളയം കെട്തികളയും മാറ്റ്‌വാനിക്കും ഒള്ള അതികാരം കൊടത്താര്. ഏശുവ്ന്റ പന്തറണ്ട് അപ്പൊശ്തലൻമാര പേരാണും ഇത്: ആത്തീത്തീവൻ പത്ത്റോശ് ഇന്റ് വിളിക്കിന്റ ശിമോൻ, അവന്റ കൂടപ്പൊറപ്പാഞ്ഞ അന്തറയോശ്, ശെവതീന്റ കയ്യൻ ശാക്കോവ്, അവന്റ കൂടപ്പൊറപ്പാഞ്ഞ ഓകന്നാൻ, പിലിപ്പോശ്, വെർത്തൊലൊമായി, തോമശ്, ഉറവായ് തെറട്ട്കാറനാഞ്ഞ മത്തായ്, അല്‌പ്പായിന്റ കയ്യനാഞ്ഞ ശാക്കോവ്, തത്തായ്, ശൊന്തം ചാതിക്കി വേണ്ടി എന്തനക്കം ഒര്ക്കമൊള്ള ശിമോൻ, ഇവനാണും ഒറ്റ്കാറനാഞ്ഞ ശൂതാ ഇശ്കരിയോത്താവ്.


ഏശു ഇയ്യ പന്തറണ്ട് ആള്ക്കും അതികാരം കൊട്ത്ത് പേശിവിട്ടപ്പൻ അവങ്ങളോട പേശീത് എന്തനിന്റെ, “നിങ്ങ എകൂതൻമാരില്ലാത്താള്കള താവ്കളിലോ ശമരിയക്കാറ പട്ടണങ്ങളിലോ പോകേറ്; അത്ക്ക് പകരം ഇശറയേല് ആള്കളീല് കാണാണ്ടി പിയ്യ ആട്കളാട്ടക്കി തിന്ന നിങ്ങ പോണം. നിങ്ങ പിയ്യ് മേലോകം എത്ത്‌വാനിക്കാഞ്ഞ്ത് ഇന്റ് പേശത്തം, ചീക്ക്കാറ്ക്ക് ശൊകം കൊടക്കത്തം, വീന്നാള്കള്ക്ക് ഉശ്റ് കൊടക്കത്തം, വെള്ളപിടിച്ച ചീക്ക്കാറ ശുത്തിയാക്കത്തം, പൂതത്ത്ന എറക്കിവിടത്തം ചെയ്യൻ; നിങ്ങ്ക്ക് വെറ്തെ കിട്ടീതൊക്ക നിങ്ങയും വെറ്തെ കൊടക്കണം. നിങ്ങള ഉറവായ്‌പ്പെയ്യീല് തങ്കമോ വെള്ളിയോ ചെമ്പ് തുട്ടോ എട്ക്കേറ്. നിങ്ങ പോവിനിക്കി തോള്പ്പെയ്യോ റണ്ട് ചട്ടയോ ചെറ്‌പ്പോ തെടിക്കോലോ എട്ക്കേറ്; എന്തനിന്റെ വേലയെടക്കന്റവന്ക്ക് ശാപ്പാട് കിട്ടണമില്ലോ.”
“നിങ്ങ ഏതിങ്കിലും പട്ടണത്തിലോ കുടിയിലോ പിയ്യെ നിങ്ങള കെയ്യേപ്പാനിക്കി മനശൊള്ള ഒരത്തന്റ വീട് കണ്ട് പിടിക്കണം; ആ താവീനെന്റ് പോന്റവെരയം ആ വീട്ടീല് തിന്ന കെടക്കണം. നിങ്ങ ഏതിങ്കിലും വീട്ടീല് പിയ്യ് ഏറിയേ ആത്തിയം തിന്ന ഈ വീട്ട്ക്ക് നിമ്മ്തി ഒണ്ടാകട്ടെ” ഇന്റ് പേശണം. ആ വീട്ടീലൊള്ളാള്കള് നിങ്ങള കെയ്യേറ്റേ നിങ്ങ പേശിയ നിമ്മ്തി അവ്ങ്ങ്ക്ക് കിട്ടട്ടെ; ഇല്ല ഇന്റെ അത് നിങ്ങളാട്ടക്കി തിന്ന തില്‌മ്പി വെര്ട്ട്. നിങ്ങ നിമ്മ്തി പേശ്വ്നിക്കി ഏവനീലും കെയ്യേക്കാണ്ടി ഇര്ക്കത്തോ നിങ്ങ പേശന്റത് കേക്കാണ്ടി ഇര്ക്കത്തോ ചെയ്ഞ്ഞെ നിങ്ങ ആ വീടോ പട്ടണമോ വിട്ട്പോവിനിക്കി നിങ്ങള കാലീല പൊടി ഉര്ഞ്ചിയിടണം. തെയ്‌വം കുറ്റം വിതിക്കിന്റ നാളക്കി ശോതോമ് കോമോറ ഇന്റ് പേശന്റ പട്ടണങ്ങള്ക്ക് കിട്ടന്റതീക്കായും വെലീയ ശിച്ച ആ പട്ടണത്ത്ക്ക് കിട്ടും ഇന്റ് നാന് ശത്തിയമായിട്ടും നിങ്ങളോട പേശന്റൻ.


