Yemba - 2017 CABTAL (NT) Non Drama

Yemba - 2017 CABTAL (NT) Drama

Á shʉʼ ŋgɔ́ aleʼé aswite, Yɛɛ́so pɔ́ nnɔ yí é nɔŋ ntɔ́kɔ, á ntē ŋkāʼ mmɔʼ ntií ŋgesáŋ, nzi é záŋ nnɔ yí, pɔ́ zi á lepwɔ̄ʼ mmɔʼ mpfɛ́t. Epuɔ Falísia é jʉ́ɔ épúp, ńdé á mbū Yɛɛ́so ŋ́gɛ: «Cʉ megaŋ nnɔ pú njʉ́ɔ. Pɔ́ é si ŋghʉ̄ɛ ajū mīi, lepé tsímpɛ é té véŋ ŋ́gɛ, mɛ́ eghʉ̄ aleʼé aswite ɛ́. » Yɛɛ́so á pwɛt á mbū pɔ́p ŋ́gɛ: «Pɛ laá ntɔ́ŋ á ntē aŋwaʼne Ndém tɛ njúʼ anu zīi, nzi e le záŋ á Efɔ Ndavít pɔ́ a epuɔ pí, á ghʉ ɛ́ lɛ́? A le kó á ntē ntap mbotɛ́ Ndém, ḿbɛ́ ecū mīi, mɛ́ nnɔ̄ŋ éwú á mbū Ndém, ḿpfɛ́t, ńzéŋ ŋgyá etsi epuɔ pí, tɛ́ lepé é gɔ́ te si ndʉ́ɛ́ ŋ́gɛ, pɔ́ gɔ epfɛ́t ɛ́, ńdaʼ wɔ nɔŋ‑epɔʼ. Kɛ pɛ la tɔ́ŋ á ntē aŋwaʼne Mɔɔ́sɛ tɛ njúʼ páʼ, á kuūʼ aleʼé aswite, wɔ nɔŋ‑epɔʼ pīi, é ghʉɛ afaʼ á Mía Ŋgyā Ndém, é té ghʉ̄ ajū mīi, lepé é si nzɛ́ttɛ ŋ́gɛ, mɛ́ eghʉ̄ aleʼé aswite ɛ́, amɔ̄ʼ azō á piŋ te wɔ́p ghʉ ɛ́ lɛ́? Meŋ ké eshúŋɔ á wɛ́ ŋ́gɛ, mmɔʼ ŋiŋ a á ega, nzwiŋ yí é te ntɔ́k eyi Mía Ŋgyā Ndém. Á ŋgwíʼi ŋgɔ́ éyi, pɛ le júʼ anu zīi, Ndém a leé á ntē aŋwaʼne yí ŋ́gɛ: “Meŋ á si ŋkɔ̄ŋɔ ŋ́gɛ, epuɔ menɔŋ e ewɛ̄ atsāmezeŋɛ, ńtɔ́k á leyā azō, ńdɔk ŋgūʼte á gá.” Mbɔ a ke gɔ́, pɛ é le néŋ ndɔ á athū epuɔ puɔ pīi, é ka fā la á. » Yɛɛ́so á zéŋ ndé mé pɔ́p ŋ́gɛ: «Méŋ‑Ŋiŋnɔŋ mé pɔŋteé á leshūŋ ajū mīi, mɛ́ gɔ eghʉ̄ʉ ánɛ aleʼé aswite. »


Yɛɛ́so á fhó ajʉʼ mɛ́t ŋgʉ̄ɔ, ŋ́gɔ ŋkó á ŋgyā aswiŋte epuɔ Yúda. Ŋ́gē eshʉʼe, mmɔʼ ŋiŋ á gɔ́ éwú, mbɔ apū zí á lē ŋkwhʉ́. Epuɔ Falísia é nɔŋ efāʼa eshhʉ̄ á lelɔk ntshí anu á athū Yɛɛ́so, ńzɛ́tte á yí ŋ́gɛ: «Tɛ lepé tsímpɛ, é veéŋ ŋ́gɛ, mɛ́ gɔ eghʉ̄ʉ, ŋiŋ á te aleʼé aswite e?» Yɛɛ́so á pwɛt á mbū pɔ́p ŋ́gɛ: «Awɔ́ a á nnɔ pɛ ŋgɔ́ éyi, a wiɛ taʼ mvhō ndaʼ, mvhō mɛ́t é pīŋ ntém á ntē lephʉ̄ á aleʼé aswite, á néŋ té gʉɔ éwú efók á yí í? Ŋiŋnɔŋ a piīŋ ntē nzwiŋ, ńtɔ́k mvhō. Púp, mɛ́ ghʉɛ, ŋiŋ á tē aleʼé aswite, mbɔ mɛ́ ka fā á. » Ńdɛ ndé á mbū ŋiŋ mɛ́t ŋ́gɛ: «Seŋte apū jú. » Á seŋte. Mɛ́ jʉ́ɔ mbɔ, á pú nte tɛ mbɔŋ, páʼ azi amɔ̄ʼ. Epuɔ Falísia é lɛ efhó á ŋgyā aswiŋte ntó, ńcúʼte, éfāʼ eshhʉ̄ páʼ pɔ́ e ghʉ épúp, tɛ́ ezwhí á Yɛɛ́so.

