 This translation was published by The Bangladesh Bible Society in 2004 © BBS 2004.  

উনি জা·মানো গিসিক রংথালগিবা যীশুখো হা·গিসি জওলোনা রিম্মাংজক জেদাক্কে শয়তান যীশুখো মাদ্দুয়েতে পাপও গালনা মা·ন্না। যীশু উয়োনা সাল সৎব্রি আরো ওয়াল সৎব্রি অকগুমুন দংআনি জা·মানো অকখ্রিজক। উনো শয়তান রি·বাএ বিনা আগানজক, ‘‘না·আ ইসলনি দেফান্থি হং·ওদে ইয়া রং·থিরাংখো রুটি ফিল·খানা আগানবো।’’
যীশু আগানচাকজক, ‘‘রংথালগিবা শাস্ত্রও চক্কা দংআ,
মান্দি রুটি চা·এসান থাংজা,
ইন্দিবা ইসলনি খু·সুকনি গিম্মিক খাৎথানাসা থাংআ।’’
উনোন শয়তান যীশুখো রংথালগিবা সংজিলমা যিরূশালেমচানা রিম্মাংজক আরো থরম নকনি চুবাত্তা হা·দামও বিখো চাদেংএতি আগানজক, “না·আ ইসলনি দেফান্থি হং·ওদে খা·মাচানা চক্কনবো, মুয়ানা রংথালগিবা শাস্ত্রও চক্কা দংআ,
ইসল নাং·নি গিম্মিন আন·থাংনি সা·গ্রেরাংখো গি·য়েৎনুয়া;
রং·থিও নাংএ নাং·নি জা·চক মাতজাখানা
বিসং নাং·খো জাকচা রিম·চাকনুয়া।”
যীশু শয়তাননা আগানজক, ‘‘আরোবা চক্কা দংআ,
না·আ আন·থাংনি গিত্তেল ইসলখো দা·আ রুরাএ নিনা রি·য়াংআ।’’
উনোন শয়তান দা·আবা বিখো নাম্মেন চুয়াকগিবা গি·সা হা·ব্রিচানা রিম্মাংজক আরো হা·গিলসাকনি গিম্মিক সংনকরাংখো আরো উরাংনি রাসংখো ফিন্নিকে আগানজক, ‘‘না·আ আংখো হা·আও থুচিকপে অলাখিয়ে নাং·নি গিত্তেল ইন্নে খু·রাচাকোদে আংআ নাং·না ইয়া গিম্মিকখোন হ·ন্নুয়া।’’
উনো যীশু বিনা আগানজক, ‘‘ইয়োনি খাত্তাংবো, শয়তান। রংথালগিবা শাস্ত্রও চক্কা দংআ,
না·আ নাং·নি গিত্তেল ইসলখোন অলাখিবো,
আরো বিনাসান দাকচাকে হন·বো।’’
উনোন শয়তান বিখো ওয়াত্তাংজক, আরো সা·গ্রেরাং রি·বাএ বিনা দাকচাকে হ·ন্না হা·বাচেংজক।

জা·মানো যীশু যোহনখো ফাতোকো দন্নাখো খিন্নানা মান·জক। উনো বিয়া গালীলচানা রি·য়াংজক আরো নাসরত সংখো ওয়াত্তে সবূলূন আরো নপ্তালি জওলনি গিসেপো সাগাল রিক্কামো দংগিবা কফরনাহূম সংজিলমাচা রি·য়াংএ দংজক। ইরাং হং·জক জেদাক্কে আগানসোগিবা যিশাইয়নি আগানা ইয়া খাৎথা চু·সকা:
সবূলূন আরো নপ্তালি জওলনি, সাগালচানি,
যর্দননি নালসাচানি আরো গিপ্পিন জাতরাংনি গালীলনি
জে মান্দিরাং আন্দালাও দংআ,
বিসং সেং·বিয়াখো নিকনা মা·ন্নুয়া।
জেরাং নাম্মেন আন্দালানি হা·সংও দংআ,
বিসংচা সেং·আ ফারাকনুয়া।
উয়া সময়ওনি যীশু ইন্দাকে আগানফ্রাকনা হা·বাচেংজক, ‘‘পাপওনি গিসিক ফিল·বো, মুয়ানা সালগিনি সংনক সেফাংও সকবাজক।’’

যীশু গালীল সাগালনি রিক্কাম গিত্তা রি·য়াংমিত্তিংও শিমোন, জেখো পিতর মিংআ আরো বিনি জংগিবা আন্দ্রিয়খো নিকনা মান·জক। বিসং সাগালো জাল গোংআমিং, মুয়ানা বিসং না·থক রিম·গিবা হং·আমিং। যীশু বিসংখো ইনজক, ‘‘আংমুং রি·বো, আংআ না·সংখো মান্দি রিম·গিবা দাক্কে থারিনুয়া। উনোন বিসং জালখো দনগাল্লে যীশুমুং রি·য়াংফাজক।
উনোনি মিকখাংচাবাক্কা রি·য়াংএ বিয়া যাকোব আরো বিনি জংগিবা যোহন মিংগিবা গিপ্পিন আদাসা সাকগ্মিখো নিকনা মান·জক। বিসং সিবদিয়নি দেফান্থি হং·আমিং। বিসংনি ফাগিবা সিবদিয়মুং রিংও আসংএ বিসং জালখো থারিংআমিং। যীশু উয়া সাকগ্মি আদাসাখোবা রিক্কামজক। উনোন বিসং বিসংনি রিংখো আরো ফাখো ওয়াত্তে যীশুমুং রি·য়াংফাজক।

গালীল হা·দকনি গিম্মিক হা·দামরাংচা রি·রোরোয়ে যিহূদীরাংনি দিংথাং দিংথাং থম·দাকরামচা যীশু স্খিনা নাংজক। আরো ইসলনি সংনকনি নাম্মা খাৎথাখো আগানফ্রাকনা আরো জম্মা-সা দংগিবা মান্দিরাংখো নাম্মেতনা হা·বাচেংজক। সিরিয়া হা·সং গিম্মিকচানা বিনি খাৎথা গিপ্পাংজক। জে মান্দিরাং জম্মে-সাএ আরো সা·দিকে-সা·খামে দংআমিং, জেরাংখো গিসিক নামগিজাগিবা মা·ন্নামিং আরো দেকদেকে গিত্থিলগিবারাংখো আরো হা·আন জাদা সিগিবারাংখো মান্দিরাং যীশুচা রিমবাজক। বিয়া বিসংখো নাম্মেতজক। গালীল, দিকাপলি, যিরূশালেম, যিহূদিয়া আরো যর্দননি নালসাচানি মান্দি বাং·আরাং যীশুমুং রি·য়াংফাজক।

Makinig sa মথি 4