കേളൻ, ചെന്നായ്‌ക്കള നെട്വ്ക്ക് ആട്ട്നപ്പേല നാന് നിങ്ങ്ക്ക് എന്റ അതികാരം തന്ത് വിടന്റൻ. അത്കൊണ്ട് നിങ്ങ പാമ്പ്നപ്പേല പുത്തിയൊള്ള ആള്കളും പ്റാവ്നപ്പേല മനശീല് കള്ളമില്ലാത്താള്കളും ആകണം. ആള്കള പാക്കണം; അവങ്ങ നിങ്ങള പിടിച്ച്കെട്ടി എകൂതൻമാര കൂട്ടത്തീല് നായംനടത്തന്റ ആള്കളാട്ട് ഏപ്പിക്കത്തം എകൂതപള്ളിയില് നിങ്ങള ചാട്ടവാറ് ഇട്ട് അടിക്കിത്തം ചെയ്വ്റ്. എന്നശെല്ലി അവങ്ങ നിങ്ങള മൂപ്പൻമാരയം രാശാക്കൻമാരയം മൊകത്ത് എട്ത്ത് പോവ്റ്; അത് അവ്ങ്ങ്ക്കും എകൂതൻമാരില്ലാത്താള്കള്ക്കും ഒര ശാശിയാകും. അവങ്ങ നിങ്ങള അതികാരികള ഏപ്പിപ്പിനിക്കി എന്തൻ പേശണമിന്റും ഏണ പേശണമിന്റും നെനച്ച് നിങ്ങ പുത്തിമുട്ടേറ്; പേശ്‌വാനൊള്ളത് തക്ക ശമയത്ത് തെയ്‌വം നിങ്ങ്ക്ക് തെരും. എന്തനിന്റെ അത് നിങ്ങയില്ല നിങ്ങള അപ്പനാഞ്ഞ തെയ്‌വത്ത്ന്റ ഉശ്റാണും നിങ്ങളച്ചിട്ട് പിര്പ്പ്ത്തിയിട്‌വിപ്പാട്ടത്.
“കൂടപ്പൊറപ്പ് കൂടപ്പൊറപ്പ്നയും അപ്പൻ കയ്യനയം കൊല്ല്‌വാനിക്കി ഏപ്പിച്ച് കൊട്പ്പ്റ്; കുഞ്ച്‌ല് അപ്പനമ്മമാര്ക്ക് എത്റാഞ്ഞ് നെന്റ് അവങ്ങള കൊല്ല്‌വാനിക്കി ഏപ്പിച്ച് കൊട്പ്പ്റ്. എന്നശെല്ലി പൂരാള്കളും നിങ്ങള വെറ്പ്പ്റ്; ഇന്റെ ഒട്ക്കും വെരയം പൊറ്പ്പോട നെക്കന്റാള്കള് രെച്ചപെട്‌വ്റ്. ഒര താവീല് നിങ്ങള ചിക്കയെട്പ്പിനിക്കി നിങ്ങ വേറ ഒര താവ്ക്ക് ഓടി പോണം. മന്ശ്‌നാഞ്ഞ് വന്ത കയ്യൻ വെന്റത്ക്ക് മുന്തി നിങ്ങ ഇശറയേല് പട്ടണത്തീല് പൂര വേലയെട്ത്ത് തീറ്ക്ക്ത്ത്ല ഇന്റ് നാന് ശത്തിയമായിട്ടും നിങ്ങളോട പേശന്റൻ. ഒര ശിശിയനും അവന്റ വാത്തിയാരക്കായും വെലീവനില്ല; ഒര വേലക്കാറനം അവന്റ ഏമാനിക്കായും വെലീവനും ഇല്ല; ശിശിയൻ വാത്തിയാരപ്പേല ആഞ്ഞെ മതി; വേലക്കാറൻ ഏമാനപ്പേല ആഞ്ഞെ മതി. വീട്ട്കാറന വെയെശെവൂല് ഇന്റ് വിളിക്കന്റതിന്റെ വീട്ടീലൊള്ള ആള്കള അതീക്കായും കെട്ട പേര്കള് ഇട്ട് വിളിപ്പ്റ്.