Yɛɛ́so á zhɛ́ á légɛ, epuɔ Falísia é si efāʼa á lezwhī á yí, éfhó á tésɔŋ mɛ́t ŋgʉ̄ɔ. Alāʼ epuɔ á gɔ́ á nzem nzhɛ̄nɛ á yí. Á ghʉ, megaŋ agɔ ntsem pīi, é nnɔ alāʼ mɛ́t, é te. Á tɔ́ŋ á wɔ́p, ḿbé á wɔ́p ŋ́gɛ, ndɛ́ʼ pɔ́ ghʉ tɛ mɛ́ zhɛ́ á légɛ, yí mé ghʉ pɔ́ te. Púp tɛ́, anu zīi, Ndém a le lɔ̄k nchu ntswi‑ŋke yi Izayi ndé, a elɔ̄k mbō.
A le lé ŋ́gɛ: «Ewuɔ, a á páʼa ŋgɔ́ á njuʼ‑nchu ga yīi, meŋ á tsɔ́ʼ á yí.
Meŋ kɔɔ̄ŋ á yí tɛʼ. Yí mé ghʉʉ̄, ntē gá é kák.
Meŋ a shʉʼ enéŋ
Azwakne zá ánɛ yí.
A a shʉʼ eshúŋ
á mbū alāʼ ntsem,
tɛ mbɔɔ á mbū epuɔ pīi, é té epuɔ Yúda á,
á ajū mīi, meŋ á si ŋkɔ̄ŋɔ.
A te shʉʼ eták ntsaŋ á, a á le shúŋne tɛ ŋghi zi é kɔ́ʼ á athʉ́ ɛ́.
Mɛ́ piīŋ le júʼ á tshí á methū nzhɛ, éshúŋnɛ ɛ́.
A te ndáʼa mbwɔ́ʼɔ akekaʼa zīi, á nzi nté njhʉ̄ nnɔŋ ntéŋnɛ ɛ́.
A te mbíkɛ mmók ánɛ láam yīi, a á si nnɔŋ
ŋgʉ̄ɔ mé mbí í.
A shʉʼ eghʉ épúp, tɛ́ lɔk eghʉ,
ajū mīi meŋ á si ŋkɔ̄ŋɔ, a etshí mvhɔ.
Epuɔ pīi é té epuɔ Yúda á, e ecʉ́ʼɛ mbúu nnéŋɛ azɔ́p akwaŋte áa ánɛ yí, tɛ́ ndɔkɔ nnáŋa. »