അത്കൊണ്ട് നിങ്ങ ആള്കള പേടിക്കേറ്ത്; ഇപ്പൻ മൂട്ടി വെച്ചിരക്കന്റതൊക്ക വെളിപ്പട്ട് വെരും ഇപ്പൻ ഒളിച്ച് വെച്ചിരക്കന്റതൊക്ക ഒക്കളക്കും തിക്കൊണ്ടാകത്തം ചെയ്യും. നാന് ഇറ്ട്ടീല് നിങ്ങളോട പേശീത് വെട്ടത്തീല് പേശൻ; മുറിയില് വെച്ച് കാതീല് പേശീത് വീട്ട് മിറ്റത്ത് വെളിയില് ഒക്കളം കേക്ക വിളിച്ച് പേശൻ. നിങ്ങള തേകത്ത്ന കൊല്ലത്തം ഇന്റെ ഉശ്റ്ന കൊല്ല്‌വാനിക്കി പെറ്റാത്തത്‌മാഞ്ഞ ആള്കള പേടിക്കേറ്; ഇന്റെ നിങ്ങള ഉശ്റ്നിയം തേകത്ത്നയം നരകത്തിലിട്ട് കൊല്ല്‌വാനിക്കി പെറ്റന്റവന നിങ്ങ പേടിക്കണം. ഒര ചെമ്പ്തുട്ട്ക്ക് റണ്ട് കുര്‌ല്ന വിക്ക്‌ലിയാ? ഇന്റെ നിങ്ങള അപ്പനാഞ്ഞ തെയ്‌വത്ത്ക്ക് തിക്ക്‌ലാണ്ടി അതീല ഒന്റ് പോലും കിള്ളാൻ വിയ്യ്ത്ത്‌ല. നിങ്ങള തലയില തലനാര് പോലും എത്തറയൊണ്ടിന്റ് തെയ്‌വത്ത്ക്ക് തിക്കൊണ്ട്. അത്കൊണ്ട് നിങ്ങ പേടിക്കേറ്; കൊള്ള കുര്‌ല്നക്കായും നിങ്ങ വെലയൊള്ള ആള്കളാണും.