Mɛ́ lɛ ndɔ̄k mmɔʼ ŋiŋ eshʉ̄ʼ á mvhɔ Yɛɛ́so, mbɔ esī e lē ŋgɔ á yí, ḿbík menēk mí, ńtsɛ́t nchu yí. Yɛɛ́so á juŋ esī mɛ́t ánɛ yí, tɛ á zi á leshūŋne, ńzéŋ njʉ́ɔ ejʉʼ. Alāʼ ntsem á jʉ́ɔ épúp, á pú ntsyā á wɔ́p tsyaa, tɛ pɔ́ lé ŋ́gɛ: «Ŋiŋ wuɔ a te ŋiŋ, ánɛ nzwɛt Efɔ Ndavít ɛ́ lɛ́?» Epuɔ Falísia é júʼ azɔ́p, ńdé ŋ́gɛ: «Bɛlzebul, á efɔ mesī mé yáa á yí mete, tɛ́ á lɔkɔ njūŋɔ mesī ánɛ epuɔ. »
Yɛɛ́so á zhɛ́ ajū mīi, pɔ́ é ntē pɔ́p ŋkwāŋtɛ, ńdé mé pɔ́p ŋ́gɛ: «Epuɔ taʼ alāʼ é náŋa tɛ esɛ̄nne, ńdʉɔ́ʼne mennɛ̄t mɔ́p, mbɔ alāʼ mɛ́t, á gʉɔ mé mbií. Epuɔ taʼ tésɔŋ é náŋa tɛ esɛ̄nne, ńdʉɔ́ʼne mennɛ̄t mɔ́p, mbɔ tésɔŋ mɛ́t, a te ŋgʉ̄ɔ mé nnáŋa á. Epuɔ taʼ atseŋ ŋgyā é náŋa tɛ esɛ̄nne, ńdʉɔ́ʼne mennɛ̄t mɔ́p, mbɔ atseŋ ŋgyā mɛ́t, á té ŋgʉ̄ɔ mé nnáŋa á. Á zéŋ ŋgɔ́ épúp á mbū Sɛ́ta. A náŋa tɛ esɛ̄nne, ńjūŋ á Sɛ́ta ánɛ epuɔ, mbɔ a lɔkɔ ndʉɔ́ʼɔ athū nnɛ̄t zí méŋwɛ̄t. A ghʉɛ epúp, mbɔ lefɔ tsí é gɔ egaá tɛ́ nnáŋ ŋ́? Páʼ menɔ mɛ́ é si njūŋɔ azɔ́p mesī lā, a gɔ́ éyi meŋ ndɔkɔ mete Sɛ́ta tɛ́ njūŋɔ azá, mbɔ pɔ́ tswíi mete á mbū awɔ́ tɛ́ ndɔkɔ njūŋɔ azɔ́p é? Menɔ mɛ́ mɛ́t, mé láʼ eshúŋ á wɛ́ ŋ́gɛ, pɛ lʉ́ɛ́ páʼā, ńdɔkɔ efā faa. Á gɔ́ áa lɛ, meŋ ndɔkɔ mete Azwakne Ndém tɛ́ njūŋɔ mesī ánɛ epuɔ. Á lɔkɔ ntswīi á légɛ, Lefɔ Ndém é ndáʼ nzī á ndo esī atsetsáʼ, tɛ é shʉʼ tɛ ntswɛ́tte á wɛ́.
«Ŋ́ké te épúp ɔ́, mbɔ ŋiŋ a gɔ egaá, ńzíʼ ŋkó á ŋgyā tɛnte ŋiŋ, ŋ́kú á tsitsi yi tɛ á mi, té gɔ́ yīi a á nté njhʉ̄, ŋ́kwɛ́t á tɛnte ŋiŋ wuɔ mɛ́t é? A pikɛ tɛ ŋkwɛ́t á yí, mbɔ a a túʼ akʉ̄ɛ akʉ̄ɛ á ŋgyā, páʼ a á kɔŋ. Ŋiŋ a lʉʼɛ ŋ́gɛ, pek yí é gɔ le gɔ́ nnɔ ɔ́, mbɔ a lɔkɔ ntáka anu zá. Ŋiŋ yīi, a te si ntswítɛ á gá á lecūʼte epuɔ, ŋ́gyá á mbū Ndém ɛ́, a á si ŋŋwāŋa á wɔ́p ŋwaŋ.
«Púp tɛ́, meŋ shúŋɔ á wɛ́ ŋ́gɛ, Ndém a gɔ elēkne mefa ntsem á mbū epuɔ menɔŋ, mbɔɔ nzɔ ntsem zīi, mɛ́ lɔk nzɔ̄te á yí. Táʼ, ŋiŋ a eké nzɔ̄te á Azwakne Ndém, mbɔ Ndém a gɔ le emuɔ mefa mɛ́t á mbū ŋgaŋ lēkne. Ŋiŋ a shúŋnɛ tépɔŋ ánɛ Méŋ‑Ŋiŋnɔŋ wuɔ, mbɔ Ndém a a lekne á mbū ŋgaŋ. Táʼ, ŋiŋ a piŋɛ eshúŋne tépɔŋ ánɛ Azwakne Ndém, mbɔ Ndém a te e láʼ elekne á mbū ŋgaŋ, ánɛ ŋgɔŋ jʉɔ ɔ́, épīŋ le láʼ ndēkne ánɛ ŋgɔŋ zīi, e e fú tɛ́ shʉʼ ɛ́. »