ഒരത്തൻ ആള്കള മൊകത്ത് എന്നപ്പെറ്റി പേശിയെ മേലോകത്തീല എന്റ അപ്പന്റ മൊകത്ത് നാനും അവനപ്പെറ്റി പേശ്‌വിൻ. ഇന്റെ ആള്കള മൊകത്ത് എന്ന തിക്ക്‌ല ഇന്റ് പേശന്റവന മേലോകത്തീല എന്റ അപ്പന്റ മൊകത്ത് നാനും തിക്ക്‌ല ഇന്റ് പേശ്‌വിൻ.


നാന് പൂമിയില് നിമ്മ്തി വെര്ത്ത്‌വാനിക്കി വന്തതിന്റ് നിങ്ങ നെനയ്‌ക്കേറ്; നാന് വന്ത്ത് അത്ക്കില്ല ആള്കള തമ്മ്ളിത്തമ്മ്ളി ചിന്നിപ്പിപ്പാനിക്കാണും വന്ത്ത്. ആങ്കുഞ്ച്‌ല അപ്പൻമാരോടയം പെങ്കുഞ്ച്‌ല അമ്മമാരോടയം മെര്മ്മക്കള മാമിമാരോടയം എത്റാക്ക്‌വാനിക്കും ആണും നാന് വന്ത്ത്. നിങ്ങള ശത്ത്റ്ക്കാറ് ഇന്റ് പേശന്റത് നിങ്ങള വീട്ടീലൊള്ള ആള്കള് തിന്നയാണും.
എന്നക്കായും ശൊന്തം അപ്പനയോ അമ്മീനയോ ശ്‌നേകിക്കന്റവൻ എന്റ ശിശിയനാവാനിക്കി ശോക്ക്തിയൊള്ളവനില്ല. അത്പേല എന്നക്കായും ശൊന്തം കയ്യനയോ പിള്ളീനിയോ ശ്‌നേകിക്കിന്റവനം എന്റ ശിശിയനാവാനിക്കി ശോക്ക്തിയൊള്ളവനില്ല. എന്റ പേരില് വെന്റ കട്ടപ്പാട്കള് കെയ്യേപ്പാനം ചാവാനും മനശില്ലാത്തവന്ക്ക് എന്റ ശിശിയനാവാനിക്കി നോക്കണ്ട. ഒരത്തൻ അവന്റ ശൊന്തം ഉശ്റ്ന കാപ്പാത്ത്‌വാനിക്കി പാത്തെ അത്‌ന കളയും; ഇന്റെ എക്ക്ശെല്ലി അവന്റ ഉശ്റ് കളയന്റതിന്റെ അത്‌ന കാപ്പാത്തും.


നിങ്ങള കെയ്യേക്കന്റവൻ എന്ന കെയ്യേക്കന്റാൻ; എന്ന കെയ്യേക്കന്റവൻ എന്ന വിട്ടവന കെയ്യേക്കന്റാൻ. തെയ്‌വത്ത്ന്റ വ്‌ലാത്തിയിന്റ് നെനച്ച് വ്‌ലാത്തീന കെയ്യേക്കന്റവന്ക്ക് വ്‌ലാത്തീന്റ കൂലി കിട്ടും; നെല്ലവനിന്റ് നെനച്ച് നെല്ലവന കെയ്യേക്കന്റവന്ക്ക് നെല്ലവനിന്റൊള്ള കൂലി കിട്ടും. എന്റ ശിശിയൻ ഇന്റ് നെനച്ച് ഈ പാവമാഞ്ഞ ഒരത്തന്ക്ക് ഒര മോയ പച്ചത്തണ്ണി കുടിപ്പാനിക്കി കൊടത്തെ കൊടക്കന്റവന്ക്ക് കൂലി കിട്ടും ഇന്റ് നാന് നെശമായിട്ടും നിങ്ങളോട പേശന്റൻ.

Makinig sa മത്തായ് 10