Yɛɛ́so á zéŋ ndé ŋ́gɛ: «Athʉ́ á gɔ́ athʉ́ mbɔŋ, mbɔ a zém ntá mbɔŋ. Ḿbīŋ ŋgɔ́ á athʉ́ tepɔŋ, mbɔ a zém ntá tepɔŋ. Mɛ́ zhɛɛ́ athʉ́ áa ánɛ ntá zí. Pɛ pīi, pɛ yikɛ, ńzīŋɛ ŋŋɛ́tte ŋɛtté páʼ menū, pɛ gɔ egaá, ŋ́gɔ́ epuɔ tepɔŋ ezi ntií péʼe, anu mbɔŋ á piŋ ntó á nchu pɛ ɛ̄? Anu zīi á toó á nchu ŋiŋ, mé tswiī ajū mīi, ŋgaŋ a á aziɛ́. Ntē ŋiŋ é si ŋgɔ́ páʼ ajʉʼ zīi, a féŋɛ lewūʼ tsí éwú lā. Mɛ́ gē ezhɛ́ á légɛ, ŋiŋ mbɔŋ a wuɔ, ńjʉ́ɔ menu mbɔŋ mīi, é fhó á ntē yí, ńtó á nchu yí. Ḿbiŋ ŋgē ezhɛ́ á légɛ, ŋiŋ tepɔŋ a wuɔ, ńjʉ́ɔ menu tepɔŋ mīi, é fhó á ntē yí, ńtó á nchu yí. Meŋ shúŋɔ á wɛ́ ŋ́gɛ, a láʼ aleʼé zīi, Ndém a záʼa ntsaŋ epuɔ menɔŋ, awɔ́ ŋiŋ lɛ́ a eshʉ̄ʼ, ŋ́kɛ́ʼte eshúŋ á Ndém, ntií metepɔŋ eshuŋne ntsem mīi, é lé tó á nchu yí. Ndém a a láʼ efhó áa ánɛ meshuŋne ŋiŋ, tɛ́ ezhɛ́ á légɛ, ŋgaŋ a á ŋiŋ ndeŋ ndeŋ, kɛ́ á légɛ, ŋgaŋ a á whʉ asāʼ. »


Yɛɛ́so á shúŋ épúp tɛ á mi, emɔ̄ʼ epuɔ ánɛ nnɔ wɔ kɛ́ʼte‑mbé Ndém, mbɔɔ ánɛ nnɔ epuɔ Falísia, é shʉʼ ndé á mbū yí ŋ́gɛ: «Ńziʼnɛ, pek é si ŋkɔ̄ŋɔ ŋ́gɛ, o eghʉ̄ á taʼ ŋkʉʼne anu, a egɔ́ ayiŋne zīi, á tswii á légɛ, mete mú é fhɔ́ɔ á mbū Ndém, pek ejʉ́ɔ. » Yɛɛ́so á pwɛt á mbū pɔ́p ŋ́gɛ: «Epuɔ ŋguʼ puɔ é té pɔŋ, ŋ́gɔ́ wɔ teē‑athū á mbū Ndém. Pɔ́ é si ŋkōnɛ á gá ŋ́gɛ, meŋ eghʉ̄ á taʼ ŋkʉʼne anu, a egɔ́ ayiŋne zīi á tswii á légɛ, mete má é fhɔ́ɔ á mbū Ndém. Amɔ̄ʼ ayiŋne anu zīi, meŋ gɔ á ntswiī pɔ́p, á té éwú ú, ńdaʼ gá á leghʉ taʼ ŋkʉʼne anu, páʼ ezi, Ndém a le ghʉ̄ ánɛ ntswi‑ŋke yi Jonási. Ndeŋ ndeŋ páʼ, Jonási a le náŋ á levem mía esōh eleʼé tɛ́t, ézokó pɔ́ etsōʼ lā, Méŋ‑Ŋiŋnɔŋ wuɔ a a shʉʼ enáŋ á nzem esī eleʼé tɛ́t, ézokó pɔ́ etsōʼ.
A láʼ ekuʼ aleʼé zīi, Ndém a ŋaka epuɔ menɔŋ, epuɔ tésɔŋ Ninive, e enéŋ mefa á apa epuɔ ŋguʼ puɔ, melaʼ mīi pɔ́p, épuɔ Ninive, é le júʼ anu Jonási, ŋ́gɔ̄ nnɛ̄t zɔp, ŋ́gwáʼ atswhī tepɔŋ zɔ́p. Mmɔʼ ŋiŋ a piīŋ ŋgɔ́ éwú tsetsɔŋɔ, azí anu á fáŋ ntɔ́k azi Jonási. Epuɔ ŋguʼ puɔ mɛ́t, é piŋ te á yí júʼ. A láʼ ekuʼ aleʼé mɛ́t, efɔ ŋgɔŋ Sába, ŋ́gɔ́ á menzwí, a eshʉʼ ntshí á mvhɔ epuɔ ŋguʼ puɔ, ńnéŋ mefa á apa pɔ́p, melaʼ mīi, pɔ́ é fa tɛ á tsia. A le tshí á alāʼ te ndeŋɛ́, ńjúʼ mɛ́ nɔŋ ŋghítɛ azhɛ̄‑anu Efɔ Salomɔŋ, á shʉʼ tɛ ntshí lezēk tsí éwú. Mmɔʼ ŋiŋ a piīŋ ŋgɔ́ wuɔ tsetsɔŋɔ, azhɛ̄‑anu zí á fáŋ ntɔ́k azi Salomɔŋ. Táʼ, mɛ́ piīŋ te si ncʉ̄tɛ á yí í.


«Esī e toó ánɛ ŋiŋ páʼā, ŋ́gʉɔ nzók á késáatswɛt ŋkɛ́tɛ, éfāʼa ajʉʼ zīi, e e pwɛ́ne enáŋ éwú. Páʼ e é faʼ kékáŋ lā, ńdɛ ndé ŋ́gɛ: “Meŋ a piŋ nzem mé mba za, ájʉʼ zīi, meŋ ke zī ntó éwú.” Ŋ́gɔ́ éyi, e piŋɛ nzem, ŋ́kó ŋgē eshʉʼe, ŋiŋ mɛ́t á gɔ́ páʼ ŋgyā zīi, ŋiŋ a te éwú náŋ, mbɔ mɛ́ ncuŋte njɔ̄k, ńtséŋte á mbɔŋɔ́, mbɔ a lɛ gʉɔ egɔ efaʼ emɔ̄ʼ mesī esambīa, émi é pú ŋgáʼ ńtɔ́k á yí. Pɔ́ a pɔ́p e eshʉʼ ŋkó á ŋgyā mɛ́t, ńnáŋ. Anu ŋiŋ wuɔ mɛ́t, a epīŋ ŋgē emakne, ḿbék ntɔ́k páʼ, á ke zī ŋgɔ́ épúp. Páʼ epuɔ ŋguʼ puɔ é tépɔŋ lā, a shʉʼ ezéŋ egɔ́ ndeŋ ndeŋ épúp, á mbū pɔ́p. »


Yɛɛ́so a le zɛ́t eshúŋne shuŋné á mbū alāʼ, epɔ̄ memía pí mbɔɔ mɛ́ wɔp, é shʉʼ ntshíte á apɛ́, ńnɔŋ efāʼa á leshūŋne á mbū yí.
[ Ŋiŋ á gʉɔ eshúŋ á yí ŋ́gɛ: «A ayi mɛ́ wu, pɔ́ a epɔ̄ memía pú, é tshiteé á apɛ́, ńnɔŋ efāʼa á leshūŋne á mbū wu lée. »] Yɛɛ́so á pwɛt á mbū ŋiŋ mɛ́t ŋ́gɛ: «Awɔ́ a á mɛ́ ga ā? Wɔ awɔ́ é gɔ́ epɔ̄ memía pá á?» Ńdé épúp, ńdɔ̄k apū ntswī megaŋ nnɔ pí, ńdé ŋ́gɛ: «Mɛ́ ga a wuɔ, epɔ̄ memía pá é gɔ́ puɔ. Ŋiŋ yīi, a ghʉʉ̄ ajū mīi, Mɔʼɔ́ ga yīi, a á athʉ́ lephū, a á si nzɛ́ttɛ, ŋgaŋ mé méŋ mɔ́ ga, éyi menzwí ká eyi mbaŋa, ńzéŋ ŋgɔ́ á mɛ́ ga. »

Makinig sa Matío 12